Manases ayllupa allpanmanta
17
Suerteasqankuman hinam Manases ayllupaqpas tocancianku allpa karqa,
Manasesqa Joseypa piwi churinmi karqa.
Manasespa piwi churinmi karqa Maquir,
Maquirñataqmi karqa Galaadpa taytan.
Maquirmi karqa guerrapi peleaq runa.
Paymanmi tuparurqa Jordan Mayupa intipa qespimunan lawpi Galaad allpa chaynataq Basan law allpapas.
2 Castankunaman hinam Manasespa wakiqnin mirayninkunapaqpas allpata suertearqaku:
Abiezerpa mirayninkunapaq,
Helecpa mirayninkunapaq,
Asrielpa mirayninkunapaq,
Siquempa mirayninkunapaq,
Heferpa mirayninkunapaq chaynataq Semidapa mirayninkunapaq.
Paykunam karqa Joseypa churin Manasespa mirayninkuna.
3 Heferpa churin Zelofehadpam mana karqachu qari churinkuna aswanqa warmi churinkunallam,
paykunam karqa:
Maala,
Noa,
Hogla,
Milca hinaspa Tirsa.
Heferpa taytanmi karqa Galaad,
Galaadpa taytanmi karqa Maquir,
Maquirpa taytanmi karqa Manases.
4 Chay warmikunam asuykurqaku sacerdote Eleazarman,
Nunpa churin Josueyman chaynataq jefekunamanpas.
Paykunatam nirqaku:
—Tayta Diosmi kamachirqa Moisesta ñoqaykumanpas qari aylluykuman hina herencia allpata qowanankupaq —nispa.
Chaymi herenciankupaq allpata Josuey paykunaman qoykurqa taytankupa qari ayllunkuman hina,
chaynataqa qorqaku Tayta Diospa nisqanpi hinam.
5 Jordan Mayupa waklaw chimpanpi kaq Basan allpa chaskisqankumantapas chaynataq Galaad allpa chaskisqankumantapas chunka pedazo masraqmi Manases ayllumanqa tuparurqa.
6 Herencia allpataqa qorqakutaqmi Manasespa warmi mirayninkunamanpas,
qorqakuqa castamasin qarikunaman hinam.
Galaad lawpi kaq allpapas karqa Manasespa wakin mirayninkunapaqmi.
7 Chaynaqa Manases ayllupa allpanmi karqa Aserpa mirayninkunapa allpanmanta qallarispa Micmetat llaqtakama.
Chay Micmetat llaqtam kachkan Siquem llaqtapa chimpan intipa qespimunan lawpi.
Chaymantam linderon chutarikurqa surlawman hinaspam chayarqa Tapua Pukyu lawpi yachaqkunapa kasqankama.
8 Tapua law allpaqa karqa Manases ayllupam,
aswanqa paykunapa linderonpa ladonpi kaq Tapua llaqtaqa karqa Efrainpa mirayninkunapam.
9 Manases ayllupa linderonmi pasarqa surlawman Cana Mayukama,
Efrain castapa chay llaqtankunam karqa Manases castapa llaqtankunawan kuska.
Manases castapa linderonqa karqa hina chay Cana Mayupa norte lawninmantam.
Hinaspam chay linderoqa lloqsirqa Mediterraneo sutiyoq lamar qochakama.
10 Efrain castapa allpanmi karqa Cana Mayupa surlawninpi,
Manases castapa allpanñataqmi karqa chay mayupa norte lawninpi hinaspam chayarqa Mediterraneo Lamar Qochakama.
Tupanakurqataqmi Aser castakunapa linderonwanpas norte lawpi chaynataq Isacar castakunapa linderonwanpas intipa qespimunan lawpi.
11 Manases castakunamanqa tuparqataqmi herencia llaqtakunapas,
chay llaqtakunaqa karqa Isacar castakunapa allpanpim,
tuparqataqmi Aser castakunapa allpanpipas.
Chay llaqtakunam karqa:
Bet-sean llaqta llaqtachankunapiwan,
Ibleam llaqta llaqtachankunapiwan,
Dor llaqtapi yachaqkuna llaqtachankunapiwan,
Endor llaqtapi yachaqkuna llaqtachankunapiwan,
Taanac llaqtapi yachaqkuna llaqtachankunapiwan,
Meguido llaqtapi yachaqkuna llaqtachankunapiwan chaynataq kimsantin moqokunapas.
12 Aswanqa Manasespa mirayninkunam mana qarqoyta atirqakuchu chay llaqtakunapi yachaq Canaan casta runakunata.
Chaynapim paykunaqa hinalla yacharqaku chay allpapi.
13 Israelpa mirayninkuna kallpanchakuruspankuñataqmi Canaan casta runakunawan servichikurqaku devaldella ichaqa manam qarqorqakuchu.
Joseypa mirayninkuna montekuna dueñochakusqankumanta
14 Joseypa mirayninkunam Josueyta nirqaku:
—¿Imanasqataq huk hawaqllapiqa herenciaykupaq allpata qowarqankiku?
Ñoqaykuqariki achka-achka runam kaniku,
Tayta Diospas bendeciykuwankutaqmi —nispa.
15 Chaymi Josuey paykunata nirqa:
—Achkallaña kasqaykichikrayku Efrain runakunapa moqo-moqo allpankuna kichkillaña kaptinqa,
riychikyá montekunaman hinaspayá Ferez casta runakunapa chaynataq Refaim casta runakunapa allpanpi montekunata kuchumuychik —nispa.
16 Chaymi Joseypa mirayninkuna nirqaku:
—Arí,
manamá kamawankuchu kay moqokunallaqa.
Qechwapi yachaq llapallan Canaan casta runakunaqa otaq Bet-sean llaqtapi chaynataq llaqtachankunapi yachaqkunaqa chaynataq Jezreel Qechwapi kaqkunaqa fierromanta carretayoqkunam kanku —nispa.
17 Chaymi Josey casta Efrainpa miraynintawan Manasespa mirayninta Josuey nirqa:
—Qamkunaqa kankichik achkallañam chaynataq kallpasapa runakunam.
Chaynaqa manam chullalla herencia allpayoqqa kawaqchikchu.
18 Aswanqa chay moqokunam qamkunapaq kanqa,
monte kaptinpas sachankunatam kuchunkichik cantonkama chaynapi dueñochakunaykichikpaq.
Qamkunaqa qarqonkichikmi Canaan casta runakunataqa fierromanta carretayoqkuna kaptinkupas chaynataq kallpasapa kaptinkupas.