Goliat sutiyoq hatu-hatun runata David wañuchisqanmanta
17
Filistea runakunam llapa tropankunata guerrapaq huñururqaku Soco llaqtapi.
Chay llaqtaqa tarikun Juda lawpim.
Chay Filistea runakunamá campamentonkuta sayachirqaku Efes-damim sutiyoq sitiopi.
Chay sitioqa tarikun Soco llaqtamanta Azeca llaqtaman riq ñanpim.
2 Chaynataqmi Saulpas Israel runakunawan huñunakururqaku hinaspam campamentonkuta sayachirqaku Ela sutiyoq qechwapi.
Paykunapas kinrayninmanmi chutarikurqaku Filistea runakunapa contranpi peleanankupaq.
3 Filistea runakunam waklawnin moqokunapi karqaku.
Israel runakunañataqmi karqaku kaylawnin moqokunapi chaymi paykunapa chawpinpiqa tarikurqa qechwa pampa.
4 Chay Filistea tropakuna ukumantam qonqaymanta lloqsiramurqa yaqa kimsa metro sayayniyoq soldado.
Payqa karqa mana pipapas vencey atinanmi.
Chay runapa sutinmi karqa Goliat,
payqa karqa Gat llaqtayoqmi.
5 Goliatpa casconmi karqa broncemanta,
qasqon harkaq pachanpas karqa hina broncemantataqmi,
chay qasqon harkaqpa llasayninmi karqa pichqa chunka pichqayoq kilo.
6 Hina broncemantataqmi karqa piernankuna tapaqpas chaynataq wasanpi apasqan lanzapas.
7 Chay lanzapa cabonmi karqa telarpa qerunkuna hina rakusu,
puntanñataqmi fierromanta kaspa llasarqa soqta kilo masninta.
Goliatpa harkachikunanta apaqñataqmi rirqa paypa puntanta.
8 Goliatmá sayaykuspan kinrayman chutarisqa Israel tropakunata nirqa:
—¿Imapaqtaq kinrayninman chutarikusparaq peleaq lloqsimurqankichik?
Ñoqaqa kani Filistea runam,
qamkunañataqmi kankichik Saulpa serviqnin.
Chaynaqa qamkunayá akllaychik huk kaqnikichikta chaynapi ñoqapa kasqayman uraykamuspan ñoqawan peleananpaq.
9 Sichu pay ñoqawan peleaspa venceruwanqa hinaptinqa ñoqaykum kasaqku qamkunapa sirvientekichik,
ñoqa venceruptiymi ichaqa qamkuna kankichik ñoqaykupa sirvienteyku.
10 Kunan punchawmi desafiani lliw Israel tropakunata.
¡Qomuwaychikyá huk runata ñoqawan peleananpaq!
—nispa.
11 Saulwan llapallan Israel runakuna chay Filistea runapa rimasqanta uyariruspankum lliw hukmayarurqaku hinaspam mancharisqallaña tarikurqaku.
12 Juda law Belen llaqtapim otaq Efrata sutiyoq llaqtapim yacharqa huk runa,
paypa sutinmi karqa Isai.
Payqa wakin runakunamantapas llumpay machuñam karqa Saulpa tiemponpiqa.
Payqa karqa pusaq churiyoqmi.
Hukninpa sutinmi karqa David.
13 Isaipa kimsantin mayor churinkunam guerramanña pasarqaku Saulta yanapanankupaq.
Paykunapa sutinmi karqa qatinasninpi:
Eliab,
Abinadab hinaspa Sama.
14 Paykunapa sullkanmi karqa David.
Chaynaqa Isaipa mayor churinkunamá Rey Saulta qatirqaku.
15 Davidpas Saulpa campamentonmantam Belen llaqtaman kutikurqa chaypi taytanpa ovejankunata michinanpaq.
16 Chay Filistea runañataqmi lloqsimurqa sapa madrugaw hinaspa sapa tarden,
chaynatam rurarqa tawa chunka punchawpuni.
17 Huk punchawmi churin Davidta Isai nirqa:
—Wawqekikunamanyá apay kay costalillopi trigo hamkata,
apaytaqyá kay chunka tantatapas.
Utqaymanyá pasachiy wawqekikunaman.
Paykunaqa kachkanku campamentopim.
18 Aparikuytaqyá kay chunka quesokunatapas.
Kay quesokunataqa qoykunki waranqa soldadokuna kamachiqmanmi.
Chaynaqa qawamuyá imaynam wawqekikuna tarikusqanta,
imallatapas apamuwayá chayta qawaykuspay allinlla kasqankuta yachanaypaq.
19 Saulqa Filistea runakunawan peleaspam kachkan Ela sutiyoq qechwapi.
Paywantaqmi kachkanku wawqekikunawan llapallan Israel tropakunapas.
20 Davidmi tutapayta hatarispa hinaspa ovejankunata hukman michiykachispa taytan Isaipa qosqankunata aparikuspan pasarqa.
Campamentoman chayaruptinmi llapa tropakunaqa kinrayninman chutakuruspa guerrapi peleaq lloqsinankupaq qaparichkasqaku.
21 Israel tropakunam Filistea runakunawan kinrayninman chutarikuspa chimpa-chimpa sayaykurqaku.
22 Davidñataqmi chayta qawaykuspan taytanpa apachisqanta waqaychaykachirqa armakunamantawan cargakunamanta nanachikuq runaman.
Tropakunapa kasqanman yaykuruspanmi wawqenkunata tapurqa imaynam kasqankumanta.
23 Paykunawan parlachkaptinmi qonqayta lloqsiykamurqa chay mana pipapas vencey atinan Gat llaqtayoq Filistea soldado.
Paypa sutinmi karqa Goliat.
Paymá lloqsiramurqa Filistea tropakuna ukumanta chaymi David uyarirqa paypa tukuy mana allin rimasqankunata.
24 Llapa Israel tropañataqmi chay Goliat sutiyoq runata qawaykuspa llumpay mancharisqallaña ayqekurqaku.
25 Chay ayqekuqkunam ninakurqaku kaynata:
—¿Qawachkankichikchu lloqsimuspa wak insultakuq runata?
¡Wak runata pipas venceruqmanqa reymi qori-qollqewan apuyachinqa,
warmi churinwan casarachispanmi contribuciontapas manaña cobranqachu chay venceqpa ayllunmantaqa —nispa.
26 Chaymi David ladonpi kaqkunata tapurqa:
—¿Imatataq qonqaku kay Filistea runata wañurachispa Israel tropakuna penqaypi kasqankumanta libraqmanqa?
¿Pi hinataq wak mana señalasqa Filistea runaqa kawsaq Diospa tropankunataqa insultan?
—nispa.
27 Chaymi runakunañataq nirqa:
—Goliat wañurachiq runamanqa kayta-waktam qonqa —nispa.
28 Ichaqa Davidpa mayor wawqen Eliabmi chay runakunawan rimasqanta uyariruspan piñakururqa Davidpaq hinaspam nirqa:
—¿Imamantaq hamurqanki?
¿Pimantaq saqemurqanki chunniqpi asllapas kaq ovejakunata?
Ñoqaqa yachanim hatun tukuq kaspayki mana allin tanteasqaykita.
Qamqa hamurqanki guerrapi peleaqkuna qawakuqlla —nispa.
29 Chaymi Davidñataq nirqa:
—¿Imatataq kunanqa ruraruni?
Ñoqaqariki rimayllam-rimarqani —nispa.
30 Chaymantam Davidqa wawqenpa kasqanmanta huklawman pasakuspan chaypipas huktaña tapurqa ichaqa wakinpas punta nisqankuta hinallam nirqaku.
31 Davidpa tapukusqanta wakin uyariq runakunam pasaspanku willaykamurqaku Saulman hinaptinmi Saulñataq Davidta qayachirqa.
32 Chaymi payta David nirqa:
—Ama pipas hukmanyachunchu wak runaraykuqa.
Ñoqam risaq wak Filistea runawan peleaq —nispa.
33 Chaymi Saul nirqa Davidta:
—Wak Filistea runawanqa manam peleayta atiwaqchu.
Qamqa kanki warmaraqmi,
wak Filistea runam ichaqa mozo kayninmanta guerrallapi puriq —nispa.
34 Hinaptinmi Davidñataq nirqa:
—Kay sirvientekiqa taytaypa ovejankuna michiqmi kani,
chayna michichkaptiymi huk leon kaspa otaq ukumari kaspapas ovejayta apakuq atajonmanta.
35 Hinaptinmi ñoqaqa chay animalpa qepanta qatiq kani hinaspam heridaruspay siminmanta qechumuq kani,
qonqayta kutiriykuwaptinqa kakichunmanta hapiruspaymi maqachkaspallay wañurachiq kani.
36 Leon kaptin otaq ukumari kaptinpas kay sirvientekiqa wañuchiqmi kani.
¡Wak mana señalasqa Filistea runaqariki chay huk kaqnin animal hinallam!
¿Imanasqamá payqa insultan kawsaq Diospa tropantaqa?
37 Leonmantapas otaq ukumarimantapas libraqniy Tayta Diosmi librawanqa wak Filistea runamantapas —nispa.
Hinaptinmi Saulñataq nirqa:
—Chaynaqa riyá,
Tayta Diosyá yanapasunki —nispa.
38 Saulmi Davidta pacharachirqa guerrapi peleanan kikinpa pachanwan,
umanpipas churarqam broncemanta cascota,
hinachirqakutaqmi broncemanta kaq qasqon harkachikunawanpas.
39 Davidqa pachanpa hawanmanpas watakurqataqmi huk espadatapas hinaspam pruebananpaq puririrqa chaykunawanqa haykapipas mana churakusqanrayku.
Chaymi Saulta David nirqa:
—Manam haykapipas churakurqanichu kaywanqa chaymi mana puriyta atinichu —nispa.
Chaynata nispanmi chay pachakunata horqokururqa.
40 Tawnanta aparikuspanmi mayupi pichqa lluchka rumichata wayqanman hinakuykurqa hinaspam warakanwan asuykurqa Filistea runawan peleananpaq.
41 Chay Filistea runapas Davidmanmi asuykamurqa,
paypa puntantataqmi hamurqa harkachikunan apaq soldadopas.
42 Chay Filistea runam Davidta qawaykuspan mana kaqpaqpas hapirqachu Davidqa mozollaraq kasqanrayku.
Davidta qawaykuptinmi payqa kasqa sumaq paqo chukchayoq buenmozo.
43 Chay Filistea runam nirqa Davidta:
—¿Ñoqaqa allqochu karqani kaspiwan hamuwanaykipaq?
—nispa.
—¡Asuykamuwayá!
Cuerpoykitam qosaq alton pawaq animalkunamanwan purunpi animalkunaman —nispa.
45 Hinaptinmi Davidñataq nirqa:
—Qanmi ñoqaman hamuchkanki espadawan hinaspa lanzakunawan,
ñoqam ichaqa qanman hamuchkani Llapallan Kamachiq Tayta Diospa sutinpi.
Paytam insultarqanki,
payqariki Israel tropakunapa Tukuy Atiyniyoq Diosninmi.
46 Kunanpunim qamta Tayta Dios makiyman churanqa,
kunanpunitaqmi wañurachispay umaykitapas qorurusaq.
Filistea tropakunapa wañusqa aychantañataqmi qarasaq alton pawaq animalkunamanwan purunpi animalkunaman.
Chaynapim tukuy hinastinpi llapallan runakuna yachanqaku Israel nacionpa yanapaqninqa Diospuni kasqanta.
47 Kaypi huñunasqa llapallan runakunapas yachanqakum Tayta Diosqa mana espadallawanchu nitaq lanzallawanchu salvasqanta.
Kay guerraqa Tayta Diospa munayllanpim kachkan chaymi payqa qamkunata qoykuwanqaku —nispa.
48 Chay Filistea runa peleananpaq Davidman asuykuptinmi Davidpas apurawman kallparispa chay runawan peleaq pasaykurqa.
49 Davidmi wayqanmanta huknin rumita horqoykuspan urkupipuni warakarurqa chay Filistea runata.
Hinaptinmi chay Filistea runapa urkunpi chay rumi kiñakuruptin uyanpa pampaman wichiykurqa.
50 Chaynatam David vencerurqa chay Filistea runata warakanwan hinaspa huk rumillawan,
chay runata wañuchinanpaqqa manam karqachu espadan.
51 Chaymi Davidqa chay Filistea runaman kallpaykuspan espadanta vainanmanta horqorurqa,
chaywan wañuparachispanmi chaywantaq umantapas qorururqa.
Wakin Filistea tropakunañataqmi valeroso runa wañurusqanta qawaykuspanku lluptikurqaku.
52 Hinaptinmi Israel lawmanta tropakunapiwan Juda lawmanta tropakuna qaparillawanña Filistea tropakunata qatirqaku qechwaman yaykurinakama hinaspa Ecron llaqtapa zaguan punkunkama.
Saaraim lawmanta qallaykuspam tukuy ñanpi Filistea runakunapa wañusqa cuerpon tarikurqa Gat hinaspa Ecron llaqtakunakama.
53 Chaynata Filistea runakunata Israel runakuna qatiruspankum kutirimuspankuñataq saquearqaku campamentonkuta.
54 Chaymantam Davidqa chay Filistea runapa umanta hoqarispan Jerusalen llaqtakama aparqa.
Armankunatam ichaqa churaykurqa karpanman.
55-56 Filistea runawan David lloqsiptinmi Saul tapurqa tropankunapa kamachiqnin Abnerta:
—¿Pitaq wak warmapa taytan?
—nispa.
Chaymi Abner nirqa:
—Reylláy,
chullalla almay hawam niki,
ñoqaqa manam yachanichu pim paypa taytanqa kasqanta —nispa.
Chaymi rey Saulñataq nirqa:
—Chaynaqa tapukachakuyá pim kasqanta —nispa.
57 Filistea runa wañuchisqanmanta David kutimuchkaptinmi Abner taripaykuspan Davidta pusarqa Rey Saulman Filistea runapa uman aptarikusqata.
58 Chaymi Saul tapurqa:
—¿Pipa churintaq kanki?
—nispa.
Hinaptinmi Davidñataq nirqa:
—Ñoqaqa kani Belen llaqtayoq serviqniki Isaipa churinmi —nispa.