1 ဂေ ဟဲ့ တဝ်း ဒီ အုဝ်၊ “ဟာဝ်၊ အေ ဟာဝ် ဒီ ဟုဝ် ဇဝ်ဖြာ၊” ဒေါ အန် တီ နဝ်း အုဝ် ဟဲ့ ခူယ် ကာဆဝ်။

2 ဒေါ တီ နီ၊ ယေ ဟဲ့ တး ဇမ် ဒီ ဘာင် မာလုဝ်း မိူင် ယေရူဆာလဲမ်။

3 မိူင် ယေရူဆာလဲမ် ဂေ ဘော ဆမ်၊ တဲး န့ ပီ မိူင် တာင် အီ မိုဝ်း ရဲင် ရူပ်။

4 န့ ဘော မုး ဒူင် တး ကာဇု ဂေ ဒူအီ ဒွန် မျုဝ်၊ ဂေ အီ မုး ဒူအီ ပီ အိုပ် ဇဝ်ဖြာ။ ဂေ ဒီ ဘော ဒါင် ဂုင် ဂေဇူ ဘော အိူပ် ဇဝ်ဖြာ၊ တဲး န့ ဘော ဘဲန် ပီ ပီ ဒွိုမ် စ်ု အန် ဇဝ် ဒီ ဂေ ဒူအီ အီဆာရေလ။

5 ခဲင် မိူင် တီ ခုန်ဒီခမ် အီ အိုပ် ဂေ ဒူအီ အီဆာရေလ၊ အန် ဒီ ဆုင်ဖျာတ် ဒါရာ ဒီ ဒူအီ ဘောကာဂ့လျီတ်။ န့ မုး ခြိုဝ် အာဒါဝိတ် အီ အိုပ် ဒီ တီ။

6 တဲး ဘေ ဆာခိုဝ် ဒါင် မိူင် ယေရူဆာလဲမ်၊ ကွဲ့ တဲး န့ မိုဝ်း ရန်ဆူ အန်။ တဲး ဘေ တဝ်း၊ “တဲး ဂေ အီ ရွက့် မိူင် ယေရူဆာလဲမ် ပွိုန် ဒီ ကွယ် ဆီချာ။

7 ခဲင် မိူင် နီ၊ တဲး ဂေ ကွယ် ဒါခိုယ် ဂျာမ်ဆာ။ ဘော ခဲင် ဟုဝ်၊ တဲး ဒွန် အီ လာယ် ကာလဝ့်။”

8 ကူပ် ရွက့် အုဝ် ဘီနွင် ဝေါဝဲ ဘော ဂေ ဂိုက် အုဝ်၊ အုဝ် ဘော တဝ်း၊ “ဂေ အီ ကွယ် ခဲင် မိူင်၊ တဲး ဂေ ဒါခိုယ် ဂျာမ်ဆာ။”

9 ဘော ဟုဝ် ဇဝ်ဖြာ ပီ ကြိုပ် အေ ဟဲ့ ကွယ် ခဲင် မိူင် တီ။ ခုဝ်၊ အုဝ် ဘော ဆာခိုဝ် တဲး န့ ဝဲ ဘွတ် ဝဲ မွှိုမ် လွှိုမ် ဘြိမ် ခဲင် မိူင် တီ။