3 Iwá̱n Jonás nimani̱nsan kikuiꞌ ojti iga yawi Nínive ijkó̱n kensan kijlij Jehová.

Inó̱n a̱ltepe̱ꞌ Nínive poxsan weyi,

iga no̱ya̱n mamonejnemili inó̱n a̱ltepe̱ꞌ kiwi̱gaya e̱yi día.

4 Iwá̱n Jonás pe̱waꞌ iga kinejnemilij inó̱n a̱ltepe̱ꞌ iwá̱n nejnen semilwiꞌ iga kijtojtinemi:

“De iná̱n a 40 día yej cha̱ntitokej nij Nínive yawij poliwitij.”

5 Wa̱n yej cha̱ntitokej Nínive kitajto̱lkuikej Dios,

iwá̱n iga mane̱si iga moyo̱lpatakej,

atakuajkej,

iwá̱n kakijkej itzotzolmej yej tejchiktiꞌ,

inó̱n kichij este yej má̱j yo̱lej wa̱n yej nemi moskaliwij.

6 Kua̱ꞌ inó̱n kimatiꞌ el rey de Nínive,

kikajtej ka̱n manda̱rowa,

iwá̱n kiki̱xtij itzótzol yej kakiáj re̱ymej iwá̱n kakij yej tejchiktiꞌ iwá̱n mota̱lij ipan nexti iga mane̱si iga moali̱mpamati iyi̱xtaj Dios.

7 Iwá̱n el rey iwá̱n yej tayaka̱ntokej kimati̱ltijkej nochi yej cha̱ntitokej ompa Nínive,

ijkí̱n kijtojkej:

“Yej nij ancha̱ntitokej iwá̱n inochi amoyo̱lka̱mej amo xitakua̱ka̱n niga xikoni̱ka̱n a̱ꞌti.

8 Ma̱jwaꞌ xikaki̱ka̱n amotzótzol yej tejchiktiꞌ amonochi̱n,

iwá̱n poxsan xikte̱ne̱wi̱ka̱n Dios.

Ximoyo̱lpataka̱n iga ankichijtokej yej aye̱kti,

iwá̱n sejsé̱ de amejeme̱n xikajte̱waka̱n iga ankimagaj sekin iga ankitachtekiáj;

9 anka ijkó̱n pojpoliwis iga kuesitoꞌ Dios,

moyo̱lpatas iwá̱n ayꞌya te̱polo̱skej.”

10 Iwá̱n Dios kiye̱ꞌitaꞌ iga moyo̱lpatakej yej de Nínive,

iwá̱n ayoꞌ kichij yej kichi̱wilia̱yaj.