3 Pone Kristen inomranimpi ka pinofe uporo kinini,

wolpuna kinini samo yemei fai ki ese keꞌre piparola ka kire alele pone ommo God yangke pu fai yuꞌpu kore mone mingklari.

Ka naimele,

ki ke kulu nanrona ki ese keꞌre mi wongke mee fai kelkape pone nanrona,

pone ese peli kelo ka popane bilip namo empo God yina mew moneni uma wunini fai ese mopane.

Ka pone ese pangkom mi empo nu iimuma empo miuporo namo.

God yangke rokoi wokera nro empo bilip fane mana wongke ese fei yensona bilip moneni namo.

4 Uma plai isi peki noloni neli monre empo nu sios pu.

God isi namale pu nanrona fane wu yereryali nu uma neꞌre mi nanrona nu ese neli kot empo God ka rokoi fai nu ese numalo kot namo sa onne.

Nu sa uma fai kuma nane God ka nisnoli ka samo nenmaire mi empo wolyane empo God ka nangke nemei yukaine ompla nire mone ese mangke nale samo fafaile wongkwongkeni nama empo God.

Nu uma namo,

sa uma fai samo kuma nane mana empo paiyi risi mone,

Manawamo moneni Jisas Krais.

5 Nu Israel isi painri naine pike plola empo kantri Isip ka Manawamo yem nu nupone kore mokoi namo.

Ka kingke,

wu ke samo yisyoli nu uma fopi empo fei bilipim wu.^a

Pone namale ompla namo pu.

Ka ki koplo mi mee kore fai pone ese pupu kore.

6 Pone namale pu nanrona nu ensel fopi isi fei samo naine koii noneni^b ka nangke ommo empo God yali nu ese nangke namo,

Manawamo yukalo nu sen fai yeye nanrona nanrona ka yingkirpanro nu panro naine kurela wamo.

Ka nu naine mokoi namo ka won norune kaire empo kot wamo empo God ese yemei.

7 Sa yukaine isi,

nu pinuma empo taun Sodom ka Gomora ka nu taun plai empo naine eklene wuyane namo,

nangke nale fafaile wamo.

Nu nangke nale pamok ka nale plai samo fafaile wongkwongkeni plau.

Ka God yawane niꞌpi ka yisyoli nu pinuma ka nu taun mingklari ka ompla rola wongke fei waiye.

Ka ompla fafaile wamo namo empo nu pinuma empo taun namo nangkene namo,

sa samo yukaine nale isi nu ensel nangkene.

Nanrona fane ompla namo sa yuku resuklu ompla God ese kingke yangke nu uma fei rikepone kot empo God,

nu ese naine kei empo niꞌpi wamo fai yeye nanrona nanrona.

8 Ka nu uma namo nire kapnuka ila poneni,

sa nu uma fai nupenene nale namo.

Nu uma fai samo nupenene ommo empo nu fai nemne ruwila noneni nro,

ommo namo fai samo yereryali wolpuna nunini ka nu fai nangke nale fafaile namo fai yangke nu none fei samo namkile nama empo God.

Nu sa uma fai nangklu mi empo God ka fei fai nupene Manawamo ka fai neklinuma nu ensel fai risine empo heven.

9 Ka ensel Maikel fina fai paiyi risi nu ensel plai namo,

yemei ka yane Satan nopu mi fina ese yem puꞌlo empo Moses.

Ka Maikel fei wewela ka yangko mi palo Satan.

Wu yireni Satan nanrona,

“Manawamo wone ese yenre yene ka yangke yene misarulu.”

10 Nu uma namo fai samo ouwnire ommo empo nu none fei samo namale nomu nunini.

Nu sa yukaile ommo kulu amun empo moule nu sa ikaklo onne ka nu fai naraine kalpulikopoinre.

Nale nunini namo,

fai samo yisyoli nu none.

11 God ese samo yisyoli nu uma nanrona.

Nale nu fai nangkene namo,

sa resuklu yukaine nale empo isi Kein yangke namo.^c

Ka nu fai wampane samo nupene nale fafaile yukaine Balam^d isi yangkeye fai wola nanrona ommo mingklari sa fai nuꞌpune romaula nro.

Ka nu fai wewelane nro ka fei fai nupu mi empo God yukaine nale empo Kora isi fai wewela ka yangkom mi empo God.^e

Ka empo rokoi namo nro,

nu uma namo sa rokoi rerile fane ese fei resuklu painri,

ka nu ese samo pekimo kei.

12 Empo pone pempoku posipanpe ka pempoku popepe ommo,

sa fai puku nanrona pone sa pinuma empo God fai wolwokerape pone kore ka samo wolapanepe pone kore.

Ka nu uma nanrona fai noloni ka nisinoline ommo fai none yukaine rip fai nemeine fulu ruwe fai nekli bot ka sip noloni eklene wu.^f

Nu fei samo flemulu empo nu nonene ommo iplele uma mingklari ka nu naine uma fai nengkene ommo mingklari paiyiye nu none nro.

Nu uma namo sa yukaine kupu fei samo kina fai riple ese yilo,

ka rapu ke yawale nu poinpanre kenkenra.

Nu re yukaile ilo fai kalneline ka fei napale nale empo taim noneni.

Ka wongke sa nanrona,

nu sa yukaile ilo empo rouwli pu ka nu uma ningkolneri kinrela nunini pu.

Uma empo nanrona,

sa nu uma empo rili pekimo pu.

13 Nu uma namo sa uma fai nangke eni.

Nu sa yukaine fulu wamfafai fai nemeine ka pikali kelo wamo.

Ka nu fei fai flemulu empo nangke nale fafaile.

Nu fai samo nemei alele yukaine rofo empo fulu fai naine fulu riri.

Ka nu re sa yukaile kikla fei fai nupenene rokoi noneni empo nemi riri.

Nanrona fane God yina mokoi nunini waiye kulrela wamo fai nu ese naine nanrona nanrona mokoi namo.

14 Adam wu sa flili paiyi risi mone ka Enok wu sa namba 7 flili empo mone wairu Adam.

Empo wu waiye isi,

wu yoplo mi profet nanrona,

“Ki kulu Manawamo yuꞌpu tausen tausen holi ensel woneni noloni.

15 Wu ese samo kotim mone uma mingklari.

Ka wu ese yangke fafaile nu uma fei fai nupene wu namo,

ese samo nem eni empo nale fafaile wamo none isi nangkene namo.

Plai empo nu uma fai nangke nale fafaile namo,

fei samo wolanane God ka kuma nane wu.

Nanrona fane,

wu yire yangke nu uma isi noplo mi fafaile wongkwongkeni wamo wu namo ese nem eni fafaile noneni.^g”

16 Nu uma namo,

nu sa uma fai wampane nem wolpuna fafaile,

17 Ka pone Kristen inomranimpi ka pinofe uporo kinini,

pone ese wolrufu mi empo nu aposel empo Manawamo moneni Jisas Krais isi noplo mi empo ommo ese kingke nemei namo.

18 Nu isi nirepi pone nanrona,

“Empo pike yire pekimo,

nu uma empo fai nangkom mi ka wewelane ka aikongkelene namo,

ese nemei.

Nu uma namo ese fei wolnane God ka nu ese nupene wolpuna noneni empo nu nire uporo none.”

19 Nu uma namo,

sa uma fai nupenene wolpuna empo pike nro ka nu resuklu ese nengke ka nenmaire wolpuna empo nu uma fai nengkene pone pepeli.

Empo fika,

Holi Spirit fei waiye plau nu uma namo.

20 Ka pone Kristen inomranimpi ka pinofe uporo kinini ese pangke bilip poneni naine kelo laip uporo namo empo God wone isi yape pone.

Ka empo pone pesapu,

pone ese pimane Holi Spirit ese yape kelo pone ka yopane wolpuna poneni.

21 God wu sa mana fai samo wolyape pone.

Nanrona fane pone ese samo paipe eklene wu,

fai wu ese yangke uporo pone ka pone ese poru Manawamo moneni Jisas Krais ese samo wolpalo pone ka yuꞌpu pone paipi paipe laip fai waiye nanrona nanrona.

22 Pone ese samo wolpalo nu uma empo bilip nunini fai yemei firpalo ka fei samo kelo.

23 Nu uma plai,

sa nanrona nu naine monre empo niꞌpi pu.

Nanrona fane pone ese puꞌpu kore nu uma namo ka pengke nu nolo moile empo niꞌpi.

Ka nu plai,

empo pone pire pangke nale empo fai wolpaloye nu,

pone ese samo pum nale empo nu namo ka sam saimope pone kore ka samo paipe amone ommo mingklari fei namkile nama empo God.

Empo fika,

nu isi panro renro fai nupene nale empo wolpuna oiya ka nangke ommo fei samo namkile ka resuklu ommo papli nunini re fei samo namkile nama empo God.

24 God resuklu ese samo yopane pone ka pone ese fei firipanro.

Ka wu re resuklu ese yuꞌpu pone papli monre koii uporo namkile wunini ka peli wu ungklamyen ka pone ese samo aipem ka eni wongke ese fei yangkana pone.

25 God wokera nro waiye ka wu mana isi yuꞌpu kore mone ommo empo Manawamo moneni Jisas Krais yangkeye.

Mereri noula wunini ka wu ese waiye king moneni ka ommo mingklari ese naine ruwe empo kelo wunini nro.

Isi oiya wu waiye nanrona ka naimele re wu nawaiyeye nanrona ka kingke re wu ese waiye nanrona nro.

Sa alwone.