ဇဝ်ဖြာ ဘော အိုပ် နဝ်း ခုန်ဒီခမ် ပီ အန် အိုပ် ဘ့လဲင် အိုမ်။ ဇဝ်ဖြာ တဲး န့ ဟာဝ် ဒူပ် ပီ အိုင် အန်။

2 ဒူအီ ထာင် ပီ ဘူင် ဂေ ဟဲ့ မုး ဟဲ့ မှာန်။ မာလဲ၊ န့ မုး ဇဝ်ဖြာ အီ ယွတ် နဝ်း ဂေ။ အန် ဒီ ဆုင်ဖျာတ် ယုဝ် ဟဲ့ မှာန် အာဝ် မှာန်။

3 ဆေ မဲ ဒူပ် ဒါရာ ဇဝ်ဖြာ ဘော ဘူင် ဆိူဝ် ဆိူဝ် မှာန် မှာန် ဒီ အီ၊ န့ ဘော လဝ့် ကာဆဝ် နဝ်း ဇဝ်ဖြာ။ န့ မွှိုမ် လွှိုမ် ပီ လှူ မဲ။

4 ပီ ဘူင် ဂေ ဒူအီ ဟာယ်၊ န့ ဒူပ် နဝ်း ပီဖုင်၊ နဝ်း ပီခိုက် ဂေ။ န့ ဘော မုး မှာပ် ဒီလူယ်။

5 ဆေ ဒူအီ ဘူင် နင်ဂန်၊ ပီ ခြာမ် အန် ဒီ ဘူင်၊ န့ ဒီ တဲး အန် မိုဝ်း ဒီ ဟူမ် လိုင် တာ လိုင်။ ဆေ အန် ယီ ဘူင် ဟဲ ဟဲ၊ တဲး န့ စေဝ် ဟွတ့်၊ အာဝ် ဂ့လိုမ် ဟူမ် ဂ့လိုမ် တာ ဒေါ မှဝ်။

6 ကြုဝ်ကြာမ် ပီ ကာလုဝ် မဲ ဒီ ဒိုဝ်း တး၊ န့ ဒီ ဘော စေဝ် ဟြာယ်။ န့ ပီ န့အု အီ တူ ကွယ် လှေန့်။ န့ ဘော ပီ ယွတ့် ပီ ဒိန့် အီ၊ တဲး ဒုဝ် ဆတ် ခြေ ယမ်။

7 ဒုက် ပီ ဒွါ ဒူအီ ဟာယ် ဒီ အီ ဟဝ်၊ န့ ဒီ ဝီ တဲး ဂေ စှိုမ်။ ခုဝ်၊ ဂေ ဟဲ့ ဝဲန် နာ မုး နာ မှာန်။

8 ဂေ အီ ဘူင် နာ စီစိဝ်၊ ဂေ ဒီ ဘော ဒူပ် န့တေန့် ဂုဝ့် ဂဲ့။ ဂေ အီ မိုဝ်း နဝ်း လုယ်၊ ဂေ ဒီ ဘော ဘူင် နာ မုး နာ မှာန်။

9 ကွယ် ခဲင် ထိုပ်၊ န့ ဘော မွှိုမ် လွှိုမ် ကွယ် ရိုမ် ခဲင် ကာင် ဒူပ် အီဘိုန့် ဆီမာ ပိုန့် ဆီမာ အေး။

10 ဒူအီ ဟာယ်၊ အန် ဆီ ဘူင် မီ အီ တူ ဘွတ် အီ တူ မွှိုမ်။ အန် မိူဝ် တူ နပ် ဒီ ကာဝေ ဂိုက် အန်။

11 ဒူအီ အီ ကာညး အီ ဘော ဖျာက် အီ၊ အန် လုဝ် ခမ် မှာပ် အန်၊ န့ ဒီ တဲး ဒူအီ ရိုဝ် နပ် ဒီ ဆာဒိက်။ န့ ယီ မုး ဒူအီ အီ မိုဝ်း အာငျာန်၊ အန် ဒီ ဘော နပ် ဒီ ဟေန် ပီ မာနုဝ် အီ ဟဝ် ဒီ အန်၊ တဲး အန် ဝဲ နပ် ကာပွါ။

12 ဒူအီ အီ မိုဝ်း နဝ်း ဆိူဝ် နဝ်း မှာန်၊ အန် ယွတ် ပီ ပါယ် ဂေ အီ ကွယ် ခဲင် ကာင် ဒူအီ ဟာယ်။ အန် ဒီ ဘော တဲး ဂေ စှိုမ်။

13 ဆေ မဲ ပီကာအာဝ် ဟျုဝ့် မဲ၊ တူ ထူမ် ဂြုဝ်း ဒူအီ ဂိန်၊ ဂြုဝ်း ပီ ဒဲ့ မဲ မိူဝ်၊ အာဝ် မိုဝ်း အီ ယဝ်း ခေါ အူ ဝီ။

14 ဆေ ဒူအီ ဟဲ့ ရူ ကာဆဝ် ဒီ မဲ၊ လက်ဆွင် ပီ ပြာ မဲ ဒီ ဒွါ၊ န့ ပဲ ပီနှိမ် နဝ်း အန်။ ပီ ချြီင် မဲ ဒီ ဒွါ၊ န့ တဲး ရူ အန် ဟြာယ်။

15 ဆေ ဒူအီ ဆုင်ဖျာတ် ဒူပ် ဒါရာ၊ န့ ဘော ဘဲန် နဝ်း ဒါခိုယ် ဒီ ဂေ အီ မိုဝ်း နဝ်း ဆိူဝ် နဝ်း မှာန်။ ဂေ အီ တူ မွှိုမ် ယီ ဘဲန် နဝ်း ယုဝ် ကာဆဝ်။

16 ဒူအီ အီ တူ ဒူပ် အာငျာန် ဘွတ်၊ န့ ပီ အန် ဟာဝ် ဒူင် ကွယ် ဂေ ဒူအီ ယမ်။

17 ဒူအီ အီ အိုင် တဲး န့ ကျဝ် ဆေဆေ၊ ဘူင် မီ ပီ အိုင် အန်၊ အန် ဒီ ကြဲ ဒီ ဂိန်။ အာဆေ အိုင် ဒီ ဒျီင် ပဝ်း ဘော ဟူမ် ဆီငဲး ဆေဆေ၊ အန် ဒီ ဖ့လာန်၊ တူ ရမ်။

18 ဂေ ဒူအီ ဟာယ် လုဝ် ဝီ ခမ် ဒုက် ကာဒါင် ဒူအီ အီ မိုဝ်း နဝ်း ဘွတ် နဝ်း မွှိုမ်။ ဘော ဒူအီ အီ တူ ပွိုန် ညှိုမ် လုဝ် ခမ် ဒုက် ကာဒါင် ဒူအီ အီ ဘူင် နာ မွှိုမ်။

19 ကွယ် ခဲင် ပြဲ ကာဟဝ်း၊ န့ မွှိုမ် လွှိုမ် ကွယ် ရိုမ် ဒူပ် အီဘိုန့် ဆီမာ ပိုန့် ဆီမာ အေး။

20 ကြုဝ် အီ ငဝ်း တာင်၊ ဟဲ့ နုဝ့် ခဲင် ကာင် ဒူအီ အီ မိုဝ်း အာငျာန်။ အီ မုး ဒူအီ အီ တူ မိုဝ်း အာငျာန်၊ အန် ယီ ဘူင် တဲး ကြုဝ်ကြာမ် အန် တူတ့် ပီယေန့်။

21 ဒူအီ အီ ဘူင် နာ ဆိူဝ် နာ မှာန်၊ ဘော ဘူင် နာ မွှိုမ်၊ အာဆာက် အန် ဒီ တူင့်။ အီ ဟဝ် ဒီ ရုဝ်ဆေ အန် ဘော ဘူင် နာ ဆိူဝ် နာ မှာန် ဒီ အန်။

22 ဒူအီ အီ မိုဝ်း အာငျာန်၊ အန် နပ် ဒီ ကာဂုဝ်း ဘော ပွိုန် မိူင် ဂေ ဒူအီ အီ မိုဝ်း ပ့လူမ် တာင်။ အန် ဘော ပွိုန် ဒီ ပျာတ့် ဘော ရဲင် မိူင် အီ မုး ဒူင် ဘိုင် ဂေ။

23 ဆေ မဲ ဆာဒိက် ဂြုဝ်း ပီ ကာလာင် မဲ၊ ဒုက် တူ တး ဇမ် မဲ။

24 ဒူအီ ပီခိုက် ဘော ဒူအီ အီ ဆီ တဲး အီ ဟဝ် အိူပ် အန်၊ အီ ဟဝ် ဘော တဝ်း အန် စိူဝ်၊ “ဒါ အီ ပး ကာဘျာဝ် တာင်။” အန် နပ် မီ ဒီ လုက်တာယ် အီ ဟဝ်၊ တူ နပ် ဒီ ရုဝ်ဆေ ဂေ။

25 ဒူအီ ကြာန် ယီ နပ် ဒီ ဆီ ပွိုန် ဘဲန် မျုဝ် ဘဲန် မျုဝ်။ နဝ်း အန် တီ ဒီ ဝီ တဲး အန် ယမ် ကူပ် ယီ တူ ခမ် အန် ဒီ ဒိုဝ်း ဒဲ အန် ဒီ ဇု ဒီ မာပွါ့။

26 ဆေဆေ အန် ဘော ဆီ ပွိုန် ဘဲန် မျုဝ် ဘဲန် မျုဝ်။ န့ ယီ မုး ဒူအီ အီ မိုဝ်း နဝ်း ဆိူဝ် နဝ်း မှာန်၊ အန် တူ လှယ့်၊ အန် နပ် ဒီ ကာဆာင် ဒွါ ဒီ အီ ဟဝ် ဆေဆေ။

27 ဇဝ်ဖြာ ဘော ကာအိး ပီ လှူ ဂေ ဒူအီ ဟာယ်။ ဒဲင် တီ၊ ဆေ ဂေ တး လှူ ဒေါ ခြာမ် ဂေ ဒီ ဘူင် အီ တူ မွှိုမ်၊ အန် ဘော ဝဲ ကာအိး လွှိုမ် တီ။

28 အာဆေ ဘဲန် ဆက်ဆေ ကာလာင် အီ တူ မှာန်၊ အန် လုဝ် ခမ် မှာပ် အန်။ ဒူအီ အီ နပ် ဒီ ထူမ် ဂြုဝ်း အီ၊ အန် ယီ ကာလာင် နာ မှာန် ဆေဆေ။

29 ဒူအီ ဟာယ် နပ် ဒီ ညိုင်ရာင် ပီကျ အန်။ အီ မုး ဒူအီ အီ မိုဝ်း နဝ်း ဘွတ် နဝ်း မွှိုမ်၊ အန် နပ် ဒီ ကာဖာ ပီ ဒီ ဘူင် အန်။

30 ဒူအီ အီ မိုဝ်း အာငျာန်၊ ဘော ဒူအီ အီ ကာလှုး ဒီ နဝ်း ဘဲန် မျုဝ် ဘဲန် မျုဝ်၊ အန် တူ ကာခဲန့် တူ ကာဘး ဒီ ဇဝ်ဖြာ။

31 ဆီငဲ ဒီ ကာဂုဝ်း အီ ဒီ ဒါ ဆိုက်၊ ဂေ ပီ ဘော ဟဲ့ ဟွတ့် ရဲန် အုန် မင်ပြွင့် ဂေ၊ န့ ယီ မုး ဇဝ်ဖြာ အီ တဲး ဂေ အွင်။