1 ဇဝ် ယေဆူ ဝီ ကာလာင် ဂြုဝ်း ဒီ ဒူအီ ကိူန် ဘော ဒီ ဂေ ဒီဘဲ အန်။ အန် တဝ်း၊ 2 “ဂေ ဒါ ဆာရာ အီ မာနုဝ် ဒါရာ ယူဒါ ဘော ဂေ ဒူအီ ခဲင် ဖိုင် ဖာရီဆဲ၊ ဂေ ဟဲ့ ဂါဝ် ပွုန် ဒါ ဆာရာ အာမုဝ်ဆဲ၊ ဝီ မာနုဝ် ဒါရာ ပီ ဒွါ အန် ဒီ ဘေ။ 3 ခုဝ်၊ ဘေ လုဝ် ထူမ် ဂြုဝ်း ဂေ၊ ဘူင် ခဲ့ ပီ စ်ု ဂေ။ ဘေ ယီ တူ လုဝ် ညိုင် ပီ ဘူင် ဂေ။ ခုဝ်၊ ဂေ မိူဝ် တူ ဘူင် ဒူပ် ပီ မာနုဝ် ဂေ။ 4 ဂြုဝ်း ပီ ကာလာင် ဂေ၊ န့ ပီ ဂေ တဲး အီ ဟဝ် ပး ကြုဝ် စန် ကာဆဝ်။ ဂေ ယီ တူ စွယ် မာဆေ၊ တဲး အီ ပွိုန် ဒီ ပး ခဲ့ ပီ ဒွါ ဂေ အီ ပး။ ကာနူ ဂေ အူ ဘူင့် မိူဝ် ဂေ တူ စုဝ့်၊ တူ ခမ် ဒီ စွယ်။

5 ခဲ့ ပီ ဘူင် ဂေ၊ ဂေ ဘူင် တဲး အီ ဟဝ် ယိုဝ် လွင် ဒူပ် ဂေ ဒါရာ။ ဒွန် အီ ဒဲမ် ဂြုဝ်း ဇဝ်ဖြာ မင် ဒုဝ် ဒဲင် ဇေ၊ ဟပ် ခဲင် ဇီဒိူက် ဒီတဲတ် ပက် ဒိုက် ဒီ ကာတဝ်း။ ဂေ ယီ ဘူင် ဇီဒိူက် တီ၊ တဲး န့ တာင် လွှိုမ် ဇီဒိူက် အီ ဟဝ်၊ တဲး အီ ဟဝ် ယိုဝ် ဂေ ဘွတ်။ ဒွန် အီ ဘော မိုဝ်း မ့ပ့လာယ် အီ ဒိုက် ဒီ ခြိုင် ပီ တာ ဂေ၊ တဲး ဂေ လှုဝ်း ဇဝ်ဖြာ ဆေဆေ။ ဂေ ယီ ဘူင် တဲး မ့ပ့လာယ် တီ ဝီ တာင် လွှိုမ် မ့ပ့လာယ် မျုဝ် ဟဝ်၊ တဲး အီ ပွိုန် ယိုဝ်။ 6 ဆေ ဂေ ဘော လိုပ် ဘ့လွယ် အီ ဟဝ်၊ ဆေ ဂေ ဘော လိုပ် ခဲင် ဇူင် ယူဒါ၊ ဂေ ဘော အိုင် ဒီ ကွယ် ဒူင် စာ။ 7 ဆေ ဂေ ဝိန် ဒီလဲ ခဲင် ကာလး၊ ဂေ အိုင်၊ ဆေ ဒူအီ ကြိုပ် ဂေ။ ဂေ ဘော အိုင်၊ ဆေ အီ ရုဝ်ဆေ ဂေ တဝ်း၊ ‘ဆာရာ’ ဒီ ဂေ။^a

8 ဆေ န့ မုး ဘေ၊ ကွဲ့ ခမ် တဲး အီ အိူပ် မျုက် ဘေ။ ခုဝ်၊ ဘေ မိုဝ်း ဒါ ကာညာ အူ ကာဒင် အီ အိုပ် ဘေ။ ဘေ ဒွန် အီ ယီ ဘဲန် ဘီနွင်။ 9 ကွဲ့ ရုဝ်ဆေ အီ ဟဝ်၊ တဝ်း၊ ‘မဲ ပီ ဂုန့် အုဝ်။’ တဲး ဘေ ရုဝ်ဆေ မီ ဇဝ်ဖြာ၊ အီ ပီ ဂုန့် ဘေ၊ အီ ကွယ် ဂါင်ဟြာဝ်။ 10 ကွဲ့ တဲး အာဆေ ဒဲ့ ဘေ တဝ်း၊ ‘မဲ မုး ဒါ ဆာရာ ဘွတ်။’ ဘေ မိုဝ်း ဆာရာ ဘွတ် အူ ဝီ။ ဝီ တီ မုး ဒူအီ ပီ ရဝ်း ပီ တိုယ် ဇဝ်ဖြာ တဲး အန် ချွတ် ဘေ။ 11 ကာတဲ ဘေ၊ အာဆေ ယဲတ့် အီ၊ အန် ဒီ ဝီ ဘဲန် မှာယ် အီ။ 12 ခုဝ်၊ ဆေ ဒူအီ ပီခိုက် အန်၊ ဂေ အီ ဟဝ် ဒီ တဝ်း၊ အန် အာဝ် အး။ ဂေ တူ ရုဝ်ဆေ အန်။ ဆေ ဒူအီ ယီ တူ ပီခိုက် အန်၊ ဆေ အန် ဘဲန် ပီ ဝါ ဒွန် အီ၊ ဂေ အီ ဟဝ် ဒီ ရုဝ်ဆေ အန်။

13 ဘေ ဒါ ဆာရာ အီ မာနုဝ် ဒါရာ ယူဒါ ဘော ဘေ ဒူအီ ခဲင် ဖိုင် ဖာရီဆဲ၊ ဘေ မုး ဒူအီ ညိုင်ရာင် ဘွတ်။ ဘေ ဒီ ဇမ် ဒုက် တာင်။ ခုဝ်၊ ပီ ဘူင် ဘေ န့ ပီ ဘေ ကာဘိတ် မာလုဝ်း ဒီ လိုပ် ခဲင် မိူင် ပီ အိုပ် ဇဝ်ဖြာ။ ဘေ ခြဲ ဒူအီ လိုပ်။ ကူပ် တူ လိုပ် ဘေ၊ ဘေ ဘော ခြဲ ဘော ဂေ အီ ဟဲ့ ဆီ လိုပ်။ 14 ဘေ ဒါ ဆာရာ အီ မာနုဝ် ဒါရာ ယူဒါ ဘော ဘေ ဒူအီ ခဲင် ဖိုင် ဖာရီဆဲ၊ ဘေ မုး ဒူအီ ညိုင်ရာင် ဘွတ်။ ဘေ ဒီ ဇမ် ဒုက် တာင်။ ခုဝ်၊ ဘေ ဘော လွှက့် ဒီ ကာလာင် ဂြုဝ်း၊ တဲး ဘေ ပွိုန် ကာင် ဂေ ယာ ဆီပြး။ ဘေ ဘော ညိုင်ရာင် ဒီ ဆာခိုဝ် လှေန့်၊ တဲး ဒူအီ ယိုဝ် ဘေ။ ဘေ အီ ဘူင် ပါယ် တီ၊ ဘေ ဒီ လုဝ် ခမ် မှာပ် ဘေ လွှိုမ် အီ ဟဝ်။^b

15 ဘေ ဒါ ဆာရာ အီ မာနုဝ် ဒါရာ ယူဒါ ဘော ဘေ ဒူအီ ခဲင် ဖိုင် ဖာရီဆဲ၊ ဘေ မုး ဒူအီ ညိုင်ရာင် ဘွတ်။ ဘေ ဒီ ဇမ် ဒုက် တာင်။ ခုဝ်၊ ဘေ နပ် ဒီ ဟာဝ် ဒွန် နာ ဒွန် ပ့လုဝ့်၊ ဟြေတ့် ဒူအီ အူ ဝီ အီ ဆီ ဒူပ် ဘေ ဘူင် ဒူပ် ဒါရာ။ ဆေ ဘေ ဟဲ့ ကာတုန့် အူ ဝီ အီ ဆီ ဒူပ် ဘေ ပါယ် တီ၊ န့ မုး ဘေ အီ ဘူင် တဲး အန် စုဝ်း ကာလုဝ့် ငါရာယ် ရိုမ် ဒူပ် ဘေ၊ တဲး အန် ဝီ ခမ် ဒုက် တာင် လွှိုမ် ဘေ။

16 ဘေ ဒါ ဆာရာ အီ တူ နပ် ဆီချာ လွင် ဇဝ်ဖြာ၊ ဘေ ပီ ဒူအီ ငါယ် အပ်၊ ယီ ယဲတ့် အီ ဟဝ်။ ဘေ ဒီ ဇမ် ဒုက် တာင်။ ခုဝ်၊ ဘေ ဘော မာနုဝ် လွင် ခမ် ကာဆမ် ဒိူင်။ ဆေ အီ တဝ်း၊ ‘အုဝ် ဟဲ့ ခမ်၊ ဆေ အုဝ် ဟီ ဘော ကာလုဝ်၊ တဲး ဟုဝ် ဇဝ်ဖြာ ကာပျာတ့်၊’ ပီ ခမ် အန် တီ အာဝ် မိုဝ်း ဒီခုဝ်။ ဘေ ဘော မာနုဝ် အီ ဒိူင် တဝ်း၊ ‘ဆေ အုဝ် ဟီ ဘော ကာလုဝ်၊ တဲး ခြိဝ် အီ ကွယ် ခဲင် ဟုဝ် ဇဝ်ဖြာ ဘျွင် ဘဲန် အီ ဝွင့်။’ ဘေ တဝ်း၊ ဆေ ဒူအီ ဒိူင် ပါယ် တီ၊ န့ မိုဝ်း ဒီခုဝ်။ အန် လုဝ် ခမ် တူတ့် ပီ ဒိူင် ဇိုဝ် တီ။ 17 အုဝ် ယီ တဝ်း၊ ဘေ ရိုဝ်။ ဘေ ပီ ဒူအီ ငါယ် အပ်၊ ဘော တူ မိုဝ်း အာငျာန်။ ဘေ လုဝ် ဇေန့်ဇာ လွင် ဟုဝ် ဇဝ်ဖြာ ဂါယ် ခြိဝ် အီ ကွယ် ခဲင် ဟုဝ် ဇဝ်ဖြာ။ ခြိဝ် အာရေ အာဝ် တာင် ပီ ဟုဝ် တွိုန်။ န့ မုး ဟုဝ် ဇဝ်ဖြာ အီ တဲး ခြိဝ် အီ ကွယ် ခဲင် ဟုဝ် တီ ဘဲန် ကြုဝ် အီ ဆီငါ ဘွတ်။ 18 ဘေ ဘော မာနုဝ် လွင် ကာဆမ် ဒိူင်၊ ဆေ အီ တဝ်း၊ ‘အုဝ် ဟဲ့ ခမ်၊ ဆေ အုဝ် ဟီ ဘော ကာလုဝ်၊ တဲး ကာစှူင့် လှူ ဒီ ဇဝ်ဖြာ ကာပျာတ့်၊’ ပီ ဒိူင် ဇိုဝ် တီ အာဝ် မိုဝ်း ဒီခုဝ်။ ဘေ ဘော မာနုဝ် အီ ဒိူင် တဝ်း၊ ‘အုဝ် ဟဲ့ ဟွတ့် ဘ့လေး ပီ ဒီ လှူ အုဝ် ဒဲင် ကာစှူင့် လှူ။ ခုဝ်၊ ဂြုဝ်း အုဝ် ဟဲ့ မှာန်၊ ပီ ဒိူင် ဇိုဝ် တီ၊ လုဝ် ခမ်။ အာဝ် ပွိုန် ကာလုဝ်။’ 19 ဘော အာတီ ဘျ ဆီချာ၊ ဘေ ပီ ဒူအီ ငါယ် အပ်။ ဆေ န့ မုး ပီ ဒီ လှူ အီ ကွယ် ဒဲင် ကာစှူင့် လှူ၊ န့ မုး ကာစှူင့် တီ၊ အီ တဲး ပီ ဒီ လှူ တီ ဘဲန် ကြုဝ် အီ ဆီငါ ဘွတ်။ 20 ခုဝ်၊ ဆေ ဘေ ဒိူင် တဝ်း မာဆေ လွင် ကာစှူင့် လှူ၊ န့ ဘော ဘာ့ ကြုဝ် အီ ကွယ် နာ ဒဲင်။ 21 ဘော ပါယ် တီ၊ အာဆေ ဒိူင် တဝ်း မာဆေ လွင် ဟုဝ် ဇဝ်ဖြာ၊ န့ ဘော ဘာ့ အန် ဇဝ် အီ ကွယ် ခဲင် ဟုဝ် ဇဝ်ဖြာ။ 22 အာဆေ ယီ ဒိူင် တဝ်း မာဆေ လွင် ဂါင်ဟြာဝ်၊ အန် ဘော ကာလာင် လွင် မာလာင် အီ မုး ဒူင် ကွယ် ဇဝ်ဖြာ။ ခုဝ်၊ န့ ဘော ဘာ့ ဇဝ်ဖြာ အီ ကွယ် ခဲင် ဂါင်ဟြာဝ် ဒဲင် မာလာင် တွိုန်။ အာဝ် ပွိုန် ကာယဝ်း ဂြုဝ်း၊ တဲး န့ ပီ ပီ ခဲ ဘေ။

23 ဘေ ဒါ ဆာရာ အီ မာနုဝ် ဒါရာ ယူဒါ ဘော ဘေ ဒူအီ ခဲင် ဖိုင် ဖာရီဆဲ၊ ဘေ မုး ဒူအီ ညိုင်ရာင် ဘွတ်။ ဘေ ဒီ ဇမ် ဒုက် တာင်။ ဘေ ဂျုဝ်ဂျာ ဒီ ဒိုဝ်း ဒဝ် လှိုင် ဂေ မှီ ဘဲန် မျုဝ် ဘဲန် မျုဝ်၊ လှူ ဂိုဝ် ဘုန် အူ ဘုန်။ ဘေ ယီ တူ ခတ် နဝ်း ဒီ ဒူပ် အီ မုး ဒါရာ အီ အာရေ တာင်။ ဘေ တူ ဆုင်ဖျာတ် နာ မှာန်။ ဘေ တူ ကာဝေ ဒူအီ။ ဘေ မိူဝ် တူ ဘူင် နာ မှာန် ဆေဆေ။ ဘေ လုဝ် ဂျုဝ်ဂျာ ဒီ ဘူင် အီ မိုဝ်း ဒီခုဝ်၊ အီ မိုဝ်း အာရေ တာင်၊ ယီ တူ ပိဝ် ဒီ ဒွါ ဂိုဝ် ဘုန် အူ ဘုန်။ 24 ဟဲ့ မှာန်၊ ဘေ ပီ ဒူအီ ငါယ် အပ်၊ ယီ ယဲတ့် အီ။ ဘေ ပီ ဒူအီ အီ ဆာဒိက် ဒီ ထာရွင် အိုမ်၊ ယုဝ် ဘေ မဲင် မာဝ ဒီတဲတ်။ ဘေ ယီ နပ် ဒီ မဲင် မာမက် ဘော ဒုဝ်၊ ဝီ တဝ်း၊ တူ လုဝ် ဆာဒိက်။

25 ဘေ ဒါ ဆာရာ အီ မာနုဝ် ဒါရာ ယူဒါ ဘော ဘေ ဒူအီ ခဲင် ဖိုင် ဖာရီဆဲ၊ ဘေ မုး ဒူအီ အီ ညိုင်ရာင် ဘွတ်။ ဘေ ဒီ ဇမ် ဒုက် တာင်။ ခုဝ်၊ ဘေ ပီ ဒူအီ အီ ဒိုဝ်း ဆီလယ့် ဂေ ဖာန်၊ ဘာယ် မီ နာ ရေတ့်၊ တဲး အန် စှိတ်။ ဘေ ယီ တူ ယိုဝ် အီ ဝွင့် နာ ခဲင်။ န့ ဘော ပီ နဝ်း ဘေ။ ဘေ မိုဝ်း နဝ်း လောဖ ဘော နဝ်း ဆီ ဒူပ် ပီ အိုင် ဘေ ဆေဆေ။ 26 ဘေ ဒူအီ ဖာရီဆဲ၊ ဘေ ယီ တူ နပ် လွင် အန် တီ။ ဘေ ပီ ဒူအီ ငါယ် အပ်။ ဘေ ယီ လုဝ် ဘူင်၊ တဲး န့ ပီ ဘေ ဘာယ် ဆီလယ့် ဂေ ဖာန် နာ ခဲင် ဒီ အာတ့်။ ဟဲ့ ဟွတ့်၊ ဘော နာ ရေတ့် န့ ဒီ စှိတ်။

27 ဘေ ဒါ ဆာရာ အီ မာနုဝ် ဒါရာ ယူဒါ ဘော ဘေ ဒူအီ ခဲင် ဖိုင် ဖာရီဆဲ၊ ဘေ မုး ဒူအီ ညိုင်ရာင် ဘွတ်။ ဘေ ဒီ ဇမ် ဒုက် တာင်။ ခုဝ်၊ ဘေ ပီ ကာဒဝ် ဘာရေဝ် အီ ဟဲ့ ဖဝ်း ဆီနမ် လုယ် နာ ရေတ့်၊ တဲး န့ စှိတ်။ ကာအာင် ဒူအီ ယမ် ဘော အီ တူ ဆီငါ ဘဲန် မျုဝ် ဘဲန် မျုဝ် ယီ ကွယ် နုဝ့် နာ ခဲင်။ 28 ပါယ် တီ၊ ဘေ မိူဝ် အွန် ဒီ ဘျ ဘေ မုး ဒူအီ ဘွတ်။ န့ ဘော မိုဝ်း နာ တူ မွှိုမ် ဘော ပီ ညိုင်ရာင် ဘေ ဘဲန် မျုဝ် ဘဲန် မျုဝ်၊ ပီ တူ ဆီ တဲး ဘေ အီ ယိုဝ်၊ ယီ ကွယ် ကော နုဝ့် ခဲင် နဝ်း ဘေ။

29 ဘေ ဒါ ဆာရာ အီ မာနုဝ် ဒါရာ ယူဒါ ဘော ဘေ ဒူအီ ခဲင် ဖိုင် ဖာရီဆဲ၊ ဘေ မုး ဒူအီ ညိုင်ရာင် ဘွတ်။ ဘေ ဒီ ဇမ် ဒုက် တာင်။ ခုဝ်၊ ဘေ နပ် ဒီ ဟာဝ် ဘူင် ကာဒဝ် မာဝ်၊ တဲး န့ ဘဲန် ဘာရေဝ် ပီ ဘ့လေး ဘေ ဒူအီ အီ ဘျာန် ဂြုဝ်း ဇဝ်ဖြာ ဘော ဂေ အီ မိုဝ်း နဝ်း ဆိူဝ် နဝ်း မှာန် ဘဲန် ဝီ ဘဲန် ဝီ အီ ဟဲ့ ကွယ် ဒေါ မွိုန်။ ဘေ ဘော ပီစှိတ် ဘာရေဝ် တီ။ 30 ဘေ နပ်၊ န့ မုး ဂုန့် ဒါ ဘေ အီ ကွယ် ဒေါ မွိုန်၊ ဂေ ဟဲ့ ငဝ်း ယမ် ဒူအီ တီ။ ဘေ ယီ ညိုင်ရာင် တဝ်း၊ ‘ဆေ န့ မုး ယေ အီ ကွယ် ဒေါ မွိုန်၊ ယေ တူ စွယ် ဂေ ငဝ်း ယမ် ဒူအီ အီ ဘျာန် ဂြုဝ်း ဇဝ်ဖြာ တီ။’ 31 ကူပ် ကာလာင် ဘေ ဂြုဝ်း တီ၊ ဟဲ့ လိုဝ်း ဆီချာ၊ ဘေ မုး လှုက်လှာန် ဂေ ဒူအီ အီ ငဝ်း ဒူအီ အီ ဘျာန် ဂြုဝ်း ဇဝ်ဖြာ တွိုန်။ ဘေ ဟဲ့ နပ်၊ နဝ်း ဘေ ပီ နဝ်း ဒူအီ ဂေ တီ။ 32 ဆေ ဘေ ဘူင် ဟာဝ် မှာပ် ပီ ဘူင် ဂေ ဇိုဝ် တီ၊ န့ ဒီ တဲး မှာပ် ပီ ဘူင် ဂုန့် ဒါ ဘေ အီ ကွယ် ဒေါ မွိုန် ဝဲ ကိူန်။ ဘေ ဒီ ဘော ခမ် မှာပ် ဘေ ပီ ဂေ။

33 ဘေ ပီ ဟန့် အီ ဟာယ် ကာဆဝ်။ ဘေ ပီ ဟန့် ငျီန် အီ နပ် ဒီ ဇုဝ့် ယမ် ဒူအီ။ ခုဝ်၊ ဘေ ဒီ ဘော စုဝ်း ကာလုဝ့် ငါရာယ်။ အာဝ် ပွိုန် လွတ်။ 34 အုဝ် ဒီ ဝီ စ်ု ဒူအီ အီ ဘျာန် ဂြုဝ်း ဇဝ်ဖြာ ဘော ဒူအီ အီ မိုဝ်း အာငျာန် ဘွတ် ဘော ဒူအီ အီ နပ် ဒီ မာနုဝ် ဒါရာ ဇဝ်ဖြာ၊ တဲး ဂေ တး ဒူင် ကွယ် ဘေ၊ တဲး ဘေ ပွိုန် ဒီ ထူမ် ဂြုဝ်း ဂေ။ မင် အီ၊ ဘေ ဒီ ငဝ်း ယမ် ဒဲင် ရွင့် ကာဝဲ့။ မင် အီ ဂေ ဒီ တဝ် ဟာဝ် ဘဲန် မိူင် ဘဲန် မိူင်။ ဘေ ဒီ ဘော ဒူပ် ဒီ မှေတ့် ဂေ၊ ဝီ တိုယ် ဂေ ခဲင် ဇူင် ဘေ၊ ဝီ ဆီဘျြီ့ ဂေ။ 35 မှာပ် ဇိုဝ် တီ ဒွန် မျုဝ်၊ ဘေ လုဝ် ခမ် တူတ့်။ ဒဲင် ကာဒါယ် နီ ဟဲ့ မိုဝ်း ဒူအီ ကိူန်၊ အီ တူ မိုဝ်း ဒီ လုတ့် မာဆေ၊ ယီ ဟဲ့ ကာဒုး ဒီ ယမ်။ ဒေါ ဂုဝ် အာကန့် ဟဲ့ ငဝ်း ဝါ အန် အီ စိူဝ် အာဘဲ။ ဟဲ့ ဟွတ့်၊ ဂေ ဟဲ့ ငဝ်း အာဆာခါရာ အီ မုး ဂွန် အာဘေရေက် တွိုန် ဒေါ ကွယ် အန် ဒီ ကာတဲ ကာစှူင့် လှူ ဂါယ် ဟုဝ် ဇဝ်ဖြာ တွိုန်။ စုး ဆိန့် အာဘဲ တီ ကော ဇမ် အာဆာခါရာ၊ မှာပ် ဂေ တီ ဒွန် အီ၊ ဘေ လုဝ် ခမ် တူတ့်။ 36 အုဝ် တဝ်း အာခ်ု ဒီ ဘေ။ မှာပ် ဇိုဝ် တီ ဒွန် မျုဝ်၊ ဘေ ဒူအီ ဇာတ် နီ လုဝ် ခမ် တူတ့်။”

37 ဇဝ် ယေဆူ ဟဲ့ ဟွတ့် ကာလာင် ဂြုဝ်း ဇိုဝ် တီ လွင် ဂေ ဒူအီ ညိုင်ရာင် ဘွတ်၊ အန် ဝီ ကာလာင် ဂြုဝ်း လွင် ဂေ ဒူအီ ခဲင် မိူင် ယေရူဆာလဲမ်။ အန် တဝ်း၊ “အိုယ် ဘေ ဒူအီ ခဲင် မိူင် ယေရူဆာလဲမ်၊ ဘေ မုး ဒူအီ အီ ဟဲ့ ငဝ်း အာဆာက် ဂေ ဒူအီ အီ ဘျာန် ဂြုဝ်း ဇဝ်ဖြာ။ ဘော ဂေ ဒူအီ ပီ ရဝ်း ပီ တိုယ် ဇဝ်ဖြာ ဒီ ဘေ၊ ဘေ ဟဲ့ ဒိုဝ်း မာဝ်၊ ဝိုန့် ဒီ ဂေ တဲး ဂေ ယမ်။ ဘဲန် ဇေန့် ဘဲန် ဇေန့် အုဝ် ဟဲ့ ထေဝ် ဒီ ဒဲ့ ဘေ တး ဒီ အုဝ်၊ တဲး န့ ပီ မာအျီန် ဒဲ့ ဒီ မာလှိုမ် ဂွန် အန်။ ဘေ ယီ တူ ခမ်၊ တူ ညှိုမ် အုဝ်။ 38 နာ အာတ့် ဟာဝ်၊ ဘေ ဒီ ဘော ယိုဝ်၊ ဟုဝ် ဇဝ်ဖြာ ဒီ ကာပျာတ့် လိုဝ်၊ ဘော ရာမ် တူတ့်။ 39 အုဝ် မိူဝ် တဝ်း ဒီ ဘေ ဒေါ တီ နီ၊ အာဝ် လှေန့် ဘေ အာဝ် ဟူ ပွိုန် ဒီ ဝီ ယိုဝ် အုဝ်။ ဟီ ဇမ် အာခြာဝ် ဒီ ဝီ တး ဇမ် အုဝ် ဒူင် ကွယ် ဘေ၊ ဘေ ဒီ ဘော ရွုး အုဝ် တဝ်း၊ ‘အိူပ် အန် ဇဝ် ပီ တိုယ် ဇဝ်ဖြာ။’”