1 အိုယ် မဲ ဇဝ်ဖြာ၊ တဲး မဲ ဇဝ် စွယ် ယေ။ ကာတဲ ယေ အာမျုဝ် ဒူအီ အာဝ် ဟူ မိုဝ်း ဂေ အီ မွှိုမ်၊ အီ မိုဝ်း နဝ်း ဆိူဝ်။ ဂေ ဟဲ့ ဟွတ့် ဟြာယ် တူတ့်။

2 ဂေ ဒွန် အီ ဘော ကာလာင် မီ ဂြုဝ်း ကာလုဝ်။ ဂေ ဘော နပ် ဒီ လာယ် ကဝ် လာယ် ဝွန်၊ ကူပ် မိုဝ်း ဂေ နဝ်း လိင်လဲ။

3 တဲး ဇဝ်ဖြာ ဝီ ကာဘိတ် မူတ့် ဂေ အီ နပ် ဒီ ကဝ် အီ၊ ကွဲ့ တဲး ဂေ ပွိုန် ဒီ ပီဖုင် ဂေ။

4 ဂေ အီ နပ် ဒီ တဝ်း၊ “ပီ တဝ်း အုဝ် နီ ဒီ တဲး အုဝ် အွင်။ မူတ့် အုဝ် နီ နပ် ဒီ ကာလာင် ပီ အိုင် အုဝ်။ အာဝ် မိုဝ်း အာဆေ အီ ပွိုန် ခြဲ အုဝ်၊” တဲး မဲ ဇဝ် ဝဲန် တူတ့် ဂေ တီ။

5 ဇဝ်ဖြာ ဝီ တဝ်း၊ “ဒေါ တီ နီ အုဝ် ဒီ ယွတ် ဂေ အီ ခမ် ဒုက်၊ ဂေ အီ ခမ် ပီ ခါနှာပ် အီ ဟဝ် ဘော ဒူအီ ဂိန်။ အုဝ် ဒီ တဲး ဂေ ဝီ ဘျုဝ် ဒါခိုယ်၊ တဲး ဂေ ဝီ မိုဝ်း ခဲ့ ပီ လုဝ် ဂေ။”

6 ပါယ် တီ၊ ဂြုဝ်း ဇဝ်ဖြာ ဘော မုး ဂြုဝ်း မှာန်၊ ဂြုဝ်း ဘွတ်။ န့ ဘော ပီ ရွိုန် ဇဲတ် ပဲ့ ဟဲ့ ထာရွင် ခဲင် ငဝ် အာဒါ ဘူ ဇေန့်။

7 အိုယ် မဲ ဇဝ်ဖြာ၊ မဲ ဒီ ယွတ် ယေ ဆေဆေ။ မဲ ဒီ ဘော တဲး ယေ ကွယ် ဆီချာ ဆေဆေ၊ တူ တဲး ယေ ခမ် ဒီ ဒူအီ ဂေ တီ။

8 ဆေ ဂေ ဒူအီ အီ ကွယ် ဒဲင် ကာဒါယ် နီ ယီ ကာဖြူမ် ဒီ အိူပ် မျုဝ် အီ တူ မွှိုမ်၊ ဂေ ဒူအီ မိူက် ဒီ ဘော ပွိုန် ဒီ ဟာဝ် ဒွန် နာ ဒွန် ပ့လုဝ့်၊ အာဝ် မိုဝ်း အီ ခြဲ ဂေ။