Efrainpaq hinaspa Manasespaq bendicionta Jacob mañakusqanmanta
48
Kaykunapa qepantam Joseyman willamurqaku:
“Taytaykim onqosqa kachkan” nispa chaymi Josey churin Manasestawan Efrainta pusarqa.
2 Jacobmanmi willarqaku:
“Churiki Joseymi hamuchkan” nispa.
Chaymi Israelqa kallpanchakuykuspan camanpi tiyaykurqa.
3 Hinaspam Joseyman nirqa:
—Tukuy Atiyniyoq Diosmi Canaan law Luz nisqan lugarpi rikuriwarqa hinaspam favorniypi rimarispan
4 niwarqa:
“Ñoqam churisapata rurasqayki hinaspam achka nacionkunata rurasaq miraynikimanta.
Kay allpatapas miraynikimanmi qosaq wiñaypaq herencia kananpaq” nispan.
5 Kay Egipto nacionman manaraq hamuchkaptiy kaypi naceq Efrainwan Manases churikikunaqa ñoqapa churiykuna hinam kanqa imaynam Rubenwan Simeon churiykuna hina.
6 Paykunapa qepan nacemuqkunam ichaqa Efrainpa hinaspa Manasespa sutinpi herenciata chaskinqaku.
7 Padan-aranmanta kutimuptinchikmi mamayki Raquelqa wañururqa Canaan lawpi Efrata llaqtachaman riq ñanpa hichpanpi,
chaypim pampamurqani.
Chay Efrata llaqtachapa huknin sutinqariki Belen llaqtam —nispa.
8 Israelmi qawarirqa Joseypa churinkunata hinaspam nirqa:
—¿Pikunataq paykunaqa?
—nispa.
9 Chaymi Josey nirqa:
—Paykunaqa Diospa qowasqan kay Egipto nacionpi naceq churiykunam —nispa.
Hinaptinmi Jacob nirqa:
—Ñoqaman anchuykachimuy hinaptin Tayta Diosta mañakusaq bendecisqa kanankupaq —nispan.
10 Israelpa ñawinkunam tumpallataña qawakurqa yuyaqña kasqanrayku chaymi churinkunata Josey asuykachiptin Israel abrazaykuspa muchaykarirqa.
11 Israelmi Joseyta nirqa:
—Manam piensarqanichu qam rikuykuytaqa aswanqa Diosmi qawaykachiwan,
qawaykachiwantaqmi churikikunatapas —nispan.
12 Chaymi Joseyqa taytanpa moqonmanta warmakunata asurichispan qonqoranpa kumuykurqa pampaman.
13 Joseymi hapiykurqa iskaynin churinkunata.
Efraintam hapiykurqa alleq makinwan Israelpa ichoq lawninpi,
Manasestañataqmi hapiykurqa ichoq makinwan Israelpa alleq lawninpi hinaspam anchuykachirqa taytan Israelman.
14 Ichaqa Israelmi alleq makinta haywariykuspan sullka kaq Efrainpa umanman churaykurqa,
ichoq makintañataqmi churaykurqa Manasespa umanman.
Manases piwi kasqanta yachastinmi chaynataqa rurarqa.
15 Joseypaq bendicionta mañakuspanmi nirqa:
Abueloy Abrahampa servisqan Diosmi,
taytay Isaacpapas servisqan Diosmi
nacesqaymanta kunankama uywawarqa.
16 Paymi tukuy mana allinmanta libraqniy Angel karqa.
Paypuniyá bendecichun kay warmakunataqa.
Ñoqapa sutiywanyá,
Abueloy Abrahampa sutinwanyá,
Taytay Isaacpa sutinwanyá
sutichasqa kachunku.
Kay pachapiyá sinchillataña mirachunku.
17 Efrainpa umanman taytan Jacob alleq makinta churasqanta qawaykuspam Josey hukmanyarurqa chaymi taytanpa makinta hapiykuspa Efrainpa umanmanta Manasespa umanman cambiarqa.
18 Hinaspam taytanta Josey nirqa:
—Taytáy,
amayá chaynataqa ruraychu,
Manasesmi piwi churiyqa,
paypa umanmanyá alleq makikitaqa churaykuy —nispa.
19 Taytanñataqmi mana munaspan nirqa:
—Yachanim churilláy,
Manasespa mirayninpas kanqa hatun nacionmi,
ichaqa sullkanpa miraynin aswan hatun nacion kaptinmi,
mirayninmantapas kanqa achkallaña nacionkuna —nispa.
20 Chay punchawpipunim bendecisqa kanankupaq Jacob kaynata rimarirqa:
Qamkunapa sutikichikpim
Israel casta runakuna Diospa bendicionninta
kaynata ninqaku:
“Diosyá yanapasunki
Efraintawan Manasesta hina” nispanku.