Dios kintlajtlakolmaka on tlakamej ken kitocaroua
2
Yejua ika,
tejua yejuan titetlajtlakolmaka xuelis itlaj ika tiknankilis Dios para ika timomanauis itech.
Ximportaroua akin tejua.
Ijkuak okse tiktlajtlakolmaka,
sano tejua timotlajtlakolmaka pampa sano tejua ijki tikchiua.
2 Tikmatstokej tej,
ika ijkuak Dios tetlajtlakolmaka,
itetlajtlakolmakalis kixtia ipan on tlen melauak se kichiua.
3 On tlakatl yejuan no kichiua on tlen kichiuaj on tlakamej yejuan kintlajtlakolmakaj,
kitocaroua kimatis ika kiselis on tejmoti tlajtlakolmakalistli yejuan Dios kimakas.
4 San pampa Dios ikan itetlajsojtlalis* kijyouilia,
yejua xkitocaroua kinemilis ika iijyouilis Dios xueyi kijtosneki.
Dios kijyouilia ikan itetlajsojtlalis* pampa kineki kimakas tiempo para ma kipatla iyojlo.
5 Pero ijkuak sen tlakatl yoltechikaktik niman xkineki noyolpatlas,
on tlajyouilistli sano yejua kinomiyekilijtiu para kiselis ipan on tonajli ijkuak Dios tecastigaros.
Ipan on tonajli Dios kiteititis ika yejua tetlajtlakolmaka ken kitocaroua.
6 Ijkuakon,
cada se kitlaxtlauilis ken kitocaroua ika on tlen se okichiu.
7 Niman on yejuan kichiuaj kanika para kitejtemouaj on ueyilistli,
niman tetlakaitalistli niman nemilistli yejuan para nochipa itechkopa on tlen kuajli kichiuaj,
Dios kinmakas yenkuik nemilistli yejuan para nochipa kipiyaskej.
8 Pero on yejuan noueyimatij niman xkitlakamatij on tlen melauak,
yej kitlakamatij on tlen xkuajli,
Dios ika itlauel kinmakas intlajyouilis.
9 Nochimej on yejuan kichiuaj tlen xkuajli kipiyaskej tlajyouilistli niman castigo.
On yejuan xhebreos* kiseliskej on castigo niman on yejuan hebreos* kiseliskej más castigo.
10 Pero nochimej on yejuan kichiuaj on tlen kuajli kipiyaskej ueyilistli,
tetlakaitalistli niman yolseuilistli.
On yejuan hebreos* achtoj kiseliskej niman on yejuan xhebreos* no kiseliskej.
11 Ijkon tej,
tikitaj ika Dios xkichikoita* sen tlakatl iuan okse.
12 Yejua ika,
on yejuan xkixmatij itlanauatil Moisés niman tlajtlakouaj,
popoliuiskej maski itlanauatil Moisés xkintlajtlakolmakas.
No ijki tej,
on yejuan kixmatij itlanauatil Moisés niman tlajtlakouaj,
kintlajtlakolmakaskej ken on tlanauatijli tlanauatia.
13 Dios tej,
xkinselia on tlakamej ken yolchipajkej tla san kakij itlanauatil Moisés,
yej tla kitlakamatij nochi tlen tlanauatia on tlanauatijli.
14 Pero ijkuak on yejuan xhebreos* yejuan xkipiyaj itlanauatil Moisés,
kichiuaj on tlen tlanauatia on tlanauatijli,
yejuamej kiteititiaj ika itlanauatil Dios onkaj ipan inyojlo,
maski xkipiyaj itlanauatil Moisés.
15 Ijkon tej,
ken yejuamej nouikaj kiteititiaj ika on tlanauatijli tlajkuilolonkaj ipan inyojlo.
Intlamachilis no ijki kiteititia,
pampa kamantika kintlajtlakolmaka noso kamantika kinmanauiya.
16 Yejua in nochiuas ipan on tonajli ijkuak Dios itechkopa JesuCristo kintlajtlakolmakas on tlen iyantikaj ipan inyojlo on tlakamej.
Nochi in nochiuas ken nikteijlia itechkopa on kuajli tlajtojli yejuan kiteijlia ken Dios temakixtia.
On hebreos* kipiyaj itlanauatil Moisés pero xkitlakamatij
17 Aman ma titlanemilikan de on hebreos*.
Yejuamej kitlaliaj inyojlo itech itlanauatil Moisés niman ikan noueyimatilistli noteneuaj ikoneuan Dios.
18 Nemejuamej nenkimatij on tlen Dios kineki para nenkichiuaskej,
niman itechkopa on tlanauatijli no nenkimatstokej kenijki nenkitlapejpeniskej on tlen más kuajli.
19 Nejuamej nenkuitiaj ika uelis nenkinyekanaskej itech Dios on yejuan xkixmatij,
niman uelis nenkinmachtiskej on yejuan xkixmatij on itemachtiluan Dios yejuan tlen melauak.
20 Nemejuamej nenkuitiaj uelis nenkintlamachilistiskej on yejuan xitlaj* kimatij niman uelis nenkinmachtiskej on yejuan ken kokonej ixpan Dios,
pampa ipan on tlanauajtijli nenkipiyaj nochi on tlaixmachilistli niman nochi on tlen melauak.
21 Tla nemejuamej tej,
ueli nenkintlamachilistiaj oksekimej,
¿tline* tej,
xsano nemejuamej no nemotlamachilistiaj?
Niman tla nenkiteijliaj xkuajli para tlachtekilos,
¿tline tej,
nemejuamej no nentlachtekij?
22 Niman tla nemejuamej nenkiteijliaj xkuajli para auilnemilos,
¿tline tej,
sano nemejuamej ijki nenkichiuaj?
Niman tla nemejuamej nenkintlauelitaj on ídolos,
¿tline tej,
nenkonichtekij on tlen ipan intiopan nosentlalia?
23 Nemejuamej nemoueyimatij pampa nenkipiyaj itlanauatil Moisés,
pero xnenkitlakaitaj Dios pampa xnenkichiuaj on tlen tlanauatia on tlanauatijli.
24 Yejua ika,
on Yektlajkuilojli ijkin kijtoua:
“On yejuan xhebreos* san nemopampa kijtouiliaj Dios on tlen xkuajli.”
25 On neskayotl itoka circuncisión* melauak mechpaleuiskia tla nenkitlakamatiskiaj nochi itlanauatil Moisés.
Pero tla xnenkitlakamatij on tlanauatijli,
tla ijkon,
on neskayotl xitlaj* kijtosneki.
26 Niman tla on yejuan xkipiya on neskayotl itoka circuncisión niman kichiua on tlen tlanauatia on tlanauatijli,
tla ijkon kinselis Dios ken kipiyaskia on neskayotl,
maski xmelauak kipiya.
27 On yejuan xkipiya neskayotl ipan itlalnakayo,
pero kitlakamati itlanauatil Moisés,
kitlajtlakolmakas on yejuan xkitlajkamati on tlanauatilij maski kipiya on neskayotl niman kitlajkuilolpiya on tlanauatijli.
28 Sen tlakatl xmelauak hebreo* ixpan Dios san pampa tlakati itech sen familia yejuan hebreo,
nion pampa kipiya circuncisión ipan itlalnakayo.
29 Yej melauak hebreo* on yejuan hebreo* ipan iyojlo.
Niman on neskayotl itoka circuncisión yejuan melauak,
onkaj ipan teyojlo.
On neskayotl yejuan melauak,
sen tlakatl kiselia itechkopa on Espíritu Santo niman xpampa kitlakamati on tlanauatijli.
On yejuan melauak hebreo* xkiselia yekteneualistli intech on tlakamej,
yej itech Dios.