1 ဝါယ် အန် တီ ဇဝ် ယေဆူ ဝီ လိုပ် ခဲင် ရိုဝ်၊ ဝီ ဝိဝ် ဇမ် မိူင် ဒူင် ကွယ် ဘြိမ် အန်။ 2 န့ ယီ မိုဝ်း မင် အီ၊ ဂေ တး တိုယ် ဒူအီ ဆဝ် အူ ဝီ ဒီ ဇဝ် ယေဆူ။ ဒဲ အန် ဘော ပ့လဝ် အန် ဟဲ့ ဟွတ့် ယမ်။ ဂေ တဲး အန် အိတ် ဒဲင် မ့ဘေ၀်၊ ဝီ ဒိုဝ်း တိုယ် အန် ဇမ် ဒီ အာတ့် ဇဝ် ယေဆူ။ ဒေါ ယွတ် ဇဝ် ယေဆူ ဂေ အီ တိုယ် ဒူအီ ဆဝ် တီ၊ အန် ဘော နပ်၊ ဂေ ညှိုမ် အန်။ ခုဝ်၊ အန် ဝီ တဝ်း ဒီ ဒူအီ ဆဝ်၊ “အိုယ် ဝါ အုဝ်၊ တဲး မဲ ဒါခိုယ်၊ အုဝ် ဟဲ့ ဟွတ့် ဘ့လွာ့ ဝဲန် မှာပ် မဲ။”

3 အန် ဟဲ့ ဟွတ့် ကာလာင် ဂြုဝ်း တီ၊ န့ မိုဝ်း ဒါ ဆာရာ အီ မာနုဝ် ဒါရာ ယူဒါ မင် အီ၊ ဂေ လာယ် ကာလာင် တဝ်း၊ “ဒူအီ နီ ကာလာင် ဂြုဝ်း အီ ကာခဲန့် ဒီ ဇဝ်ဖြာ။”

4 ဇဝ် ယေဆူ ယီ နပ် ပီ ထာင် ဂေ။ အန် ဝီ တဝ်း၊ “မှဝ် န့ ပါယ် ပီ ထာင် ဘေ နာ တူ မွှိုမ် ခဲင် နဝ်း ဘေ။း 5 ဘေ ဟဲ့ ထာင်၊ န့ ငှိုယ် တဝ်း၊ ‘အုဝ် ဂဝ်း ဝဲန် မှာပ် မဲ။’ ခုဝ်၊ အာဝ် ပွိုန် ယိုဝ်၊ ယုဝ် မှာပ် ဆီ မိုဝ်း၊ တူ မိုဝ်း။ ဆေ အုဝ် ယီ တဝ်း၊ ‘တဲး မဲ ယိတ့် ဟာဝ်၊’ ဘေ ထာင် န့ ညှာပ် ကူပ် ပွိုန် ယိုဝ် ဘေ၊ ယုဝ် အန် ယိတ့်၊ တူ ယိတ့်။ 6 အုဝ် ယီ တဲး ဘေ နပ် ဆီချာ၊ န့ မုး အုဝ်၊ အီ ဟဲ့ ဘဲန် ဂွန် ဒူအီ၊ အုဝ် ဟဲ့ မိုဝ်း ပွုန် ဒဲင် ကာဒါယ် တဲး အုဝ် ပဲ ဒီ ဘ့လွာ့ ဝဲန် မှာပ် အီ။” အန် ဟဲ့ ဟွတ့် ကာလာင် ဂြုဝ်း တီ၊ အန် ဝီ တဝ်း ဒီ ဒူအီ ဆဝ် တွိုန်၊ “ယိတ့်၊ ဒိုဝ်း မ့ဘေ၀် မဲ၊ ဝေန့် ဒီ ကာင် မဲ။” 7 ပန် တီ ဒူအီ တီ ဝီ ယိတ့်၊ ဝီ ဝေန့် ကာင် ဂေ။ 8 ဂေ ဒူအီ ကိူန် ဘော ယိုဝ် လွင် အန် တီ၊ ဂေ ဝီ အာမ် ကာဆဝ်။ ဂေ ဘော အိူပ် ဇဝ်ဖြာ အီ ဟဲ့ ဒွါ ပွုန် ဇိုဝ် တီ ဒီ ဒူအီ။

9 ဇဝ် ယေဆူ ယီ လေး ဒူင် ကွယ် အန်၊ ဝီ ဟာဝ် ပေါ ပ့လုဝ့်။ အန် ဝီ ယိုဝ် ဒူအီ အီ စိူဝ် အာမာထဲ။ အန် ကွယ် ဒူင် ဂဲပ် ရွိုန် စိုင်။ ဇဝ် ယေဆူ ဝီ တဝ်း ဒီ အန်၊ “မဲ တး ဒူပ် အုဝ်။” ပန် တီ အာမာထဲ တွိုန် ဝီ ယိတ့်၊ ဝီ ဟာဝ် ဒူပ် ဇဝ် ယေဆူ။

10 အာမာထဲ ဝီ ဘာင် ဇဝ် ယေဆူ ဟူမ် ဘူမ် ခဲင် ကာင် အန်။ ခုဝ်၊ ဇဝ် ယေဆူ ဝီ ဟာဝ် လိုပ် ခဲင် ကာင် အန်၊ ဝီ တုတ့်၊ ဆီလွ့ တဝ်း ဒီ ဟူမ်။ ဒေါ အန် တီ န့ ဘော မိုဝ်း ဒူအီ ဂဲပ် ရွိုန် စိုင် ဘဲန် ဝီ ဘဲန် ဝီ၊ ဂေ တး ဟူမ် ရိုမ်။ ဘော ဒူအီ ဟဝ် အီ အွန် ဒီ ဘူင် မှာပ် ဆေဆေ၊ ဂေ ကိူန် ဟဲ့ တး။ ဘော ဂေ ဒီဘဲ ဇဝ် ယေဆူ ဟဲ့ တး။ ဂေ ဘောကာဂ့လျီတ် ကွယ် ရိုမ် ဟူမ် ရိုမ်။ 11 ဂေ ဒူအီ ဖိုင် ဖာရီဆဲ ဘော နပ် လွင် အန် တီ၊ ဂေ ဝီ တဝ်း ဒီ ဒီဘဲ ဇဝ် ယေဆူ၊ “မှဝ် န့ ပါယ် ပီ ကွယ် ဒါ ဆာရာ ဘေ၊ ဟူမ် ရိုမ် ဒူပ် ဂေ ဒူအီ အီ ဂဲပ် ရွိုန် စိုင် ဘော ဂေ ဒူအီ အီ အွန် ဒီ ဘူင် မှာပ် ဆေဆေ။း”

12 ဇဝ် ယေဆူ ယိုဝ် ဂြုဝ်း ဂေ တီ။ အန် ဝီ တဝ်း၊ “ဆေ ဒူအီ ဟဲ့ ပ့လူမ် ခ၊ အန် တူ လုဝ် ဆာရာဝူန်။ ဆေ အန် ယီ မိုဝ်း ဆဝ် ရောဂါ၊ အန် ဟဲ့ လုဝ် ဆာရာဝူန်။ 13 ဘေ ဘော လုဝ် ဇေန့်ဇာ လွင် ဒါင် ဂြုဝ်း ဇဝ်ဖြာ ပီ ကာလာင် အန်။ အန် ဟဲ့ ဒွိုမ် တဝ်း၊ ‘အုဝ် တူ လုဝ် ဘေ လှူ ဘဲန် မျုဝ် ဘဲန် မျုဝ် ဒီ အုဝ်။ အုဝ် ဆီ တဲး ဘေ ကာဝေ အီ ဟဝ်။’ ပါယ် တီ၊ ဘော အုဝ် တူ တး ဒဲင် ကာဒါယ် နီ၊ တဲး အုဝ် ဒဲ့ ဒူအီ မွှိုမ် တး ဒူပ် အုဝ်။ အုဝ် ဟဲ့ တး၊ တဲး အုဝ် ဒဲ့ ဂေ ဒူအီ မိုဝ်း မှာပ် တး ဒူပ် အုဝ်။”

14 ဇဝ် ယေဆူ ဟဲ့ ဟွတ့် ကာလာင် ဂြုဝ်း တီ၊ န့ ဝီ မိုဝ်း ဂေ ဒီဘဲ အာယောဟာန် တွိုန်၊ ဂေ ဝီ တး ဒူင် ကွယ် ဇဝ် ယေဆူ ဝီ တဝ်း၊ “အီ မုး ယေ ဘော ဂေ ဒူအီ ဖိုင် ဖာရီဆဲ၊ ယေ လုဝ် ယိူန် ပီ ဒီ ဟူမ်။ မှဝ် န့ ပါယ် ပီ တူ ယိူန် ဒီဘဲ မဲ ပီ ဒီ ဟူမ် ဂေ။း”

15 ဇဝ် ယေဆူ ဝီ တဝ်း ဒီ ဂေ၊ “ဆေ န့ မိုဝ်း ဘ့လွယ် ခတ်၊ ဒေါ ကွယ် ရိုမ် ကာညူမ် ဒူပ် ခဲတ့် အန်၊ ဂေ ဒူအီ အီ လိုပ် ဘ့လွယ် တူ က့လိုဝ်။ န့ ယီ ဇမ် အူ ဆီငဲ၊ ဂေ ဒီ ဒိုဝ်း ဝဲန် ကာညူမ် တီ။ ဒေါ အန် တီ ဂေ ဒူအီ အီ လိုပ် ဘ့လွယ် တီ၊ ဂေ ဒီ ယိူန် ပီ ဒီ ဟူမ် ဂေ။”

16 ပန် တီ အန် ဝီ ကာလာင် အူဖာမာ လွင် အန် တီ။ အန် တဝ်း၊ “ဒူအီ တူ ဒိုဝ်း ဒူန့် ကာမာယ် ဝီ ကာပါင် ဆီတုဝ် ဘြိမ်။ ဆေ ဂေ ဒီ ဘူင် ပါယ် တီ၊ ဒူန့် ကာမာယ် တဲး ဆီတုဝ် ဘြိမ် ဝီ ကာပျာတ့် ကာပွါ၊ တဲး လှုး အန် ဝီ တာင် လွှိုမ် ခါ အာတ့်။ 17 န့ မိူဝ် တူ မိုဝ်း အာဆေ အီ ဟပ် အိုမ် မာငုန် ကာမာယ် ခဲင် ကာပဝ် ဘ့လေ အီ ဘြိမ်။^a ဒွန် အီ နပ်၊ အိုမ် မာငုန် ကာမာယ် ဒီ ဆီနမ် ခဲင် ကာပဝ် ဘ့လေ ဘြိမ် တွိုန်၊ တဲး န့ ကာလာတ့်၊ တဲး ဘော ကာပဝ် ဘော အိုမ် မာငုန် ကော လိုဝ် စှိုမ်။ ခုဝ်၊ လုဝ် ဟပ် အိုမ် မာငုန် ကာမာယ် ခဲင် ကာပဝ် ဘ့လေ ကာမာယ်၊ ကွဲ့ တဲး န့ လိုဝ်။”

18 ဒေါ ကာလာင် ဇဝ် ယေဆူ အူဖာမာ ဇိုဝ် တီ၊ န့ မိုဝ်း ဒါ တာင် အီ အိုပ် ဇူင် အူ ဝီ၊ အန် တး ခြိုပ်ခြဝ် ဒီ အာတ့် ဇဝ် ယေဆူ။ အန် ဝီ တဝ်း၊ “ဂွန် အီဘိုန့် အုဝ် ဆီလွ့ ယမ် ဒေါ တီ နီ။ ဘိုင် မဲ တး၊ ပါ ဒုဝ် အန်၊ တဲး အန် ဝီ ယိတ့် ဝီ အိမ်။” 19 ဇဝ် ယေဆူ ဘော ဒီဘဲ အန် ဝီ ဟာဝ် ဒူပ် အန်။

20 ဒေါ အန် တီ န့ ဘော မိုဝ်း အီဘိုန့် အူ ဝီ။ အန် ဟဲ့ မိုဝ်း ဆဝ် နှာမ် လေး အာဒါ ဂိုဝ် ဒီ အာ ဆီနမ်။ အန် တး ချြီ့ ဒီ ပန် ဇဝ် ယေဆူ၊ ဝီ ပါ ဘြုဝ် ဆီတုဝ် ဇဝ် ယေဆူ။ 21 အန် ဟဲ့ ထာင် ခဲင် နဝ်း အန်၊ “ဆေ အုဝ် ပွိုန် ဒီ ပါ မီ ခဲ့ ဆီတုဝ် အန် မိူဝ်၊ အုဝ် ဒီ ဘော ကဲန်။” ခုဝ်၊ အန် ဝီ ဘူင် ပါယ် တီ။

22 ဇဝ် ယေဆူ ဝီ ယွတ် ဒီ ပန် အန် အူ ဇေန့်၊ ဝီ တဝ်း ဒီ အီဘိုန့် တွိုန်၊ “အိုယ် ဂိုန့်၊ တဲး မဲ ဒါခိုယ်။ ကူပ် ညှိုမ် မဲ၊ ဆဝ် မဲ ဟဲ့ ဟြာယ်၊ မဲ ဟဲ့ ကဲန်။” ဒေါ အန် တီ ဆဝ် အန် ဟဲ့ ကဲန် အူ ဇေန့်။

23 ဟဲ့ ဟွတ့်၊ ဇဝ် ယေဆူ ဝီ ဟာဝ် ဇမ် ကာင် ဒါ ကာညာ တွိုန်။ ဒေါ ယိုဝ် ဇဝ် ယေဆူ ဂေ ဒူအီ ဘုတ် ဝဝ်၊ ဘော ဂေ ဒူအီ ကိူန် ဟဲ့ ယာမ် ဆီနန် ဆီနိူင်၊ 24 အန် ဝီ တဝ်း၊ “ဟာဝ်၊ တဲး ဘေ ဝေန့်။ ဂွန် အီဘိုန့် နီ၊ အန် တူ ယမ်။ အန် အိတ်။” ဂေ ယီ ကာညး အန်။ 25 အန် ဘော စ်ု ဒူအီ ကိူန် လေး ဟာဝ် နာ ရေတ့် ကာင်။ ဟဲ့ ဟွတ့်၊ ဇဝ် ယေဆူ လိုပ် နာ ခဲင်။ အန် ဝီ ပါ ဒဲ ဂွန် တီ၊ စွယ် အန် ယိတ့်။ 26 ဂေ ဒူအီ ကိူန် ဝီ ဟာဝ် ကာလာင် ဒီ အီ ဟဝ် လွင် အန် တီ၊ တဲး ဂေ ဘောကာဂ့လျီတ် အီ ကွယ် ဒွန် ရဝ် ဒွန် မိူင် ကော နပ်။

27 ဇဝ် ယေဆူ ဝီ လေး ဒူင် ကွယ် အန် တွိုန်။ ဒေါ အန် တီ န့ မိုဝ်း ဒူအီ ငါယ် အပ် အာ ဝီ၊ ဂါယ် ဝီ ဒူပ် အန်။ ဂါယ် ဝီ ဒတ် တဝ်း၊ “မဲ ဂွန် အာဒါဝိတ်၊ မှာန့်၊ တဲး မဲ ကာဝေ ယာယ်။” 28 ဇဝ် ယေဆူ ဝီ လိုပ် ခဲင် ကာင် အီ။ ပန် တီ ဂါယ် ဝီ ဒူပ် အန်။ အန် ဝီ ဒီမွှတ် ဂါယ် တဝ်း၊ “ဘာယ် ညှိုမ်၊ အုဝ် ပဲ ဒီ ပီကဲန် ဘာယ်။း” ဂါယ် ဝီ တဝ်း၊ “ဟဲ့ ညှိုမ်။”

29 ပန် တီ ဇဝ် ယေဆူ ဝီ ပါ ငါယ် ဂါယ်၊ ဝီ တဝ်း၊ “ကူပ် ညှိုမ် ဘာယ်၊ န့ ဒီ ဘဲန် ပါယ် တီ။” 30 ပန် တီ ဂါယ် ဝီ ပွိုန် ယိုဝ်။ ဇဝ် ယေဆူ ဝီ ဒမ် ဆီချာ ဂါယ်၊ ဝီ တဝ်း၊ “ကွဲ့ တဲး ဘာယ် ကာလာင် ဒီ အာဆေ လွင် အန် တီ။” 31 ဂါယ် ယီ လေး ခဲင် ကာင် တွိုန်၊ ဝီ ဟာဝ် ကာလာင် လွင် ပဲ့ ဟဲ့ ဘူင် ဇဝ် ယေဆူ၊ တဲး ဂေ အီ ကွယ် ခဲင် မာန် မိူင် ကော နပ် တူတ့် လွင် အန် တီ။

32 ဒေါ ဟာဝ် ဂါယ် လေး ခဲင် ကာင် ဒူင် ကွယ် ဇဝ် ယေဆူ၊ န့ ဘော မိုဝ်း ဒူအီ အီ မိုဝ်း ကာနမ် ခဲင် ဒုဝ် အန်။ အန် မိူဝ် တူ နပ် ဒီ ကာလာင် ဂြုဝ်း။ ဂေ တး တိုယ် အန် ဒီ ဇဝ် ယေဆူ။ 33 ဇဝ် ယေဆူ ဝီ စ်ု ကာနမ် လေး ခဲင် ဒုဝ် ဒူအီ တွိုန်။ ဟဲ့ ဟွတ့်၊ အန် ဝီ ပွိုန် ကာလာင် ဂြုဝ်း။ ပန် တီ ဂေ ဒူအီ ကိူန် ဝီ အာမ် ကာဆဝ်။ ဂေ ဝီ တဝ်း၊ “အေ ဒူအီ အီ ကွယ် ခဲင် မိူင် အီဆာရေလ နီ၊ အေ တူ ဒွိုမ် ယိုဝ် ဇိုဝ် တီ။”

34 ဂေ ဒူအီ ခဲင် ဖိုင် ဖာရီဆဲ၊ ဂေ ဝီ တဝ်း၊ “န့ မုး ဘုဝ် အီ အိုပ် ကာနမ် အီ တဲး ဝီ တီ ပဲ ဒီ ဟုဝ် ကာနမ် လေး ခဲင် ဒုဝ် အီ။”

35 ဇဝ် ယေဆူ ဘော ဟာဝ် ခဲင် မိူင် ခဲင် ရဝ် ဒွန် နာ ဒွန် ပ့လုဝ့်၊ ဝီ မာနုဝ် ဂေ ဒူအီ အာယူဒါ ခဲင် ဇူင် ပီ ကြိုပ် ဂေ ဇဝ်ဖြာ ဘော ကာလာင် လွင် အာခြာဝ် ဒီ အိုပ် ဇဝ်ဖြာ ကာဒါယ်၊ တဲး န့ ဘဲန် နဝ်း ဒါခိုယ် ဒီ ဒူအီ။ အန် ဘော ပီကဲန် ဂေ ဒူအီ ဆဝ်၊ တဲး ဆဝ် ဂေ ဟြာယ်။ 36 အန် ဘော ယိုဝ် ဂေ ဒူအီ ကိူန်၊ အန် ဝီ ကာဝေ ဂေ။ ခုဝ်၊ ဂေ ပီ မာဘူ အီ တူ မိုဝ်း ဒါ အီ ဟျီင်။ န့ ဘဲန် ဒုက် ဘဲန် ညှာပ် ဒီ နဝ်း ဂေ၊ အာဝ် မိုဝ်း အီ စွယ် ဂေ။ 37 ပန် တီ အန် ဝီ ကာလာင် အူဖာမာ ပေါ အူ မျုဝ် ဒီ ဒီဘဲ အန်။ အန် တဝ်း၊ “ဒူအီ အီ ဆီ ထူမ် လွင် ဇဝ်ဖြာ ဂေ ကိူန်။ ဂေ ပီ မာန် ငှုဝ် အီ ဟဲ့ ဆိန်၊ အီ ဟဲ့ လုဝ် ဆုဝ့်။ ဂေ ဒူအီ အီ ဆုဝ့် ငှုဝ် တီ ယီ ပြေတ့်။ 38 ခုဝ်၊ အုဝ် တဝ်း၊ တဲး ဘေ မှာန့် ဒီ ဇဝ်ဖြာ အီ ပီ ဒါ ကာညာ မာန် ငှုဝ် တီ၊ တဲး အန် တိုယ် ဒူအီ အီ ဒဲ့ ဒူအီ ဒူပ် ဇဝ်ဖြာ၊ တဲး ဂေ ဘူင် ပီ ဒူအီ အီ ဆုဝ့် ငှုဝ်။”