ခါန် 3
လွင် ဒါ ဆာရာ အာယောဟာန် ဟုဝ် ဒါရာ ဇဝ်ဖြာ
1 ဝါယ် အန် တီ န့ မုး အာကဲဆာ ထီဘေရီ၊ အန် ဟဲ့ ဘဲန် ခုန်ဒီခမ် အာဒါ ဂိုဝ် ဒီ ဖန် ဆီနမ်။ ဒေါ အန် တီ န့ ဘော မုး အာဖူန်ထီ ဖီလာတ်။ အန် မုး ဒါ တာင် အီ အိုပ် အိူင် ယူဒါ။ အာဟေရူတ် ဘော မုး ဒါ ကာညာ အီ အိုပ် အိူင် ဂါလီလေ။ အာဖီလိပ်၊ အီ မုး ဝါ အာဟေရူတ် တွိုန်၊ အန် ယီ မုး ဒါ ကာညာ အီ အိုပ် အိူင် အီထူရီယာ ဂါယ် အိူင် တ့ရာခုဝ်နီထီ။ ဒါ အာလူဆာနီယာ ဘော မုး ဒါ တာင် အီ အိုပ် အိူင် အီဘာလေန်။ 2 အာခြာဝ် အန် တီ၊ န့ ဘော မုး ဒါ အာနာတ် ဂါယ် အာကာယ်ဖာ၊ ဂါယ် မုး ဒါ တာင် အီ အိုပ် တူတ့် ဒူအီ အီ လှူ ဒီ ဇဝ်ဖြာ။ ဒေါ အန် တီ ဇဝ်ဖြာ တး ကာလာင် ဂြုဝ်း ဒီ အာယောဟာန် အီ မုး ဂွန် အာဆာခါရာ ဒေါ ကွယ် အန် ခဲင် ပြဲ။ 3 အာယောဟာန် ဘော ဟာဝ် ဒွန် ပ့လုဝ့် အီ ကွယ် ကာတတ် ဘ့လဲင် ယောဒါန်။ အန် မိူဝ် ကာလာင် ဒီ ဒူအီ တဝ်း၊ “ဘေ လုဝ် ဝဲန် နဝ်း ဘြိမ်၊ ဝီ ဒိုဝ်း နဝ်း ကာမာယ်။ ဘေ လုဝ် ခမ် ဒီ စိုပ် ခဲင် အိုမ်၊ တဲး ဘေ လှုဝ်း မှာပ် ဘေ၊ တဲး ဇဝ်ဖြာ ပွိုန် ဒီ ဂဝ်း ဝဲန် မှာပ် ဘေ။” ပီ တဝ်း အန် တီ၊ 4 န့ ပီ ပီ ဒဲမ် အာအီဆာယ၊ အီ မုး ဒူအီ အီ ဘျာန် ဂြုဝ်း ဇဝ်ဖြာ။ အန် ဟဲ့ ဒဲမ် အုန် လွင် အန် တီ တဝ်း၊
“န့ ဒီ မိုဝ်း ဒါ အူ ဝီ ကာလာင် ဂြုဝ်း ခဲင် ပြဲ။ အန် တဝ်း၊
‘တဲး ဘေ မ့ပြာယ် န့တေန့် ပီ လုဝ် ဝဝ့် ဇဝ်ဖြာ။ ဘူင်၊ တဲး န့ ကော ဆိူဝ်။
5 ဆေ န့ မုး ဒီဂ့လုဝ့်၊ တဲး န့ ဝီ ဖဲန့်။ ဒူင် ကုက် ကာဒါယ်၊ တဲး ဘေ လုဝ့် ဝဲန်၊ တဲး န့ ဝီ ဂ့လင်။ ဆေ န့တေန့် ဘော ဂုဝ့် ဂဲ့၊ တဲး ဘေ ဘူင် တဲး န့ ဆိူဝ်။ ဒူင် ဒီဂ့လုဝ့် ဒီဂ့လျီမ်၊ တဲး ဘေ ပုန် ဝဲန်၊ တဲး န့ ဟာဝ် ဒါခိုယ် တူတ့် ဒွန် ပ့လုဝ့်။
6 ဂေ ဒူအီ ဘောကာဂ့လျီတ် ဒီ ဘော ပွိုန် ယိုဝ် လွင် ဇဝ်ဖြာ ချွတ် ဂေ ဒူအီ။’” ခဲ့ တီ အာယောဟာန် ကာလာင် ပီ ဒဲမ် ခဲင် ဘပ် ဇဝ်ဖြာ။
7 န့ ယီ မိုဝ်း ဂေ ဒူအီ ကိူန် တး ဒူင် ကွယ် အာယောဟာန်။ ဂေ ဆီ တဲး အန် စိုပ် ဂေ ခဲင် အိုမ်။ အာယောဟာန် ဘော တဝ်း ဒီ ဂေ၊ “အိုယ်၊ ဘေ အီ ပီ ဟန့် ငျီန်။ အာဆေ ဟဲ့ တဝ်း ဒီ ဘေ၊ ဘေ ဒီ ပွိုန် တဝ် ဆေ ဇဝ်ဖြာ ဟီ ရူ ဒီ ဘေ နာ အာတ့် နီ။း 8 ဘော ပီ ဘူင် ဘေ၊ ဘော ဂြုဝ်း ပီ ကာလာင် ဘေ၊ ဘေ လုဝ် တဲး န့ ကာရမ်။ တဲး ဘေ ဝဲန် နဝ်း ဘြိမ် ဘေ၊ ဒိုဝ်း နဝ်း ကာမာယ်။ ကွဲ့ တဲး နဝ်း ဘေ ပီခိုက် ကူပ် မုး ဘေ လှုက်လှာန် ဒါ အာဘြာဟမ် တွိုန်။ အုဝ် တဝ်း ဒီ ဘေ၊ ဆေ ဘေ တူ ဒူပ် ဆီချာ ဇဝ်ဖြာ ပီ ဂေ လှုက်လှာန် အာဘြာဟမ် အာခါခ်ု၊ ဇဝ်ဖြာ ဒီ ဘူင် တဲး မာဝ် ဂေ နီ ဘဲန် လှုက်လှာန် အာဘြာဟမ်။ 9 ဒေါ တီ နီ န့ ပီ မိုယ် ဟဲ့ ဟွတ့် ကွယ် ဒီ ဒင် ဟေ။ ဟေ ဒွန် ကာဒင် အီ တူ မိုဝ်း ဘ့လေ မွှိုမ်၊ ဂေ ဒီ ဂ်ု ဝဲန် ဝီ ဒုဝ့် ကာဆိုမ် ခဲင် ငဝ်။”
10 အာယောဟာန် ဟဲ့ ဟွတ့် တဝ်း ပါယ် တီ၊ ဂေ ဒူအီ တွိုန် ဝီ ဒီမွှတ် အန်။ ဂေ တဝ်း၊ “ဆေ န့ ပါယ် တီ၊ မာဆေ ပီ ဒီ လုဝ် ဘူင် ယေ။း”
11 အာယောဟာန် ဝီ တဝ်း၊ “အာဆေ မိုဝ်း ဆီတုဝ် အာ ဖိူန်၊ အူ ဖိူန် တဲး အန် ဝီ ဒွါ ဒီ ဒူအီ အီ တူ မိုဝ်း မာဆေ။ အာဆေ ဟဲ့ မိုဝ်း ပီ ဒီ ဟူမ် ပီ ဒီ တာ၊ တဲး အန် ဝီ ကာဆာင် ဒွါ ဒီ ဒူအီ အီ တူ မိုဝ်း မာဆေ။”
12 န့ ဘော မိုဝ်း ဂေ ဒါ အီ ဂဲပ် ရွိုန် စိုင် မင် အီ၊ ဂေ ဘော တး တဝ်း ဒီ ခမ် ဒီ စိုပ် ခဲင် အိုမ်။ ဘော ဂေ ဟဲ့ တး ဒီမွှတ် အာယောဟာန်။ ဂေ တဝ်း၊ “မဲ ဒါ ဆာရာ၊ မာဆေ ပီ လုဝ် ဘူင် ယေ။း”
13 အာယောဟာန် ဝီ တဝ်း ဒီ ဂေ၊ “ကွဲ့ ဂဲပ် ရွိုန် စိုင် လွှိုမ် ပီ ဒမ် ဒါရာ။”
14 ဘော ဂေ ဒါ ဆိုက် တး ဒီမွှတ် အန်။ ဂေ တဝ်း၊ “မာဆေ ပီ ဒီ တဝ်း မဲ ဒီ ယေ။း မာဆေ ပီ လုဝ် ဘူင် ယေ။း”
အာယောဟာန် ဝီ တဝ်း ဒီ ဂေ၊ “ကွဲ့ ကာစွှာ့ ဒူအီ၊ မှာန့် ရွိုန် ဒီ ဂေ။ ကွဲ့ ကာယွင့် ဒူအီ။ တဲး ဘေ စူ ခဲ့ ပွိုန် ဘေ ရွိုန် မာဂျီန်။ ကွဲ့ တဲး ဘေ မိုဝ်း နဝ်း ဆီ ပွိုန် လွှိုမ် တီ။”
15 န့ ယီ မိုဝ်း ဂေ ဒူအီ အီ နှဝ့် န့ဒဝ့် အာခြာဝ် ဒီ တး အန် ဇဝ် ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ။ ဂေ ထူမ် ဂြုဝ်း ပီ ကာလာင် အာယောဟာန် တီ၊ ဂေ ဝီ ဇေန့်ဇာ လွင် အန် တီ၊ ယုဝ် န့ ပဲ့ ဟဲ့ မုး အန် အီ မုး အန် ဇဝ် ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ၊ ဝီ ပီ နှဝ့် န့ဒဝ့် ဂေ။ ယုဝ် မိူဝ် ဟဲ့ မုး အန် အီ မုး အန် ဇဝ် အီ ဒီ တး အာဝ် လှေန့်။ ဂေ ယီ တူ နပ် ဆီချာ လွင် အန် တီ။ 16 ခုဝ်၊ အာယောဟာန် ဝီ တဝ်း ဒီ ဒူအီ ဘောကာဂ့လျီတ်၊ “အုဝ် ဟဲ့ စိုပ် ဘေ ခဲင် အိုမ်။ ဒါ အီ ဒီ တး ဒီ ပန် အုဝ်၊ ပွုန် အန် ယီ တာင် လွှိုမ် ပွုန် အုဝ်။ အန် ဒီ တး ဒီ ဘေ။ အီ မုး အုဝ်၊ အုဝ် မိူဝ် ညှမ် ကာအာပ် ဂိုပ် ဒီ အာတ့် အန်၊ ဂဝ်း ဝန် ခူဒိန့် အန်။ အန် ဒီ ဘော တဲး နဝ်း ဖွိုမ် ဇဝ်ဖြာ အိုပ် ဘေ။ ပီ ဒီ ဘူင် အန် ဒီ ဘေ ပေါ အူ မျုဝ်၊ န့ ဘော ပီ ဒူအီ ဟပ် ခြိဝ် ခဲင် ငဝ်၊ ထာရွင် တဲး န့ ဘွတ်။ 17 န့ ဘော ပီ၊ အန် ဂူင့် န့ဆူက် အန်၊ တဲး အန် ဆူက် ယွိုမ် ငှုဝ် ခဲင် ကာင်နဝ်း၊ တဲး န့ ဂိတ် မီ ဘူင့် ငှုဝ် ဒီလူယ်။ ဟဲ့ ဟွတ့်၊ အန် ဒီ ကာဇု ငှုဝ် တီ ခဲင် ဘု အန်။ ဒျီပ် ငှုဝ် အန် ယီ တူ လုဝ်။ အန် ဒီ ဒုဝ့် ဝဲန် ခဲင် ငဝ် အီ တူ နပ် ဒီ ယတ်။” 18 ဘော ဂြုဝ်း တီ ဘော ပီ မာနုဝ် မျုဝ် ဟဝ် ဘဲန် မျုဝ် ဘဲန် မျုဝ်၊ အာယောဟာန် ဝီ မာနုဝ် ဂေ ဒွန် အီ လွင် ဂြုဝ်း ဇဝ်ဖြာ အီ တဲး ဒူအီ ဘဲန် နဝ်း ဒါခိုယ်။
19 အာယောဟာန် မိူဝ် ဟဲ့ ကာလာင် ဒီ ခုန်ဒီခမ် အာဟေရူတ် လွင် ဒိုဝ်း အန် နာင် ဟေရုဝ်ဒီ၊ တဲး အန် ဘဲန် အီဘိုန့် အန်။ ခါ အာတ့် နာင် ဟေရုဝ်ဒီ မုး အီဘိုန့် ဝါ အာဟေရူတ်။ အာယောဟာန် ဟဲ့ တဝ်း ဒီ အန် လွင် ပီ ဘူင် အန် တီ အာဝ် မွှိုမ်။ အာယောဟာန် မိူဝ် ဟဲ့ ကာလာင် ဒီ အန် လွင် ပီ ဘူင် အန် အီ တူ မွှိုမ် ဒွန် မျုဝ်။ 20 ဟဲ့ ဟွတ့် အန် တူ အိုင်၊ အန် ဟဲ့ ဝီ ခြွင့် ဒါ ဆာရာ အာယောဟာန် ခဲင် ကာပိုမ်။
လွင် ဇဝ် ယေဆူ ခမ် ဒီ စိုပ် ခဲင် အိုမ်
21 ဝါယ် အန် တီ ဒေါ ခမ် ဒူအီ ဒီ စိုပ် ခဲင် အိုမ်၊ ဇဝ် ယေဆူ တး ဒူင် ကွယ် ဂေ။ အန် တဲး အာယောဟာန် စိုပ် ဘော အန် ခဲင် အိုမ်။ ဒေါ ဆာခိုဝ် အန်၊ ဂါင်ဟြာဝ် ဘော န့ဝိုဝ်း။ 22 နဝ်း ဖွိုမ် ဇဝ်ဖြာ ဘော လေး လူင် ကွယ် ဒဲင် ဒုဝ် ဘူင့် အန်။ နဝ်း ဖွိုမ် ဇဝ်ဖြာ တွိုန် ဟဲ့ ပီ မာဘ့လူယ် အီ တး လူင် ဒီ အန်။ ဒေါ အန် တီ န့ ဘော မိုဝ်း ဂြုဝ်း အီ လေး ခဲင် ဂါင်ဟြာဝ်။ န့ တဝ်း၊ “မဲ မုး ဂွန် ပီ ရွက့် အုဝ်။ ပီ ဘူင် မဲ ဟဲ့ လဝ့် နဝ်း အုဝ်။”
လွင် ဇာရာင် ဂေ ဂုန့် ဒင် ဇဝ် ယေဆူ အီ လာယ် ဒါမ်
23 ဒေါ စုး ဇဝ် ယေဆူ ဘူင် ဂါန် အန်၊ အာဆာက် အန် မုး ကာဘက် အူယ် ဂိုဝ် ဆီနမ်။ ဂေ ဒူအီ ဘောကာဂ့လျီတ် ထာင် အန် မုး ဂွန် အာယုဝ်ဆဲပ်။
အာယုဝ်ဆဲပ် ယီ မုး ဂွန် အာအေလီ။
24 အာအေလီ မုး ဂွန် အာမာထတ်။ အာမာထတ် မုး ဂွန် အာလေဝီ။ အာလေဝီ မုး ဂွန် အာမေလာခီ။ အာမေလာခီ မုး ဂွန် အာယာနာယ်။ အာယာနာယ် မုး ဂွန် အာယုဝ်ဆဲပ် ပေါ ဝီ။
25 အာယုဝ်ဆဲပ် တီ ဝီ မုး ဂွန် အာမာထာထီယာ။ အာမာထာထီယာ မုး ဂွန် အာမူတ်။ အာမူတ် မုး ဂွန် အာနာဟူမ်။ အာနာဟူမ် မုး ဂွန် အာဟေဆာလီ။ အာဟေဆာလီ မုး ဂွန် အာနာဂါယ်။
26 အာနာဂါယ် မုး ဂွန် အာမာအာတ်။ အာမာအာတ် မုး ဂွန် အာမာထာထီယာ ပေါ ဝီ။ အာမာထာထီယာ တီ မုး ဂွန် အာဆေမေအိန်။ အာဆေမေအိန် မုး ဂွန် အာယုဝ်ဆေက်။ အာယုဝ်ဆေက် မုး ဂွန် အာယုဝ်ဒါ။
27 အာယုဝ်ဒါ မုး ဂွန် အာယုဝ်နာန်။ အာယုဝ်နာန် မုး ဂွန် အာရေဆာ။ အာရေဆာ မုး ဂွန် အာဇေရူဘာဘေန်။ အာဇေရူဘာဘေန် မုး ဂွန် အာဆေထီအေန်။ အာဆေထီအေန် မုး ဂွန် အာနေရီ။
28 အာနေရီ မုး ဂွန် အာမေလာခီ။ အာမေလာခီ မုး ဂွန် အာထီအာတ်။ အာထီအာတ် မုး ဂွန် အာခုဝ်ဆမ်။ အာခုဝ်ဆမ် မုး ဂွန် အာအေမာဒမ်။ အာအေမာဒမ် မုး ဂွန် အာအေရာ။
29 အာအေရာ မုး ဂွန် အာယောဆူ။ အာယောဆူ မုး ဂွန် အာလီအေဇေန်။
အာလီအေဇေန် မုး ဂွန် အာယုဝ်ရိမ်။ အာယုဝ်ရိမ် မုး ဂွန် အာမာထတ်။ အာမာထတ် မုး ဂွန် အာလေဝီ။
30 အာလေဝီ မုး ဂွန် အာဆီမေအူန်။ အာဆီမေအူန် မုး ဂွန် အာယူဒါ။ အာယူဒါ မုး ဂွန် အာယုဝ်ဆဲပ်။ အာယုဝ်ဆဲပ် မုး ဂွန် အာယုဝ်နာမ်။ အာယုဝ်နာမ် မုး ဂွန် အာအေယာခိမ်။
31 အာအေယာခိမ် မုး ဂွန် အာမေလေအာ။ အာမေလေအာ မုး ဂွန် အာမေနာ။ အာမေနာ မုး ဂွန် အာမတ်ထာထာ။ အာမတ်ထာထာ မုး ဂွန် အာနာထာန်။ အာနာထာန် မုး ဂွန် အာဒါဝိတ်။
32 အာဒါဝိတ် မုး ဂွန် အာယေဆေ။ အာယေဆေ မုး ဂွန် အာအုဝ်ဘေတ်။ အာအုဝ်ဘေတ် မုး ဂွန် အာဘုဝ်အာပ်။ အာဘုဝ်အာပ် မုး ဂွန် အာဆာလာမူန်။ အာဆာလာမူန် မုး ဂွန် အာနာဆူန်။
33 အာနာဆူန် မုး ဂွန် အာမီနာဒါပ်။ အာမီနာဒါပ် မုး ဂွန် အာဒါမိန်။ အာဒါမိန် မုး ဂွန် အာရာမ်။ အာရာမ် မုး ဂွန် အာဟေဇာရူန်။ အာဟေဇာရူန် မုး ဂွန် အာဖေရေတ်။ အာဖေရေတ် မုး ဂွန် အာယူဒါ။
34 အာယူဒါ မုး ဂွန် အာကူပ်။ အာကူပ် မုး ဂွန် အာဆဲက်။ အာဆဲက် မုး ဂွန် အာဘြာဟမ်။ အာဘြာဟမ် မုး ဂွန် အာထေန်ရာ။ အာထေန်ရာ မုး ဂွန် အာနာဟုဝ်။
35 အာနာဟုဝ် မုး ဂွန် အာဆေရုက်။ အာဆေရုက် မုး ဂွန် အာရေဂူ။ အာရေဂူ မုး ဂွန် အာဖေလေ။ အာဖေလေ မုး ဂွန် အာအေဘာ။ အာအေဘာ မုး ဂွန် အာဆေလာ။
36 အာဆေလာ မုး ဂွန် အာခေနန်။ အာခေနန် မုး ဂွန် အာဖာဆာတ်။ အာဖာဆာတ် မုး ဂွန် အာဆေမ်။ အာဆေမ် မုး ဂွန် အာနုဝ်။ အာနုဝ် မုး ဂွန် အာလာမ်။
37 အာလာမ် မုး ဂွန် အာမေထူဆာလာ။ အာမေထူဆာလာ မုး ဂွန် အာဟေန်။ အာဟေန် မုး ဂွန် အာယာရေတ်။ အာယာရေတ် မုး ဂွန် အာမာဟာလာလေန်။ အာမာဟာလာလေန် မုး ဂွန် အာခေနန်။
38 အာခေနန် မုး ဂွန် အာအေန်။ အာအေန် မုး ဂွန် အာဆေတ်။ အာဆေတ် မုး ဂွန် အာဒါမ်။ အာဒါမ် တွိုန် ယီ မုး ဂွန် ဇဝ်ဖြာ။