3
Ne hein kenè dey en egkeantus is kebulunga zey keniyu,
sikami is tetelu,
mid-isip dey he meupiya ke ebpetaǥak is dezuwa kenami ziyà te inged he Etinas.
2 Ne zutun midsuǥù dey ziyan si Timoteo he suled tew wey suluǥuen daan te Megbevayà te kegkesengyawa te Meupiya he Tudtulanen mehitenged ki Kristu.
Iyan insuǥua zey kandin su wey zin meheǥeti is kedtuu niw ne wey kew zin mesembaǥi
3 su wey kenà meliveg is minsan hentei keniyu tenged te kebpesipelahi keniyu te menge etew.
Netuenan niw en he sikitew is tumutuu,
imbanglis kenitew te Megbevayà is kemeresayan.
4 Hein diyan key pa te keniyu migkeǥiyan dey sikiyu he zuen timpu he egkeumahan kiw te kemeresayan,
ne netuenan niw ǥuntaan he netuman en.
5 Ne tenged kayi hein kenè ku en egkeantus is kegkeipeng ku keniyu,
midsuǥù ku ziyan si Timoteo wey ku metueni ke nemenumenu en is kedtuu niw.
Nahandek a su kela ke nepenulayan kew ni Setanas ne naawà is pulus te kedhaǥù dey ziyan te keniyu.
Is Tudtul ni Timoteo
6 Ne iyan pa kebpekeuma ni Timoteo he ebpuun diyan te Tiselunika.
Ne meupiya is tudtul zin he mezesen ded is kedtuu niw te Megbevayà wey ebmahalen niw zaan diyà te ǥehinawa niw is menge zuma niw.
Ne iyan daan tudtul zin is:
utew meupiya is gehinawa niw kenami,
ne ebulungen kew kenami iring te kebulunga zey zaan keniyu.
7 Ne tenged kayi,
menge suled,
minsan neseeng key wey nemereǥenan key,
utew key nelipey tenged keniyu wey tenged te kedtuu niw.
8 Ne ǥuntaan mibmeupiya en utew is kebpekesavuk dey su netuenan dey en he mezesen ded bes is kedtuu niw te Nengazen.
9 Kenè pa hustu is kebpenigudu zey kebpeselamat te Megbevayà tenged keniyu,
su utew zey sikiyu ingkelipey.
Iyan ebpeketistiǥus kayi is Megbevayà.
10 Su maandew wey mezukilem ebpenigudu key ed-ampù he ituǥut din he memeked-uuma kiw en maan wey zey meheǥet is kedtuu niw ke zuen din kurang.
11 Berekati te Amey tew he Megbevayà wey te Nengazen tew he si Jesus he meǥaan key mekehendiyan te keniyu.
12 Berekati te Nengazen he med-iseg is kebmahala niw ziyà te ǥehinawa niw te uman sevaha keniyu wey is langun he etew,
iring te utew mezesen is kebmahala zey keniyu.
13 Berekati zin daan he mebmelig-en kew te kedtuu niw su wey wazà igkesewayi keniyu te menge ǥaked te Megbevayà emun diyè kew ed-etuvang te Amey tew he Megbevayà dutun te kebpekeuma te Nengazen tew he si Jesus he edumahan te langun he tumutuu kandin.