Ibilili ushaɗangi n adan
21
Aku Yesu tuwa̱i u doki u wenikei kaci ka ne a asu u atoni a ne a ikengi i Kushiva̱ ku Galili.a
Tyoku ɗa ukuna vi u gita̱i ɗa na:
2 Atoni a ne ushani alya a pini:
Simo Bituru,
n Toma (uza ɗa a tsu isa̱ Mapeshe),
n Nataniya u Kanan u Galili,
na̱ mmuku n Zabidi,
n atoni a re a roku.
Jesus at the Sea of Galilee (John 21:1-25)
Aku a danai,
“Tsa bana ta̱ dem kaɓolo n avu.”
Aku a lazai a asuvu a kpatsu ku le.
Shegai a ka̱na̱ ko i te wa n kayin ka nala ki.
4 An kain ka wansai n usana u de,
aku Yesu shamgbai a ikengi i kushiva̱,
shegai atoni yi a reve an Yesu ɗa wa.
5 U isa̱ le u danai,
“Ama a va̱,
i ka̱na̱ gba̱m adan?”
A wushuki,
“Aꞌa.”
6 Aku u tonuko le,
“Vuta̱la̱i ibilili i ɗe a kapashi ka ulyaki ka kpatsu ki,
ya ka̱na̱ ta̱.”
Aku a yain nala,
a fuɗa gba̱m a rono ibilili yi wa kpaci adan a ɗa pini ushani.
7 Aku katoni ka Yesu wa ciga vi u tonukoi Bituru,
“Asheku a ɗa!”
An u panai a danai Asheku a ɗa,
aku u ukai matogo ma ne (kpaci wa̱ri u mondo ta̱ ma an wa yan manyan),
aku u raɗugi u rukpa̱i pini a mini mi.
8 Atoni a ɗa a buwai vi a rawai a kpatsu ki,
aku a ka ɓa̱na̱ ibilili yi ushaɗangi n adan.
Aꞌa̱ri mɓa̱ri n kagiɗa wa,
evu n iyadi amangatawun (100) iꞌya.
9 An atoni yi a wuta̱i a kpatsu ki,
a wenei wa̱ ta̱ n ilikulya,
kpam wa zungu adan a akina.
10 Aku Yesu danai,
“Tukoi adan a roku a asuvu a ɗa i ka̱na̱i vi.”
11 Aku Simo Bituru gonoi a kpatsu ki u ronoi ibilili yi ubana a kagiɗa.
Adan a pige amangatawun n amangarenkupa n a tatsu (153) a ɗa aꞌa̱ri pini,
gba̱ n nala ibilili yi i kara wa.
12 Yesu tonuko le,
“Tuwa̱i i lyai ilikulya.”
Ko uza u te a asuvu a atoni yi u kawan u wece yi,
“Aɗa yai?”
wa,
kpaci a reve ta̱ Asheku a ɗa.
13 Aku Yesu banai u bidyai burodi u na̱ka̱ le.
U na̱ka̱ le kpam dem adan yi.
14 Tatsu ɗa la vi an Yesu wenikei kaci ka ne ara le an u ꞌya̱nga̱i a ukpa̱.
Yesu n Bituru
15 An a kotsoi ulya ilikulya,
Yesu wecei Simo Bituru,
“Simo maku ma Yahaya,
va ciga mu kapala n uciga u ɗa atoni a na a ka ciga mu?”
U wushuki,
“Eye,
Asheku,
vu reve ta̱ ma ciga vu.”
Yesu danai,
“Lina̱ka mmuku ma ncon n va̱.”
16 Yesu doki u wecikei u ire,
“Simo maku ma Yahaya,
va ciga mu?”
Bituru wushuki,
“Eye,
Asheku,
vu reve ta̱ ma ciga vu!”
Yesu danai,
“Kirana na̱ ncon n va̱.”
17 U doki u wecikei utatsu,
“Simo maku ma Yahaya,
va ciga mu?”
Aku Bituru namgbai katsuma̱ an Yesu wece yi hal kutatsu u da wa ciga yi.
Aku u tonukoi Yesu,
“Asheku,
vu reve ta̱ ko ndya wa.
Vu reve ta̱ ma ciga vu.”
Yesu tonuko yi,
“Lina̱ka ncon n va̱.
18 Mayun n tonuko vu,
aꞌayin a ɗa va̱ri kalobo,
vu tsu uka ta̱ aminya n kaci ka vunu vu bana a asu u ɗa dem va ciga vu bana.
Shegai vu kutsa baci,
va ba̱ra̱kpa̱ ta̱ akere a vunu uza roku u uka vu,
u rono vu ubana a asu u ɗa bawu va ciga vu bana.”
19 (Yesu dana ta̱ nala tsa̱ra̱ u wenike tyoku ɗa Bituru wa kuwa̱ tsa̱ra̱ u na̱ka̱ Kashila̱ tsupige.)
Aku Yesu tonukoi Bituru,
“Tono mu!”
20 Bituru yira̱la̱kpa̱i aku u wenei katoni ka Yesu wa ciga vi wa tono le,
aya kpam dem uza ɗa u raɓai evu n Yesu an a ka lya ilikulya aku u wecikei,
“Asheku,
ya uza ɗa wa neke vu vi?”
21 An u wene yi,
u wecei Yesu,
“Asheku,
ndya ya tuwa̱ ya gita̱ n eyi?”
22 Yesu wushunku yi,
“N da baci ma a̱sa̱ka̱ yi n uma hal aꞌayin a ɗa ma gono,
ndya i birika vu?
Avu gai tono mu.”
23 Aku alabari a kyawain a asu u atoni a da eyi nala vi wa kuwa̱ wa.
Shegai Yesu dana ɗa u danai eyi na wa kpa̱ɗa̱ ukuwa̱ wa.
Dana ɗa gai u danai,
“N da baci ma a̱sa̱ka̱ yi n uma hal aꞌayin a ɗa ma gono,
ndya i birika vu?”
24 Katoni ka nala ki aya u dansai gba̱ ili i na yi.
U korongi iꞌya,
kpam tsu reve ta̱ ukuna u mayun u ɗa wa dansa.
25 Yesu yansa ta̱ ili i roku ushani.
A da baci a ka korongu gba̱ ili i na yi a itagara̱da,
a uwene u va̱ kabala ka̱ la a likimba ka ka bidya iꞌya wa.