On tlaneltokakej noneki tepaleuiskej ikan nochi inyojlo
8
Aman nokniuan,
tiknekij temechtlajtlajtouiliskej kenijki Dios yokintitij iueyitetlajsojtlalis* on yejuan tlaneltokaj ne Macedonia.
2 Maski sanoyej* kipanouaj miyek tlajyouilistli,
impakilis sanoyej ueyi.
Yejua ika,
ikan nochi inyojlo okitemakakej hasta kech ouelkej,
maski yejuamej sanoyej mayankej.
3 Nejua kuajli onikitak ika xsan okitemakakej ken ouelkej,
yej hasta kech ouelkej niman más.
Niman ijkon okichijkej,
pampa ijki okitlalijkej ipan inyojlo,
niman xpampa yakaj okinmijlij ika ijkon noneki kitemakaskej.
4 Yejuamej sanoyej otechtlajtlanilijkej para ma tikitkikan inuentomin para kimpaleuiskej on tlaneltokakej de Jerusalén.
5 Niman yejuamej okichijkej más xken tejuamej tikchayaj.
Achtoj sano yejuamej onotemakakej itech toTEKO,
niman kemaj totech,
ijki ken Dios okinek.
6 Ijkuak otikitakej ken on tokniuan de Macedonia okichijkej,
otiktlajtlanilijkej Tito para ma tlami kisentlali on uentomin yejuan achtoj opejka kisentlalia nemotsajlan.
7 Nemejuamej nentetlantiuij ika on tlen nenkichiuaj:
ken nemouikaj ipan nemotlaneltok,
ken nentemachtiaj,
ken on tlen nenkixmatij,
ken ikan nochi nemoyojlo nentepaleuiyaj,
niman ken nentechmakaj nemotetlajsojtlalis*.
No ijki xchiuakan kuajli ken nenkitemakaj on uentomin.
8 In tlen nemechijlia xejua sen tlanauatijli.
Pero san niknekya xmatikan kenijki oksekimej no sanoyej kuajli tlapaleuiyaj niman no para xkitakan tla nemotetlajsojtlalis* no ijki ken de yejuamej.
9 Nemejuamej tej,
ye nenkimatstokej iueyitetlajsojtlalis* toTEKO JesuCristo yejuan xmechtocarouaya nenkiseliskej.
Maski yejua kipiya nochi riquezas,
onochiu manyanki nemopampa,
para itechkopa imanyanalis nemejuamej onemochikej ricos.
10 Aman nemechijlis tlinon niknemilia de on uentomin.
Más kuajli para tlamis nenkisentlaliskej on uentomin yejuan opeu nenkinsentlaliaj ipan on okse xipan katka.
Nemejuamej xsan achtoj onenpejkej nenkichiuaj on tekitl,
yej no para nenkichiuaj ikan paktli.
11 Aman tej,
sano ijki ikan nochi nemoyojlo ken achtoj onenkipixkej,
oksejpa peua xsentlalikan on uentomin hasta nentlamiskej.
Xtemakakan kech nenueliskej,
12 pampa tla sen tlakatl ikan nochi iyojlo kitemaka kech yejua ueli kitemaka,
Dios kiselilia on uentomin.
Yejua tej,
xueli kitlajtlanilia tlen sen xkipiya.
13 In tej,
xkijtosneki tla pampa nenkimpaleuiskej oksekimej,
yej nemejuamej itlaj mechpolos.
In yej kijtosneki nochimej ma kipiyakan sanno ijki.
14 Aman nemejuamej nenkipiyaj tlinon ika uelis nenkimpaleuiskej ipan on tlen kimpoloua oksekimej.
Niman sano ijki,
ipan okse tonajli yes yejuamej kipiyaskej tlinon ika mechpaleuiskej ipan on tlen mechpolos.
Ijkin tej,
in kijtosneki nochimej ma kipiyakan sanno ijki,
15 ken kijtoua ipan in Yektlajkuilojli:
“On yejuan miyek okisentlalij,
xitlaj* itech onokau;
niman on yejuan xmiyek okisentlalij,
xokipoloto.”
Tito niman icompañeros otemachtito ne Corinto
16 Nikmaka tlaxtlauijli Dios ika yejua okitlalilij Tito ipan iyojlo sano yejua on yoleualistli ken nejua nikpiya para mechpaleuis.
17 Yejua mechontas xsan pampa oniktlajtlanijlij ma mechitati,
yej pampa sanoyej mechonmatstikaj.
18 Iuan Tito tiktitlanij sen tokniu yejuan nochiuiyan ipan on tiopantin on tlaneltokakej kitlakaitaj,
pampa yejua kuajli kiteijlia on kuajli tlajtojli yejuan kiteijlia ken Dios temakixtia.
19 Niman xsan kitlakaitaj,
yej no okitlapejpenijkej para touan kistinemis,
niman techpaleuis tikteititiskej on totetlajsojtlalis* itechkopa on uentomin yejuan tiktemakaj.
Ijkin tikchiuaj para toTEKO kiselis ueyilistli niman para tiktemachistiskej ika melauak tiknekij titepaleuiskej.
20 Tiknekij tikchiuaskej kanika para maka yakaj techtejteneuas ken tiknechikouaj miyek uentomin.
21 Niman tikchiuaj kanika para tikchiuaskej ken kitocaroua xsan ixpan toTEKO,
yej no imixpan on tlakamej.
22 Inuan in tokniuan tiktitlanij okse tokniu yejuan miyekpa otiktlatlatakej,
niman miyekpa otechititij ika kineki ikan nochi iyojlo tepaleuis.
Niman pampa kipiya iyojlo nemotech,
aman más sanoyej kineki ikan nochi iyojlo tepaleuis.
23 Tla yakaj itlaj mechtlajtoltia de tokniu Tito,
nenkijliskej ika yejua nocompañero yejuan nechpaleuiya nitekiti nemouan.
Niman on oksekimej tokniuan,
tenojnotskej de on tiopanmej yejuan kiueyiliaj Cristo.
24 Ijkon tej,
xkintitikan on tokniuan ika melauak nenkintlajsojtlaj niman ijkon nenkintitiskej tline ika tejuamej melauak titomatij tiuejueyixtokej nemopampa.
Ijkin xchiuakan para nochi on tlaneltokakej ipan on tiopantin ueliskej kitaskej.