Röllucho sërawan lagashanta jorgushan
6
Chaypitana ricarä röllucho rimir caj lagaraycaj sërata Cashni uysha jorgurejta.
Jorguriptinmi ñaupancho caj chuscu anjil-nirajcunapita jucga gayacuran räyunöraj busninwan:
«¡Shamuy!»
nir.
2 Chaura ricarä juc yuraj cawalluta.*
Chay cawalluta muntaräga lëchata aptaraycaran.
Paytami corönata goran.
Chaura payga aywaran binsishanno yapay Tayta Diospa contran cajcunata llapanta binsinanpaj.
3 Röllucho ishcay caj lagaraycaj sërata Cashni uysha jorguriptinmi ñaupancho caycaj chuscoj anjil-nirajcunapita jucna gayacuran:
«¡Shamuy!»
nir.
4 Niptinmi llojshimuran puca cawallu.*
Chay cawalluta muntarajtana jatun sablita goran cay pachacho runacunata chiquinacachir fiyupa wañuchinacachinanpaj.
5 Röllucho quimsa caj lagaraycaj sërata Cashni uysha jorguriptinmi ñaupancho caycaj chuscu anjil-nirajcunapita jucna gayacuran:
«¡Shamuy!»
nir.
Niptin ricärishächo ricarä yana cawalluta.*
Chay cawalluta muntarajna balansan aptasha caycaran.
6 Chaymi chay chuscoj anjil-nirajcunapa chaupinpita cayno nimuran:
«¡Muchuymi canga!
Chaura juc junaj arur gänashan aypanga juc quïlu rïguta,
u quimsa quïlu sebädata rantinallanpaj.
Ichanga asëtitawan bïnuta ama ushaychu.»
7 Röllucho chuscu caj lagaraycaj sërata Cashni uysha jorguriptinmi ñaupancho caycaj chuscu anjil-nirajcunapita jucna gayacuran:
«¡Shamuy!»
nir.
8 Niptin ricärishächo ricarä bäyu cawalluta.
Chay cawalluta muntarajpa jutinmi caran «Murti».
Paypa guepantanami «Pantiyun» shamuran.
Paycunami llojshiran runacunata guërrawan wañuchinacachinanpaj,
muchuywan gueshyawan wañunanpaj.
Y micucoj animalcuna wañuchinanpaj.
Paycunaga munayniyoj caycaran pullanpita pullannin caj runacunata wañuchinanpämi.*
9 Röllucho pichga caj lagaraycaj sërata Cashni uysha jorguriptinmi altar chaquincho almacuna caycajta ricarä.
Chaycunaga caran Tayta Diosman yäracojcunata wañuchishanpa almanmi.
10 Paycunami sinchipa niran:
«Llapanpaj munayniyoj Tayta Dios,
¿imaytaj jusganqui wañuchimaj runacunata?»
11 Niptinmi Tayta Diosga yuraj röpata jatiparcur niran:
«Shuyaycuyraj.
Gamcuna wañushayquinöllami waquin yäracamajcunapis wañongaraj.»
12 Röllucho sojta caj lagaraycaj sërata Cashni uysha jorguriptinmi cay pachacho fiyupa timlur caran.*
Chay örami ricarä inti chacacäcojta,*
quillapis yawar-niraj pucaman ticracurejta.*
13 Janaj pachapita goyllarcuna shicwacamuran.
Sinchipa wayrämuptin manaräpis pogoj ïgus shicwamojnömi goyllarcunaga shicwacamuran.
14 Syëlupis papil cauchucäcojnömi pitucäcuran.*
Jircacuna,
lamar chaupin tishgucunapis juc-läman witiran.*
15 Runacunanami gagacunaman,
machaycunaman pacacuran.*
Cay pachacho caj raycuna,
mandaj suldärucuna,
rïcucuna,
uywaycuna,
waquin runacunapis llapanmi pacacuran.
16 Puntacunata,
gagacunatapis niran:
«¡Nogacunata ñiticarcallämay!*
¡Sillunnincho jamaraycajpis Cashni uyshanpis fiyupa rabyashami caycan.
Paycunapita pacaycallämay ari!
17 ¡Llapan runacunata jusgananpaj caj timpu chayamushanami!
¡Tayta Diospa castïguntaga manami pipis awantangachu!»*