Is Tutuu he Kegkemetazeng
3
Na,
menge suled,
ketepusan heini he sambag ku keniyu.
Lipey kew tenged te upakat niw te Nengazen.
Maambe ke idsublì ku keniyu is daan he sambag ku su melemu zà heini,
ne kela ke egkehimu he pinaaǥi kayi egkelig-enan is isip niw.
2 Likayi niw is menge kuntada te Megbevayà he mezaat is ulaula zan he iyan is menge Hudiyu he ebpenurù he iyan egkesuatan te Megbevayà is kebpelii niw te lawa niw.
3 Iyan kiw kes tutuu he menge sakup te Megbevayà,
ne kenà iyan sikandan,
su pinaaǥi te Waǥas he Mulin-ulin ed-azap kiw te Megbevayà ne edlipey kiw tenged te upakat tew ki Jesu Kristu.
Ne kenè tew iyan edseriǥan is kelibutanen he ulaula iring te kebpesirkunsidar.
4 Iyan,
ke egkehimu he egkeseriǥan is iring dutun,
egkeseriǥan is nengeulaula ku zengan su ke zuen etew he kunaan din ke egkeseriǥan din is kedtumana zin te menge kelibutanen he tulumanen,
ne egkelevawan ku pa sikandin te kedtumana kayi.
5 Su hein walu en he andew is ked-enaka kedì,
ne midsirkunsidar a.
Is menge ǥinikanan ku,
ne kevuwazan sikandan ni Benjamin he anak te kepuun dey he si Israyil.
Ne tudalis a he Hudiyu.
Mibpurungan ku te edtuman is kesuǥuan he imbilinbilin ni Moises su Perisiyu a.
6 Ne tuus te utew meheǥet dini te ǥehinawa ku is kedtumana ku te menge tulumanen dey te menge Hudiyu,
su mibpemesipelahan ku is menge tumutuu ki Jesus.
Ne sumalà te kedtumana ku te kesuǥuan he imbilinbilin ni Moises wazè ku netuenan he supak ku te Megbevayà.
7 Iyan,
is langun he iring dutun he kunaan ku ke egkeseriǥan ku wey a melibri te silut,
mid-engkezan ku en wey ku maangken si Kristu.
8 Ne kenà dutun dà taman is mid-engkezan ku,
kekenà,
mid-eminan ku engkezi is minsan hengkey he zekelà dini te ǥehinawa ku su wey ku mekuwa is utew pa lavew he mahal he iyan is kebpekidsevaha ku ki Jesu Kristu te Nengazen ku.
Tenged kandin mid-engkezan ku is langun ne mid-isip ku heini he abper zà dini te kelibutan wey a mekepekidsevaha ki Kristu,
9 su wey a zaan meisip te Megbevayà he metazeng tenged ki Kristu.
Wazà a meisip he metazeng pinaaǥi te kediey zà he ulaula te kedtumana te kesuǥuan,
su mibpeketazeng a te Megbevayà pinaaǥi te kedtuu ku ki Kristu.
Heini is kebmetazeng,
ne idtuvad kenita te Megbevayà emun edtuu ki ki Kristu.
10 Iyan dà guntaan ibmeupiya te ǥehinawa ku is kegketueni ku te menge ulaula ni Kristu wey is kebulusi kedì te ǥehem he iyan sikan is gehem he ingkevanhew zin.
Egkesuatan ku he mekeambit a zaan duen te kemeresayan he mid-antus din he iyan is ked-engkezi ku te kediey he egkesuatan iring te kandin he kebelevaǥa te untung din.
11 Umba egkesuatan ku heini su wey mehimu he mevanhew a keuzemà.
12 Kenè ku iyan ibpesavut kayi he netuman en dini te kedì heini is langun wey ke nehimu e en he etew he wazè en duen igkesawey,
kekenà,
ebpenigudu a wey heini metuman su iyan heini tuyù ni Jesu Kristu zutun te kedhimuwa zin kedì he sakup din.
13 Netuenan ku,
menge suled,
he wazè pa heini metuman dini te kedì,
iyan,
mid-awè ku ziyà te isip ku is nengehuna he nengetuman ku en,
ne edhimuwen ku is taman te egkehimu ku wey ku mekuwa is langun he egkesuatan te Megbevayà he mekuwa ku keuzemà.
14 Ebpenigudu e pa wey ku mekuwa is suhul te Megbevayà su iyan heini ketezengan ke maan is mid-umew kiw zin te ked-angken te untung he wazà pidtemanan pinaaǥi te kebpekidsevaha tew ki Jesu Kristu.
15 Ne is langun te sikitew he meǥurang en te kedtuu,
kinahanglan he iring kayi zaan is isip tew wey ǥehinawa tew.
Iyan,
emun kenè kew egkengeuyun ibpetuenan keniyu te Megbevayà is benar.
16 Iyan,
kinahanglan guntaan he edtumanen tew is daan he impenurù kenitew te Megbevayà.
17 Is langun te sikiyu,
menge suled,
purungi niw te ed-iring heini is menge ulaula ku.
Iyan niw zaan iringi haazà is menge etew he iring is menge ulaula zan te kenami he ulaula.
18 Dengan ku zà heini layun egkeǥiya,
iyan,
guntaan ed-umanan ku egkeǥiya zuma is menge luhè ku he ebpeniǥis,
tenged te mezakel he menge etew he egkeǥiyen dan he sakup sikandan ni Kristu,
iyan,
egketuusan pinaaǥi te ulaula zan he kuntada sikandan te kebpesevuta mehitenged te kebpehimatey ni Kristu ziyà te krus.
19 Siguradu egkeimpirnu sikandan su iyan ebayàbayà kandan is menge mezaat he kebayà te lawa zan.
Ibmeupiya te ǥehinawa zan is menge mezaat he ulaula,
iyan,
meupiya pezem ke igkeeled dan;
ne iyan dan dà egkeisip is menge vutang he zini te kelibutan.
20 Ne sikitew mulà,
ne iyan hustu he inged tew is diyà te langit ne utew zekelà is perateng tew te kedlikù te Menluluwas tew he ebpuun diyà te langit he iyan is Nengazen tew he si Jesu Kristu.
21 Ne zutun te andew,
ne edhelinen din en is memeǥuyà he menge lawa tew ne edhimuwen din he iring te mekeǥeǥehem he lawa zin.
Ne kayi te kedhelina zin kenitew,
egemiten din is dekelà he ǥehem din he iyan ingkehimu zin he ebayàbayà te minsan hengkey.