ခါန် 14
လွင် အီဘိုန့် ဖဝ်း နာမန် အုး ငှုန် ဒီ ဇဝ် ယေဆူ
3 ဒေါ ကွယ် ဇဝ် ယေဆူ ခဲင် ရဝ် ဘေထာနီ အန် ကွယ် ဟူမ် ဘူမ် ခဲင် ကာင် ဒူအီ အူ ဝီ၊ အီ စိူဝ် အာဆီမူန်၊ အီ ဒွိုမ် မိုဝ်း ဆဝ် ဒု။a ဒေါ ကွယ် အန် ခဲင် ကာင် တီ၊ န့ မိုဝ်း အီဘိုန့် အူ ဝီ၊ အန် ဂူင့် တး ကာပဝ် နာမန် အုး ငှုန်။ နာမန် အုး ငှုန် တီ ဟဲ့ ငဝ်း တာင် ကာဆဝ်။ န့ မုး နာမန် နာဒူ ဒီလူယ် အီ ဟဲ့ ဘွတ် ကာဆဝ်။ အီဘိုန့် တွိုန် ဘော တး ဇမ် ဒူင် ကွယ် ဇဝ် ယေဆူ၊ အန် ဝီ ကာဘက် ကာပဝ် တီ၊ ဝီ လှုဝ် ဒီ ဂိန့် ဇဝ် ယေဆူ။
4 ဂေ ဒူအီ အီ ယိုဝ် ပီ ဘူင် အန် တီ၊ ဂေ တူ အိုင်။ ဂေ ဝီ လာယ် ကာလာင် တဝ်း၊ “မှဝ် န့ ပါယ် ပီ ဝဲန် အန် နာမန် အုး ငှုန် တီ၊ တဲး န့ စှိုမ် ဒီလူယ် ဒီလာယ်။း 5 ဆေ အီ ယွင့် နာမန် အုး ငှုန် တီ၊ ဂေ တူ ဝန် ဒီ ပွိုန် ရွိုန် ဇဲတ် အူယ် မာယဝ်း ဘူင့်။b ဟဲ့ ဟွတ့်၊ ဝီ ပွိုန် ဒွါ ရွိုန် တီ ဒီ ဒူအီ ဂိန်။” ပါယ် တီ ဂေ ဝီ အေး အီဘိုန့် တွိုန်။
6 ဇဝ် ယေဆူ ဝီ တဝ်း၊ “ကွဲ့ အေး အန် ပါယ် တီ။ မှဝ် န့ ပါယ် ပီ ဘူင် ဘေ၊ တဲး နဝ်း အန် လိုဝ်။ အန် ဟဲ့ ဘူင် နာ မွှိုမ် နာ ဘွတ် ဒီ အုဝ်။ 7 ဂေ ဒူအီ ဂိန်၊ ဂေ ဒီ ကွယ် ရိုမ် ဒူပ် ဘေ ဆေဆေ။ ဆေ ဘေ ဘော မိုဝ်း နဝ်း ဆီ စွယ် ဒူအီ ဂိန်၊ ဘေ ပွိုန် ဒီ စွယ် ဂေ ဆေဆေ။ န့ ယီ မုး အုဝ်၊ အုဝ် တူ ကွယ် ရိုမ် ဒူပ် ဘေ ဆေဆေ။ 8 အီဘိုန့် တီ ဟဲ့ ဘူင် ခဲ့ ပီ ပွိုန် အန် ဘူင်။ အန် ဟဲ့ လှုဝ် နာမန် အုး ငှုန် တီ ဒီ ဒုဝ် ဘူင့် အုဝ်။ အန် ဟဲ့ မ့ပြာယ် ဒုဝ် ဘူင့် အုဝ် အာတ့် ယမ် အုဝ်၊ တဲး ဂေ ပွိုန် ဒီ ဒိပ် အုဝ်။ 9 အုဝ် တဝ်း အာခ်ု ဒီ ဘေ၊ ဂေ ဒီ ကာလာင် ဒါရာ အီ တဲး နဝ်း ဒူအီ ဒါခိုယ်၊ တဲး ဒူအီ ဒွန် နာ ဒွန် ပ့လုဝ့် ကော နပ်။ ဂေ ဒီ ကာလာင် နာ မှဝ်၊ ဂေ ဒီ ဘော ခဲ လွင် ပဲ့ ဟဲ့ ဘူင် အီဘိုန့် တီ၊ တဲး ဒွန် အီ ကော နပ် လွင် အန်။”
10 ဇဝ် ယေဆူ ဟဲ့ ဟွတ့် ကာလာင် ဂြုဝ်း တီ၊ န့ မုး အာယူဒတ် အီ စိူဝ် ဘော အာဆာခါရီအူတ်။ အန် ဘော ဘာ့ ခဲင် ဖိုင် ဒီဘဲ ဇဝ် ယေဆူ ဂိုဝ် ဒီ အာ ဝီ။ အန် ဟာဝ် ဒူင် ကွယ် ဂေ ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ၊ တဝ်း ဒီ အာပ် ဇဝ် ယေဆူ ဒီ ဂေ။ 11 ဂေ ဒါ တာင် ဘော ခူယ် ကာဆဝ် ဒေါ ယိုဝ် ဂေ ဂြုဝ်း ပီ ကာလာင် အာယူဒတ် ဒီ ဂေ။ ဂေ ဘော လာယ် ဖြူမ် ဒီ ဒွါ ရွိုန် ဒီ အန်။ ဟဲ့ ဟွတ့် ပန် တီ အာယူဒတ် ဝီ ဟြေတ့် ပီ ဒီ ပါယ် အန် ဒီ အာပ် ဇဝ် ယေဆူ ဒီ ဂေ ဒါ တာင်။
လွင် ပီ ဒီ ဟူမ် တဲး န့ လှုဝ်း ဇဝ် ယေဆူ
12 န့ ယီ ဇမ် ဆီငဲ ဒေါ ဂုဝ် ဒေါ ဟူမ် ဂေ ခါမုန် တူ ဟပ် ဆီနမ် ဘြး။ ဆီငဲ တီ ဂေ လုဝ် ငဝ်း ဂွန် မာဘူ တဲး ဂေ ဟူမ် ရိုမ်။ ဒေါ အန် တီ ဂေ ဒီဘဲ ဇဝ် ယေဆူ ဝီ ဒီမွှတ် ဇဝ် ယေဆူ။ ဂေ တဝ်း၊ “နာ မှဝ် ယေ လုဝ် ရဲန် မာဘူ၊ တဲး အေ ပွိုန် ဒီ ဟူမ် ရိုမ်။း”
13 ပန် တီ ဇဝ် ယေဆူ ဝီ စ်ု ဒီဘဲ အန် အာ ဝီ။ အန် တဝ်း ဒီ ဂါယ်၊ “တဲး ဘာယ် ဟာဝ် ခဲင် မိူင်။ ဘာယ် ဒီ ဘော ကာတုန့် ဒူအီ အူ ဝီ အီ ဂွတ် ကာပဝ် အိုမ်။ ဘာယ် လုဝ် ဒူပ် ဒူအီ ဝီ တီ။ 14 ဆေ အန် ဘော လိုပ် ခဲင် ကာင်၊ ဘာယ် ဝီ လုဝ် တဝ်း ဒီ ဒါ ကာညာ ကာင် တီ၊ ‘ဒါ ဆာရာ ယာယ် ဒီမွှတ် မဲ၊ မှဝ် ဟူင် ဒူင် ဒီ ဟူမ် ယေ ဘ့လွယ် လှုဝ်း အေ ဇဝ်ဖြာ ဒေါ ကာလုဝ်း အန် ကာင် အီ။း ဘော အန် ဘော ဒီဘဲ အန် လုဝ် ဟူမ် ရိုမ်။’ 15 ဆေ ဘာယ် တဝ်း ပါယ် တီ၊ ဒါ ကာညာ ကာင် တီ ဒီ ဝီ နှဲ ဒီ ဘာယ် ဟူင် တာင် အီ ကွယ် ခြွင့် နာ ဒဲင်။ ခဲ့ ပီ လုဝ် အေ ဟဲ့ ဟွတ့် ဘ့လေး အုန် တူတ့် နာ ခဲင် ဟူင် တီ။ ခဲင် ဟူင် တီ ဘာယ် လုဝ် ရဲန် ပီ ဒီ ဟူမ် အေ။”
16 ဂါယ် ဒီဘဲ ဇဝ် ယေဆူ ဝီ ဟာဝ် လိုပ် ခဲင် မိူင်၊ ဝီ ယိုဝ် တူတ့် ဒွန် မျုဝ် ပီ ကာလာင် ဇဝ် ယေဆူ ဒီ ဂါယ်။ ခုဝ်၊ ဂါယ် ဝီ ရဲန် ဘ့လွယ် တီ၊ တဲး ဂေ ပွိုန် ဒီ ဟူမ် ရိုမ်။
19 ဇဝ် ယေဆူ ဟဲ့ ဟွတ့် ကာလာင် ဂြုဝ်း တီ၊ န့ ဝီ ဘဲန် နဝ်း က့လိုဝ် ဒီ ဂေ။ ဘဲန် ဝီ ဘဲန် ဝီ ဝီ တဝ်း ဒီ အန်၊ “အာဝ် မုး အုဝ်။”
20 ဇဝ် ယေဆူ ဝီ တဝ်း၊ “န့ မိုဝ်း ဒူအီ အူ ဝီ အီ ကွယ် ကာတဲ ဘေ ဂိုဝ် ဒီ အာ ဝီ။ ဘော အန် ဘော အုဝ် ဇုတ် ခါမုန် ယာယ် ခဲင် ဆီလယ့် အူ ဘ့လ။ 21 န့ မုး အုဝ်၊ အီ ဟဲ့ ဘဲန် ဂွန် ဒူအီ၊ အုဝ် ဒီ ခမ် တဲး န့ ဒူပ် ပီ ဒွိုမ် ဒဲမ် ခဲင် ဘပ် ဇဝ်ဖြာ။ န့ ယီ မုး ဒူအီ အီ အာပ် အုဝ်၊ အန် ဒီ ဇမ် ဒုက် တာင်။ ဆေ အန် တူ ဂွိုတ် ဘဲန် ဒူအီ၊ ဟဲ့ ဝဲ မွှိုမ် ဒီ အန်။”
22 ဒေါ ဟူမ် ဂေ ဘ့လွယ် တွိုန်၊ ဇဝ် ယေဆူ ဘော ဒိုဝ်း ခါမုန်၊ ဝီ ဒါင် ဂုင် ဂေဇူ ဒီ ဇဝ်ဖြာ။ ဟဲ့ ဟွတ့်၊ အန် ကာဘက် ခါမုန် တီ၊ ဝီ ဒွါ ဒီ ဒီဘဲ အန်။ အန် တဝ်း၊ “ဒိုဝ်း ဟူမ် ခါမုန် နီ။ န့ မုး ဒုဝ် ဘူင့် အုဝ်။”
23 ဟဲ့ ဟွတ့် ပန် တီ အန် ဘော ဒိုဝ်း ဆီလယ့်၊ ဝီ ဒါင် ဂုင် ဂေဇူ ဒီ ဇဝ်ဖြာ၊ ပီ ဝီ ဒွါ ဂေ ဒျီင်။ ဂေ ဒွန် အီ ဘော ဒျီင်။
24 အန် တဝ်း၊ “အာတီ မုး နှာမ် အုဝ်၊ အီ လေး ခဲင် ဒုဝ် ဘူင့် အုဝ် အာဒါ ဂေ ဒူအီ ကိူန်။ န့ ဘျ ဒီ ဘေ လွင် ကာဒိက် ဆတ်ဇာ ပီ ဒွါ ဇဝ်ဖြာ ဒီ ဘေ။ 25 အုဝ် မိူဝ် တဝ်း အာခ်ု ဒီ ဘေ။ အူ ဆိန့် ဒေါ တီ နီ အုဝ် အာဝ် ဟူ ဒျီင် အိုမ် မာငုန် ဇိုဝ် တီ။ ကော ဇမ် ဆီငဲ ဒီ ကွယ် အုဝ် ခဲင် မိူင် ပီ အိုပ် ဇဝ်ဖြာ၊ အုဝ် ဒီ ဝီ ဒျီင် အီ ကာမာယ်။”
26 ပန် တီ ဂေ ဝီ တဝ်း မှုဝ် ထမ်။ ဟဲ့ ဟွတ့်၊ ဂေ ဘော လေး ခဲင် မိူင်၊ ဟာဝ် ဒဲင် နွန် ဟေ နာမန်။
လွင် ဇဝ် ယေဆူ ကာလာင် ဂြုဝ်း ဒီ အာပေတာရူ
27 ဇဝ် ယေဆူ ဝီ တဝ်း ဒီ ဂေ၊ “ဘေ ဒွန် အီ ဒီ တဝ် ဝဲန် အုဝ်။ ခုဝ်၊ န့ ဟဲ့ ဒဲမ် အုန် ခဲင် ဘပ် ဇဝ်ဖြာ၊
‘ပန် ဒီ မး အုဝ် ဒူအီ အီ ပီ ဒူအီ ဟျီင် မာဘူ၊ ဂေ မာဘူ ဒီ တဝ် ကာယဝ်း ဟာဝ် ဘဲန် ပ့လုဝ့် ဘဲန် ပ့လုဝ့်။’
28 အုဝ် ဟီ ဟွတ့် ယမ်၊ ဟီ ဝီ ယိတ့် ဝီ အိမ်၊ အုဝ် ဒီ ယဲတ့် ဒီ အာတ့် ဘေ ဟာဝ် အိူင် ဂါလီလေ။”
29 ဇဝ် ယေဆူ ဟဲ့ ဟွတ့် ကာလာင် ဂြုဝ်း တီ၊ အာပေတာရူ ဝီ တဝ်း၊ “ဆေ ဒွန် အီ ဒီ ဘော တဝ် ဝဲန် မဲ၊ အုဝ် တူ ဝဲန် မဲ ဒေါ မှဝ်။”
30 ဇဝ် ယေဆူ ဝီ တဝ်း ဒီ အန်၊ “အုဝ် တဝ်း အာခ်ု ဒီ မဲ။ ခဲင် မှိုဝ် နီ၊ အာတ့် ကာတွုန် အျီန် အာ ဇေန့် မဲ ဒီ ဘော တဝ်း အူယ် ဇေန့်၊ မဲ တူ နပ် အုဝ်။”
31 အာပေတာရူ ဝီ ပီရဲန့် အန်၊ ဝီ တဝ်း၊ “ဆေ အုဝ် ဘော လုဝ် ယမ် ရိုမ် ဒူပ် မဲ၊ အုဝ် တူ တဝ်း ဒေါ မှဝ်၊ အုဝ် တူ နပ် မဲ။” ဘော အာပေတာရူ ဘော ဂေ ဒီဘဲ ဇဝ် ယေဆူ ဒွန် အီ တဝ်း ပါယ် တီ။
လွင် ဇဝ် ယေဆူ ဆာခိုဝ်
35 အန် ဟဲ့ ဟွတ့် တဝ်း ပါယ် တီ၊ အန် အူ ဝီ ဝီ ဟာဝ် ကာပွါ ပေါ အီ စဲက်။ ဟဲ့ ဟွတ့် အန် ဝီ ခြိုပ်ခြဝ် ဒဲင် ကာဒါယ်၊ ဆာခိုဝ် ဒီ ဇဝ်ဖြာ၊ မှာန့်၊ ဆေ န့ ပွိုန်၊ ကွဲ့ တဲး အန် ကာဒုး ဒုက် အီ ဒီ တး နာ အာတ့်။ 36 အန် တဝ်း၊ “အိုယ် မဲ ဂုန့် အုဝ်။ မဲ နပ် ဒီ ဘူင် တူတ့် ဒွန် မျုဝ်။ ဆေ န့ ဘော ပွိုန်၊ ကွဲ့ တဲး အုဝ် ခမ် ဒုက် တာင် အီ ဒီ တး။ န့ ပီ ဆီလယ့် အီ မိုဝ်း ဂူင်။ ကွဲ့ တဲး အုဝ် လုဝ် ဒျီင်။ အုဝ် ယီ တူ မှာန့် မဲ ဘူင် ပီ အိုင် အုဝ်။ တဲး မဲ ဘူင် ပီ အိုင် မဲ။”
37 အန် ဟဲ့ ဟွတ့် ဆာခိုဝ် ပါယ် တီ၊ အန် ဝီ ဟာဝ် ဒူင် ကွယ် ဒီဘဲ အန်။ ဂေ ယီ ဟဲ့ အိတ် ဆီချာ။ အန် ဝီ တဝ်း ဒီ အာပေတာရူ၊ “အိုယ် အာဆီမူန်၊ မှဝ် န့ ပါယ် ပီ အိတ် မဲ။း အူ နာရီ မိူဝ်၊ မဲ တူ ပွိုန် ဘ်ု အုဝ်။း 38 ဘေ လုဝ် ဘ်ု ဘော ဆာခိုဝ်၊ ကွဲ့ တဲး ဘေ ကာလိုပ် ဒေါ ကာဆုး ဘုဝ် ကာနမ် ဘေ ဘူင် မှာပ်။ နဝ်း ဖွိုမ် ဟဲ့ ဆီ ဘူင် နာ မွှိုမ်။ န့ ယီ မုး ဒုဝ် ဘူင့်၊ အန် တူ ခမ် ဒီ ဘူင်။”
39 ဇဝ် ယေဆူ ဟဲ့ ဟွတ့် ကာလာင် ဂြုဝ်း တီ၊ အန် ဝီ ဟာဝ် ပေါ အူ ဇေန့်၊ ဝီ ဆာခိုဝ် ပီ ခါ အာတ့်။ 40 ဒေါ ဝီ တး အန်၊ ဂေ ဒီဘဲ အန် ဝီ အိတ် ပေါ အူ ဇေန့်။ ခုဝ်၊ န့ ဘဲန် ဆီ အိတ် ကာဆဝ် ဒီ ဂေ။ ဂေ မိူဝ် တူ နပ် ပီ ဒီ ဝီ တဝ်း ဒီ ဇဝ် ယေဆူ။
41 ဝါယ် အန် တီ ဇဝ် ယေဆူ ပီ ဝီ ဟာဝ်၊ ပီ ဝီ ဝေန့် ပေါ အူ ဇေန့်။ အန် ဝီ တဝ်း ဒီ ဂေ၊ “ဘေ ပီ ဆီ နဲ့ အိတ်။ စူ ခဲ့ တီ။ န့ ဟဲ့ ဟွတ့် ဇမ် အာခြာဝ် ဒီ တး မှေတ့် ဂေ ဒီ အုဝ်။ ဒေါ တီ နီ ဂေ ဒီ မှေတ့် အုဝ်၊ အီ ဟဲ့ ဘဲန် ဂွန် ဒူအီ။ ဂေ ဒီ အာပ် အုဝ် ဒီ ဒူအီ မိုဝ်း မှာပ်။ 42 ယိတ့် ဒေါ တီ နီ၊ တဲး အေ ဟာဝ်။ ဒူအီ အီ ဒီ အာပ် အုဝ် ဒီ ရန်ဆူ အုဝ်၊ အန် ဟဲ့ ဟွတ့် တး။”
လွင် ဒီ မှေတ့် ဂေ ဇဝ် ယေဆူ
43 ဒေါ ကာလာင် ဇဝ် ယေဆူ ဂြုဝ်း တီ၊ န့ မိုဝ်း အာယူဒတ်၊ အီ ဘာ့ ခဲင် ဖိုင် ဒီဘဲ ဇဝ် ယေဆူ ဂိုဝ် ဒီ အာ ဝီ။ အန် တး ဇမ် ဒူင် ကွယ် ဂေ။ ဂေ ဒူအီ ကိူန် ဟဲ့ တး ရိုမ် ဒူပ် အန်။ ဂေ ဂူင့် မာပွါ့ လာင် ဂေ န့ကြွုန်။ ဂေ ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ ဘော ဂေ ဒါ ဆာရာ အီ မာနုဝ် ဒါရာ ယူဒါ၊ ဘော ဂေ ဒါ တာင် အီ အိုပ် မိူင်၊ ဂေ ဟဲ့ တိုယ် ဒူအီ တီ ဘော ဖိုင် ဟာဝ် ဒူင် ကွယ် ဇဝ် ယေဆူ။
44 ဒူအီ အီ ဒီ အာပ် ဇဝ် ယေဆူ ဒီ ဒါ တာင်၊ အန် ဟဲ့ ကာလာင် အုန် ဒီ ဂေ၊ “ဒူအီ ပီ ဒီ အုး အုဝ်၊ ဘေ လုဝ် မှေတ့်။ ဟဲ့ ဟွတ့်၊ တဲး ဘေ တိုယ် အန် ဟာဝ် ဇမ် ဒီ အာတ့် ဒါ တာင် အေ။” 45 ပန် တီ အာယူဒတ် တွိုန် ဝီ ဟာဝ် ဆိူဝ် ဒီ ဇဝ် ယေဆူ တဝ်း၊ “အိုယ် ဆာရာ။” ဟဲ့ ဟွတ့်၊ အန် ဝီ အုး ဇဝ် ယေဆူ။ 46 အန် ဟဲ့ ဟွတ့် ဘူင် ပါယ် တီ၊ အူ ဇေန့် ဂေ ဝီ မှေတ့် ပက် ဇဝ် ယေဆူ။ 47 ဒေါ အန် တီ န့ မိုဝ်း ဒူအီ အူ ဝီ၊ အီ ကွယ် ရိုမ် ဒူပ် ဂေ။ အန် ဝီ ထွတ် မာပွါ့ လာင် အန်၊ ဒဲပ် ဝဲန် ဟျုဝ့် ဒဲစေန့် ဒါ တာင် အီ အိုပ် တူတ့် ဒူအီ အီ လှူ ဒီ ဇဝ်ဖြာ။
48 ဇဝ် ယေဆူ ဝီ တဝ်း၊ “ဘေ ဟဲ့ တး မှေတ့် အုဝ် ပီ ဘေ မှေတ့် ဒူအီ အီ ယဲတ့် ဒါ ဇူန်။ ဘေ ဂူင့် မာပွါ့ လာင် ဂေ န့ကြွုန်၊ တဲး ဘေ ပွိုန် ဒီ မှေတ့် အုဝ်။ 49 ဒွန် ဆီငဲ၊ ဒွန် ဆီငဲ အုဝ် ဟဲ့ ဒွိုမ် ကွယ် ကာတဲ ဘေ၊ မာနုဝ် ဒါရာ ဇဝ်ဖြာ ခဲင် ဝဲင် ဟုဝ် ဇဝ်ဖြာ။ ဘေ ယီ တူ မှေတ့် အုဝ်။ ဒေါ တီ နီ န့ ယီ ဘဲန် တူတ့် ပီ ဒွိုမ် ဒဲမ် အုန် ခဲင် ဘပ် ဇဝ်ဖြာ။” 50 ဇဝ် ယေဆူ ဟဲ့ ဟွတ့် ကာလာင် ပါယ် တီ၊ ဒွန် အီ အီ ကွယ် ရိုမ် ဒူပ် အန် ဝီ တဝ်၊ အာဝ် ဟူ ဒူပ် အန်။
51 န့ ယီ မိုဝ်း ကာညူမ် အူ ဝီ အီ ဟဲ့ ဒူပ် ဇဝ် ယေဆူ။ အန် ဟဲ့ ကန် ဟိုပ် အူ ဖိူန်၊ တူ မိုဝ်း ဒီ စှိုပ် ခြိုင် မာဆေ နာ ခဲင်။ 52 ဂေ တဝ်း ဒီ မှေတ့် ဘော အန်။ အန် ယီ တဝ် ဟာဝ် ဒုဝ် ဂ့လ။ ဂေ ဘော ပွိုန် မီ ဟိုပ် အန် တီ။
လွင် ဒါ တာင် ဆုင်ဖျာတ် အာမူ ဇဝ် ယေဆူ
55 ဂေ ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ၊ ဘော ဂေ ဒူအီ ဟဝ် အီ ဆုင်ဖျာတ် အာမူ အီ၊ ဂေ ဝီ လာယ် ဆင်ချာင် မှဝ် ဂေ ဒီ ပါယ် ဒီ ဖျာက် ဇဝ် ယေဆူ၊ တဲး ဂေ ပွိုန် ဒီ ငဝ်း ဝဲန် အန်။ ဂေ ယီ တူ နပ် ပီ ဒီ ပါယ် ဒီ ဖျာက်။ 56 န့ ယီ မိုဝ်း ဒူအီ ကိူန်၊ ဂေ ကာလုဝ် ဒီ ကာလာင် ဆက်ဆေ လွင် ဇဝ် ယေဆူ။ ပီ ကာလာင် ဂေ ဘဲန် မျုဝ် ဘဲန် မျုဝ် ယီ တူ ကာဒူပ်။
57 ပန် တီ န့ မိုဝ်း ဒူအီ မင် အီ၊ ဂေ ကာလုဝ် ဒီ တဝ်း၊ 58 “ယေ ဟဲ့ ယိုဝ် အန် တဝ်း၊ ‘ဟုဝ် ဇဝ်ဖြာ တီ မုး ပီ ဘူင် ဒူအီ။ အုဝ် ယီ ပျာတ့် ဝဲန် ဟုဝ် ဇဝ်ဖြာ တီ၊ တဲး န့ လိုဝ် တူတ့်။ အူယ် ဆီငဲ အုဝ် ဒီ ဝီ ဆမ် ဟုဝ် ဇဝ်ဖြာ ကာမာယ်၊ ပီ တူ ဘူင် ဒူအီ။’” 59 ဘော ဂေ ဒူအီ ဘဲန် ဝီ ဘဲန် ဝီ တဝ်း ပါယ် တီ။ ဂေ မိူဝ် တူ ပဲ ဒီ ကာလာင်၊ တဲး လွင် ဒါင် အန် လေး အူ မျုဝ်။
60 ဟဲ့ ဟွတ့်၊ ဒါ တာင် အီ အိုပ် တူတ့် ဒူအီ အီ လှူ ဒီ ဇဝ်ဖြာ၊ အန် ဝီ ယိတ့်၊ ဝီ ကွယ် ဒီ အာတ့် ဂေ ဒွန် အီ။ အန် ဒီမွှတ် ဇဝ် ယေဆူ တဝ်း၊ “မဲ တူ မိုဝ်း ပီ ဒီ ကာလာင် ဂြုဝ်း မာဆေ။း မာဆေ ပီ ဒီ ဝျီ့ မဲ ဒီ ဂေ ဒူအီ တီ။း”
61 အန် ဟဲ့ ဟွတ့် ကာလာင် ပါယ် တီ၊ ဇဝ် ယေဆူ ယီ တူ တဝ်း မာဆေ။
ပေါ အူ ဇေန့် ဒါ တာင် အီ အိုပ် တူတ့် ဒူအီ အီ လှူ ဒီ ဇဝ်ဖြာ၊ အန် ဝီ ဒီမွှတ် ဇဝ် ယေဆူ။ အန် တဝ်း၊ “န့ မှာန်၊ မုး မဲ ဒူအီ ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ။း ဟဲ့ မှာန်၊ မုး မဲ ဂွန် ဇဝ်ဖြာ ပီ အိူပ် အေ။း”
62 ဇဝ် ယေဆူ တဝ်း၊ “ဟဲ့ မှာန်။ ဘေ ဒီ ဘော ယိုဝ် ဒူအီ အီ ဟဲ့ ဘဲန် ဂွန် ဒူအီ။ အန် ဒီ ဝီ ကွယ် ဘ့လာက် အာအး အန် ဇဝ် အီ မိုဝ်း ပွုန် တာင်။ ဘေ ဒီ ဘော ယိုဝ် အန် ကွယ် ခဲင် န့အု၊ ဝီ တး လူင် ဒဲင် ကာဒါယ်။”
63 ဇဝ် ယေဆူ ဟဲ့ ဟွတ့် ကာလာင် ဂြုဝ်း တီ၊ ဒါ တာင် အီ အိုပ် တူတ့် ဒူအီ အီ လှူ ဒီ ဇဝ်ဖြာ ဘော ရူ ကာဆဝ်၊ ဝီ ကာယာတ့် ဆီတုဝ် တာင် အန်။ အန် တဝ်း၊ “အေ အာဝ် ဟူ မိုဝ်း ဒီ လုဝ် အာဆေ ကာလာင် ဆက်ဆေ လွင် အန်။ 64 အေ ဘောကာဂ့လျီတ် ဟဲ့ ဟွတ့် ယိုဝ် ဂြုဝ်း အန်။ န့ မုး ဂြုဝ်း ခဲန့် ဇဝ်ဖြာ။ မာဆေ ပီ ထာင် ဘေ။း” ပန် တီ ဒွန် အီ တဝ်း၊ အန် မိုဝ်း မှာပ်၊ လုဝ် ငဝ်း ယမ် အန်။ 65 ဂေ ဟဲ့ ဟွတ့် တဝ်း ပါယ် တီ၊ န့ မိုဝ်း ဒူအီ မင် အီ၊ ဂေ စုး ဒီ ပတ့် နာ အန်။ ဂေ ဝီ ကာဘိတ် ငါယ် အန်၊ မး အန်၊ တာ ကာလိုမ် ဂေ၊ ဝီ တဝ်း၊ “တဲး ယေ နပ်၊ အာဆေ မး မဲ။” ဘော ဂေ ဒူအီ ဘ်ု အန် ဝီ မး ကာဆဝ် အန်။
လွင် အာပေတာရူ တဝ်း အန် တူ နပ် ဇဝ် ယေဆူ
66 ဒေါ ကွယ် အာပေတာရူ ခဲင် ဝဲင် ဟုဝ် တွိုန်၊ န့ မိုဝ်း အီဘိုန့် အူ ဝီ၊ အီ မုး မှာယ် ဒါ တာင် အီ အိုပ် တူတ့် ဒူအီ အီ လှူ ဒီ ဇဝ်ဖြာ။ 67 အန် တး ယွတ် အာပေတာရူ၊ အန် ဘော ယိုဝ် အာပေတာရူ ဝါတ် ငဝ်၊ အန် ဝီ ယွတ် ဆီချာ တဝ်း၊ “ဘော မဲ ဟဲ့ ဒွိုမ် ကွယ် ရိုမ် ဒူပ် ဒူအီ အီ တး မိူင် နာဆာရေတ့် တွိုန်၊ အီ စိူဝ် အာယေဆူ။”
68 အန် ဟဲ့ ဟွတ့် တဝ်း ပါယ် တီ၊ အာပေတာရူ ဝီ တဝ်း၊ “အုဝ် တူ နပ် မာဆေ ပီ တဝ်း မဲ။” ဟဲ့ ဟွတ့်၊ အန် ဝီ လေး ခဲင် ဝဲင်၊ ဝီ ကွယ် ကာတတ် မာလုဝ်း ဝဲင်။ ဒေါ အန် တီ အျီန် မိူဝ် ကာတွုန်။
69 အီဘိုန့် တွိုန် ဝီ ယိုဝ် အန်၊ ဝီ တဝ်း၊ ဒီ အီ ဟဝ်၊ “ဘော အန် ကွယ် ခဲင် ဖိုင် ဂေ။” 70 ပေါ အူ ဇေန့် အာပေတာရူ ဝီ တဝ်း၊ “န့ တူ မှာန်။” အာဝ် လှေန့် ဂေ ဒူအီ အီ ကွယ် ကာတတ် အန် ဝီ တဝ်း၊ “ဟဲ့ မှာန်၊ မဲ မုး ဒူအီ ခဲင် ဖိုင် အန်။ မဲ မိူဝ် တး အိူင် ဂါလီလေ။”
71 ဝါယ် အန် တီ အာပေတာရူ ဝီ ဒိူင် ဒုဝ် အန် တဝ်း၊ “အုဝ် တူ နပ် ဒူအီ ပီ တဝ်း ဘေ။”
72 အန် ဟဲ့ ဟွတ့် ကာလာင် ဂြုဝ်း တီ၊ အျီန် ဝီ ကာတွုန် ပေါ အူ ဇေန့်။ ပန် တီ အာပေတာရူ ဝီ လှုဝ်း ဂြုဝ်း ဇဝ် ယေဆူ ဒေါ ကာလာင် အန်၊ “အာတ့် ကာတွုန် အျီန် အာ ဇေန့်၊ မဲ ဟဲ့ ဟွတ့် တဝ်း အူယ် ဇေန့်၊ မဲ တူ နပ် အုဝ်။” ဒေါ ဝီ လှုဝ်း အန် ဂြုဝ်း တီ၊ အန် ဝီ လေး နာ ရေတ့်၊ ဝီ ယာမ်။