1 ဇဝ်ဖြာ ယီ ကာလာင် ဂြုဝ်း ဒီ အာဘြာမ် တွိုန်။ အန် တဝ်း၊ “မဲ လေး ဟာဝ် ခဲင် ကာင် ဂုန့် မဲ၊ လေး တ ဝေါဝဲ မဲ ဘော လေး ခဲင် မိူင် မဲ၊ ဝီ ဟာဝ် တဲး မဲ ဇမ် ခဲင် မိူင် ပေါ မိူင် ပီ ဒီ နှဲ အုဝ် ဒီ မဲ။

2 အုဝ် ဒီ တဲး လှုက်လှာန် မဲ ဘြဲ ကိူန်၊ တဲး န့ ဘဲန် ဒူအီ အာမျုဝ် တာင်။ အုဝ် ဒီ မွင့်ကာရာ ဒွါ ဒီ မဲ၊ တဲး ဒွန် အီ နပ် လွင် မဲ။ အုဝ် မိူဝ် ဒီ တဲး မဲ မွင့်ကာရာ ဒွါ ဒီ အီ ဟဝ်။

3 အာဆေ မွင့်ကာရာ တဲး ဒီ မဲ၊ အုဝ် ဒီ မွင့်ကာရာ တဲး ဘော ဒီ အန်။ အာဆေ ဒိူင် မဲ၊ အုဝ် ဇဝ်ဖြာ မိူဝ် ဒီ ဝီ ဒိူင် အန်။ ကူပ် မဲ တီ၊ အုဝ် ဒီ ဘော မွင့်ကာရာ တဲး ဘော ဒီ ဂေ ဒူအီ ဒွန် မျုဝ် အီ ကွယ် ဒဲင် ကာဒါယ်။”

4 ပန် တီ အာဘြာမ် တွိုန် လေး ဟာဝ် ဒူင် ကွယ် အန်၊ ဘူင် ပီ ကာလာင် ဇဝ်ဖြာ ဒီ အန်။ ဘော အာလူတ် ဟာဝ် ရိုမ် ဒူပ် အန်။ ဒေါ လေး အန် ခဲင် မိူင် ဟာရာန် အီ မုး မိူင် ဘြိမ် အန်၊ အာဆာက် အန် ဟဲ့ နုဝ့် ဘူ ဂိုဝ် ဒီ ဖန် ဆီနမ်။ 5 အာဘြာမ် ဘော ဒဲ့ အီဘိုန့် အန်၊ အီ စိူဝ် နာင် ဆာရာယ်၊ ဘော အာလူတ်၊ အီ မုး ဂွန် ဝါ အန်၊ တဲး ဂါယ် ဒူပ် အန်။ ဘော ကြုဝ်ကြာမ် ဂေ ဒွန် မျုဝ် ဘော မှာယ် ပဲ့ ဟဲ့ ပွိုန် ဂေ ခဲင် မိူင် ဟာရာန် တွိုန်၊ အန် ဒိုဝ်း တူတ့်၊ လေး ဟာဝ် ခဲင် မိူင် ကာနန့်။ ဂေ ဘော ဟာဝ် ဇမ် ခဲင် မိူင် ကာနန့် တွိုန်။

6 ဟဲ့ ဟွတ့် ဇမ်၊ အာဘြာမ် ဝီ ဝိန် ဒီ လဲ ခဲင် မိူင် တာင် တီ ဘော မိူင်၊ တဲး အန် ကော ဇမ် မိူင် ဆေခေမ် အီ မုး ဒူင် ကွယ် ဟေ ဘွတ် ပီ ကြိုပ် အီ။ ဒေါ အန် တီ ယီ မိုဝ်း ဂေ ဒူအီ အာမျုဝ် ကာနန့် အီ ကွယ် ခဲင် မိူင် တီ။ 7 ဒေါ ကွယ် အန် ဒူင် တီ၊ ဇဝ်ဖြာ မိူဝ် ကာပ့လုး ဒီ အန် တဝ်း၊ “မိူင် တာင် တီ၊ အုဝ် ဒီ ဒွါ ဒီ လှုက်လှာန် မဲ။” ပန် တီ အာဘြာမ် ဝီ ဘူင် ကာစှူင့် လှူ ဒီ အန် ဇဝ် အီ ဟဲ့ ကာပ့လုး ဘော ကာလာင် ဂြုဝ်း ဒီ အန်။

8 ပန် တီ အာဘြာမ် တွိုန် ဝီ ဟာဝ် ကာလုဝ်း မိူင် ဘေဒါအေန် ဘ့လာက် နာ လေး ဆီငဲ၊ ဟာဝ် ဇမ် ဒူင် မိုဝ်း နွန်၊ ဝီ ဆမ် ထိုပ် ဘိက် အန် ဒီ တီ။ ဒူင် ချ အန် တီ၊ န့ ကွယ် ဒီ ကာတဲ မိူင် အာ မိူင်။ မိူင် ဘေဒါအေန် ကွယ် နာ ဂေတ့် ဆီငဲ။ မိူင် အာယီ ဘော ကွယ် နာ လေး ဆီငဲ။ ဒူင် ကွယ် အန် တီ၊ အန် ဝီ ဘူင် ကာစှူင့် ဒူင် ဒီ ကြိုပ် အန် ဇဝ်ဖြာ။

9 ဝါယ် အန် တီ အာဘြာမ် ဘော ကာထုဝ့် ဟာဝ် ဘဲန် ပ့လုဝ့် ဘဲန် ပ့လုဝ့်၊ တဲး အန် ကြဲ ဒီ ဇမ် နာ တေတ့်။

10 ပန် တီ န့ ဘော ဇမ် အာခြာဝ် အေတ့် ပီ ဒီ ဟူမ် ခဲင် မိူင် ဒူင် ကွယ် အာဘြာမ် တွိုန်။ ဒေါ အန် တီ အာဘြာမ် ဝီ လူင် မိူင် အဲဂိုပ်၊ တဲး အန် ဘဲန် ခဲတ့် ခဲင် မိူင် အဲဂိုပ် တွိုန်။ အာခြာဝ် အေတ့် ပီ ဒီ ဟူမ် ဟဲ့ ဘဲန် ဒုက် တာင် ဒီ အီ။ 11 ဒေါ ဟာဝ် အန် ဒူပ် န့တေန့်၊ ဟဲ့ ချြီ့ ဒီ ဇမ် ခဲင် မိူင် အဲဂိုပ်၊ အန် ဝီ ကာလာင် ဂြုဝ်း ဒီ အီဘိုန့် အန် အီ စိူဝ် နာင် ဆာရာယ်။ အန် တဝ်း၊ “အုဝ် ဟဲ့ နပ်၊ မဲ မုး အီဘိုန့် စှိတ် ကာဆဝ်။ 12 ဆေ ဂေ ဒူအီ ခဲင် မိူင် အဲဂိုပ် ဟီ ယိုဝ် မဲ၊ ဆေ ဂေ နပ် မဲ မုး အီဘိုန့် အုဝ်၊ ဂေ ဒီ ဘော ငဝ်း ယမ် အုဝ်။ ဂေ ဒီ ဒိုဝ်း မဲ၊ ကွယ် ဒူပ် ဂေ။ 13 ခုဝ်၊ တဲး မဲ တဝ်း၊ အုဝ် မုး အီကတ် မဲ။ ဆေ န့ ပါယ် တီ မဲ ဒီ စွယ် အုဝ် ကွဲ့ တဲး အုဝ် ဇမ် ဒုက်၊ တဲး အုဝ် လွတ် ယမ်။”

14 ဒေါ ဇမ် အန် ခဲင် မိူင် အဲဂိုပ်၊ ဂေ ဒူအီ ခဲင် မိူင် အဲဂိုပ် ဘော ယိုဝ် အီဘိုန့် အန် တွိုန် ဟဲ့ စှိတ် ကာဆဝ်။ 15 ဘော ဂေ အာမူ အာမာတ် ခုန်ဒီခမ် ဟဲ့ ယိုဝ် အန်၊ ဂေ ဝီ ကာလာင် ဒီ ခုန်ဒီခမ် ခဲ့ စှိတ် အန်။ ပန် တီ ဂေ ဝီ တိုယ် အန် ဟာဝ် ခဲင် ဟုဝ် ခုန်ဒီခမ်။ 16 ခုန်ဒီခမ် ယီ တဲး အာဘြာမ် ကွယ် ဒါခိုယ် ကူပ် မုး အန် ဝေါဝဲ နာင် ဆာရာယ်။ ခုန်ဒီခမ် မိူဝ် ဒွါ ဒီ အန် ဘဲန် မျုဝ် ဘဲန် မျုဝ်။ ဘော မာဘူ၊ မာမက် ဘော မာလာ ဘော မှာယ် အီဘိုန့် အီမာယ်၊ ဘော မာလာ အာဟျာင်၊ ဘော မင်ပြွင့် ကာဟာတ့်၊ အန် ဒွါ တူတ့် ဒီ အာဘြာမ်။

17 ဇဝ်ဖြာ ယီ ဒွါ ဒုက် ဘဲန် မျုဝ် ဘဲန် မျုဝ် ဒီ ခုန်ဒီခမ် ဘော ဒီ ဒူအီ ခဲင် န့ဟူမ် အန် ကူပ် ဟဲ့ ဒိုဝ်း အန် နာင် ဆာရာယ် အီ မုး အီဘိုန့် အာဘြာမ် တွိုန်၊ တဲး အန် ကွယ် ရိုမ် ဒူပ် အန်။ 18 ခုန်ဒီခမ် ဘော နပ် လွင် အန် တီ၊ အန် ဝီ ဒဲ့ အာဘြာမ်၊ တဝ်း ဒီ အန်၊ “မာဆေ ပီ ဘူင် မဲ ဒီ အုဝ်။း မှဝ် န့ ပါယ် ပီ တူ ကာလာင် မဲ ဒီ အုဝ်၊ တဲး အုဝ် နပ်၊ အီဘိုန့် တီ မုး အီဘိုန့် မဲ။း 19 မှဝ် မ့ပါယ် ပီ တဝ်း မဲ ဒီ အုဝ် ‘အီဘိုန့် တီ ဟဲ့ မုး ဝါ အုဝ်၊’ မှဝ် န့ ပါယ် မဲ ပီ ခ့ဝါင် တဲး အုဝ် ဒဲ့ အန် ဘဲန် အီဘိုန့် အုဝ်။း နီ၊ တဲး မဲ ဒိုဝ်း ဟာဝ် အီဘိုန့် မဲ ဒေါ တီ နီ။” 20 ခုန်ဒီခမ် ဝီ စ်ု ဒဲစေန့် အန်၊ တဲး ဂေ တိုယ် အာဘြာမ် ဘော ကြုဝ်ကြာမ် အန် တူတ့် ဒွန် မျုဝ်၊ တဲး အန် လေး ခဲင် မိူင် အဲဂိုပ်။