1 တဲး အေ အိူပ် ဇဝ်ဖြာ။ တဲး အေ အိူပ် အန် ဇဝ်။ ဘေ ဒဲစေန့် အန် ဇဝ်၊ တဲး ဘော ဘေ အိူပ် ဇဝ်ဖြာ။

2 ဘေ အီ ဘူင် ဂါန် ခဲင် ဟုဝ် ဇဝ်ဖြာ၊ ဘော ဘေ အီ ဘူင် ဂါန် ခဲင် ဝဲင် ထိုပ် ဘိက် ဘွတ်၊

3 တဲး အေ ကာဖြူမ် ဒီ အိူပ် မျုက် ဇဝ်ဖြာ။ ခုဝ်၊ အန် ဇဝ် ဟဲ့ မွှိုမ်။ တဲး အေ ဘော တဝ်း မှုဝ် အီ အိူပ် အန် ဇဝ်။ ခုဝ်၊ န့ ဒါခိုယ်။

4 အန် ဇဝ် ဟဲ့ ရဝ်း ခြိုဝ် အာကူပ်၊ တဲး ဂေ ဘဲန် ဒူအီ အာမျုဝ် အန်။ အန် ဟဲ့ ရဝ်း ဂေ ဒူအီ အီဆာရေလ၊ တဲး ဂေ ပီ ကြုဝ် အန် အီ ဟဲ့ ဘွတ် ဟဲ့ ငဝ်း တာင်။

5 အုဝ် ဟဲ့ နပ် ဆီချာ၊ ဇဝ်ဖြာ ဟဲ့ ဘွတ် မျာတ် ကာဆဝ်။ အန် ဟဲ့ ဘွတ် လွှိုမ် ဇဝ် ပီ ကြိုပ် အီ ဟဝ် ဒွန် ကာဒင်။

6 ခဲ့ ပီ ဆီ ဘူင် ဇဝ်ဖြာ၊ အန် ဒီ ဘော ဘူင်။ ဘော ခဲင် ဂါင်ဟြာဝ် ဘော ဒဲင် ကာဒါယ်၊ ဘော ခဲင် အိုမ် နမ်မုက်ဆာရာ အီ လိုက် ဒွန် ပ့လုဝ့်၊ အန် နပ် ဒီ ဘူင် ခဲ့ ပီ အိုင် အန်။

7 အန် ဇဝ် ဘော ဘူင် တဲး န့အု တး ဒူင် ဆိူတ် ဘ့လေန့်။ အန် ဇဝ် ဘော ဘူင် တဲး ပ့လ မ့ပ့လေတ့် တး ဒူပ် ခုန် တာင် ဂေ ဂ့လာယ် တာင်။ န့ ပီ အန် ဒိုဝ်း လေး ခုန် ခဲင် ဂြွာ ဒူင် အုန် အန် ကြုဝ်ကြာမ် အန်။

8 ခဲင် မိူင် အဲဂိုပ်၊ အန် ဇဝ် ဟဲ့ ဘူင် တဲး ဂွန် ဂိန့် ဂေ ယမ် တူတ့်။ ဘော ဂွန် ဂိန့် ဒူအီ ဘော ဂွန် ဂိန့် ဒုဝ် ဆတ်ဒါဝါ ဟဲ့ ယမ် တူတ့်။

9 အိုယ် ဘေ ဒူအီ အဲဂိုပ်၊ အန် ဇဝ် ဟဲ့ ဘျ အီ မွှိုမ် အာမ် ဘဲန် မျုဝ် ဘဲန် မျုဝ်၊ တဲး ခုန်ဒီခမ် ဘော အာမူ အာမာတ် အန် ကာဒုး ဒုက်။

10 အန် ဇဝ် ဟဲ့ ဘူင် တဲး ဂေ ဒူအီ အာမျုဝ် ဟဝ် ဘဲန် မျုဝ် ဘဲန် မျုဝ် ဘော ယမ် ကိူန် ကာဆဝ်။ ဘော ခုန်ဒီခမ် အီ မိုဝ်း ပွုန် တာင်၊ အန် ဟဲ့ ဝဲန်။

11 ဘော အာဆီဟူန် အီ မုး ခုန်ဒီခမ် ခဲင် မိူင် အာမုဝ်ရိတ်၊ ဘော အာအောခ အီ မုး ခုန်ဒီခမ် ခဲင် မိူင် ဘာဆန်၊ ဘော ခုန်ဒီခမ် ခဲင် မိူင် ကာနန့် ဘောကာဂ့လျီတ်၊

12 အန် ဇဝ် ဟဲ့ ဒိုဝ်း မိူင် ဂေ တီ၊ ဝီ ဒွါ ဒီ ဂေ ဒူအီ ပီ အိုပ် အန်၊ ဝီ တဲး ဂေ ဒူအီ အီဆာရေလ ကွယ် ခဲင် မိူင် တီ။

13 အိုယ် မဲ ဇဝ်ဖြာ၊ ပွုန် မဲ ဇဝ် ဒီ ဘော ကွယ် ဆေဆေ။ ဒူအီ ဒွန် ဇာတ် ဒွန် စုဝ် ဒီ ဘော လှုဝ်း မဲ ဇဝ်။

14 ဇဝ်ဖြာ ဒီ ဘော ရဲ ဘော ဂွင့် ဂေ ဒူအီ ပီ အိုပ် အန်။ အန် ဇဝ် ဒီ ဘော ကာဝေ ဂေ ဒဲစေန့် အန် ဘောကာဂ့လျီတ်။

15 အာရိုပ် ပီ ကြိုပ် ဂေ ဒူအီ အာမျုဝ် ဟဝ် ပီ တဝ်း ဂေ န့ မုး ဇဝ်ဖြာ၊ န့ မုး ခြိဝ် ဂေ ရွိုန် ဘော မုး မျုဝ် ပီ ဘူင် ဒူအီ။

16 အာရိုပ် တီ မိုဝ်း မူတ့်၊ ယီ တူ နပ် ဒီ ကာလာင် ဂြုဝ်း။ မိုဝ်း ငါယ်၊ ယီ တူ ပွိုန် ယိုဝ် မာဆေ။

17 မိုဝ်း ဟျုဝ့် ၊ ယီ တူ ပွိုန် ထူမ် မာဆေ။ ဂေ တူ မိုဝ်း အာဆာက်၊ တူ နပ် ဒီ ဟိုဝ်း လိုပ် ဟိုဝ်း လေး ဖွိုမ် ဂေ။

18 ဂေ အီ ဘူင် အာရိုပ် တီ၊ ဘော ဂေ အီ ကြိုပ် အီ ဘိုင် အာရိုပ် တီ၊ ဂေ ဒီ ဘော ပီ အာရိုပ် ပီ ဘူင် ဂေ တီ။

19 အိုယ် ဘေ ဒူအီ အီဆာရေလ၊ တဲး ဘေ အိူပ် ဇဝ်ဖြာ။ ဘေ ခြိုဝ် အာရူန်၊ တဲး ဘော ဘေ အိူပ် ဇဝ်ဖြာ။

20 အိုယ် ဘေ ခြိုဝ် အာလေဝီ၊ တဲး ဘေ အိူပ် ဇဝ်ဖြာ။ ဘေ အီ ကြိုပ် အီ ရုဝ်ဆေ ဇဝ်ဖြာ၊ တဲး ဘေ အိူပ် ဇဝ်ဖြာ။

21 တဲး အေ အိူပ် ဇဝ်ဖြာ ဒီ နွန် ဇီအူန်။ တဲး အေ အိူပ် အန် ဇဝ် အီ ကွယ် ခဲင် မိူင် ယေရူဆာလဲမ်။ တဲး အေ အိူပ် ဇဝ်ဖြာ။