Pablo kitlajtlakolmaka sen tlakatl yejuan kipiya itlakpanan ken imosaj
5
Machiya tej,
ika nemotsajlan nemi sen tlakatl yejuan kipiya itlakpanan ken imosaj.
On ken on tlajtlakojli sanoyej* xkuajli hasta on yejuan xhebreos* xijkon kichiuaj.
2 Aman tej,
xnikmati kenijki sanken* ueli nemoueyimatij.
Noneki para nemejuamej nemajmanaskiaj.
Niman noneki para xkixtikan nemotsajlan on tlakatl yejuan kichiua on ken on tlajtlakojli.
3 Maski nejua xompa nemouan ninemi,
ken ompa nemouan ninemiskia.
Tla ijkon tej,
on tlakatl yejuan kichiua on ken on tlajtlakojli ye kuajli yoniktlajtlakolmakak ken niktlajtlakolmakaskia tla ompa ninemiskia.
4-5 Ijkuak nemosentlaliskej ikan itokatsin toTEKO JesuCristo,
nejua ken ompa nemouan ninemiskia.
Ipan on tonajli xmaktilikan Satanás on tlakatl ikan ipoder JesuCristo yejuan nemouan onyas para ma tlajyoui itlalnakayo.
Ijkon ialma nomakixtis ijkuak toTEKO JesuCristo uajlas.
6 Xkitocaroua nemoueyimatiskej.
¿Tlen xnenkimatij on tlajtojli yejuan kijtoua:
“San achijtsin tlaxokolilistli* kajkokui nochi on tixtli de harina”?
7 Yejua on tlakatl yejuan kichiua in tlajtlakojli ken on tlaxokolilistli* yejuan kajkokui nochi on tixtli.
Yejua ika,
xkixtikan on tlakatl para maka ma kimijtlakojtia on oksekimej ikan itlajtlakol.
Ijkuakon nennemiskej ken yejua on tixtli yejuan xkipiya tlaxokolilistli*.
Nikmati ika melauak nenchipajkanemij,
pampa sano Cristo san topampa okiuentlalijkej ken on borreguito yejuan kiuentlaliayaj ipan on iluitl itoka Pascua*.
8 Aman tej,
ijkon ken on hebreos* xkikuaj pan yejua kipiya tlaxokolilistli* ipan on iluitl Pascua*,
no ijki tejuamej ma tikixtikan nochi xkuajlilistli niman tlajtlakojli totsajlan.
Niman ijkon ma tinemikan ixpan Dios ikan kuajli toyojlo niman ikan melajkanemilistli.
9 Ipan okse notlajkuilolamau onemechijlij para maka inuan xmonelokan on yejuan auilnemij.
10 Pero nejua xnikijtosnekiya xkintlalkauikan on yejuan xhebreos*.
On tej,
melauak ika yejuamej auilnemij,
sanoyej tlamach kinejnekij kipiyaskej,
tlachtekij niman kinmauistiliaj ídolos.
Pero para ueliskia nenkintlalkauiskiaj nonekiskia nenkisaskiaj ipan in tlaltikpaktli.
11 Nejua tej,
yej nemechijlisnekiya maka iuan xmonelokan on yejuan noteneua kineltoka Cristo,
pero nemi ipan auilnemilistli,
noso sanoyej tlajtlamach* kinoyaxkatisneki,
noso kinyekteneua ídolos,
noso tetejteneua,
noso tlauani,
noso tlachteki.
Nion siquiera iuan xtlakuakan on yejuan ijkon kichiua.
12-13 On xnejua notekiu para nikintlajtlakolmakas on yejuan xtlaneltokaj.
On kenomej Dios kintlajtlakolmakas.
Pero nemejuamej noneki nenkintlajtlakolmakaskej on yejuan tlaneltokaj.
Yejua ika tej,
xkixtikan nemotsajlan on xkuajli tlakatl.