1 ဝါယ် အန် တီ ဇဝ် ယေဆူ ဝီ ခဲ အူဖာမာ။ အန် တဝ်း၊ “ပန် ဒီ ဇမ် အာခြာဝ် ဒီ တူတ့် ဇာတ် နီ၊ ပန် ဒီ တး ဇဝ်ဖြာ အိုပ် ကာဒါယ်၊ န့ ဒီ ပီ ဘ့လွယ် ခတ်။ န့ ပီ၊ န့ မိုဝ်း ဒီဘျာ ဂိုဝ် ဝီ။ ဂေ ဒိုဝ်း ငဝ် အွမ် ဂေ၊ တဝ်း ဒီ ဟာဝ် ရွုး ကာညူမ်။ 2 ဒီဘျာ ဂိုဝ် ဝီ တွိုန် ယီ မိုဝ်း ဖန် ဝီ အီ မိုဝ်း အာငျာန်။ ဖန် ဝီ တူ မိုဝ်း အာငျာန်။ 3 ဂေ ဖန် ဝီ အီ တူ မိုဝ်း အာငျာန် တွိုန်၊ ဂေ ဒိုဝ်း ငဝ် အွမ် ဂေ။ ဂေ ယီ ပိဝ် ဒီ ဂူင့် နာမန်။ 4 ဂေ ဒီဘျာ အီ မိုဝ်း အာငျာန်၊ ဂေ ယီ ဂူင့် ဘော ငဝ် အွမ် ဘော နာမန် ပီ ဟပ် ဂေ ခဲင် ကာပဝ်။ 5 ယီ လှေန့်၊ ကာညူမ် တူ တး။ ခုဝ်၊ ဂေ ဒွန် အီ ဝီ ဘဲန် ဆီ အိတ်၊ ဘော ပွိုန် ဒီ အိတ် ဆီချာ။

6 ခဲင် မှိုဝ် ကာတဲ ဆွိုမ် ဂေ ယီ ယိုဝ် အီ ဒတ် တဝ်း၊ ‘ကာညူမ် ဟဲ့ တး၊ တဲး ဘေ လေး ဒူင် ကွယ် ဘေ၊ ဟာဝ် ရွုး ကာညူမ်။’

7 ဒေါ အန် တီ ဂေ ဒီဘျာ ဂိုဝ် ဝီ ဝီ န့ဆိုဝ်း၊ ဝီ ကပ် ဆဲ ငဝ် အွမ်၊ တဲး ငဝ် ဝီ ဘ့လာင်။ 8 ဂေ အီ တူ မိုဝ်း အာငျာန် ယီ တဝ်း ဒီ ဂေ အီ မိုဝ်း အာငျာန်၊ ‘မှာန့်၊ တဲး ဘေ ဒွါ နာမန် ဘေ ခေါ အီ စဲက်။ ငဝ် အွမ် ယေ ဟဲ့ ရိန် ဒီ ယတ်။’

9 ဂေ ဝီ တဝ်း၊ ‘အာဝ် ပွိုန် ဒွါ၊ ယုဝ် နာမန် ယေ တူ ဂ့လိုမ် ဘော ယေ ဘော ဘေ။ တဲး ဘေ ဟာဝ် စိုဝ်း ဒီ ဒူအီ ယွင့် အာဒါ ဘေ။’

10 ဒေါ ဟာဝ် စိုဝ်း ဂေ နာမန် တီ၊ ကာညူမ် တွိုန် ဘော တး။ ဂေ ဒီဘျာ အီ နှဝ့် အန်၊ ဂေ ဝီ ဟာဝ် ဒူပ် အန်၊ တဲး ဂေ ဟာဝ် ဇမ် ခဲင် ကာင် ဟူမ် ဂေ ဘ့လွယ် ခတ်။ ဂေ ဟဲ့ ဟွတ့် လိုပ် ခဲင် ကာင်၊ ဂေ ဝီ ကာဘိတ် မာလုဝ်း။

11 ဝါယ် အန် တီ ဒီဘျာ ဂေ အီ ဟာဝ် စိုဝ်း နာမန် တွိုန် ဘော ဝီ တး။ ဂေ ဒဲ့ တဝ်း၊ ‘ဒါ၊ တဲး မဲ ဝိုဝ်း မာလုဝ်း၊ တဲး ဘော ယေ ပွိုန် ဒီ လိုပ်။’

12 ဒါ ကာညာ ကာင် ယီ တဝ်း၊ ‘အုဝ် တဝ်း အာခ်ု ဒီ ဘေ။ အုဝ် တူ နပ် ဘေ။’

13 ခုဝ် န့ ပါယ် တီ၊ ဘေ လုဝ် ဘ်ု ဆေဆေ ကူပ် တူ နပ် ဘေ ပန် မှဝ် အုဝ် ဒီ ဝီ တး။” ခဲ့ တီ ဇဝ် ယေဆူ ခဲ လွင် ဒီဘျာ ဂိုဝ် ဝီ တွိုန်။

14 ပေါ အူ ဇေန့် ဇဝ် ယေဆူ ကာလာင် အူဖာမာ။ အန် တဝ်း၊ “ပန် ဒီ တး အိုပ် ဇဝ်ဖြာ ကာဒါယ် နီ၊ န့ ဘော ပီ ဒူအီ အူ ဝီ၊ အီ ဟာဝ် ပေါ အူ ပ့လုဝ့် တဝ်း ဒီ ကွယ် လှေန့်။ ဒူအီ တီ၊ အန် ဝီ ဒဲ့ ဒဲစေန့် အန်၊ တဝ်း ဒီ တဲး ဂေ လိုမ်လာ ကြုဝ်ကြာမ် အန်။ 15 ဒူအီ အူ ဝီ၊ အန် ဒွါ ရွိုန် ဖန် ထာလေန်။ (န့ မုး ရွိုန် ဇဲတ် အူ မာယဝ်း ဒီ အူယ် ဂိုဝ် ဒီ ဒဝ် ဆ)။ ပေါ အူ ဝီ အန် ဒွါ အာ ထာလေန်။ (န့ မုး ရွိုန် ဇဲတ် ဖန် ဂိုဝ် ဒီ ဖွုန် ဆ)။ ပေါ အူ ဝီ အန် ဒွါ အူ ထာလေန် (န့ မုး အာ ဂိုဝ် ဒီ ဘူ ဆ)။ အန် ဒွါ ရွိုန် တီ ဒီ အူယ် ဝီ တီ၊ တဲး န့ ဒူပ် ခဲ့ ပဲ ဂေ ဒီ ဘူင် တဲး န့ မိုဝ်း အျီင် အန်။ ဒါ ကာညာ ဟဲ့ ဟွတ့် ဒွါ ရွိုန် အန် တီ၊ အန် ဝီ ဟာဝ် ပေါ အူ ပ့လုဝ့်။ 16 ဝါယ် အန် တီ ဒူအီ တွိုန်၊ အီ ဟဲ့ ပွိုန် ရွိုန် ဒါ ကာညာ အန် ဖန် ထာလေန် တွိုန်၊ အန် ဝီ ဟာဝ် အူ ဇေန့်၊ လာယ် ကာစိုဝ်း ကာယွင့်၊ တဲး ရွိုန် အန် မိုဝ်း အာမျာတ်၊ တဲး န့ ဘဲန် ဂိုဝ် ထာလေန်။ 17 ဘော ဒူအီ အီ ဟဲ့ ပွိုန် အာ ထာလေန်၊ အန် ဝီ ဘူင်၊ တဲး ရွိုန် အန် မိုဝ်း အာမျာတ်၊ တဲး န့ ဘဲန် ဖွုန် ထာလေန်။ 18 န့ ယီ မုး ဒူအီ တွိုန်၊ အီ ဟဲ့ ပွိုန် အူ ထာလေန်။ အန် ဟာဝ် ဂိုဝ်း ကာဒဝ်၊ ဒိပ် အုန် ရွိုန် ဒါ ကာညာ အန် ခဲင် ကာဒဝ် တီ။

19 ဝါယ် ဟဲ့ လှေန့် ကာဆဝ်၊ ဒါ ကာညာ တွိုန် ဝီ တး၊ တဝ်း ဒီ ယွတ် ခဲ့ ပီ ပွိုန် ဂေ။ 20 ဒေါ အန် တီ ဒူအီ အီ ဟဲ့ ပွိုန် ရွိုန် ဖန် ထာလေန် တွိုန်၊ အန် တး ဒူင် ကွယ် ဒါ ကာညာ၊ ဝီ ဘျ ဒီ အန် ဘော ဖန် ထာလေန် ပီ ပွိုန် အန်။ အန် တဝ်း၊ ‘မဲ ဇဝ်၊ တဲး မဲ ယွတ်။ မဲ ဒွါ ရွိုန် ဖန် ထာလေန် ဒီ အုဝ်။ အုဝ် မိူဝ် ဟဲ့ ဘူင် တဲး အုဝ် ပွိုန် ပေါ ဖန် ထာလေန်။’

21 ဒါ ကာညာ တွိုန် ဝီ တဝ်း၊ ‘မဲ ဟဲ့ ဘူင် နာ မွှိုမ်။ မဲ မုး ဒဲစေန့် အီ မွှိုမ်၊ အီ ဘူင် ဆီချာ ဒွန် မျုဝ်။ မဲ ဟဲ့ လိုမ်လာ ယွတ် ကြုဝ် အီ တူ ကိူန်။ အုဝ် ဒီ တဲး မဲ ဝီ လိုမ်လာ ယွတ် ကြုဝ် အုဝ် အီ ကိူန်။ တဲး မဲ ဒါခိုယ် ပီ အုဝ် ဟဲ့ ဒါခိုယ်။’

22 ပန် တီ ဒူအီ တွိုန် အီ ဟဲ့ ပွိုန် ရွိုန် အာ ထာလေန်၊ အန် ဘော တး။ ဘော အန် တဝ်း၊ ‘မဲ ဇဝ်၊ တဲး မဲ ယွတ်။ မဲ ဟဲ့ ဒွါ ရွိုန် အာ ထာလေန် ဒီ အုဝ်။ အုဝ် ဟဲ့ ဝီ ပွိုန် ပေါ အာ ထာလေန် အာမျာတ် အန်။’

23 ဒါ ကာညာ အန် ဝီ တဝ်း ဒီ အန်၊ ‘မဲ ဟဲ့ ဘူင် နာ မွှိုမ်။ မဲ မုး ဒဲစေန့် အုဝ် အီ မွှိုမ်၊ အီ ဘူင် ဆီချာ ဒွန် မျုဝ်။ မဲ ဟဲ့ လိုမ်လာ ကြုဝ် အုဝ် အီ တူ ကိူန်။ အုဝ် ဒီ ဝီ တဲး မဲ လိုမ်လာ ယွတ် ကြုဝ် အုဝ် အီ ကိူန်။ တဲး မဲ ဒါခိုယ် ပီ အုဝ် ဟဲ့ ဒါခိုယ်။’

24 ဝါယ် အန် တီ ဘော ဒူအီ အီ ဟဲ့ ပွိုန် ရွိုန် အူ ထာလေန် တွိုန် ဝီ တး။ အန် တဝ်း၊ ‘မဲ ဇဝ်၊ အုဝ် ဟဲ့ နပ်၊ မဲ မုး ဒါ ကာညာ အီ မွှိုမ် ယုဝ်။ မဲ ဆုဝ့် ငှုဝ် ပီ တူ ဆမ် မဲ။ မဲ မိူဝ် ဂဲပ် ကာဇု ဘ့လေ ပီ တူ ရန့် မဲ။ 25 ခုဝ်၊ အုဝ် ဟဲ့ ယုဝ် မဲ။ အုဝ် ဒိုဝ်း ချြီင် ရွိုန် မဲ ခဲင် ကာဒဝ် ကာဒါယ်။ နီ၊ အုဝ် ဟဲ့ ဝီ ဒိုဝ်း ကြုဝ် မဲ ဝီ ဒွါ ဝိဝ် ဒီ မဲ။’

26 ဒါ ကာညာ တွိုန် ယီ တဝ်း၊ ‘မဲ မုး ဒဲစေန့် အုဝ် အီ ဟာယ်၊ အီ ကြာန်။ မဲ တဝ်း၊ မဲ ဟဲ့ နပ် လွင် ဆုဝ့် အုဝ် ငှုဝ် ပီ တူ ဆမ် အုဝ်။ 27 ဆေ န့ မှာန် ပီ တဝ်း မဲ၊ ဒေါ ပွိုန် မဲ ရွိုန် အုဝ်၊ ဆေ မဲ ဘ့လေး ရွိုန် တီ၊ တဲး န့ လေး အျီင် အန်၊ ဒေါ ဝီ တး အုဝ် ဒီ နီ၊ အုဝ် ဒီ ဘော ပွိုန် ဘော ရွိုန် အုဝ် ဘော အျီင် အန်။’

28 ပန် တီ အန် တဝ်း ဒီ ဒဲစေန့် ပေါ အူ ဝီ၊ ‘မဲ ဒိုဝ်း ရွိုန် ပီ ပွိုန် ဒူအီ တီ၊ ဝီ ဒွါ ဒီ ဒူအီ အီ မိုဝ်း ရွိုန် ဂိုဝ် ထာလေန်။’ 29 ဟဲ့ ဟွတ့်၊ ဒါ ကာညာ ဝီ တဝ်း ဒီ ဂေ ဒွန် အီ၊ ‘အုဝ် ဘူင် ပါယ် တီ၊ တဲး ဘေ နပ်၊ အာဆေ ဟဲ့ မိုဝ်း ဘဲန် မျုဝ် ဘဲန် မျုဝ်၊ အန် ဒီ ဝီ ပွိုန် ပေါ မ့ပွါ၊ တဲး အန် မိုဝ်း လွှိုမ် ခါ အာတ့်။ အာဆေ ယီ တူ မိုဝ်း မာဆေ၊ ခဲ့ ပီ ထာင် အန်၊ အန် ဟဲ့ မိုဝ်း၊ အုဝ် ဒီ ဝီ ဒိုဝ်း ဘော အာတီ၊ ကွဲ့ ဟူ တဲး အန် မိုဝ်း မာဆေ။’ 30 ဟဲ့ ဟွတ့် ကာလာင် ဂြုဝ်း တီ၊ ဒါ ကာညာ ဝီ စ်ု ဒဲစေန့် အန် အူ ဝီ၊ တဲး အန် ဝီ ဒိုဝ်း ဒဲစေန့် အီ တူ မွှိုမ်၊ ဝီ တိုယ် အန် လေး တ ဒူင် ကွယ် ဒါ ကာညာ အန်၊ တဲး အန် ယာမ်၊ ကွယ် ခဲင် အပ် ဝွင့်၊ တဲး ကုင်ကာပ် အန် ကော ကာဒွယ် ကူပ် ယုဝ် အန်။” ခဲ့ တီ ဇဝ် ယေဆူ ဟဲ့ ခဲ လွင် လုဝ် ဘူင် ပီ စ်ု ဇဝ်ဖြာ။

31 ဇဝ် ယေဆူ ဝီ တဝ်း၊ “ဆေ အုဝ် အီ ဟဲ့ ဘဲန် ဂွန် ဒူအီ ဒီ ဝီ တး လူင် ဒဲင် ကာဒါယ်၊ အုဝ် ဒီ ဘော မိုဝ်း အာဖုင် ဒင်ခုဝ်။ ဂေ အာမူ အာမာတ် ဇဝ်ဖြာ ဂေ ဒီ ဘော ဒူပ် အုဝ်။ အုဝ် ဒီ ဘော ကွယ် ဒဲင် မာလာင်၊ အိုပ် ဒူအီ။ န့ ဘော မိုဝ်း အာဖုင် ဒင် ခုဝ် ဇဝ်ဖြာ အီ ကွယ် ရူပ် အုဝ်။ 32 ဒေါ အန် တီ န့ ဒီ မိုဝ်း ဂေ ဒူအီ ဒွန် မျုဝ်၊ ဒွန် ခြိုဝ်၊ ဂေ တး ကာဇု ဒီ အာတ့် အုဝ်။ အုဝ် ဒီ ဘော ကာယဝ်း ဒူအီ၊ တဲး န့ ပီ ဒူအီ ဟျီင် မာဘူ ဒီ ကာယဝ်း မာဘူ ဂါယ် မာပဲ။ 33 ဆေ န့ မုး ဒူအီ အီ ပီ မာဘူ၊ အုဝ် ဒီ တဲး ဂေ ကွယ် ဘ့လာက် အာအး အုဝ်။ ဆေ န့ မုး ဒူအီ အီ ပီ မာပဲ၊ ဂေ ဒီ ဘော ကွယ် ဘ့လာက် အာဂ အုဝ်။

34 န့ ဒီ ဘော ပီ အုဝ် မုး ခုန်ဒီခမ်။ ခုန်ဒီခမ် တီ၊ အန် ဒီ ဘော တဝ်း ဒီ ဖိုင် ဒူအီ အီ ကွယ် ဘ့လာက် အာအး၊ ‘တဲး ဘေ တး ကာတတ် အုဝ်။ ဘေ မုး ဒူအီ ပီ မွင့်ကာရာ ဒွါ ဂုန့် အုဝ်။’ အူ ဆိန့် ဒေါ ဘူင် ဇဝ်ဖြာ ကာဒါယ် နီ၊ အန် ဟဲ့ တဝ်း ဒီ တဲး ဘေ လိုပ် ခဲင် မိူင် ပီ အိုပ် အန်။ ဒေါ တီ နီ ဘေ ပွိုန် ဒီ တး လိုပ် ခဲင် မိူင် တီ၊ တဲး နဝ်း ဘေ ဒါခိုယ် ကာဆဝ်၊ တဲး ဘေ ပီ ဒူအီ အီ ဟဲ့ ပ့လု ဂုန့် အန်။ 35 ခုဝ်၊ ဒေါ ကာပြာန့် အုဝ် ပီ ဒီ ဟူမ်၊ ဘေ ဟဲ့ ဒွါ ပီ ဒီ ဟူမ် ဒီ အုဝ်။ ဒေါ ဆီ ဒျီင် အုဝ် အိုမ်၊ ဘေ မိူဝ် ဟဲ့ ဒွါ။ ဒေါ တး အုဝ် ဒူင် ကွယ် ဘေ၊ ဘဲန် ခဲတ့် ဘေ၊ ဘေ မိူဝ် ဟဲ့ ဘာင် အုဝ် လိုပ် ခဲင် ကာင် ဘေ။ 36 ဒေါ တူ မိုဝ်း အုဝ် ခြိုင် ပီ ဒီ တာ၊ ဘေ ဟဲ့ ဒွါ ခြိုင် ဒီ အုဝ်။ ဒေါ ဆဝ် အုဝ် ဘေ ဟဲ့ လိုမ်လာ အုဝ်။ ဒေါ ကွယ် အုဝ် ခဲင် ကာပိုမ်၊ ဘေ ဟဲ့ တး ဘဲန် ဂိုက် အုဝ်။

37 ခုန်ဒီခမ် တွိုန် ဟီ ဟွတ့် တဝ်း ပါယ် တီ၊ ဂေ ဒူအီ မွှိုမ် တွိုန်၊ ဂေ ဒီ ဝီ တဝ်း ဒီ အန်၊ ‘မဲ ဇဝ်၊ ဒေါ မှဝ် မဲ ဟဲ့ ကာပြာန့် ပီ ဒီ ဟူမ်။း ဒေါ မှဝ် ယေ ဟဲ့ ဒွါ ပီ ဒီ ဟူမ် ဒီ မဲ။း ဒေါ မှဝ် မဲ ဟဲ့ ဆီ ဒျီင် အိုမ်၊ ယေ ဟဲ့ တဲး မဲ ဒျီင်။း 38 ဒေါ မှဝ် မဲ ဟဲ့ တး ဒူင် ကွယ် ယေ ဘဲန် ခဲတ့် ယေ။း ဒေါ မှဝ် ယေ ဟဲ့ ဘာင် မဲ လိုပ် ခဲင် ကာင် ယေ။း ယေ မိူဝ် တူ နပ် လွင် မဲ လုဝ် ခြိုင် ပီ ဒီ တာ၊ တူ နပ် ဒေါ မှဝ် ယေ ဟဲ့ ဒွါ ခြိုင် ဒီ မဲ။ 39 ယေ မိူဝ် တူ နပ်၊ လွင် မဲ ဟဲ့ ဆဝ်၊ မဲ ဟဲ့ ကွယ် ခဲင် ကာပိုမ်။ ယေ တူ နပ် ဒေါ မှဝ် ယေ ဟဲ့ တး၊ ဘဲန် ဂိုက် မဲ။’

40 ပန် တီ ခုန်ဒီခမ် ဒီ ဝီ တဝ်း၊ ‘အုဝ် တဝ်း အာခ်ု ဒီ ဘေ။ ဆေ န့ မိုဝ်း ဒူအီ အီ ပီ ဝါ ဒွန် အီ၊ အန် ဘော ပီ ဝါ အုဝ်။ ခဲ့ ပီ စွယ် ဘေ ဝါ အုဝ် ဇိုဝ် တီ၊ န့ ပီ ဘေ ဟဲ့ စွယ် အုဝ်။’

41 ခုန်ဒီခမ် ဟီ ဟွတ့် ကာလာင် ဇိုဝ် တီ၊ အန် ဒီ ဝီ တဝ်း ဒီ ဂေ အီ ကွယ် ဘ့လာက် အာဂ အန်၊ ‘ဟာဝ် လေး ဒူင် ကွယ် အုဝ်။ အုဝ် ဟဲ့ တဲး ဘေ ခမ် ဝူတ်၊ တဲး ဘေ ကွယ် ခဲင် ငဝ် အီ တူ ယတ် ဒေါ မှဝ်။ ဘော ဘုဝ် ကာနမ် ဘော ဂေ ကာနမ် အီ ဘဲန် အာမူ အာမာတ် အန်၊ ဂေ လုဝ် ကွယ် ရိုမ် ဒူပ် ဘေ ခဲင် ငဝ် ပဲ့ ဟဲ့ ဘုတ် အုန် အုဝ် အာဒါ ဘေ တီ။ 42 ခုဝ်၊ ဒေါ ကာပြာန့် အုဝ် ပီ ဒီ ဟူမ်၊ ဘေ တူ ဒွါ အုဝ် ဟူမ်။ ဒေါ ဆီ ဒျီင် အုဝ် အိုမ်၊ ဘေ တူ တဲး အုဝ် ဒျီင်။ 43 ဒေါ တး အုဝ် ဒူင် ကွယ် ဘေ ပီ ခဲတ့် အီ တး တူင့်၊ ဘေ တူ ဘာင် အုဝ် လိုပ် ခဲင် ကာင် ဘေ။ ဒေါ တူ မိုဝ်း အုဝ် ဒီ တာ ခြိုင်၊ ဘေ တူ ဒွါ ဒီ အုဝ်။ ဒေါ ကွယ် အုဝ် ခဲင် ကာပိုမ် ဘော ဆဝ် ကာဆဝ်၊ ဘေ တူ စွယ် အုဝ်။’

44 ခုန်ဒီခမ် ဟီ တဝ်း ပါယ် တီ၊ ဂေ ဒီ ဝီ တဝ်း၊ ‘မဲ ဇဝ်၊ ယေ တူ ဒွိုမ် ယိုဝ် မဲ ကာပြာန့် ပီ ဒီ ဟူမ်။ တူ ဒွိုမ် ယိုဝ် မဲ ဆီ ဒျီင် အိုမ်၊ ဘဲန် ခဲတ့်၊ တူ မိုဝ်း ဒီ တာ ခြိုင်။ ယေ တူ ဒွိုမ် ယိုဝ် မဲ ဆဝ်၊ တူ နပ် မဲ ဟဲ့ ဒွိုမ် ကွယ် ခဲင် ကာပိုမ်။ ခုဝ်၊ ဒေါ မှဝ် န့ မုး၊ ယေ တူ စွယ် မဲ။း’

45 ခုန်ဒီခမ် ဒီ ဝီ တဝ်း၊ ‘အုဝ် တဝ်း အာခ်ု ဒီ ဘေ။ ဂေ ဒူအီ အီ ပီ ဝါ ဒွန် အီ၊ ဂေ ဟဲ့ ကွယ် ကာတဲ ဘေ။ ပီ တူ စွယ် ဘေ ဒီ ဂေ၊ န့ ပီ၊ ဘေ မိူဝ် တူ စွယ် အုဝ်။’

46 ပန် တီ ဂေ ဒူအီ တူ မွှိုမ် ဒီ လေး ဟာဝ် ဒူင် ကွယ် အုဝ်၊ တဲး ဂေ ခမ် မှာပ် ဂေ ဆေဆေ။ ဂေ ဒူအီ အီ ဒွိုမ် ဘူင် နာ မွှိုမ်၊ ဂေ ယီ ဟာဝ် ကွယ် ရိုမ် ဒူပ် ဇဝ်ဖြာ ဆေဆေ။” ခဲ့ တီ ဇဝ် ယေဆူ ကာလာင် လွင် မာဘူ ဂါယ် မာပဲ။