1 ခဲင် ဖိုင် ဖာရီဆဲ န့ ယီ မိုဝ်း ဒူအီ အူ ဝီ၊ အန် စိူဝ် အာနီခုဝ်ဒေမ်။ အန် မုး ဒါ တာင် ဂေ ဒူအီ အာယူဒါ အူ ဝီ။ 2 အန် တး ဒူင် ကွယ် ဇဝ် ယေဆူ ဒေါ ပြဲ ဟဲ့ အပ် ခဲင် မှိုဝ်။ အန် ဝီ တဝ်း ဒီ ဇဝ် ယေဆူ၊ “အိုယ် မဲ ဆာရာ၊ ယေ ဟဲ့ နပ်၊ ဇဝ်ဖြာ ဟဲ့ တိုယ် မဲ၊ တဲး မဲ ဘဲန် ဒါ ဆာရာ ယေ။ ယေ နပ် ပါယ် တီ၊ ကူပ် ဘူင် မဲ နာ မွှိုမ် အာမ် ကာဆဝ်။ ဆေ ဇဝ်ဖြာ တူ ကွယ် ရိုမ် ဒူပ် ဒူအီ၊ အာဝ် မိုဝ်း အာဆေ နပ် ဒီ ဘူင် ပီ ပီ ဘူင် မဲ။”

3 ဇဝ် ယေဆူ ဝီ တဝ်း ဒီ အန်၊ “အုဝ် တဝ်း အာခါခ်ု ဒီ မဲ၊ ဆေ ဒူအီ တူ ဘဲန် ဒူအီ ကာမာယ်၊ အာဝ် ပွိုန် လိုပ် ခဲင် မိူင် ပီ အိုပ် ဇဝ်ဖြာ။ န့ ပီ၊ ဒူအီ လုဝ် ဝီ ဂွိုတ် ပေါ အူ ဇေန့်၊ တဲး အန် ဘဲန် ဒူအီ ကာမာယ်။”

4 အာနီခုဝ်ဒေမ် ဝီ တဝ်း၊ “ဆေ ဒူအီ ဟဲ့ တာင်၊ မှဝ် အန် ဒီ ပါယ် ဒီ ဝီ ဂွိုတ် ပေါ အူ ဇေန့်။း အာဝ် ပွိုန် ဝီ လိုပ် ခဲင် ဝတ့် မာ အန်၊ တဲး အန် ဝီ ဂွိုတ် ပေါ အူ ဇေန့်။”

5 ဇဝ် ယေဆူ ဝီ တဝ်း၊ “အုဝ် တဝ်း အာခ်ု ဒီ မဲ။ န့ လုဝ် ဘော နဝ်း ဖွိုမ် ဇဝ်ဖြာ ဘော အိုမ်၊ တဲး ဒူအီ ဘဲန် ဒူအီ ကာမာယ်။ ဆေ အာဝ် ပါယ် တီ၊ အာဝ် ပွိုန် လိုပ် ခဲင် မိူင် ပီ အိုပ် ဇဝ်ဖြာ။ 6 ဆေ ဒူအီ မိုဝ်း ဂွန်၊ ဂွန် တီ မုး အာမျုဝ် ဒူအီ။ ဆေ နဝ်း ဖွိုမ် ဇဝ်ဖြာ ယီ ဒွါ အာဆာက် ကာမာယ် ဒီ အီ၊ န့ တဲး နဝ်း ဖွိုမ် အန် ကာမာယ်။ 7 ခုဝ်၊ ကွဲ့ အာမ် ကူပ် တဝ်း အုဝ် ဒီ မဲ၊ မဲ လုဝ် ဝီ ဂွိုတ် ကာမာယ် ပေါ အူ ဇေန့်။ 8 န့ ပီ ခုန်။ ခုန် တး ဘုတ် ဒူင် ပီ အိုင် အန်။ မဲ တူ နပ် နာ မှဝ် အန် တး၊ ဒူင် မှဝ် အန် ဟာဝ်။ မဲ ယီ နပ် ဒီ ထူမ် ဟမ် အန်။ နဝ်း ဖွိုမ် ဇဝ်ဖြာ ဘော ပါယ် တီ။ မဲ တူ နပ် ပီ ပါယ် အန် ဒီ ဘူင်၊ တဲး ဒူအီ ဘဲန် ဝီ ဘဲန် ဝီ ဝီ ဘဲန် ဒူအီ ကာမာယ်။”

9 အာနီခုဝ်ဒေမ် ဝီ ဒီမွှတ် တဝ်း၊ “အုဝ် တူ နပ် မှဝ် န့ ဒီ ပါယ် ဒီ ဘဲန်၊ ပီ တဝ်း မဲ။”

10 ဇဝ် ယေဆူ ဝီ တဝ်း ဒီ အန်၊ “မဲ ကော ဘော ဟဲ့ မုး ဒါ ဆာရာ အီ မာနုဝ် ဒူအီ ခဲင် မိူင် အီဆာရေလ၊ မှဝ် န့ ပါယ် ပီ တူ နပ် မဲ လွင် အန် တီ။း 11 အုဝ် တဝ်း အာခါခ်ု ဒီ မဲ။ ယေ ကာလာင် ဒီ ဘေ ခဲ့ ပီ နပ် ယေ။ မာဆေ ပီ ယိုဝ် ယေ၊ ယေ ဝီ ခဲ ဒီ ဘေ။ ခဲ့ ပီ ခဲ ယေ ဇိုဝ် တီ၊ ဘေ ယီ တူ ညှိုမ်။ 12 ဒေါ ကာလာင် အုဝ် ဒီ ဘေ ခဲ့ ပီ ပွိုန် ယိုဝ် ဘေ ဒဲင် ကာဒါယ် နီ၊ ဘေ တူ ကူပ် ညှိုမ်။ န့ တူ လိုဝ်း ဒီ ဘေ။ ဆေ အုဝ် ယီ ဒီ ကာလာင် လွင် ပီ ပါယ် ဘဲန် မျုဝ် ဘဲန် မျုဝ် ခဲင် မိူင် ဇဝ်ဖြာ ဘေ ဘဲန် ဝဲ တူ နပ်။ 13 အာဝ် မိုဝ်း ဒူအီ အီ ဟဲ့ ဒွိုမ် ဟုဝ့် မိူင် ဇဝ်ဖြာ။ န့ ယီ မုး မီ အူ ဝီ၊ အီ ဟဲ့ ဘဲန် ဂွန် ဒူအီ၊ အန် ဟဲ့ ဒွိုမ် ကွယ် ခဲင် မိူင် ဇဝ်ဖြာ၊ ဟဲ့ တး လူင် ဒဲင် ကာဒါယ်။ အန် ဒီ ဝီ ဟုဝ့် နာ ဒဲင်။ 14 ဒူအီ အီ ဟဲ့ ဘဲန် ဂွန် ဒူအီ၊ အန် ပီ ဟန့် တွိုန်။ ဒေါ ကွယ် ဂေ ဒူအီ အီဆာရေလ ခဲင် ပြဲ ကာဟဝ်း၊ အာမုဝ်ဆဲ ဟဲ့ တာ ဘွင့်၊ ဘူင် အာရိုပ် ဟန့်၊ ဘ့လေး နာ ဒဲင် ရွင့်၊ တဲး န့ ချွတ် ဒူအီ အီ ငွိုပ် အန်။ ပါယ် တီ ဘော ဒူအီ အီ ဟဲ့ ဘဲန် ဂွန် ဒူအီ၊ အန် လုဝ် ဒိုက် ဒီ ရွင့်၊ 15 တဲး ဒူအီ ဒွန် အီ ပွိုန် ဒီ ညှိုမ် အန်၊ တဲး အန် ပွိုန် ဒီ ချွတ် အာဆာက် ဂေ။ အာဆေ ညှိုမ် ဂွန် ဒူအီ တီ၊ အာဆာက် အန် တူ စှိုမ်။ အန် ဒီ ဘော ပွိုန် ဒီ ကွယ် ရိုမ် ဒူပ် ဇဝ်ဖြာ ဆေဆေ။

16 ဇဝ်ဖြာ ရွက့် ကာဆဝ် ဂေ ဒူအီ ဒဲင် ကာဒါယ်။ ခုဝ်၊ အန် ဒွါ ဂွန် အန် အီ မုး ခဲ့ အူ ဝီ တီ၊ တဲး အန် ချွတ် ဒူအီ။ အာဆေ ညှိုမ် ဂွန် ဇဝ်ဖြာ တီ၊ အာဆာက် အန် တူ စှိုမ်။ အန် ဒီ ဘော ပွိုန် ဒီ ကွယ် ရိုမ် ဒူပ် ဇဝ်ဖြာ ဆေဆေ။ 17 ဇဝ်ဖြာ ဟဲ့ တဲး ဂွန် အန် လူင် ဒဲင် ကာဒါယ် ဘဲန် ဒူအီ၊ တဲး အန် ချွတ် ဒူအီ၊ ကွဲ့ တဲး အန် ဒမ် မှာပ် ဒီ ဂေ။ 18 အာဆေ ညှိုမ် ဂွန် ဇဝ်ဖြာ တီ၊ အန် တူ လုဝ် ခမ် မှာပ် အန်။ အာဆေ ယီ တူ ညှိုမ်၊ န့ ပီ ဇဝ်ဖြာ ဟဲ့ ဟွတ့် ဒမ် မှာပ် ဒီ အန်၊ တဲး အန် ခမ် တူတ့် ကူပ် တူ ညှိုမ် အန် ဂွန် ဇဝ်ဖြာ၊ အီ မုး ခဲ့ အူ ဝီ တီ။ 19 လွင် ဒမ် ဇဝ်ဖြာ မှာပ် အီ၊ န့ ပါယ် နီ။ ဇဝ်ဖြာ ဟဲ့ တဲး ဘ့လာင် အန် တး လူင် ဒဲင် ကာဒါယ်။ ဂေ ဒူအီ အီ ကွယ် ဒဲင် ကာဒါယ် ယီ တူ အိုင် ဘ့လာင် တီ။ ဂေ အိုင် ဒီ ကွယ် ခဲင် အပ် ဝွင့် ကူပ် ဟဲ့ ဟာယ် ပဲ့ ဟဲ့ ဘူင် ဂေ။ ခုဝ်၊ အန် လုဝ် ဒမ် မှာပ် ဂေ။ 20 အာဆေ ဘူင် နာ တူ မွှိုမ်၊ အန် တူ အိုင် ဘ့လာင်။ အန် တူ ယ တး ဇမ် ခဲင် ဘ့လာင်။ အန် ယုဝ် ဘ့လာင် တီ၊ တဲး န့ လိုဝ်း ခဲ့ တူ မွှိုမ် ပဲ့ ဟဲ့ ဘူင် အန်။ 21 အာဆေ ယီ ဘူင် နာ မှာန်၊ န့ ပီ၊ အန် ကွယ် ခဲင် ဘ့လာင်။ န့ ဒီ တဲး ဒွန် အီ နပ် လွင် ပဲ့ ဟဲ့ ဘူင် အန်၊ န့ မုး ပီ အိုင် ဇဝ်ဖြာ။”

22 ဝါယ် အန် တီ ဇဝ် ယေဆူ ဂေ ဒီဘဲ အန် ဝီ ဟာဝ် ဇမ် ခဲင် အိူင် ယူဒါ။ ခဲင် အိူင် တီ အန် ကွယ် ရိုမ် ဒူပ် ဒီဘဲ အန်။ အန် ဘော စိုပ် ဒူအီ ခဲင် အိုမ်။ 23 ဘော ဒါ ဆာရာ အာယောဟာန် တွိုန် ကွယ် ဒီ ခူပ် မိူင် အေနူန်၊ အီ ကွယ် ကာတတ် မိူင် ဆာလိမ်။ ဒူင် ကွယ် အန် တီ၊ ဘော အန် စိုပ် ဒူအီ ခဲင် အိုမ် ကူပ် မိုဝ်း အိုမ် ကိူန်။ ဂေ ဒူအီ ကိူန် ဘော တး ဇမ် ဒူင် ကွယ် အန် ဆေဆေ၊ မှာန့် တဲး အန် စိုပ် ဂေ ခဲင် အိုမ်။ 24 (ဒေါ အန် တီ မုး အာတ့် ခြွင့် ဂေ ဒါ ဆာရာ အာယောဟာန် ခဲင် ကာပိုမ်)။ 25 ဒေါ အန် တီ ဂေ ဒီဘဲ အာယောဟာန် မင် အီ ဘော ဒါ တာင် ယူဒါ အူ ဝီ၊ ဂေ တူ လာယ် ဖြူမ် လွင် လုဝ် ဘာယ် ဘဲန် မျုဝ် ဘဲန် မျုဝ်၊ တဲး န့ ဒူပ် ဒါရာ။ 26 ပန် တီ ဂေ ဝီ ဟာဝ် ဇမ် ဒူင် ကွယ် အာယောဟာန် တွိုန်။ ဂေ ဝီ တဝ်း၊ “အိုယ် မဲ ဆာရာ၊ ဒါ ဆာရာ ပီ ဒွိုမ် ခဲ မဲ တွိုန်၊ အီ ဟဲ့ ဒွိုမ် ကွယ် ရိုမ် ဒူပ် မဲ ဒေါ ကွယ် မဲ ဒီ ဘ့လဲင် ယောဒါန်၊ ဘော အန် စိုပ် ဒူအီ ခဲင် အိုမ်။ ဂေ ဒူအီ ဘောကာဂ့လျီတ် ဝီ ဟာဝ် ဒူင် ကွယ် အန်။”

27 အာယောဟာန် ဝီ တဝ်း၊ “ဒူအီ ဒွန် အီ တူ ပွိုန် ဘူင် မာဆေ ဆေ ဇဝ်ဖြာ တူ တဲး အန် ဘူင်။ 28 ဘေ မိူဝ် နပ် ပီ ဒွိုမ် တဝ်း အုဝ်၊ အုဝ် တူ မုး အန် ဇဝ် ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ။ အုဝ် မုး အီ ယဲတ့် ဒီ အာတ့် အန် ဇဝ် တီ။ 29 လွင် အန် တီ၊ န့ ပီ ဘ့လွယ် ခတ်။ န့ မုး ကာညူမ်၊ ဘော အန် ဘော ဒီဘျာ အီ ဒူပ် အန်၊ ဂါယ် ဒီ လာယ် ခတ်။ န့ ယီ မုး ဂိုက် ကာညူမ် တွိုန်၊ အန် ကွယ် ဒီ ခူပ်၊ ထူမ် ဂြုဝ်း ပီ ကာလာင် ကာညူမ်။ နဝ်း အန် ဘော ဒါခိုယ် ကာဆဝ် ဒေါ ထူမ် အန် ဂြုဝ်း ပီ ကာလာင် ကာညူမ် တီ။ အုဝ် ပီ ဂိုက် တီ။ ဘော နဝ်း အုဝ် ဟဲ့ ဒါခိုယ် ကာဆဝ်။ 30 ခုဝ်၊ အန် လုဝ် ဘဲန် ဒါ ဆာရာ တာင် တဲး ဂေ ဒူအီ အီ ဒူပ် အန် ကြဲ ဒီ ကိူန် ကာဆဝ်။ ဂေ ဒူအီ အီ ဒူပ် အုဝ် ယီ လုဝ် ကြဲ ဒီ ပြေတ့်။

31 ဒူအီ အီ တး လူင် ခဲင် ဂါင်ဟြာဝ်၊ အန် ဟဲ့ တာင် လွှိုမ် ဒွန် အီ။ ဒူအီ အီ ကွယ် နာ ခြိုမ် နီ ဆေဆေ၊ အန် နပ် မီ ခဲ့ ပီ မိုဝ်း ဒဲင် ကာဒါယ်။ အန် ဘော နပ် ဒီ ကာလာင် ဒွန် မျုဝ် အီ ကွယ် ဒဲင် ကာဒါယ်။ အာဆေ ယီ တး နာ ဒဲင်၊ အန် မုး အီ တာင် ဒဲင် ဒွန် အီ။ 32 ဒူအီ တီ နပ် ဒီ ကာလာင် လွင် ဒွန် မျုဝ် ပဲ့ ဟဲ့ ယိုဝ် အန်၊ န့ ယီ တူ မိုဝ်း အာဆေ အီ ထူမ် ညှိုမ် ဂြုဝ်း အန် တီ၊ တဲး န့ လိုပ် ခဲင် နဝ်း။ 33 အာဆေ ယီ တဲး ဂြုဝ်း အန် တီ လိုပ် ခဲင် နဝ်း၊ အန် နပ် ဆီချာ၊ ဇဝ်ဖြာ ဟဲ့ မှာန် ဟဲ့ မုး။ 34 ခုဝ်၊ ဒူအီ ပီ ရဝ်း ပီ တိုယ် ဇဝ်ဖြာ၊ အန် ကာလာင် ဂြုဝ်း ဇဝ်ဖြာ။ ဇဝ်ဖြာ ဟဲ့ ဒွါ ကိူန် နဝ်း ဖွိုမ် အန် ဒီ ဒူအီ အီ ညှိုမ် အန်၊ ကွဲ့ တဲး န့ ဆီ ဇုတ် လုတ် ဒေါ မှဝ်။ 35 ဇဝ်ဖြာ ရွက့် ဂွန် အန်။ ခုဝ်၊ အန် တဲး ဂွန် တီ အိုပ် တူတ့် ဒွန် မျုဝ်။ 36 အာဆေ ညှိုမ် ဂွန် ဇဝ်ဖြာ တီ၊ အန် ပွိုန် ဒီ ကွယ် ရိုမ် ဒူပ် ဇဝ်ဖြာ ဆေဆေ။ အာဆေ ယီ တူ တဲး ဂွန် ဇဝ်ဖြာ တီ အိုပ် နဝ်း အန်၊ အန် တူ ပွိုန် ဒီ ကွယ် ရိုမ် ဒူပ် ဇဝ်ဖြာ။ ဇဝ်ဖြာ ဒီ ရူ ဒီ ဒူအီ ဇိုဝ် တီ ဆေဆေ။”