1 ပန် တီ အာဆဲက် တွိုန် ဝီ ဒဲ့ အာကူပ်။ အန် ဝီ မွင့်ကာရာ ဒွါ ဒီ အာကူပ်။ အန် မိူဝ် ဒမ် အာကူပ် တဝ်း၊ 2 “ကွဲ့ တဲး မဲ ဒိုဝ်း အီဘိုန့် အာမျုဝ် ကာနန့်။ မဲ လုဝ် ဟာဝ် ခဲင် မိူင် ဖာဒါန်အာရာမ် ဒူင် ကွယ် အာဘေတ်၊ အီ မုး ဂုန့် မာ မဲ။ တဲး မဲ ခတ် ဒိုဝ်း အီဘိုန့် အူ ဝီ အီ မုး ဂွန် အာလပ်၊ အီ မုး အီကတ် မာ မဲ။ 3 ဇဝ်ဖြာ အီ အိုပ် တူတ့် ဒွန် မျုဝ်၊ တဲး အန် မွင့်ကာရာ ဒွါ ဒီ မဲ။ ဇဝ်ဖြာ တဲး မဲ မိုဝ်း ဂွန် ဘော လှုက်လှာန်၊ တဲး ဂေ ကိူန်၊ တဲး ဂေ ဘဲန် အာမျုဝ် ဒူအီ ဘဲန် မျုဝ် ဘဲန် မျုဝ်။ 4 တဲး အန် ဇဝ် မွင့်ကာရာ ဒွါ ဒီ မဲ ပီ အန် ဟဲ့ မွင့်ကာရာ ဒွါ ဒီ အာဘြာဟမ် တွိုန်။ ဘော မဲ ဘော လှုက်လှာန် မဲ၊ တဲး ဘေ ဘဲန် ဒါ ကာညာ ခဲင် မိူင် ပီ ဒွိုမ် ဟာဝ် အာဘြာဟမ်၊ ကွယ် ဘဲန် ခဲတ့်။” 5 ပါယ် တီ အာဆဲက် ခ့ဝါင် အာကူပ် လေး ဒူင် ကွယ် အန်။ အာကူပ် ဘော ဟာဝ် ဒူပ် န့တေန့် ဇမ် မိူင် ဖာဒါန်အာရာမ် ၊ တဲး အန် ဟာဝ် ဒူင် ကွယ် အာလပ် အီ မုး ဂွန် အာဘေတ်။ အာဘေတ် ယီ မုး အာမျုဝ် ဒူအီ အာရာမ်။ အာလပ် ဘော မုး အီကတ် နာင် ဘဲက် အီ မုး မာ အာကူပ် ဂါယ် အာဆုဝ်။

6 ပန် တီ အာဆုဝ် တွိုန် ဘော နပ် လွင် အာဆဲက် ဟဲ့ ဝီ မွင့်ကာရာ ဒွါ ဒီ အာကူပ်၊ ခ့ဝါင် အန် ဟာဝ် မိူင် ဖာဒါန်အာရာမ် ၊ တဲး အန် ခတ် ဒိုဝ်း အီဘိုန့် ခဲင် မိူင် တီ။ အန် ဘော နပ် လွင် အာဆဲက် ဟဲ့ မှာန့် ဒီ အန်၊ “ကွဲ့ တဲး မဲ ခတ် ဒိုဝ်း အီဘိုန့် အာမျုဝ် ဟေထိတ်။” 7 အန် ဘော နပ် လွင် အာကူပ် ဟဲ့ ထူမ် ဂြုဝ်း ဂုန့် မာ အန်၊ ဟာဝ် မိူင် ဖာဒါန်အာရာမ် တွိုန်။ 8 ဒေါ ယိုဝ် အန် လွင် အန် တီ၊ အန် ဘော နပ်၊ ဂေ အီဘိုန့် အန် အီ မုး အာမျုဝ် ကာနန့်၊ ဂေ တူ လဝ့် နဝ်း ဂုန့် အန်။ 9 ခုဝ်၊ အာဆုဝ် ဝီ ဟာဝ် ဒူင် ကွယ် အာဆာမာန်။ အန် ဝီ ခတ် ဒိုဝ်း အီဘိုန့် ပေါ အူ ဝီ အီ စိူဝ် နာင် မာဟာလာတ်၊ အီ မုး ဂွန် အာဆာမာန်။ အာဆာမာန် ယီ မုး ဂွန် အာဘြာဟမ်။ နာင် မာဟာလာတ် ဘော မုး ဝါ အာနေယာဘူတ်။

10 အာကူပ် ဟဲ့ လေး မိူင် ဘီရာဆေဘာ တွိုန်၊ ဟာဝ် ဒူပ် န့တေန့် မိူင် ဟာရာန်။ 11 ဆီငဲ ဟဲ့ ဂေတ့်၊ အန် ဘော ဇမ် အူ ပ့လုဝ့် ဘော ဝီ တမ် ဒီ တီ။ အန် ဒိုဝ်း မာဝ် အူ ဘူင့်၊ တဲး န့ ဘဲန် မွှန် အန် ဘော အိတ်။ 12 ဒေါ အိတ် အန်၊ အန် မ့ဘာဝ်။ အန် ယိုဝ် န့တဲင် အီ ကွယ် ဒဲင် ကာဒါယ်။ ကာဒဲ့ အန် ယီ စာ ကော ဇမ် ဂါင်ဟြာဝ်။ အာမူ အာမာတ် ဇဝ်ဖြာ ဘော လူင် အီ ခြိုမ်၊ ဝီ ဟုဝ့် နာ ဒဲင်။ 13 အူ ဇေန့် ဇဝ်ဖြာ ဝီ ကွယ် ရိုမ် ဒူပ် အန်။ အန် တဝ်း၊ “အုဝ် မုး ဇဝ်ဖြာ ပီ ကြိုပ် ဒါ မဲ၊ အီ စိူဝ် အာဘြာဟမ်။ အုဝ် ဘော မုး ဇဝ်ဖြာ ပီ ကြိုပ် အာဆဲက်။ ကာဒါယ် ဒူင် အိတ် မဲ ဒေါ တီ နီ၊ အုဝ် ဒီ ဒွါ ဒီ မဲ ဘော ဒီ လှုက်လှာန် မဲ၊ တဲး န့ ဘဲန် မိူင် ဘေ။ 14 လှုက်လှာန် မဲ၊ ဂေ ဒီ ကိူန် ပီ ကာပုး အီ ကွယ် ဒဲင် ကာဒါယ်။ ဂေ ဒီ ဟာဝ် ကွယ် နာ ဂေတ့် ဆီငဲ၊ နာ လေး ဆီငဲ၊ နာ တေတ့် ဘော နာ ကွာ။ ကူပ် ပီ ဘူင် မဲ ဘော လှုက်လှာန် မဲ၊ န့ တဲး အုဝ် မွင့်ကာရာ ဒွါ ဘော ဂေ ဒူအီ ဒွန် မျုဝ် အီ ကွယ် ဒဲင် ကာဒါယ်။ 15 အုဝ် ဒီ ဘော ဟာဝ် ရိုမ် ဒူပ် မဲ။ မဲ ဘော ဟာဝ် နာ မှဝ်၊ အုဝ် ဒီ ဘ်ု ရိတ် မဲ ဆေဆေ။ ဟဲ့ ဟွတ့်၊ အုဝ် ဒီ တဲး မဲ ဝီ တး ဒီ တီ။ အုဝ် တူ ဝဲန် မဲ၊ တဲး အုဝ် ကော ဘူင် တူတ့် ပီ တဝ်း အုဝ် ဒီ မဲ ဒေါ တီ နီ။”

16 ဇဝ်ဖြာ ဟဲ့ ဟွတ့် ကာလာင် ပါယ် တီ အာကူပ် တွိုန် ဝီ န့ဆိုဝ်း။ အန် တဝ်း၊ “ဟဲ့ မှာန် အာခါခ်ု၊ ဇဝ်ဖြာ ဟဲ့ ကွယ် ဒူင် ကွယ် အုဝ် နီ။ အုဝ် ယီ တူ နပ် လွင် အန် တီ။” 17 ပန် တီ အန် ဘော ယုဝ်။ အန် တဝ်း၊ “ဒူင် ကွယ် အုဝ် နီ ဟဲ့ မွှိုမ် အာမ်၊ မွှိုမ် ယုဝ်။ ဟဲ့ မုး၊ ဒူင် တီ မုး ဒူင် ကွယ် ဇဝ်ဖြာ။ န့ မုး မာလုဝ်း တဲး အီ လိုပ် ဂါင်ဟြာဝ်။”

18 ပန် တီ ဆိန့်ဝး အန် စေဝ် ယိတ့်၊ ဒိုဝ်း မာဝ် အီ ဟဲ့ ဘဲန် မွှန် အန်၊ ဘ့လေး ဒူင် တီ၊ တဲး အန် ဘဲန် ကာအုန်။ အန် မိူဝ် လှုဝ် နာမန် ဒဲင် မာဝ် တီ 19 အန် တဲး ဒူင် တီ ဒီ စိူဝ် ဘေဒါအေန်။^a ခါ အာတ့် ဒူင် တီ ဟဲ့ စိူဝ် မိူင် လူဆာ။

20 ဒီ တီ အာကူပ် တွိုန် ဘော ဒွါ ကာဒိက် ဆတ်ဇာ ဒီ အန် ဇဝ်။ အန် တဝ်း၊ “ဆေ န့ မှာန် ပီ တဝ်း ဇဝ်ဖြာ၊ ဆေ အန် ဒီ ဟာဝ် ရိုမ် ဒူပ် အုဝ်၊ ဒွါ အုဝ် မိုဝ်း ပီ ဒီ ဟူမ် ပီ ဒီ တာ၊ 21 ဆေ အုဝ် ဟီ ဝီ ဇမ် ခဲင် ကာင် ဂုန့် အုဝ် ပေါ အူ ဇေန့်၊ ဇဝ်ဖြာ တီ ဒီ မုး ဇဝ်ဖြာ ပီ ကြိုပ် အုဝ်။ 22 မာဝ် ပီ ဘ့လေး အုဝ် ဒေါ တီ နီ၊ တဲး န့ ဘဲန် ကာအုန်၊ တဲး န့ ဘဲန် ဒူင် ဒီ ကြိုပ် အေ ဇဝ်ဖြာ။ ခဲ့ ပီ ဒွါ အန် ဇဝ် ဒီ အုဝ်၊ အုဝ် ဒီ ဝီ လှူ ဒီ အန် ဂိုဝ် ဘုန် အူ ဘုန်။”