အိုယ် ဘေ ဂွန် ကာညူမ်၊ ထူမ် ပီ မာနုဝ် ဂုန့် ဘေ။ တဲး ဘေ ထူမ် ဆီချာ၊ တဲး န့ တဲး ဘေ မိုဝ်း အာငျာန်။

2 ပီ မာနုဝ် အုဝ် ဟဲ့ ဘွတ် ဟဲ့ မွှိုမ်။ ကွဲ့ ဝဲန် ဂြုဝ်း တီ။

3 ဒေါ ဆီ မုး အုဝ် ဂွန်၊ ဒေါ ဆီ ကွယ် ရိုမ် အုဝ် ဒူပ် ဂုန့် အုဝ်၊ ဒေါ ဆီ ဒီတဲတ် အုဝ်၊ ဒေါ မိုဝ်း ဂုန့် မာ အုဝ် အုဝ် အူ ဝီ၊

4 ဂုန့် ဟဲ့ မာနုဝ် အုဝ် တဝ်း၊ “တဲး မဲ ဆာဒိက် ဂြုဝ်း ပီ မာနုဝ် နီ၊ ဟပ် အုန် ခဲင် နဝ်း မဲ။ န့ ဒီ တဲး မဲ အိမ်၊ တူ တဲး မဲ ယမ်။

5 တဲး မဲ မိုဝ်း အာငျာန်၊ နပ် ပီ ပါယ် ဘဲန် မျုဝ် ဘဲန် မျုဝ်။ ကွဲ့ တဲး မဲ ပိဝ်၊ ကွဲ့ ဘ့လိူင် ဂြုဝ်း ပီ ကာလာင် အုဝ် နီ။

6 ကွဲ့ ဘ့လေး ကွဲ့ ဝဲန် အာငျာန် တီ။ အန် ဒီ ဂွင့် ဒီ ရဲ မဲ။ တဲး မဲ ရွက့် အာငျာန်၊ အန် ဒီ ဘ်ု ရိတ် အာဆာက် မဲ။

7 အာငျာန် ဟဲ့ မွှိုမ် လွှိုမ် တူတ့် မျုဝ် ဟဝ်။ ခုဝ်၊ မဲ လုဝ် ဒိုဝ်း အုန် အာငျာန်။ ခဲ့ တာင် ငဝ်း အန်၊ အာဝ် လုဝ် ယုဝ်။ မဲ ပီ ဘော လုဝ် ဒွါ တူတ့် ခဲ့ မိုဝ်း မဲ၊ တဲး မဲ ဒွါ၊ တဲး မဲ ပွိုန်။

8 ဆေ မဲ နပ် အာငျာန် တီ ဟဲ့ ပီ ကြုဝ် အီ ငဝ်း တာင် ကာဆဝ်။ န့ ဒီ ဝီ တဲး အီ ဟဝ် ရုဝ်ဆေ မဲ။ ဆေ မဲ ဘော ဘျုဝ် ဒီ ဒူပ် ဆေဆေ၊ န့ ဒီ တဲး မဲ မိုဝ်း ဆာရေ။

9 အာဆေ ဟဲ့ မိုဝ်း အာငျာန် တီ၊ န့ ပီ၊ အန် ဟဲ့ ဘြဝ့် ကာမဲ့ ကာမာယ် ဘော စှိုပ် မင်ဂိုမ် အီ စှိတ် ကာဆဝ်။”

10 အိုယ် ဂွန် ကာညူမ် အုဝ်၊ တဲး မဲ ထူမ် ဂြုဝ်း အုဝ်။ ဆေ မဲ ဘူင် ပါယ် တီ၊ အာဆာက် မဲ ဒီ တူင့်။

11 အုဝ် ဟဲ့ မာနုဝ် မဲ၊ မှဝ် ဒီ ပါယ် ဒီ ဘူင်၊ တဲး န့ ဒူပ် အာငျာန်။ အုဝ် ဟဲ့ ဘျ ဒီ မဲ၊ တဲး မဲ ဒူပ် နာ မုး နာ မှာန်။

12 ဆေ မဲ ဘော ဟာဝ် နာ မှဝ်၊ မဲ မိူဝ် တူ ကာဒုး ဒုက်။ ဆေ မဲ ဘော ကာဘ့လဲပ်၊ မဲ မိူဝ် တူ ကာဝှး၊ တူ ကေး။

13 ကွဲ့ ပိဝ် ပီ မာနုဝ် အုဝ် နီ။ ကွဲ့ ဝဲန် အန်။ တဲး မဲ လှုဝ်း ဆီချာ။ ခုဝ်၊ န့ တဲး အာဆာက် ဒီ မဲ။

14 ကွဲ့ ဟာဝ် ဒူပ် ဂေ အီ တူ မွှိုမ်။ ကွဲ့ ဒူပ် ဂေ ဒူအီ ဟာယ် ဒူအီ မိူက်။

15 တဲး မဲ ဝး န့တေန့် တီ၊ ကွဲ့ ဟာဝ် ဒူပ် ဂေ။ မဲ ဟီ ဟွတ့် ဝး၊ မဲ ယီ ဟာဝ် ဒူပ် န့တေန့် မဲ။

16 ဂေ ဒူအီ မိူက်၊ ဆေ ဂေ တူ ပွိုန် ဒီ ဘူင် မိူက်၊ ဂေ တူ ပွိုန် ကွယ် နှိမ်။ ဆေ ဂေ တူ ပွိုန် ဒီ ဘူင် တဲး အီ စှိုမ် ဂေ တူ ပွိုန် ဒီ အိတ်။

17 ဂေ ဘူင် နာ မိူက် နာ ဟာယ် ပီ ဂေ ဟူမ် ဘူမ်။ ဂေ ဘော လာယ် ကာမး ကာဂုဝ်း ပီ ဂေ ဒျီင် အိုမ်။

18 ပီ ဘူင် ဂေ အီ နဝ်း ဆိူဝ် နဝ်း မှာန်၊ န့ ပီ ကာတာန် ဘ့လာင် ဆီငဲ အီ ကြဲ ဒီ ဘ့လာင် တာင် ကော ဇမ် လေး ဆီငဲ။

19 ပီ ဘူင် ဂေ ဒူအီ မိူက် ယီ အပ် ဝွင့် ကာဆဝ်။ ဂေ တူ နပ် အီ ဒီ တဲး ဂေ ကေး။

20 အိုယ် ဂွန် ကာညူမ် အုဝ်၊ တဲး မဲ ထူမ် ဆီချာ ဂြုဝ်း ပီ ကာလာင် အုဝ်။

21 တဲး မဲ လှုဝ်း ဆေဆေ၊ ကွဲ့ တဲး မဲ ပိဝ်။

22 ခုဝ်၊ ဂြုဝ်း တီ တဲး အာဆာက် ဒီ ဂေ အီ ဟဲ့ ယိုဝ် အန်။ န့ ဘော တဲး ဘော ဒုဝ် ဘော နဝ်း ဒါခိုယ်။

23 တဲး မဲ ဘ်ု ဆီချာ နဝ်း မဲ၊ တဲး န့ လွှိုမ် မဲ ဘ်ု မျုဝ် ဟဝ် ဒွန် မျုဝ်။ ခုဝ်၊ ပီ ဘူင် မဲ ဒွန် မျုဝ်၊ န့ လေး ခဲင် နဝ်း မဲ တီ။

24 ကွဲ့ ကာလာင် ဂြုဝ်း ဂုဝ့် ဂဲ့ ဘော ဂြုဝ်း ကာလုဝ် ဒေါ မှဝ်။

25 တဲး မဲ ယွတ် ဆိူဝ် နာ အာတ့် မဲ၊ ကွဲ့ ပီလှိန် ငါယ် မဲ။ တဲး မဲ ယွတ် ဟာဝ် ဆိူဝ် ဆိူဝ်။

26 မဲ လုဝ် ဆာဒိက် ဆီချာ န့တေန့် ဒူင် ဒီ ဟာဝ် မဲ၊ တဲး မဲ ပွိုန် ဒီ ဟာဝ် ဒါခိုယ်။

27 မဲ ကွဲ့ ဝး နာ ဂ နာ အး။ တဲး မဲ ယီ ဝး အီ တူ မွှိုမ်။