2 Xtechtlalikan ipan nemoyojlo ikan tetlajsojtlalistli*.

Tejuamej xakaj nion akin otikchiuilijkej itlaj tlen xkuajli.

Xakaj otikpopolojkej,

nion xakaj otikixpachouilijkej itlaj.

3 In xnikijtoua para itlaj nemechtlajtlakoltis.

Nemejuamej ye nenkimatstokej ika yonemechijlij nennemij ipan noyojlo.

Maski tinemiskej noso timikiskej,

nochipa nemechpiyas ipan noyojlo.

4 Nemechijlia tlen melauak ika niktlalia nochi noyojlo nemotech.

Nemotechkopa nikpiya miyek ueyimatilistli niman nemechtlakaita.

Maski tlatlajmach nikijyouiya,

sanoyej nechyoleua,

niman sanoyej nipaki.

5 Desde ijkuak otejkokej nikan Macedonia,

xkaman titoseuiyaj,

yej nochiuiyan tikonamikij pajsolouilistli.

On yejuan xtlaneltokaj techijixnamikij,

niman ipan toyojlo otikmatkej nemojtijli.

6 Pero Dios,

yejuan kinyoleua on yejuan nosiaukauasnekij,

otechyoleu itechkopa Tito ijkuak oyejkok.

7 Yejua otechyoleu xsan pampa oyejkok,

yej pampa otechijlij kenijki onenkiyolejkej.

Niman yejua otechtlajtlajtouilij ika sanoyej nentechitasnekij,

niman ken onemajmankej,

niman ken sa nentechajmatstokej.

Yejua ika on,

nejua más sanoyej onipak.

8 Maski on tlajkuilolamatl yejuan achtoj onemechtitlanilij omechmakak ajmantli,

nipaki ika onemechtitlanilij.

Achtoj oninajman,

pampa onikmat ika on tlajkuilolamatl omechmakak ajmantli,

pero on san ipan achijtsin tiempo.

9 Pero aman nipaki xpampa tla onemajmankej,

yej pampa on ajmantli omechpaleuij para onemoyolpatlakej.

Nemejuamej onemajmankej ken Dios okinek,

niman ijkon totlajkuilolamau xomechchiuilij itlaj tlen xkuajli.

10 Tla se kijyouiya on ajmantli ken Dios kiyolpaktia,

ompa peua on yolpatlalistli.

Niman ijkuak se noyolpatla,

ueli kiselia on temakixtilistli,

niman ijki xkaman kijtos ika xkuajli tlen okichiu.

Pero tla xkijyouiya on ajmantli ijkon ken Dios kiyolpaktia,

kiselis mikilistli.

11 Nemejuamej onemajmankej ken Dios okipaktij,

niman aman xkitakan tlinon onenkitlankej yejua ika on.

Aman nemejuamej nennemij listos para nenkiteititiskej ika nemouikaj ken kitocaroua.

On tlajtlakojli yejuan onemechtlajkuiluij ipan on okse tlajkuilolamatl,

omechkualanij niman no omechmojtij.

Nimantsin onenkinekkej nennechitaskej,

niman onenkipixkej nemoyojlo para nencastigaroskej on yejuan okichiu on tlajtlakojli.

Yejua ika on,

onenkiteititijkej ika xnenkipiyaj tlajtlakojli yejua ika on tlen onochiu.

12 Maski ijkon onemechijkuilouilij on okse tlajkuilolamatl,

nejua xonikchiu ipampa on tlakatl yejuan okichiu on tlen xkuajli,

nion xipampa on yejuan okijyouij on tlen xkuajli.

Yej onikchiu para ixpan Dios xmatikan on kech melauak nenkinekij nentechtlamatiskej tejuamej.

13 Yejua ika onentechyoltlalijkej.

Pero no sanoyej otipakkej pampa Tito otikitakej sanoyej pakiya.

Ijkon nemiya pampa nemejuamej onenkipaleuijkej para oyolchikau.

14 Ijkuak Tito xe yaya nemotech,

onikijlij ken sanoyej nipakiya nemopampa.

Aman tej,

yejua yoyejkok notech niman xonipinau ika on tlen onikijlij.

Ijkon tej,

nochi on tlen temechijliaj,

no ijki kuajli okisato on tlen otikijlijkaj Tito ika melauak titomatij tiuejueyixtokej nemopama.

15 Niman aman ijkuak kelnamiki ken nemochimej* onenkititijkej nemotetlakamatilis,

niman ken onenkiselijkej ikan yolyemanilistli niman miyek tetlakaitalistli,

itetlajsojtlalis* yejuan mechpiyalia más noskaltijtiu.

16 Nipaki pampa niueli niktlalia nochi noyojlo nemotech.