1 ဂါယ် အာမူ အာမာတ် ဇဝ်ဖြာ အာ ကာဒင် တွိုန်၊ ဂါယ် ယီ တး ဇမ် ခဲင် မိူင် ဆုဝ်ဒူမ် နာ ဘာ ဒီ အပ်။ ဒေါ တး ဂေ၊ အာလူတ် တွိုန် ဟဲ့ တး ကွယ် ဒီ ခူပ် မာလုဝ်း မိူင် ဆုဝ်ဒူမ်။ အန် ယိုဝ် ဂါယ် တး၊ အန် ယိတ့် အူ ဇေန့်၊ ဟာဝ် ရွုး ဂါယ်။ အန် မိူဝ် ခြိုပ်ခြဝ် ဒီ အာတ့် ဂါယ်။ 2 အန် တဝ်း၊ “အိုယ် ဒါ အုဝ်၊ တဲး ဘာယ် ဟာဝ် လိုပ် ခဲင် ကာင် ဒဲစေန့် ဘာယ်။ တဲး ဘာယ် တမ်၊ တဲး အုဝ် ဘာယ် ပ့လဝ် ဘာယ်။ ခဲညှာ ဘာယ် ယဝ့် ဟာဝ် ဒူပ် န့တေန့် ပီ လုဝ် ဟာဝ် ဘာယ်။”

ဂါယ် အာ ဝီ ယီ တဝ်း၊ “အာဝ် ပွိုန် ကွယ် ခဲင် ကာင် မဲ။ ယာယ် ဒီ တမ် ဒီ ဂ့လ။”

3 အန် ယီ ဝီ ညဝ် ဂါယ် တမ်။ ဟဲ့ ဟွတ့် ဂါယ် ဘော ဟာဝ် လိုပ် ခဲင် ကာင် အန်။ အန် မိူဝ် ဟျီင် ဂါယ် ဟူမ် ဘူမ်။ အန် ဘော ဘူင် ခါမုန် အီ တူ ဘြး၊ တဲး ဂါယ် ဟူမ်။ 4 ဝါယ် အန် တီ ဂါယ် ညှမ် လိုပ် အိတ်၊ ဂေ အီမာယ် အီ ကွယ် ခဲင် မိူင် ဆုဝ်ဒူမ်၊ ဂေ ဟဲ့ တး ရူပ် ကာင်။ န့ မုး ဘော ဒူအီ ကတ် ဘော ကာညူမ်၊ ဂေ ဟဲ့ တး ဒွန် ဘ့လာက်။ 5 ဂေ ဝီ ဒတ် ဒဲ့ အာလူတ် တွိုန် တဝ်း၊ “မှဝ် ဂါယ် ဒါ အီ တး ကွယ် ခဲင် ကာင် မဲ ခဲင် မှိုဝ် နီ။း ဒဲ့ ဂါယ် တး၊ တဲး မဲ ဒွါ ဂါယ် ဒီ ယေ။ ယေ ဆီ လာယ် ဂါယ်။”

6 ဂေ ဟဲ့ ဟွတ့် တဝ်း ပါယ် တီ အာလူတ် တွိုန် ဝီ လေး ခဲင် ကာင် ဟာဝ် ကွယ် နာ ရေတ့် မာလုဝ်း၊ ဝီ ကာဘိတ် မာလုဝ်း ဒီ ပန် အန်။ 7 အန် တဝ်း၊ “အိုယ် ဘေ ဘီနွင် အုဝ်၊ ကွဲ့ တဲး ဘေ ဘူင် နာ တူ မွှိုမ်။ 8 အုဝ် မိုဝ်း ဂွန် အီဘိုန့် အာ ဝီ၊ ဂါယ် ညှမ် ဒွိုမ် ခတ်။ အုဝ် ဒီ ဒွါ ဂါယ် ဒီ ဘေ၊ တဲး ဘေ ဘူင် ပီ အိုင် ဘေ။ အုဝ် ယီ မှာန့်၊ ကွဲ့ တဲး ဘေ ဘူင် မာဆေ ဒီ ဒါ အာ ဝီ အီ တး တမ် ခဲင် ကာင် အုဝ်။”

9 ဂေ ယီ ဒတ် တာင် တဝ်း၊ “မဲ လေး ဟာဝ်။” ဂေ ဘော တဝ်း၊ “မဲ မုး မီ ခဲတ့် အူ ဝီ အီ ဟဲ့ တး ကွယ် ဒီ နီ။ မဲ ထာင် မဲ ပွိုန် ဆုင်ဖျာတ် အာမူ ယေ။း ယေ ဒီ ဘူင် နာ စာဝ် ဒီ မဲ လွှိုမ် ယေ ဘူင် ဒီ ဂါယ် အာ ဝီ တီ။” ပန် တီ ဂေ ဝီ ကာထဲန့် ဒီ အာလူတ်။ ဂေ ဘော ငှာ ဒီ ပျာတ့် မာလုဝ်း ကာင်။

10 ဂါယ် အာ ဝီ ဘော ဆူင့် ဒဲ ဂါယ် ပါ အာလူတ်၊ ဒိူတ် လိုပ် အန် ခဲင် ကာင်။ ဟဲ့ ဟွတ့် ဂါယ် ဝီ ကာဘိတ် ရိတ် မာလုဝ်း။ 11 ပန် တီ ဂေ အီ ကွယ် နာ ရေတ့် ကာင် တွိုန်၊ ဘော ဂေ ဒါ ကတ် ဘော ဂေ ကာညူမ်၊ ဂေ အာဝ် ဟူ ပွိုန် ယိုဝ် မာဆေ။ ခဲတ့် အီ ဟဲ့ တး တမ် ခဲင် ကာင် အာလူတ် တွိုန်၊ ဂါယ် ဟဲ့ ဘူင် တဲး ငါယ် ဂေ အပ်။

12 ပန် တီ ဂါယ် အာ ဝီ တွိုန် ဝီ ဒီမွှတ် ဒီ အာလူတ် တဝ်း၊ “မဲ မိုဝ်း ဝေါဝဲ အာဆေ ခဲင် မိူင် နီ။း မဲ မိုဝ်း အျီ့ ဘော ဂွန် အီဘိုန့်။း ခဲ့ မိုဝ်း ဘီနွင် မဲ အီ ကွယ် ခဲင် မိူင် နီ၊ တဲး မဲ ဒဲ့ ဂေ လေး တ မိူင်။ 13 ယာယ် ဒီ ဘူင် တဲး မိူင် နီ ကာပျာတ့် လိုဝ် တူတ့်။ ဇဝ်ဖြာ ဟဲ့ ယိုဝ် အီ ဆီနန် ဆီနိူင် ပဲ့ ဟဲ့ ဘူင် ဂေ။ ဇဝ်ဖြာ ဟဲ့ စ်ု ယာယ် ဘူင် တဲး န့ ကာပျာတ့် လိုဝ် တူတ့်။”

14 ဟဲ့ ဟွတ့် တဝ်း ပါယ် တီ အာလူတ် တွိုန် ဟာဝ် ကာလာင် ဂြုဝ်း ဒီ အျီ့ အန် အီ ဟဲ့ ခတ် လာယ် ဂွန် အီဘိုန့် အန်။ အန် တဝ်း၊ “အိုယ်၊ တဲး ဘေ ယိတ့် ဟာဝ် လေး ခဲင် မိူင် နီ။ ဇဝ်ဖြာ ဒီ ဘူင် တဲး န့ လိုဝ် တူတ့်။” အျီ့ အာလူတ် တွိုန်၊ ဂေ ယီ ထာင် အန် လင်ဂ့လွိုန်။

15 ဆိန့်ဝး၊ ဘာင် ဒီ ဝး ပြဲ၊ ဂါယ် အာမူ အာမာတ် ဇဝ်ဖြာ ကာရဲတ် အာလူတ် တွိုန် တဝ်း၊ “တဲး မဲ ဒိုဝ်း ဘော အီဘိုန့် ဘော ဂွန် အီဘိုန့် မဲ၊ အီ ကွယ် ရိုမ် ဒူပ် မဲ၊ ကွဲ့ တဲး အာဆာက် ဘေ စှိုမ် ပန် ဒီ ဆုင်ဖျာတ် ဇဝ်ဖြာ ဒါရာ ဒီ မိူင် တီ။”

16 ဂါယ် အာ ဝီ ဝီ ဒိူတ် ဒီတတ့် အာလူတ်၊ ဝီ ဒိုဝ်း ဘော အီဘိုန့် အန် ဘော ဂွန် အီဘိုန့် အန် အာ ဝီ၊ ပါ ဒဲ ဂေ၊ တိုယ် ဂေ လေး ခဲင် မိူင်၊ ဘ့လေး ဂေ နာ ရေတ့် မိူင်။ ဇဝ်ဖြာ ဟဲ့ ဆီ ချွတ် ဂေ။ 17 ဒေါ တိုယ် အာမူ အာမာတ် ဇဝ်ဖြာ ဂေ လေး ခဲင် မိူင်၊ ဂါယ် တဝ်း၊ “တဲး ဘေ ဟာဝ် တဝ်၊ တဲး န့ ချွတ် အာဆာက် ဘေ။ ကွဲ့ ယွတ် နာ ပန်၊ ကွဲ့ ဒီလှဝ် နာ မှဝ် ခဲင် ဂ့လင် နီ၊ တဲး ဘေ တဝ် ဟာဝ် ဇမ် ဒဲင် နွန်၊ ကွဲ့ တဲး အာဆာက် ဘေ စှိုမ်။”

18 အာလူတ် တွိုန် ဝီ တဝ်း ဒီ ဂါယ်၊ “ကွဲ့ တဲး ယေ တဝ် ဇမ် ဒဲင် နွန်။ 19 ဘာယ် ဇဝ် ဟဲ့ ကာဝေ အုဝ်၊ ဟဲ့ ဘျ ဒီ အုဝ် နဝ်း ဒီဟာင် ဘာယ်၊ ဟဲ့ ချွတ် အာဆာက် အုဝ်။ အုဝ် ယီ တူ ခမ် ဒီ ဟာဝ် တူင့် ဇမ် ဒဲင် နွန်။ အုဝ် ယုဝ် ဒုက် ဒီ ဒူပ် အုဝ် အာတ့် ဇမ် အုဝ် ဒဲင် နွန် တီ။ အုဝ် ယုဝ် အုဝ် ယမ်။ 20 တဲး ဘာယ် ယွတ် မိူင် နာ အာတ့် ဒွယ်။ မိူင် တီ အာဝ် ကာတူင့်၊ အုဝ် ဟဲ့ ပွိုန် ဟာဝ် ဇမ် မိူင် ဒွယ်။ မိူင် တီ န့ ဘော ဒီတဲတ်။ တဲး အုဝ် ဟာဝ် နာ ဒွယ်။ တဲး အုဝ် လွတ် ယမ်။”

21 ပန် တီ အာမူ အာမာတ် ဇဝ်ဖြာ ဝီ တဝ်း၊ “အိုဝ်၊ ဘော အာရေ တီ၊ အုဝ် ဒီ ထူမ် ပီ မှာန့် မဲ။ မိူင် ပီ တဝ်း မဲ၊ အုဝ် တူ တဲး န့ ကာပျာတ့်၊ တူ တဲး န့ လိုဝ်။ 22 မဲ ဟာဝ် ဟဲ ဟဲ၊ တဲး မဲ စေဝ် ဇမ်။ အာတ့် ဇမ် မဲ ခဲင် မိူင် ဒွယ်၊ အုဝ် တူ ပွိုန် ဘူင် မာဆေ။” ခုဝ် အန် တီ၊ မိူင် တီ၊ ဂေ တဲး န့ စိူဝ် မိူင် ဇုဝ်အာန်။^a

23 ဟဲ့ ဟွတ့် ပန် တီ ဒေါ လေး ဆီငဲ၊ အာလူတ် မိူဝ် ဟဲ့ ဇမ် ခဲင် မိူင် ဇုဝ်အာန် တွိုန်။ 24 ဒေါ အန် တီ ဇဝ်ဖြာ တဲး န့ ဂ့လာယ် ငဝ် ဘော ဂန်ဒိူက်၊ တဲး န့ လေး လူင် ခဲင် ဂါင်ဟြာဝ်။ 25 ပါယ် တီ အန် ဇဝ် ဘူင် တဲး န့ လိုဝ် တူတ့် မိူင် ဂေ တီ။ ဘော ဂ့လင် အီ ကွယ် ကာတတ် မိူင် ဘော ဒူအီ အီ ကွယ် ခဲင် မိူင် ဘော ဒုဝ် ဆတ်ဒါဝါ ဘော ဟေ ဘ့လေ ဘဲန် မျုဝ် ဘဲန် မျုဝ် အီ လတ့် ခဲင် ဂ့လင် တီ၊ န့ လိုဝ် စှိုမ် တူတ့် ဒွန် မျုဝ်။ 26 ဒေါ အန် တီ အီဘိုန့် အာလူတ် တွိုန် ဝီ ယွတ် နာ ပန်။ ဟဲ့ ဟွတ့်၊ အန် ဝီ ယမ် စွင့်၊ ဘဲန် မာဝ် ဆယ့် ဆွင့် အူ ဇေန့်။

27 အာဘြာဟမ် တွိုန် ဟဲ့ ယိတ့် ဆိန့်ဝး စေဝ်၊ ဟာဝ် ဇမ် ဒူင် ပီ ဒွိုမ် ကာလာင် အန် ဒီ ဇဝ်ဖြာ။ 28 အန် ဘော ယွတ် ဒူင် ကွယ် မိူင် ဆုဝ်ဒူမ် ဂါယ် မိူင် ဂုဝ်မုဝ်၊ ယွတ် ဘော ဂ့လင် အီ ကွယ် ကာတတ် မိူင် ဂေ တီ၊ အန် ဘော ယိုဝ် ဒက် ငဝ် လေး ဒွန် နာ ဒွန် ပ့လုဝ့်၊ န့ ပီ ဒက် ငဝ် အီ လေး ဒူင် စိုမ် ဟိန်။

29 ပါယ် တီ ဇဝ်ဖြာ လှုဝ်း အာဘြာဟမ် တွိုန် ဒေါ ပျာတ့် ဝဲန် အန် မိူင် အီ ကွယ် ခဲင် ဂ့လင် ဘ့လဲင် ယောဒါန်။ အန် ဇဝ် ယီ ဟဲ့ တဲး အာလူတ် တွိုန် လွတ် ယမ် ဒေါ ကာပျာတ့် အန် မိူင် ဒူင် ကွယ် အာလူတ်။

30 ဝါယ် အန် တီ အာလူတ် တွိုန် ဝီ လေး ခဲင် မိူင် ဇုဝ်အာန်၊ ဟုဝ့် ကွယ် ဒဲင် နွန်။ ဘော အန် ဘော ဂွန် အီဘိုန့် အန် ဟဲ့ ယုဝ် တူ ဆီ ကွယ် ခဲင် မိူင် ဇုဝ်အာန် တွိုန်။ ဂေ ဟာဝ် ကွယ် ခဲင် ကာဒဝ် မာဝ် အူ ပ့လုဝ့်။ 31 ပန် တီ အီကတ် အန် ဝီ ကာလာင် ဒီ ဝါ အန်၊ “ဂုန့် အာယ် ဟဲ့ ကတ်။ ဒူင် ကွယ် အာယ် ဒီ နီ၊ န့ မိူဝ် တူ မိုဝ်း အီမာယ်၊ ပီ ဒီ ပွိုန် ခတ် ဒိုဝ်း ပီ ဂေ ဒူအီ ဟဝ် ဒွန် နာ ဒွန် ပ့လုဝ့်။ 32 တဲး အာယ် ဒွါ ဂုန့် ဒျီင် အိုမ် မာငုန်။ ဆေ အန် ဟဲ့ ယိုတ့်၊ တဲး အာယ် လာယ် ဂုန့် အာယ်၊ တဲး အာယ် မိုဝ်း ဂွန် ဒီ ဂုန့် အာယ်။” 33 ပန် တီ ဂါယ် ဒွါ ဂုန့် ဂါယ် ဒျီင် ပဝ်း။ အန် ယီ တူ နပ် မာဆေ လွင် တး ဂွန် အန် ဝီ တာင် အိတ် ဒူင် အိတ် အန်၊ ဝီ ယိတ့် ဟာဝ်။ 34 ပေါ အူ ဆီငဲ အီကတ် ဝီ တဝ်း ဒီ ဝါ အန်။ “အာမှိုဝ် အုဝ် ဟဲ့ အိတ် ဒီ ဂုန့် အုဝ်။ ဘော အာတိုဝ် တဲး အာယ် ဝီ ဒွါ အန် ဒျီင် ပဝ်း၊ တဲး မဲ ဝီ ပွိုန် ဒီ အိတ် ဒီ ဒူပ် အန်။ တဲး အာယ် ဝီ မိုဝ်း လှုက်လှာန် ပါယ် တီ။”

35 ခဲင် မှိုဝ် ဂါယ် ပီ ဝီ ဒွါ ဂုန့် ဂါယ် ဒျီင် ပဝ်း၊ တဲး ဝါ ဝီ ဟာဝ် အိတ် ဒူပ် ဂုန့် အန်။ အာလူတ် မိူဝ် တူ နပ် မာဆေ လွင် တး အန်၊ ဝီ လေး ဟာဝ် အန်။ 36 ပါယ် တီ ဂွန် အီဘိုန့် အာလူတ် ဟဲ့ ဒဲ ဘာဒိက် ဆန်ထေ ဒီ ဂုန့် ဂါယ်။ 37 အီကတ် ဝီ ဂွိုတ် ဂွန် အီမာယ်။ အန် တဲး အန် စိူဝ် အာမုဝ်အာပ်။ အန် ဟဲ့ ဘဲန် ဂုန့် ဒင် ဂေ အာမျုဝ် ဒူအီ မုဝ်အာပ်၊ အီ ကွယ် ကော ဇမ် အာတိုဝ်။ 38 ဘော ဝါ ဝီ ဂွိုတ် ဂွန် အီမာယ်။ အန် တဲး အန် စိူဝ် အာဘေနအာမီ။ အန် ဟဲ့ ဘဲန် ဂုန့် ဒင် ဂေ အာမျုဝ် ဒူအီ အာမုဝ်ရိတ်၊ အီ ကွယ် ကော ဇမ် အာတိုဝ်။