3 Yové wetsarasĩ ravikima, ea westíse mĩ ravitirívi.

4 Waa naí shavapa awerasĩ yochĩ akĩ tanái, naa mai shavapa awerasĩ yochĩ akĩ tanái, ene shavapa awerasĩ yochĩ akĩ tanái, akí aroa. 5 Aaivorasĩro aa veyó rãtí ipásho ravii mĩ atimarívi. Awesáma, earo Yavé, mĩ Yové. Yové wetsamẽ mĩ txipotĩpá. Aská ivo tanátinĩ ikí niáyaro, aa, ãwẽ vake, ãwẽ shokó, ãwẽ shokopa vakerasĩ aatii ato ẽ kopikatsa. 6 Askámaĩnõ kavimai enõ noíki, ẽ esé vana anõ akí akaya ivoro, ãwẽ revokaĩa^a roapakĩ ato ẽ vesokatsa.

7 Askávai earo Yavé, mĩ Yovésho, ẽ anẽ wesitima. Ẽ anẽ wesiya ivoro ẽ kopikatsa.

8 Askávai sábado shaváro enõ eséyati shavásho, anõ teneti. 9 6 shavátíiro mĩ anõ mee ikí roase, 10 askámaĩnõ 7 shavánamã, enõ eséyati. Naaivo shavaparo anõ mee itima, mia, mĩ vakerasĩ, mĩ mee imarasĩ, mĩ yoinavorasĩ, yorarasĩ orasho veí, mivé shaváyaivorasĩ aatíi. 11 Awesáma, 6 shavá taváki naí, mai, waka, atõ awerasĩ aká ato shovimavai, 7 shavánamã ẽ tenetisho ẽ ikí. Askáki aaivo shavánamãsevi roapa ivo vana netãi, anõ eséyati ivo shavá nẽei ẽ atisho ẽ ikí.

12 Askávai, mĩ papa, mĩ ewa, akámẽ eséyai nitso, mia ẽ ivomakatsai maĩ inopai ninosho.

13 Askávaíse yora ati akĩ yamamatima.

14 Aĩyashõ wetsã aĩ meetima.^b Veneyashõ vene wetsa oĩtima.

15 Kerõmatima.

16 Yoraki yoatima.

17 Yora wetsã shavapa, ãwẽ aĩ, ãwẽ mee imarasĩ, ãwẽ txasho, ãwẽ jumento, ãwẽ awe wetsarasĩ akámẽ kẽetima”, akĩ, Yové Koĩni.

18 Askái ãwẽ vanamaĩnõ kaná roai, põo ikí, koĩ semese tsaói aká oĩinã, rakéi tari ikí orase shokovo. 19 “Miãse nĩkãvaíki noke yoãsho, askámaĩnõ, Yové Koĩ nokenĩ vanaro noke vopimísi”, akávo.

20 Atõ askái vanamaĩnõ Moisésnĩ ato aská akĩ. “Rakétsomároa, Yové Koĩni mato onãtaki oa, rakéshokĩ ãwẽ vana tavámakãma mã shokonõ iinã”, ato akĩ.

21 Askái yorarasĩ ora atõ shokomaĩnõ Moisés naí osho semeka ivo Yové Koĩ niánamã chinãvaĩatõsho 22 aská aoki. “Israel yorarasĩ ato aská aota. ‘Waa naí shavapashõ mato aká mã nĩkãaitĩ. 23 Yové wetsarasĩ ourose, pratase aká yochĩ ashõ ea take akĩ ravitsomároa. 24 Askávaíki earavĩki mai tapo ashõ tsaõtsoma. Aská ashõ aa matxisho matõ txivo, matõ txashorasĩ aká maki atsoma. Wetsaro keyoki maki akí, wetsaro pii anõsho Yovénĩ mã mekikinanãti. Ea mã anõ raviti chinãsho shavá matõ ẽ kashma ashõkõvaĩkatsa ivo, anosho roapa ivo mato ẽ ashõkatsa. 25 Askámaĩnõ anõ maki ati tapo ea ashõkatsiinãro, shasho manẽ shatétáyarasĩ atsomároa, enõ mã eséyamárvi, aaro. 26 Askáki tapo ashõ paítiro atsomároa, mã paínímaĩnõ matõ txĩtó oĩkãmísivo’ ato atso”, akĩ.