Huchankunata Job reqsikusqanmanta
42
Jobñataqmi Tayta Diosta nirqa:
2 Taytáy,
ñoqaqa yachanipunim
tukuy imapas ruray atiq kasqaykita.
Ñoqaqa yachanipunim munasqaykiqa
mana yanqachasqa kananta.
3 Qanmi nirqanki kaynata:
“¿Pitaq qamqa kanki
munasqaykunata yanqachanaykipaqqa?”
nispa.
“¿Pitaq qamqa kanki
mana yachaywan yanqakunata
rimanaykipaqqa?”
nispa.
Ñoqaqa rimarqani mana entiendesqay
admirakuypaq kaqkunatam.
Ñoqaqa rimarqani mana yachasqay
admirakuypaq kaqkunatam.
4 Qanmi niwarqankitaq kaynata:
“Qamqa uyariwayá rimarisqayta” nispa.
“Contestawayá tapusqaykunata” nispa.
5 Taytáy,
ñoqaqa uyayllam-uyarirqani qanmanta.
Kunanmi ichaqa ñawiywanpuni qawaykullayki qamtaqa.
6 Kunanqa penqakuymantam wanakuniña.
Allpapiwan uchpapi tiyaykuspam wanakuniña.
Job huktawan Diospa bendecisqan kasqanmanta
7 Chaykunata Jobman Tayta Dios rimapayaruspanmi Teman law Elifaztapas nirqataq:
—Piñasqam kachkani qampa contraykipipas chaynataq iskaynin amistadnikikunapa contranpipas.
Qamkunaqa manam serviqniy Job hinachu cheqap kaqta ñoqamanta rimarqankichik.
8 Chaynaqa mana yuyaywan rurasqaykichikmanta ama castiganaypaqyá Jobman pusaychik qanchis malta torokunatawan qanchis carnerokunata.
Chay animalkunata payman qoptikichikmi qamkunapa favornikichikpi wañuchispa ñoqapaq kañapuwanqa,
chaynataqa ruranqa serviqniy Job hina mana cheqap rimasqaykichikmantam.
9 Chaynapim Teman lawmanta Elifazqa rispan yupaychasqanku Tayta Diospa munasqanta rurarqa.
Hina chaynatataqmi rurarqaku Sua sutiyoq lawmanta Bildadpiwan Naamat lawmanta Zofar sutiyoq runapas.
Chaynapim Tayta Diosqa chaskirqa Jobpa mañakusqanta.
10 Chaynata Job amistadninkunapaq mañakuruptinmi Tayta Diosqa kasqallan payta bendecirqa.
Paymanmi qoykurqa ñawpaq kapuqninmantapas huk chaynatawanraq.
11 Chaynapimá Jobmanqa hamurqaku wawqenkuna,
paninkuna chaynataq ñawpaqta llapallan reqsiqninkunapas.
Wasinpi huñunakuykuspankum rurarqaku convidota.
Payta llakipayaykuspankum consuelarqaku tukuy sasachakuy Tayta Diospa qosqanmanta.
Paykunaqa sapakamataqmi qorqaku qollqetawan huk qori anillota.
12 Chay kawsakusqan watakunapim Jobqa ñawpaq watakunamantapas aswanraq Tayta Diospa bendecisqan karqa.
Paypamá kapurqa chunka tawayoq waranqa ovejankuna,
soqta waranqa camellonkuna,
iskay waranqa yapuq bueyesninkuna,
kapurqataqmi waranqa china asnonkunapas.
13 Paypaqa karqataqmi qanchis qari churinkunapas chaynataq kimsa warmi churinkunapas.
14 Chay kimsan warmikunamanta punta naceqtam suticharqa aJemima nispa.
Qatiqnin warmi churintañataqmi suticharqa bCesia nispa.
Chay sullka warmi churintañataqmi suticharqa cKeren-hapuc nispa.
15 Tukuy kay pachapiqa manam tarikurqachu Jobpa churinkuna hina kuyayllapaq suma-sumaq sipaskunaqa.
Paykunamanmi taytan Job qopurqa tocaqnin herencianta.
Qoykurqaqa qari churinkunamanwan igualtam.
16 Chaymantam Jobqa kawsakurqa pachak tawa chunkan watataraq.
Payqa rikurqam churinkunata,
willkankunata hinaspa willkanpa churinkunatapas.
17 Jobqa wañukurqa yuyaq kayninpiñam.