Uajlaskej omemej testigos
11
Kemaj,
onechmakakej sen vara yejuan ika tlatemachiualo,
niman onechijlijkej:
“Xmotelketsa niman xtejtemachiua on iueyitiopan Dios niman on itlaixpan*.
Niman no xkimpoua keskimej on yejuan ompa kimauistiliaj Dios.
2 Pero on ikiauak on templo maka xtemachiua pampa on yokinmaktilijkej on yejuan xhebreos*.
Yejuamej yeyi xipan uan tlajko kichojcholoskej on yektitikaj ueyikalpan Jerusalén.
3 Niman nejua niktitlanis ome notestigo yejuan kiteijliskej on tiotlajtojli yejuan nikimijlis ipan se mil 260 tonaltin.
Niman yejuamej tlakemejkej yeskej ikan tlakentli* tejsontik tlachijchijtli ikan costales para kiteititiskej ika najmanaj.”
4 On ome kojtli* intoka olivos niman on ome candeleros yejuan onokej ixpan iTEKO in tlaltikpaktli,
kijtosneki on omemej testigos.
5 Tla yakaj kinekis ijtlaj xkuajli kinchiuilis,
yejuamej inkamak kixtiskej tlitl niman kinmiktiskej intlauelikniuan.
Ijkon tej,
mikis yejuan kinekis itlaj xkuajli kinchiuilis.
6 Yejuamej in testigos kipiyaskej poder para kichiuaskej maka kiauis ipan on tonaltin chika yejuamej kiteijliskej on tiotlajtojli yejuan kiseliskej itech Dios.
No ijki kipiyaskej poder para on atl kuepaskej yestli.
Niman san kaman kinekiskej,
uelis kichiuaskej ipan in tlaltikpaktli nochi kech sesekneka plagas onkaj.
7 Ijkuak yejuamej yotlankej kiteijliaj on tiotlajtojli yejuan kiseliskej itech Dios,
on xkuajli yolki yejuan kisa ipan on pozo yejuan xnejsi kech ika uejkatlan,
kinuijsokis,
kintlanis niman kinmiktis.
8 Niman inmikatlalnakayo kintlajkaliskej ipan icalles on ueyixtikaj ueyikalpan,
kampa toTEKO okajkopilojkej.
On chanejkej ipan on ueyikalpan nouikaj xkuajli ken on tlakamej chanejkej ne Sodoma niman Egipto.
Yejua ika,
on ueyikalpan Jerusalén kitokayotiaj Sodoma niman Egipto.
9 Yeyi tonajli uan tlajko on tlakamej chanejkej ipan nochi naciones,
niman nochi raza,
niman nochi kech seseknekamej tlajtoltin,
kitaskej inmikatlalnakayo,
niman xkitekauiliskej para ma kintlaltokakan.
10 On chanejkej ipan in tlaltikpaktli,
sanoyej* pakiskej ipampa inmikilis.
Yejuamej kichiuaskej iluitl hasta kinotlayokoliskej itlaj pampa on omemej tiotlajtojkej sanoyej kimpajsolouayaj on tlaltikpaktlakamej.
11 Pero ijkuak yopanok on yeyi tonajli uan tlajko,
Dios ikan ijyo yejuan kitemaka nemilistli,
okinyolitij*,
niman yejuamej oksejpa onokuitejkejkej.
Niman nochimej on yejuan okitakej sanoyej onomojtijkej.
12 Kemaj on omemej testigos okakkej sen chikauak tlajtojli yejuan okinuajnots iluikak,
niman okinmijlij:
“Xuajtlejkokan nikan tlakpak.”
Niman yejuamej ipan sen moxtli otlejkokej chika intlauelikniuan kominitstikatkaj ken tlejkouayaj.
13 Kemaj nimantsin sanoyej temojtij otlalolin,
niman majtlaktli por ciento de on ueyikalpan oxoxoton.
Niman ijkuakon,
chikome mil tlakamej omikkej.
Niman on tlakamej yejuan xomikkej,
ikan innemojtil okueyilijkej Dios iluikak chanej.
14 Ijkon opanok on ika ome tlaxoxotonilistli,
pero saniman ye uajlau on ika yeyi tlaxoxotonilistli.
On ika chikome ángel kipitsa itrompeta
15 Kemaj on ika chikome ángel okipits itrompeta,
niman nimantsin chikauak okakistikej tlajtoltin ne iluikak.
On tlajtoltin ijkin kijtouayaj:
“Nochi tekiuajyotl yejuan onkaj ipan in tlaltikpaktli,
yokinoyaxkatij* toTEKO Dios niman iCristo,
niman para nochipa toTEKO Dios tlamandaros.”
16 Kemaj,
on 24 ueuetkej tlayekankej yejuan yejyeuatikatkaj ipan intronos,
onotlakuantelketskej,
niman onopachojkej hasta ipan tlajli ixpan Dios,
niman okimauistilijkej.
17 Ijkin okijlijkej:
“Timitsmakaj tlaxtlauijli toTEKO Dios yejuan nochi tiueli kichiua.
Tejua nochipa tinemi niman nochipa tinemiya.
Timitsmakaj tlaxtlauijli pampa aman kuajli yotikteititij moueyi poder,
niman yopeu titlamandaroua.
18 On países okualankej.
Pero aman ye kuajli yoyejkok on tonajli para tikinyolkuitis,
niman tikintlajkolmakas on mikatsitsimej.
Niman no yoyejkok on tonajli para tikintlaxtlauilis on tiotlajtojkej motekichiuilijkauan,
niman on yejuan yolchipajkej motech,
niman on yejuan mitstlakaitaj.
Tejua tikintlaxtlauilis on yejuan uejueyixtokej niman on yejuan xuejueyixtokej.
Niman no yoyejkok on tonajli para tikimpopolos
on yejuan kinmiktiaj on tlakamej ipan in tlaltikpaktli.”
19 Kemaj,
on itiopan Dios yejuan onkaj iluikak otlapou,
niman ijtik on tiopan nestikatka on yekcaja kampa yejtikaj on majtlaktli tlanauatijli.
Niman sanoyej otlapetlan,
otlakakistik miyek tlajtojli,
otlakomon,
otlalolin niman chikauak otejsiu.