On ángel kimapixtikaj sen tlajkuilolamatsintli mimiltik
10
Kemaj onikitak uajtemoua ipan cielo* okse ángel yejuan kipiya poder.
Yejua uajtlapachijtiaya ikan moxtli,
niman ikuapan kuajkiya sen kojsemalotl.
Ixayak petlaniya ken tonaltsintli,
niman ikximetskojyouan ken pilares yejuan tlikuitikatkaj.
2 Yejua kipixtikatka ipan ima sen tlajkuilolamatsintli mimiltik yejuan tlapojtikaj.
Niman ika iyekmaikxi,
ocholoj ipan mar,
niman ika iopochikxi,
ocholoj ipan tlaltikpaktli.
3 Kemaj otsajtsik ikan chikauak tlajtojli yejuan okakistik ken ijkuak nanalka sen león.
Niman ijkuak otsajtsik,
on cielo okinankilij chikomepa ikan tlakomonajli.
4 Ijkuak ouajtlajtojkej on chikome tlakomonajli,
nejua nikijkuilosnekiya on tlen okijtojkej.
Pero ne iluikak onikak okse tlajtojli yejuan onechijlij:
“Maka xkijkuilo on tlen okijtoj on chikome tlakomonajli,
yej xkichtakapiya.”
5 Kemaj on ángel yejuan onikitak cholojtikatka ipan mar niman ipan tlaltikpaktli,
okajkoku iyekma ipan iluikak,
6 niman okimelajkaijtoj itech on yejuan nemi para nochipa,
yejuan okitlalij on cielo,
on tlaltikpaktli,
on mar niman nochi on tlen impan onkaj niman nemi.
Niman ijkin okijtoj:
“Nochi amantsin nochiuas.
7 Yej,
ijkuak on ika chikome ángel kipitsas itrompeta,
nochiuas on tlen Dios okinek yejuan iyantikaj,
ijkon ken okinmijlij on itekitkauan tiotlajtojkej.”
8 Kemaj on tlajtojli yejuan onechajnotska ne iluikak oksejpa onechajnots niman onechijlij:
“Xuiya,
niman xkuiti on tlajkuilolamatsintli yejuan tlapojtikaj ipan ima on ángel yejuan cholojtikaj ipan mar niman ipan tlaltikpaktli.”
9 Kemaj,
nejua oniaj itech on ángel niman onikijlij ma nechmaka on tlajkuilolamatsintli,
niman yejua onechijlij:
“Nikankaj.
Xkua.
Mokamak tikmatis tsopelik ken itlaj nekutli,
pero ijkuak tiktolos,
ne mojtik tikmatis ika chichik.”
10 Kemaj onikonkuik on tlajkuilolamatsintli ipan ima on ángel niman onikuaj.
Nokamak onikmat tsopelik ken itlaj nekutli,
pero ijkuak oniktoloj,
nojtik onikmat chichik.
11 Kemaj,
onechijlij:
“Ika onkaj oksejpa tikteijlis on tiotlajtojli impan on miyek kalpanmej,
países,
seseknekamej tlajtoltin niman reyes yejuan Dios mitsijlis.”