2 ဇဝ် ယေဆူ ဝီ တဝ်း၊ “ဟဲ့ မုး။ ဟုဝ် ဂေ တီ ဟဲ့ တာင် ဘော စှိတ်။ န့ ဒီ ဇမ် အာခြာဝ် ဒေါ တး အီ ဟဝ်၊ ဘူင် တဲး န့ လိုဝ် တူတ့်။ မာဝ် အူ ဘူင့် မိူဝ် အာဝ် ဟူ ကွယ် ဒူင် ဘြိမ် အန်။”

3 ပန် တီ ဇဝ် ယေဆူ ဟဲ့ ဟာဝ် ကွယ် ဒီ နွန် ဟေ နာမန်၊ အီ ကွယ် လာယ် ကာဆိူဝ် ဒီ ဟုဝ် ဇဝ်ဖြာ။ ဒေါ အန် တီ န့ မုး အာပေတာရူ၊ အာယာကူပ်၊ အာယောဟာန် ဘော အာအန်ဒါရူ။ ဂေ ဝီ ဒီမွှတ် ဇဝ် ယေဆူ ကွဲ့ တဲး အီ ဟဝ် ထူမ်။ 4 ဂေ တဝ်း၊ “တဲး မဲ ကာလာင် ဒီ ယေ၊ ဒေါ မှဝ် န့ ဒီ ဘဲန် ပီ တဝ်း မဲ ဇိုဝ် တီ။ တဲး ယေ နပ် လက်ဆာနာ အန် အီ တဲး ယေ နပ်၊ အာခြာဝ် ပီ တဝ်း မဲ ဟဲ့ ကာတတ် ဒီ တး။”

5 ဇဝ် ယေဆူ ဝီ တဝ်း ဒီ ဂေ၊ “ဘေ လုဝ် ဆာဒိက်၊ ကွဲ့ တဲး အီ ပွိုန် ဒီ ကာလုဝ် ဘေ။ 6 န့ ဒီ မိုဝ်း ဘဲန် ဝီ ဘဲန် ဝီ၊ ဂေ ဒီ တး ဂါဝ် စိူဝ် အုဝ်။ ဂေ ဒီ ဘော တဝ်း၊ ဂေ ဟဲ့ မုး အုဝ်၊ အန် ဇဝ် ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ။ ပါယ် တီ ဂေ ဒူအီ ကိူန် ဒီ ကာလိုပ် ဒီ ညှိုမ် ဂြုဝ်း ပီ ကာလုဝ် ဂေ။ 7 ဆေ ဘေ ဘော ထူမ် ဆာဒါင် လွင် ဒူအီ လာယ် ကာဂုဝ်း၊ ကွဲ့ တဲး ဘေ ယုဝ်။ န့ လုဝ် ဘဲန် ဇိုဝ် တီ ဒွန် မျုဝ်။ ဒေါ အန် တီ ယီ ညှမ် ဇမ် အာခြာဝ် ဒီ တူတ့် ဒွန် မျုဝ်။ 8 န့ ဒီ မိုဝ်း ဒူအီ ဘဲန် မျုဝ် ဘဲန် မျုဝ်၊ ဒီ လာယ် ဘဲန် ရန်ဆူ။ ဘော ခုန်ဒီခမ် အူ ကာဒင် ဒီ ဝီ ကာဂုဝ်း ဒီ ခုန်ဒီခမ် ပေါ အူ ကာဒင်။ ဘော မာအိမ် ဒီယေန့် ဘဲန် ပ့လုဝ့် ဘဲန် ပ့လုဝ့်။ ဂေ ဒူအီ ဒီ ဘော အေတ့် ပီ ဒီ ဟူမ်။ ဆေ ဒူအီ ကာဒုး ဒုက် ဇိုဝ် တီ ဒွန် မျုဝ်၊ န့ ဒီ ပီ အီဘိုန့် ဆဝ် ဒီ မိုဝ်း ဂွန်။

9 ဘေ ဘော လုဝ် ဆာဒိက်။ ဂေ ဒီ အာပ် ဘော ဘေ ဒီ ဒါ တာင် အီ အိုပ် မိူင်။ ဂေ ဒူအီ အာယူဒါ ဒီ ဘော မး ကာဆဝ် ဘေ ခဲင် ဇူင် ဂေ။ ကူပ် ညှိုမ် ဘေ ဒီ အုဝ်၊ ဘေ ဒီ ကွယ် ဒီ အာတ့် ဒါ ကာညာ ဘော ခုန်ဒီခမ် အီ အိုပ် မိူင်၊ တဲး ဘေ ပွိုန် ဒီ ကာလာင် လွင် အုဝ် ဒီ ဂေ။ 10 အာတ့် အန် တီ၊ ဂေ ဒူအီ ယီ လုဝ် ဟာဝ် ဒွန် နာ ဒွန် ပ့လုဝ့် ကာလာင် ဒါရာ ဇဝ်ဖြာ အီ တဲး ဒူအီ ဘဲန် နဝ်း ဒါခိုယ်၊ တဲး ဒူအီ ဒွန် မျုဝ် ကော နပ် လွင် အန်။ 11 ဆေ ဂေ ဒီ မှေတ့် ဘေ၊ ဝီ တဝ်း ဒီ ဆုင်ဖျာတ် အာမူ ဘေ၊ ဘေ ကွဲ့ တဲး နဝ်း ဘေ ကာဟွာ့၊ ကွဲ့ ဇေန့်ဇာ ဒီ အာတ့် ဂြုဝ်း ပီ ဒီ ကာလာင် ဘေ။ ဆေ ဟီ ဇမ် အာခြာဝ် အန်၊ ဘေ လုဝ် ကာလာင် ဂြုဝ်း အီ လိုပ် ခဲင် နဝ်း ဘေ။ အာတီ အာဝ် မုး ဂြုဝ်း ဘေ။ နဝ်း ဖွိုမ် ဇဝ်ဖြာ ဒီ ဟပ် ဂြုဝ်း အန် ခဲင် နဝ်း ဘေ။

12 န့ ဒီ ဘော မိုဝ်း အူကတ် အူဝါ၊ ဂေ ဒီ လာယ် အာပ် ဂေ ဒီ ဒါ တာင်၊ တဲး ဂေ ဒါ တာင် ငဝ်း အာဆာက် ဂေ။ ဘော ဂုန့် ဒီ အာပ် ဂွန် အန်။ ဘော ဂွန် ဒီ ဝဲန် ဂြုဝ်း ဂုန့် မာ အန်၊ အာပ် ဂါယ် ဒီ ဒါ တာင်၊ တဲး ဂါယ် ယမ်။ 13 ကူပ် ညှိုမ် ဘေ ဒီ အုဝ်၊ ဂေ ဒူအီ ဒွန် အီ ဒီ ဘော ဇွင့် ဘေ။ အာဆေ ယီ မိုဝ်း နဝ်း မန် ဘော ခမ် တူတ့် ဒွန် မျုဝ်၊ တဲး န့ ကော ဇမ် ပန် ဒီ တူတ့် ဇာတ် တီ၊ ဇဝ်ဖြာ ဒီ ချွတ် အာဆာက် အန်။

14 န့ ဒီ ဘော မိုဝ်း ကြုဝ် အီ မွှိုမ် ယုဝ်၊ အီ တဲး တူတ့် ဒွန် မျုဝ် ကာပျာတ့် လိုဝ်။ ဆေ ဘေ ယိုဝ် အီ ဘ့လေး ကြုဝ် တီ ခဲင် ဒူင် တူ ကာအာပ် အန် ကွယ်၊ ဘေ လုဝ် တဝ် ဟာဝ် ပေါ ပ့လုဝ့်။ (အာဆေ တိး လွင် အန် တီ လုဝ် ဆာဒိက်၊ တဲး ဆီဖဝ် အန် လိုဝ်း)။ အာဆေ ကွယ် ခဲင် အိူင် ယူဒါ လုဝ် တဝ် ဟာဝ် ဒဲင် နွန်။ 15 ဆေ ဒူအီ ကွယ် နာ ဒဲင် ကာင်၊^a ဆေ အန် လူင်၊ ကွဲ့ တဲး အန် ဝီ ဟာဝ် လိုပ် ခဲင် ကာင်၊ ဒိုဝ်း ကြုဝ် အန် အီ ကွယ် ခဲင် ကာင်။ တဲး အန် တဝ် ဟာဝ် အူ ဇေန့်။ 16 အာဆေ ကွယ် ခဲင် မာန် အန်၊ ကွဲ့ တဲး အန် ဟာဝ် ဝေန့် ခဲင် ကာင် ဒိုဝ်း ဆီတုဝ် အန်၊ တဲး အန် တဝ် ဟာဝ် အူ ဇေန့်။ 17 ဒေါ အန် တီ ဂေ အီဘိုန့် အီ တူ အး၊ ဘော အီဘိုန့် အီ မိုဝ်း ဂွန် အာင အီ ညွှတ် ပူ၊ ဂေ ဒီ ဇမ် ဒုက် တာင်။ 18 ဘေ ယီ လုဝ် ဆာခိုဝ်၊ ကွဲ့ တဲး ဒုက် တာင် ဇိုဝ် တီ တး ဒေါ မုး အာခြာဝ် ဂတ် ဂျီတ်။ 19 အူ ဆိန့် ဒေါ ဂုဝ် အန်၊ ဒေါ ဘူင် ဘ့လေး ဇဝ်ဖြာ ကာဒါယ်၊ ကော ဇမ် အာတိုဝ် နီ၊ န့ တူ ဒွိုမ် မိုဝ်း ဒုက် တာင် ဇိုဝ် တီ ဒဲင် ကာဒါယ်။ ဝါယ် အန် တီ မိူဝ်၊ န့ တူ ဝီ မိုဝ်း ဒုက် ဇိုဝ် တီ ဒေါ မှဝ်။ 20 ဆေ ဇဝ်ဖြာ တူ တဲး ဒုက် ဇိုဝ် တီ ဝီ စေဝ် တူတ့်၊ န့ တူ ဝီ မိုဝ်း အာဆေ အီ ဒီ လွတ် ယမ်။ ကူပ် မိုဝ်း ဂေ ဒူအီ ပီ ရဝ်း ဇဝ်ဖြာ၊ ဇဝ်ဖြာ တူ တဲး ဒုက် တာင် တီ ကွယ် လှေန့်။ 21 ပန် ဒီ ဇမ် အာခြာဝ် တီ၊ န့ ဒီ မိုဝ်း ဒူအီ တဝ်း ဒီ ဘေ၊ ‘ယွတ် နာ နီ၊ အန် ဇဝ် ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ ဟဲ့ ကွယ် ဒီ နီ။’ ဂေ ဘော တဝ်း၊ ‘ယွတ် နာ ဒွယ်၊ အန် ဇဝ် ကွယ် နာ ဒွယ်။’ ဆေ ဘေ ယိုဝ် ဒူအီ တဝ်း ပါယ် တီ၊ ကွဲ့ ညှိုမ် ဂြုဝ်း ဂေ။ 22 န့ ဒီ မိုဝ်း ဒူအီ၊ ဂေ ကာလုဝ် တဝ်း၊ ဂေ မုး ဒူအီ ဒီ ချွတ် အာဆာက် အီ။ ဂေ ဒီ ဘော ကာလုဝ် ဒီ တဝ်း၊ ဂေ မုး ဒူအီ အီ ဘျာန် ဂြုဝ်း ဇဝ်ဖြာ။ ဂေ ဒီ ဘော ဘူင် နာ မွှိုမ် အာမ် ကာဆဝ် ဘဲန် မျုဝ် ဘဲန် မျုဝ်။ ဂေ ဒီ ဘော ထေဝ် ဒီ ကာလုဝ် ဒီ ဒူအီ ပီ ရဝ်း ဇဝ်ဖြာ။ ဂေ ယီ တူ ပဲ ဒီ ဘူင် တဲး ဂေ ဒူအီ ပီ ရဝ်း ဇဝ်ဖြာ ညှိုမ် ဂြုဝ်း ပီ ကာလုဝ် ဂေ တီ။ 23 ခုဝ်၊ ဘေ လုဝ် ဆာဒိက်။ အုဝ် ဟဲ့ ဟွတ့် ကာလာင် တူတ့် ဒွန် မျုဝ် ဒီ ဘေ၊ တဲး ဘေ နပ် ဒီ အာတ့်၊ န့ ဒီ ဘဲန် ပါယ် မှဝ်။

24 ဝါယ် အန် တီ ဂေ ဒူအီ ဒဲင် ကာဒါယ် ဟီ ဟွတ့် ခမ် ဒုက် တာင် ဇိုဝ် တီ၊ ဘော ဆီငဲ ဒီ အပ် ဝွင့်။ ဘော မာဂျီန် အာဝ် ဟူ မိုဝ်း ဘ့လာင် အန်။

25 ဘော ဆီမန့် ဒီ ရး စုဝ်း ခဲင် ဘ့လေန့်။ ဘော ပွုန် အီ တဲး ဆီမန့် ကွယ် ဒဲင် ဘ့လေန့်၊ အာဝ် ဟူ ပီ ဘြိမ်၊ တဲး န့ ဒီယုး တူတ့်။

26 ဆေ န့ ဘော ဘဲန် ပါယ် တီ ဒွန် မျုဝ်၊ ဒူအီ ဒီ ယိုဝ် ဒါ အီ အီ ဟဲ့ ဘဲန် ဂွန် ဒူအီ။ အန် ဒီ တး လူင် ခဲင် န့အု။ အန် ဒီ ဘော ဘျ ခဲ့ တာင် ပွုန် အန် ဘော အာဖုင် ဒင်ခုဝ် အန်၊ တဲး ဒွန် အီ ပွိုန် ဒီ ယိုဝ်။ 27 အန် ဒီ ဘော တိုယ် အာမူ အာမာတ် အန်၊ တဲး ဂေ ဒဲ့ ဒူအီ ပီ ရဝ်း ဇဝ်ဖြာ အီ ကွယ် ဒွန် နာ ဒွန် ပ့လုဝ့် ဖွုန် ဘ့လာက်။ ဂေ အီ ကွယ် ဒူင် ဆိူတ် ဒဲင် ကာဒါယ် ဘော ဒူင် ဆိူတ် ခဲင် ဂါင်ဟြာဝ်၊ တဲး ဂေ ဘောကာဂ့လျီတ် တး ကာဇု တူတ့် ဒီ အာတ့် အုဝ်၊ အီ ဟဲ့ ဘဲန် ဂွန် ဒူအီ။

35 ပါယ် တီ ဘော ဘေ လုဝ် ဘ်ု ဆာဒိက် ဆေဆေ၊ ကူပ် တူ နပ် ဘေ ဒေါ မှဝ် အန် ဇဝ် ဒီ တး။ ယုဝ် အန် ဒီ တး ဘာ ဒီ အပ်၊ ယုဝ် အန် တး ကာတဲ ဆွိုမ်၊ ယုဝ် အန် ဒီ တး ဒေါ ကာတွုန် အျီန်၊ ယုဝ် အန် ဒီ တး ဘာင် ဒီ ဝး၊ ဘေ တူ နပ်။ 36 ကွဲ့ တဲး ဘေ အိတ် ဒေါ တး အန်။ 37 ပီ တဝ်း အုဝ် ဒီ ဘေ၊ အုဝ် ဘော တဝ်း၊ တဲး ဒူအီ ဒွန် အီ ထူမ်။ ဘေ လုဝ် ဘ်ု ဆာဒိက်။” ခဲ့ တီ ဇဝ် ယေဆူ ကာလာင် လွင် အာခြာဝ် ဒီ တး။