2 In kuajli tlajtojli Dios yokiprometerojka intechkopa on tiotlajtojkej ken tlajkuilolnestikaj ipan on Yektlajkuilojli.

3 In kuajli tlajtojli technojnotsa itechkopa toTEKO JesuCristo yejuan iKonetsin Dios.

Niman yejua otlakat ken sen teuejkakoneu itech on rey David.

4 Pero ijkuak okitôkakej niman onokuiteu ipan itlalkon,

on Espíritu Santo okipanextij ikan poder ika yejua iKoneu Dios.

5 Itechkopa JesuCristo,

Dios onechmakak iueyitetlajsojtlalis* yejuan xnechtocarouaya nikselis.

Niman ikan iteiknelilis* onechtitlan ken apóstol* para ma nikinnojnotsa on yejuan xhebreos* yejuan chantij ipan nochi países.

Nikinnojnotsa para ma kineltokakan niman ma kitlakamatikan Dios.

6 Niman nemejuamej no nenteuamej omechnots para no nenteyaxkauan* yeskej itech Cristo.

7 Nemechtlajkuiluiya tej,

nochimej nemejuamej yejuan nenchantij ipan on ueyikalpan Roma yejuan nenitetlajsojkayaxkauan Dios.

Ma Dios toTajtsin niman toTEKO JesuCristo mechmakakan inueyitetlajsojtlalis* niman inyolseuilis.

8 Aman tej,

itechkopa JesuCristo nikmaka tlaxtlauijli noDios nemopampa nemochimej* pampa nochiuiyan yokakkej ken nemejuamej nentlaneltokaj.

9 Niktekipanoua Dios ikan nochi noyojlo ika nikteijlia on kuajli tlajtojli de on iKonetsin.

Dios kualitstikaj ika nochipa nemechelnamiki ipan nooración.

10 Desde ye uejkaui oniknek nemechonnotsas.

Yejua ika tej,

niktlajtlanilia Dios ma nechkauili nemechnotsati tla yejua kineki.

11 Sanoyej nikneki nemechitas para nemechmakas itlaj tlatiochiualistli yejuan kisa itech on Espíritu Santo para xmelajkanemikan.

12 Nikijtosneki,

ma titoyoleuakan ika on tlaneltoktli yejuan tikpiyaj.

13 Nokniuan,

nikneki xmatikan ika miyekpa oniknek nemechonnotsas,

pero hasta aman tlamach nechteltia.

Nikneki nias para yakajmej nikinyolpatlas para más mieyekej ma kineltokakan Dios ijkon ken nikchiua inuan on oksekimej yejuan xhebreos*.

14 Nikmati ika,

ika onkaj nitekitis intech on yejuan griegos* niman yejuan xgriegos*,

niman intech on yejuan tlamatkej* niman on yejuan xtlamatkej*.

15 Yejua ika,

aman ika yoninokau para no nemechmachtis on kuajli tlajtojli yejuan kiteijlia ken Dios temakixtia nemejuamej yejuan nenchanejkej Roma.

16 Xnipinaua tej,

para nikteijlis on kuajli tlajtojli yejuan kiteijlia ken Dios temakixtia,

pampa on yejua ipoder Dios para kinmaka temakixtilistli nochimej on yejuan kineltokaj.

On temakixtilistli achtoj opeu kipiyaj on hebreos*,

pero aman no peua intech on yejuan xhebreos*.

17 In kuajli tlajtojli yejuan kiteijlia ken Dios temakixtia techmachistia kenijki Dios kimaka sen tlakatl yolmelaualistli.

Dios kimaka yolmelaualistli san ipampa itlaneltok niman xitlaj* okse ipampa ijkin ken kijtoua in Yektlajkuilojli:

“On tlakatl yejuan yolmelajki san itechkopa itlaneltok nemis.”

18 Tikitaj tej,

ika itlauel Dios,

desde ne iluikak ualeua para kincastigaroua on yejuan xkuajkualtin niman xyolmelajkej tlakamej yejuan ika intlajtlakoluan xkitekauiliaj ma kimatikan on tlen melauak.

19 Yejuamej kuajli kimatstokej on tlajtlamach* itechkopa Dios,

pampa sano yejua Dios yokintitij.

20 Desde ijkuak opeu in tlaltikpaktli,

nochi tlakatl ueli kita in tlaltikpaktli,

on cielo niman nochi on tlen Dios okichijchiu.

Itechkopa nochi on tlajtlamach*,

yejuamej ueli kimatij ika Dios kipiya poder yejuan xkaman tlamis niman de on inemilis.

Yejua ika tej,

ijkuak kintlajtlakolmakaskej,

xueliskej itlaj ika tenankiliskej yejuan kimpaleuis para nomanauiskej.

21 Maski yejuamej okimatkej ika Dios nemi,

xokitlakaitakej ken Dios nion xokimakakej tlaxtlauijli.

Pero intlamachilis yej xok ueli kinemilia on tlen uelis kinpaleuis,

niman inyoltechikaualis hasta xok ueli itlaj kuajli kajsikamatij.

22 Maski noteneuaj tlamatkej*,

yejuamej onochijkej tontos.

23 Yejuamej okikajkej iueyilis Dios yejuan xkaman miki,

yej kinmauistiliaj on yejuan tlamachijchiualtin ídolos yejuan tlajtlachaj ken tlakamej yejuan mikij,

noso ken totomej,

kouamej* niman on yolkej yejuan kipiyaj naui inmikxi.

24 Yejua ika tej,

Dios okinkauilij ma kichiuakan tlajtlamach* tlen xchipauak yejuan inxkuajlieleuilis okinek.

Niman ijki onochijkej on tlen sanoyej tepinajti ken on ika sano tlakamej noejeleuiyaj* niman no ijki on siuamej noejeleuiyaj.

25 Yejuamej okipatlakej on tlen melauak de Dios ika on tlen tlakajkayaualistli.

Yejuamej kitlakaitaj niman kimauistiliaj on tlen Dios okichijchiu,

pero xkitlakaitaj niman xkimauistiliaj Dios akin kitocaroua kiselis yekteneualistli para nochipa.

Ma ijki nochiua.

26 Yejua ika,

Dios okinkauilij ma kichiuakan on xkuajli tlajtlamach* yejuan inxkuajlieleuilis okinek.

Niman inejeleuis sanoyej tepinajtij.

On siuamej hasta notekaj inuan insiuaxiuan,

ijkon ken xkitocaroua kichiuaskej.

27 On tlakamej no ijki yej intlakaxiuan kinejeleuiyaj hasta kampa xok ueli.

Yejuamej tej,

kichiuaj tlamach tlen tepinajtij,

niman pampa ijkon nonejnekij,

aman tlajyouiya intlalnakayo pampa kiselia on castigo yejuan kitocaroua kiselis.

28 Pampa xok kinekij kimatiskej tlajtlamach* de Dios,

Dios okinkau okinemilijkej on tlen sanenkaj.

Yejua ika,

yejuamej kichiuaj on tlen xkitocaroua kichiuaskej.

29 Innemilis tentikaj ikan nochi tlajtlamach* tlen sanoyej xkuajli.

Auilnemij,

xyolmelajkej,

kiteejeleuiliaj tlajtlamach* ken xkitocaroua niman kinchiuiliaj tlen xkuajli oksekimej.

Yejuamej ikan nochi inyojlo nexikolmikij,

temiktiaj,

kipejpeualtiaj tlauejli,

tlakajkayauaj,

kichiuaj nochi tlen xkuajli niman chakuamej.

30 Yejuamej teijijtouaj,

istlakatij,

kitlauelitaj Dios,

xtetlakaitaj,

noueyimatij niman noueyiteneuaj.

Kinemiliaj tlajtlamach* más tlen xkuajli para kichiuaj niman xkintlakamatij intajuan.

31 Yejuamej xitlaj* kimatij,

xkichiuaj tlen kijtouaj,

xakaj kitlajsojtlaj*,

xtetlapojpoluiyaj niman xteikneliaj*.

32 Maski kuajli kimatstokej ika Dios yotlanauatij para mikiskej on yejuan kichiuaj on tlen xkuajli,

yejuamej sanken* más kichiuaj.

Niman hasta kuelitaj kintaj on yejuan no ijki kichiuaj.