Joseypa mirayninkunapa allpanmanta
16
Suerteaspa Joseypa mirayninkunaman allpa qosqankum qallarirqa intipa qespimunan lawpi tarikuq Jordan Mayumanta,
chay mayuqa kachkan Jerico pukyukunapa hichpanpim,
chaypi qallarispamá chunniqninta chutarikurqa Betel moqokunakama.
2 Betel otaq Luz llaqtamantam pasarqa Arqui runakunapa linderonpi Atarot llaqtakama.
3 Chaymantam pasarqa intipa seqaykunan lawpi kaq Jaflet runakunapa allpanman,
chaymantañataq uray lawpi kaq Bet-horon llaqtapa linderonkama,
chaymantañataqmi Gezer llaqtanta pasaspan chayarqa Mediterraneo sutiyoq lamar qochakama.
4 Kay allpakunatam herenciankupaq chaskirqaku Josueypa mirayninkuna otaq Manasespiwan Efrain ayllukuna.
Efrain ayllupa allpanmanta
5 Castankuman hinataqmi Efrain ayllupaqpas allpanku karqa.
Intipa qespimunan lawmanmi karqa Atarot-adar llaqtamanta hanay lawpi kaq Bet-horon llaqtakama.
6 Chaymantam pasarqa Mediterraneo Lamar Qochakama,
chaymantañataqmi pasarqa norte lawninta Micmetat llaqtakama hinaspam muyurirqa intipa qespimunan lawninta Taanat-silo llaqtakama,
chaymantam pasarqa intipa qespimunan lawpi kaq Janoa llaqtakama.
7 Janoa llaqtamantam pasarqa Atarot llaqtaman chaynataq Naarat llaqtaman.
Jerico llaqtapa hichpanta pasaspanñataqmi lloqsirqa Jordan Mayuman.
8 Tapua llaqtamantam pasarqa intipa seqaykunan lawman Cana Mayukama,
chayninta pasaspam lloqsirqa Mediterraneo sutiyoq lamar qochaman.
Chay herencia allpamá karqa Efrain ayllupaq imaynam castankuman hina.
9 Paykunapaqtaqmi karqa rakisqa llapa llaqtakunapas llaqtachankunapiwan,
chay tocaqnin llaqtakunaqa karqa Manases ayllupa allpan ukupim.
10 Gezer llaqtapi yachaq Canaan runakunataqa manam qarqorqakuchu Efrain ayllu runakunaqa.
Aswanqa chay Canaan casta runakunam paykuna ukupi yacharqaku kay libro qellqasqa kasqan tiempokama.
Chaywanpas chay Canaan runakunam paykunata devaldella servirqaku.