Êxodo
Israel yorarasĩ atõ poshóti ivo yoã
Egitonamã ato ati ati yoã
1
Jacopa vakerasĩ, atõ papa, atõ wetsamavorasĩ aatii Egito mainamã votivo. 2 Atõ anerasĩro Rúben, Simeão, Levi, Judá, 3 Issacar, Zebulom, Benjamim, 4 Dã, Naftali, Gade, Aser, aatíi. 5 Atõ papã revomaa katsésero 70 yora.a Askámaĩnõ, atõ take José ivoro aapari vevo kati.6 Askái ano shokosho, José, ãwẽ takevo, ãwẽ avé kaniavorasĩ aká sheniwetsai mashtéshorívi keyókõvaĩtivo. 7 Askánamãsho atõ revoa, “Israel”, atõ aká ivo yorarasĩ mestẽpai shovisho Egito maitiovaĩtivo.b
8 Askásho txipo Egito maĩ kakáya, “Faraó”, atõ aká shovisho niakei, Josepa apawa tanama.c 9 Askáki aapa ivo yorarasĩ ato tanamakĩ. “Oĩ, Israel yorarasĩ westímai revoki, nokepa ma tavakéaivo. 10 Ramaro ato nõ neská atimarã, revoomísivo. Pakayanamãsho askásevi akĩ, nokenĩ ranokasmananãyavonĩ takékésho, noke viakeshõ nokẽ mai enevaĩi poshómísivo”, ato akĩ.
11 Askáinã Israel yorarasĩ kakáya vesomashõ ato mee iti yomãne ato imaki, ati akĩ. Aská akĩ ato shokõsho cidade ravévakĩ ato amaki, Pitom, Ramassés aká, anõ kakáyatõ piti meketi. 12 Aská akĩ shokõsho atõ ati akasmẽkĩ Israel yorarasĩ revoi peás isvo. Atõ aská oĩinã Egito yorarasĩni ato rakéshovãwãki 13 yomãpatõ ato imaóki. 14 Askáki ato onís awemakĩ, mee iti ewe yomãnamaí, massa ato amai, tijolo shoimaí, piti merámatõ ato imai akávo. Aská akĩ ato ati akĩ, onis atãkima ato shokõvo.
Too imayavõ Faraó tavámati ivo yoã
15 Askáki anosho, Egito kakáyatõ, hebreud shavo too imayae ravévakĩ, Sifra, Puá aatii, “askátsoma”, iinã ato vana yonoshokĩ. 16 “Hebreu shavorasĩ vake pakémaĩnõ, ato take akĩ neská atsoma. Venevake oĩinãro õtxĩi, aĩvake oĩinãro enei, atsoma”, ato akĩ. 17 Aská akĩ ato ãwẽ yonoasmẽkĩ, Yové Koĩ rakéshokĩ ato ãwẽ yonoa keská akĩ ashõma ikívo, venevakerasĩ enesvo, õtxima ikívo.
18 Aská oĩinã kakáyatõ, kenavaíki ato nĩkãki. “Awesakĩ mã aská akárá, venevakerasĩ mã õtximanã?” 19 ato ãwẽ aská amaĩnõ, “hebreu shavorasĩro, Egito shavorasĩ keskámarívi. Mestẽkasho atõ tooa, inói pakésmavo. Nokenĩ too imayavo atõ nokóa anõsmarvi”, akĩ revívo.
20-21 Askái Yové Koĩ rakéshoi atõ kãtxíatõsho Yovepa roakakĩ ato revomakĩ. Israel yorarasĩ askásevi, ãtsa isi mestẽpai shovi isvo.
22 Atõ aská oĩinã kakáyatõ aapa yorarasĩ ato tanamakĩ. “Venevakerasĩ pakéa venáchta ivorasĩro, keyokise waka Nilo naki ato potatsoma. Askámaĩnõ aĩvakerasĩro yamamatsomároa enestsoma”, ato akĩ.