Jonás tajtowa wa̱n Dios
Jonás 2
“Niktno̱tzaꞌ Jehová kua̱ꞌ némiya nimiki,
iwá̱n yéj ne̱kaguiꞌ.
Este xapo‑ijtiꞌ ka̱n nito̱ktoꞌ nimitzte̱ne̱wij,
iwá̱n tine̱tajto̱lkaguiꞌ.
3 Tine̱mo̱taꞌ ka̱n takomichka̱n,
ka̱n pox wejkatan.
Iwá̱n ne̱melaꞌtzakuaꞌ a̱ꞌti,
eꞌ tej tikchij iga nij mani‑a̱tzakto.
4 Iwá̱n nikijtoj:
“A̱n sí tine̱tájkalya,
ayoꞌ tine‑itasneki;
eꞌ nikmati malej ijkó̱n nonos mote̱noj.”
5 Nikmachi̱lia̱ya yawiy ki̱sati noa̱lmaj,
nita̱tako̱mpachiwiáy,
iwá̱n ne̱kechki̱kimilojtoya a̱kuamekamej.
6 TinoDio̱s Jehová,
nasiꞌ te ka̱n pox ta‑ijtiꞌ.
Nikmachi̱lia̱ya nonoya ta̱ltampa.
Eꞌ tej tineojpa‑ixitij ka̱n nimiktoya.
7 Kua̱ꞌ nita̱tapolijtoya,
nikte̱ne̱wij Jehová,
iwá̱n asiꞌ notájto̱l,
este pox ajko ka̱n tonoꞌ.
8 Yej kitokaj na̱mo̱ldio̱s,
tej awel tikpale̱wiá.
9 Eꞌ nej nimitztakui̱kili̱j,
iga nimitzweyimati̱lti̱j.
Nia nikchi̱wati yej nimotajto̱ltij wa̱n tej,
¡iga tejsan Jehová wel titama̱nawiá!”
10 Iwá̱n Jehová kitekimáꞌ weyito̱pojwé̱j iga maki̱so̱tati Jonás ipan a̱tate̱n.