ခါန် 27
လွင် အာယူဒတ် ဟွယ် မဲင် အန်
1 ဆိန့်ဝး စေဝ် ဂေ ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ ဘော ဂေ ဒါ တာင် အီ ဆုင်ဖျာတ် အာမူ အီ၊ ဂေ ဘောကာဂ့လျီတ် လာယ် ဖြူမ်။ ဂေ ဟဲ့ ဆုင်ဖျာတ် ဒီ ငဝ်း ယမ် ဇဝ် ယေဆူ။ 2 ဂေ ဘော ပက် ဒဲ အန်၊ ဝီ တိုယ် အန် ဟာဝ် ဒူင် ကွယ် အာဖီလာတ် အီ မုး ဒါ တာင် ရုဝ်မာ အီ အိုပ် မိူင်။ ဂေ ဘော အာပ် ဇဝ် ယေဆူ ဒီ အာဖီလာတ် တီ၊ တဲး အန် ဆုင်ဖျာတ်။
3 န့ ယီ မုး အာယူဒတ် အီ ဟဲ့ အာပ် ဇဝ် ယေဆူ ဒီ ရန်ဆူ အန်။ ဒေါ ယိုဝ် အန် လွင် ဂေ ဟဲ့ ဟွတ့် ဆုင်ဖျာတ် ဒီ ငဝ်း ယမ် ဇဝ် ယေဆူ၊ အန် ဟဲ့ ဝီ ကာလုတ့် နဝ်း၊ ဝီ ဘဲန် နဝ်း က့လိုဝ် ကာဆဝ်။ အန် ဝီ ဝေန့် ဒူင် ကွယ် ဂေ ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ ဘော ဂေ ဒါ တာင် အီ အိုပ် မိူင်၊ ဝီ ဒွါ ဝိဝ် ရွိုန် အူယ် ဂိုဝ် ဘူင့် ပီ ဒွါ ဂေ ဒီ အန်။ 4 အန် တဝ်း ဒီ ဂေ၊ “အုဝ် ဟဲ့ ဘူင် မှာပ်။ အုဝ် ဟဲ့ အာပ် ဒူအီ အီ တူ မိုဝ်း ဒီ ဘူင် မှာပ်၊ တဲး ဘေ ပွိုန် ဒီ ငဝ်း အန်။” ဂေ ဝီ တဝ်း၊ “အာတီ အာဝ် ဘာ့ ယေ။ န့ မုး အာရေ မဲ။”
5 ပန် တီ အာယူဒတ် တွိုန် ဝီ ဒိုဝ်း ရွိုန် တွိုန်၊ ဝဲန် ခဲင် ဝဲင် ဟုဝ် ဇဝ်ဖြာ၊ ဝီ လေး ဟာဝ် အူ ဇေန့်။ အန် ဝီ ဟာဝ် နာ ရေတ့် မိူင်၊ ဝီ ဟာဝ် ဟွယ် မဲင် အန်၊ တဲး အန် ယမ်။
6 ဂေ ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ တွိုန်၊ ဂေ မိူဝ် ဂဲပ် ကာဇု ရွိုန် တွိုန်။ ဂေ ဝီ တဝ်း၊ “ရွိုန် တီ မုး ရွိုန် အီ ဟဲ့ ဘဲန် ရုး အီ ငဝ်း အာဆာက် အီ။ ခုဝ်၊ ဒါရာ တူ တဲး အေ ဟပ် ရွိုန် တီ ခဲင် ရွိုန် ပီ လှူ အီ ခဲင် ဟုဝ် ဇဝ်ဖြာ။” 7 ခုဝ်၊ ဂေ ဝီ တဝ်း ဒီ ဒိုဝ်း ရွိုန် တီ၊ ဝီ စိုဝ်း မာန် အူ ပ့လုဝ့် အီ မုး ကြုဝ် ဒါ အီ ဘူင် ကာလုဝ့် ကာဒါယ်။ ဂေ တဝ်း ဒီ ဒိပ် ဒူအီ ယမ် အီ တူ မုး ဒူအီ အာယူဒါ ခဲင် ကာဒါယ် တီ။ 8 ခုဝ် အန် တီ ကော ဇမ် အာတိုဝ်၊ ဂေ ဘော တဲး ဒူင် တီ စိူဝ် “ဒူင် လေး နှာမ်။” 9 ပါယ် တီ၊ န့ ဘော ဘဲန် ပီ ပီ ဒွိုမ် ဒဲမ် အုန် ခဲင် ဘပ် ဇဝ်ဖြာ။ အီ မုး ဘပ် ပီ ဒဲမ် ဒူအီ အီ ဘျာန် ဂြုဝ်း ဇဝ်ဖြာ၊ အီ စိူဝ် အာယေရေမီ။ န့ တဝ်း၊ “ဂေ ဒိုဝ်း ရွိုန် အူယ် ဂိုဝ် ဘူင့် အီ မုး ငဝ်း ပီ ဒွါ ဂေ ဒူအီ အီဆာရေလ အာဒါ အာဆာက် အန်။ 10 အန် ဇဝ် ဟဲ့ စ်ု အုဝ်၊ တဲး ဂေ တာ ရွိုန် တီ၊ စိုဝ်း မာန် အီ မုး ကြုဝ် ဒူအီ အီ ဘူင် ကာလုဝ့် ကာဒါယ်။ ဂေ မိူဝ် ဘူင် ပါယ် တီ။”
လွင် အာဖီလာတ်
11 န့ ယီ မုး ဇဝ် ယေဆူ၊ ဂေ ဟဲ့ ဟွတ့် တိုယ် အန် ဇမ် ဒီ အာတ့် အာဖီလာတ် တွိုန် အီ မုး ဒါ ကာညာ ရုဝ်မာ အီ အိုပ် မိူင် ဂေ။ ဒါ ကာညာ တွိုန် ဝီ ဒီမွှတ် အန် တဝ်း၊ “ဟဲ့ မှာန် မုး မဲ ခုန်ဒီခမ် အီ အိုပ် ဂေ ဒူအီ အာယူဒါ။း” 12 ဇဝ် ယေဆူ ဝီ တဝ်း၊ “ဟဲ့ မှာန် ပီ တဝ်း မဲ။” ဂေ ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ ဘော ဂေ ဒါ တာင် အီ အိုပ် မိူင်၊ ဂေ ဝီ ဖျာက် ဇဝ် ယေဆူ။ ဒေါ အန် တီ အန် တူ တဝ်း မာဆေ။ 13 ခုဝ်၊ အာဖီလာတ် ဝီ တဝ်း ဒီ အန်၊ “မဲ တူ ယိုဝ် ဂြုဝ်း ဂေ၊ ပီ ကာလာင် ဂေ လွင် မဲ။း” 14 ဇဝ် ယေဆူ ယီ တူ တဝ်း မာဆေ။ အူ ဒဲ မိူဝ် အန် တူ ဂြုဝ်း။ အာတီ တဲး အာဖီလာတ် အာမ် ကာဆဝ်။
15 န့ ယီ မိုဝ်း ဟိတ် ဒါ တာင် ရုဝ်မာ အီ အိုပ် မိူင် အီဆာရေလ အူ မျုဝ်။ ဒေါ ဘူင် ဂေ ဘ့လွယ် တီ၊ အန် ခ့ဝါင် တဲး ဂေ ဒူအီ ကိူန် ရဝ်း ဒူအီ အူ ဝီ အီ ကွယ် ခဲင် ကာပိုမ်။ ဟဲ့ ဟွတ့်၊ အန် ဝီ ဘ့လေး ဒူအီ ပီ ရဝ်း ဂေ တီ။ 16 ဒေါ ကွယ် ဇဝ် ယေဆူ ဒီ အာတ့် အန်၊ န့ ဘော မိုဝ်း ဒူအီ အူ ဝီ ခဲင် ကာပိုမ် အီ စိူဝ် အာဘာရာဘ။ အန် ဟဲ့ ဒွိုမ် ဘူင် အီ ဟာယ် ကာဆဝ် ဘဲန် မျုဝ် ဘဲန် မျုဝ်။ 17 ဒေါ မိုဝ်း ဒူအီ ကိူန် အီ ဟဲ့ တး ကာဇု ဒူင် ကွယ် အာဖီလာတ်၊ အန် ဝီ ဒီမွှတ် ဂေ တဝ်း၊ “ဘေ ဆီ တဲး အုဝ် ဘ့လေး အာဆေ။း ဘေ ဆီ တဲး အုဝ် ဘ့လေး အာဘာရာဘ တွိုန်။း ဘော၊ ဘေ ဆီ တဲး အုဝ် ဘ့လေး အာယေဆူ နီ၊ အီ စိူဝ် ဘော အီ ချွတ် အီ။း” 18 အာဖီလာတ် ကာလာင် ဂြုဝ်း တီ။ ခုဝ်၊ အန် နပ် ဆီချာ၊ ဂေ ဟဲ့ အာပ် ဇဝ် ယေဆူ ဒီ အန် ကူပ် တူ အိုင် ဂေ ဇဝ် ယေဆူ။
19 ဒေါ ကွယ် အာဖီလာတ် ဒဲင် မာလာင် အီ မုး ဒူင် ပီ ဆုင်ဖျာတ် အန် အာမူ အီ၊ န့ မိုဝ်း အီဘိုန့် အန်၊ အန် စ်ု အူ ဝီ ကာလာင် ဂြုဝ်း ဒီ အာဖီလာတ်။ အန် တဝ်း၊ “ကွဲ့ ဘူင် မာဆေ ဒီ ဒူအီ တီ။ အန် တူ လုတ့် မာဆေ။ အာတိုဝ် အုဝ် ဟဲ့ ကာဒုး ဒုက် တာင် ခဲင် နဝ်း ဒေါ မ့ဘာဝ် အုဝ် လွင် အန်။”
20 ဂေ ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ ဘော ဂေ ဒါ တာင် အီ အိုပ် မိူင်၊ ဂေ ယီ ကာဆုး ဒူအီ ကိူန်၊ တဲး ဂေ မှာန့် အာဖီလာတ် ဘ့လေး အာဘာရာဘ၊ တဲး အန် ခ့ဝါင် ဂေ ငဝ်း ဇဝ် ယေဆူ။
21 ပန် တီ အာဖီလာတ် ဝီ ဒီမွှတ် ဂေ။ အန် တဝ်း၊ “ဂါယ် အာ ဝီ၊ ဘေ ဆီ တဲး အုဝ် ဘ့လေး အာဆေ။း” ဂေ ဝီ တဝ်း၊ “ဘ့လေး အာဘာရာဘ။”
22 အာဖီလာတ် ဝီ တဝ်း၊ “ဆေ န့ ပါယ် တီ၊ မာဆေ ပီ လုဝ် ဘေ အုဝ် ဘူင် ဒီ ဒူအီ အီ စိူဝ် အီ ချွတ် အီ။း” ဂေ ဝီ တဝ်း၊ “ငဝ်း ယမ် အန် ဒဲင် ရွင့် ကာဝဲ့။”
23 အာဖီလာတ် ဝီ တဝ်း၊ “မှဝ် န့ ပါယ် ပီ ဆီ ငဝ်း ဘေ အာဆာက် အန်။း အန် တူ လုတ့် မာဆေ။” ဂေ ယီ ဝီ ဒတ် တာင် လွှိုမ် ခါ အာတ့် တဝ်း၊ “ငဝ်း ဝဲန် အန် ဒဲင် ရွင့် ကာဝဲ့။”
24 ပန် တီ အာဖီလာတ် ကော နပ်၊ ဂေ တူ ထူမ် ဂြုဝ်း အန်။ န့ ပီ ဂေ ဆီ ဘူင် ဆီနန် ဆီနိူင်။ ခုဝ်၊ အန် ဒိုဝ်း အိုမ်၊ ဝီ ဘာယ် ဒဲ အန် တဲး ဒွန် အီ ယိုဝ်၊ တဲး ဂေ နပ်၊ အန် တူ ဖြူမ် ပီ ဆီ ဘူင် ဂေ။ အန် ဘော တဝ်း ဒီ ဂေ၊ “အာဝ် မုး အုဝ်၊ အီ ဆီ ငဝ်း အာဆာက် ဒူအီ တီ။ န့ မုး ဘေ။ ဘေ အီ ဒီ လုဝ် ခမ် မှာပ် တီ။ အာဝ် မုး မှာပ် အုဝ်။”
25 ဂေ ဒူအီ ဝီ တဝ်း၊ “ယေ ဟဲ့ ဆီ ငဝ်း ဝဲန် အန်။ တဲး ဘော ယေ ဘော လှုက်လှာန် ယေ ခမ် မှာပ် အန် တီ။”
26 ဂေ ဟဲ့ ဟွတ့် တဝ်း ပါယ် တီ၊ အာဖီလာတ် မိူဝ် ဘ့လေး အာဘာရာဘ၊ တဲး န့ ဒူပ် ပီ အိုင် ဂေ။ အန် ယီ စ်ု ဒါ ဆိုက် ဆီဘျြီ့ ဇဝ် ယေဆူ။ ဟဲ့ ဟွတ့်၊ အန် ခ့ဝါင် ဂေ ငဝ်း ယမ် အန် ဒဲင် ရွင့် ကာဝဲ့။
27 ပန် တီ ဂေ ဒါ ဆိုက် ရုဝ်မာ ဝီ ဒိုဝ်း ဇဝ် ယေဆူ၊ ဝီ တိုယ် အန် ဇမ် ဒူင် ကွယ် ဂေ ခဲင် ဟုဝ် အာဖီလာတ်။ ဂေ ဝီ ဒဲ့ ကာဇု ဂေ ဒါ ဆိုက် ဘော ဖိုင်။ 28 ပန် တီ ဂေ ဘုတ့် ဝဲန် ခြိုင် အန်၊ ဝီ တဲး အန် စှိုပ် ခြိုင် ရေန့် ဂဲ၊ အီ မုး ခြိုင် ပီ တာ ခုန်ဒီခမ်။ 29 ဟဲ့ ဟွတ့်၊ ဂေ ဝီ ဒိုဝ်း ယွုန် မာအာတ့်၊ ဘူင် မင်ဂိုမ်၊ စှိုပ် ဒီ ဂိန့် ဇဝ် ယေဆူ။ ဂေ ဘော တဲး အန် ဂူင့် န့ကြွုန်။ ဟဲ့ ဟွတ့်၊ ဂေ ဝီ ခြိုပ်ခြဝ် ဒီ အာတ့် အန်၊ ညိုင်ရာင် ကြိုပ် အန်၊ တဲး န့ မွှိုမ် ကာညး။ ဂေ တဝ်း၊ “အိုယ် မဲ ခုန်ဒီခမ် အီ အိုပ် ဒူအီ အာယူဒါ၊ တဲး မဲ ဂျာမ်ဆာ။” 30 ဂေ ဘော ပတ့် နာ အန်၊ ဒိုဝ်း န့ကြွုန်၊ မး ဂိန့် အန် ဘဲန် ဇေန့် ဘဲန် ဇေန့်။ 31 ဂေ ဟဲ့ ဟွတ့် ဘူင် ဇိုဝ် တီ ဘဲန် မျုဝ် ဘဲန် မျုဝ်၊ ဂေ ဝီ ဘုတ့် ဝဲန် ခြိုင် ရေန့် ဂဲ တွိုန်၊ ဝီ တဲး အန် စှိုပ် ခြိုင် ဘြိမ် အန်၊ ဝီ တိုယ် အန် လေး ခဲင် မိူင်၊ တဲး ဂေ ငဝ်း ယမ် အန် ဒဲင် ရွင့် ကာဝဲ့။
လွင် ဇဝ် ယေဆူ ယမ်
32 ဒေါ ဟာဝ် ဂေ ဒူပ် န့တေန့် အီ လေး ခဲင် မိူင်၊ ဂေ ဘော ယိုဝ် ဒူအီ အီ တး မိူင် ကူရေန့်။ အန် စိူဝ် အာဆီမူန်။ ဂေ စ်ု အန် ဂွတ် ရွင့် ကာဝဲ့ ပီ ဒီ ဒွက် ဒိုက် ဂေ ဇဝ် ယေဆူ။ 33 ဂေ ဘော ဟာဝ် ဇမ် အူ ပ့လုဝ့် အီ စိူဝ် ဂေါလဂုဝ်ထာ။ လွင် ဒါင် စိူဝ် တီ မုး “ဒူင် ကွယ် ကာအာင် ဂိန့်။” 34 ဒူင် ကွယ် ဂေ တီ၊ ဂေ ဝီ တဲး ဇဝ် ယေဆူ ဒျီင် အိုမ် မာငုန် အီ ဟဲ့ ကာဝ်ု ဆွင့် ဒုဝ် ဆတ်။ ဇဝ် ယေဆူ ယီ ထေဝ် အီ စဲက်။ အန် တူ ဒျီင်။ 35 ပန် တီ ဂေ ဝီ ဒွက် ဒိုက် အန် ဒီ ရွင့် ကာဝဲ့ တွိုန်။ ဂေ ဟဲ့ ဟွတ့် ဆမ် ရွင့်၊ ဂေ ဝီ ဒိုဝ်း ခြိုင် အန် ဝီ ကာယဝ်း ကာတဲ ဂေ။ ဂေ လာယ် ကာဒုဝ်၊ တဲး ဂေ နပ် အာဆေ ဒီ ပွိုန်။ 36 ဟဲ့ ဟွတ့်၊ ဂေ ဝီ တုတ့် ဘ်ု အန်။ 37 နာ ဒဲင် ဂိန့် အန်၊ ဂေ ဟဲ့ ဒိုက် ပဲ့ အီ တဲး အီ နပ် ပီ လုတ့် အန်။ န့ တဝ်း၊ “အန် မုး အာယေဆူ၊ ခုန်ဒီခမ် အီ အိုပ် ဒူအီ အာယူဒါ။” 38 န့ ဘော မိုဝ်း ဒါ ဇူန် အာ ဝီ။ ဘော ဂါယ် လုဝ် ယမ် ဒဲင် ရွင့် ကာဝဲ့။ ဂေ ဘော ဒိုက် ဂါယ် ဒီ ရွင့် ဂါယ်၊ အူ ဝီ ဘ့လာက် အာအး၊ ပေါ အူ ဝီ ဘ့လာက် အာဂ ဇဝ် ယေဆူ။ 39 န့ ယီ မိုဝ်း ဂေ ဒူအီ အီ တး ကာလုဝ်း ဒူင် တီ။ ဂေ ဘော ယိုဝ် ဇဝ် ယေဆူ ဒိုက် ဒီ ရွင့် ကာဝဲ့၊ ဂေ ဝီ တဝ်း ဂြုဝ်း တူ မွှိုမ် ဒီ အန်။ ဂေ မာဝတ် ဂိန့် ဂေ၊ ဝီ တဝ်း၊ 40 “မဲ ဟဲ့ တဝ်း၊ မဲ ပဲ ဒီ ဘူင် တဲး ဟုဝ် ဇဝ်ဖြာ ကာပျာတ့် လိုဝ်၊ အူယ် ဆီငဲ ဒီ ဝီ ဆမ် တဲး န့ ဟွတ့်။ ဒေါ တီ နီ၊ တဲး မဲ ချွတ် အာဆာက် မဲ။ ဆေ မဲ မုး ဂွန် ဇဝ်ဖြာ၊ တဲး မဲ လူင် ဒဲင် ရွင့် တီ။”
41 ဘော ဂေ ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ၊ ဘော ဂေ ဒါ ဆာရာ အီ မာနုဝ် ဒါရာ ယူဒါ၊ ဘော ဂေ ဒါ တာင် အီ အိုပ် မိူင်၊ ဂေ ဘော တဝ်း ပါယ် တီ၊ တဲး န့ မွှိုမ် ကာညး။ 42 ဂေ ဘော တဝ်း၊ “အန် ဟဲ့ ချွတ် အီ ဟဝ်၊ ဒေါ တီ နီ အာဝ် ပွိုန် ဝီ ချွတ် ဒုဝ် ဘြိမ် အန်။ အန် မုး ခုန်ဒီခမ် အီ အိုပ် ဒူအီ အီဆာရေလ။ တဲး အန် လေး လူင် ဒဲင် ရွင့် တီ။ ပန် တီ ယေ ယွ့ ညှိုမ် အန်။ 43 အန် ဘော ဘိုင် ဇဝ်ဖြာ။ ဆေ ဇဝ်ဖြာ အိုင်၊ တဲး အန် ချွတ် ဝီ တီ၊ အီ ဟဲ့ တဝ်း၊ အန် မုး ဂွန် ဇဝ်ဖြာ။” 44 ဘော ဒါ ဇူန် အာ ဝီ အီ ဒိုက် ဒီ ရွင့် အီ ကွယ် ဒီ ခူပ် ဇဝ် ယေဆူ၊ ဂါယ် ဝီ ကာလာင် ဂြုဝ်း တူ မွှိုမ် ဇိုဝ် တီ။
45 အူ ဆိန့် ဆီငဲ ကာတဲ ကော ဇမ် အူယ် နာရီ ဝါယ် ဆီငဲ ကာတဲ၊ န့ ဘော အပ် ဝွင့် ခဲင် မိူင် ဘော မိူင်။ 46 ယီ ဇမ် အူယ် နာရီ ဝါယ် ဆီငဲ ကာတဲ၊ ဇဝ် ယေဆူ ဝီ ဒတ် တာင်။ အန် တဝ်း၊ “အေလီ အေလီ လာမာ ဆာဘာထာနီ။” လွင် ဒါင် အန် တီ၊ န့ မုး၊ “မဲ ဇဝ်ဖြာ အုဝ်၊ မဲ ဇဝ်ဖြာ အုဝ်၊ မှဝ် န့ ပါယ် ပီ ဝဲန် မဲ ဒီ အုဝ်။” 47 ဂေ ဒူအီ အီ ကွယ် ကာတတ် ရွင့် ကာဝဲ့ တွိုန်၊ မင် အီ ဘော ထူမ် ဂြုဝ်း တီ။ ဂေ ဝီ တဝ်း၊ “အန် ဒဲ့ အာအေလီယ တွိုန်။” 48 အူ ဝီ ဝီ ကာဘ့လဲပ် ဟာဝ် အူ ဇေန့်၊ ဟာဝ် ဒိုဝ်း ဒိး အိုမ်၊ စိုပ် ခဲင် အိုမ် မာငုန် အီ ပြာင်၊ ဝီ စျှီပ် ဒီ ရာ ဟေ၊ ဝီ စုဝ့် တဲး ဇဝ် ယေဆူ ပွိုန် ဒီ ဒျီင်။ 49 အီ ဟဝ် ယီ တဝ်း၊ “တဲး အန် ကွယ် ပါယ် တီ၊ တဲး ယေ ယွတ်၊ ယုဝ် အာအေလီယ တွိုန် ဒီ တး ချွတ် အန်။”
50 ဇဝ် ယေဆူ ယီ ဒတ် တာင် ပေါ အူ ဇေန့်။ ဟဲ့ ဟွတ့်၊ ဖွိုမ် အန် ဘော တူတ့်။
51 ဒေါ အန် တီ န့ မုး ဘိက် တာင် အီ ဂွင့် ဘဲန် ရဲင် ခဲင် ဟုဝ် ဇဝ်ဖြာ တွိုန်။ ဘိက် ဂွင့် တီ ဘော ကာယာတ့် ရာင် အန်၊ ဘော စုး နာ ဒဲင်၊ လူင် ဇမ် အီ ခြိုမ်။ ဘော မာအိမ် ဘော ယေန့်၊ ဘော မာဝ် တာင် ကာလာတ့် လိုဝ်။ 52 ဘော ကာဒဝ် ဘာရေဝ် ဘဲန် ပ့လုဝ့် ဘဲန် ပ့လုဝ့် ဘော န့ ဝိုဝ်း ရာင် အန်။ ဘော ဒူအီ ဘွတ် အီ ဟဲ့ ဟွတ့် ယမ်၊ ဂေ ကိူန် ဝီ ယိတ့် ဝီ အိမ်။ 53 ဂေ ဝီ လေး ခဲင် ကာဒဝ် ဘာရေဝ် တွိုန်။ ဝါယ် ဝီ ယိတ့် ဝီ အိမ် ဇဝ် ယေဆူ၊ ဂေ ဒူအီ တီ ဘော ဟာဝ် လိုပ် ခဲင် မိူင် ဘွတ် တွိုန်၊ (အီ မုး မိူင် ယေရူဆာလဲမ်)၊ တဲး ဒူအီ ကိူန် ဘော ပွိုန် ဒီ ယိုဝ် ဂေ။
54 န့ ယီ မုး ဒါ ဘုဝ် အီ အိုပ် ဒါ ဆိုက် အူ မာယဝ်း ဝီ ဘော ဂေ ဒါ ဆိုက် အန် အီ ကွယ် ရိုမ် ဒူပ် အန်၊ ဘ်ု ဇဝ် ယေဆူ။ ဂေ ဟဲ့ ယိုဝ် မာအိမ် ယေန့်၊ ယိုဝ် ဘော ဘဲန် မျုဝ် ဘဲန် မျုဝ် ပီ ပါယ် ဒူင် ကွယ် ဂေ တွိုန်၊ ဂေ ဘော ယုဝ် ကာဆဝ်။ ဂေ ဝီ တဝ်း၊ “ဟဲ့ မှာန်၊ ဟဲ့ မုး၊ ဒူအီ တီ ဟဲ့ မုး ဂွန် ဇဝ်ဖြာ။”
55 ဂေ အီဘိုန့်၊ ဂေ ကိူန်၊ ဂေ ယီ ကွယ် တူင့် ဒီ တွိုန်၊ ယွတ် ဇဝ် ယေဆူ ဒေါ ကွယ် အန် ဒဲင် ရွင့်။ န့ မုး ဂေ အီဘိုန့် အီ ဟဲ့ ဒွိုမ် ဒူပ် ဇဝ် ယေဆူ အူ ဆိန့် ဒေါ လေး အန် ခဲင် အိူင် ဂါလီလေ တွိုန်။ ဂေ မိူဝ် ဟဲ့ လိုမ်လာ အန်။ 56 ကာတဲ ဂေ အီဘိုန့် တီ၊ န့ ဘာ့ ဘော နာင် မာရီ အီ တး မိူင် မာက်ဒါလာ ဘော နာင် မာရီ အီ မုး မာ အာယာကူပ် ဂါယ် အာယုဝ်ဆဲပ် ဘော မာ ဂါယ် အာ ဝီ အီ မုး ဂွန် အာဇေဘေဒေ။
57 ဘာ ဒီ အပ်၊ န့ ဘော မိုဝ်း ဒူအီ အူ ဝီ၊ အန် စိူဝ် အာယုဝ်ဆဲပ်။ အန် မုး ဒူအီ ခြမ်။ မိူင် ဘြိမ် အန် မုး မိူင် အေရီမာထီ။ အန် ဟဲ့ ဒွိုမ် ဘဲန် ဒီဘဲ ဇဝ် ယေဆူ အူ ဝီ။ 58 အန် ဝီ ဟာဝ် ဒူင် ကွယ် အာဖီလာတ်၊ ဝီ မှာန့်၊ တဲး အန် ပွိုန် ဒီ ဒိုဝ်း ဒုဝ် ဘူင့် ဇဝ် ယေဆူ လေး ဒဲင် ရွင့် တွိုန်။ အာဖီလာတ် ဘော စ်ု အီ၊ တဲး ဂေ ဒွါ ဒုဝ် ဇဝ် ယေဆူ ဒီ အန်။ 59 အာယုဝ်ဆဲပ် ဘော ဒိုဝ်း ဒုဝ် ဇဝ် ယေဆူ၊ ဒိုဝ်း ဘော ဘိက် ကာတမ် လုယ် အီ ဆီငါ၊ ဝီ ကာဘန် ဘိက် တီ ဒီ ဒုဝ် ဘူင့် ဇဝ် ယေဆူ။ 60 န့ ယီ မိုဝ်း ကာဒဝ် ဘာရေဝ် အီ မုး ကြုဝ် အန်။ န့ မုး ကာဒဝ် ကာမာယ် ပီ ဘူင် အန် ခဲင် ဒါအာင် မာဝ်။ အန် ဒိုဝ်း ဒုဝ် ဇဝ် ယေဆူ ဘ့လေး ခဲင် ကာဒဝ် တီ။ အန် ဘော ဘ့လေး မာဝ် တာင် ဒီ အာတ့် မာလုဝ်း ကာဒဝ် တွိုန်၊ တဲး န့ ကာဘိတ် ဆီချာ။ ဟဲ့ ဟွတ့်၊ အန် ဝီ ဝေန့် ဒီ ကာင် အန်။ 61 ဒေါ အန် တီ ဘော နာင် မာရီ အီ တး မိူင် မာက်ဒါလာ တွိုန် ဘော နာင် မာရီ ပေါ အူ ဝီ၊ ဂါယ် ကွယ် နာ အာတ့် ကာဒဝ် ဘာရေဝ် တွိုန်။
62 ပါ ခဲညှာ ယီ မုး ဆီငဲ ဝါယ် ရဲန် ဂေ ဒူအီ အာယူဒါ ပီ ဒီ ဟူမ် အာတ့် ဆီငဲ ဒီလှဝ်။ ဆီငဲ အန် တီ၊ ဂေ ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ ဘော ဂေ ဒူအီ ခဲင် ဖိုင် ဖာရီဆဲ၊ ဂေ ဝီ ဟာဝ် ဒူင် ကွယ် အာဖီလာတ်။ 63 ဂေ တဝ်း၊ “မဲ ဇဝ်၊ ယေ လှုဝ်း ဂြုဝ်း ဒူအီ အီ ဆီမာ ကာလုဝ် တွိုန်။ ဒေါ ဆီ အိမ် အန်၊ အန် ဟဲ့ ဒွိုမ် တဝ်း၊ ဝါယ် အူယ် ဆီငဲ အန် ဒီ ဝီ ယိတ့် ဝီ အိမ်။ 64 ခုဝ်၊ ယေ မှာန့်၊ တဲး မဲ စ်ု အီ၊ တဲး ဂေ ကာဘိတ် ရိတ် ကာဒဝ် ဘာရေဝ် တွိုန်၊ ကွဲ့ တဲး ဂေ ဒီဘဲ အန် တး ပြာ ဒုဝ် အန်၊ ကွဲ့ တဲး ဂေ ပွိုန် ဒီ ကာလာင် ဒီ အီ၊ အန် ဟဲ့ ဝီ ယိတ့် ဝီ အိမ်။ ဂေ ဟီ ပွိုန် ဒီ ဘူင် ပါယ် တီ၊ ပီ ကာလုဝ် ဂေ တီ ဟဲ့ ဝဲ တူ မွှိုမ် လွှိုမ် ပီ မာနုဝ် အာယေဆူ ဒေါ အိမ် အန်။”