Aza Urishelima a ryabusai Yesu
11
An Yesu n atoni a ne a yain evu n Urishelima,
n Betafaji,
n Batani a asu u Masasa ma Zayitum,
u suki atoni a ne a re.
2 U tonuko le,
“Uwai a une u ɗa wa̱ri a kapala ka ɗe nala vi,
n uꞌuwa u ɗe ya wene ta̱ maku ma makparyagi ma bawu a taɓai uyuwa̱ usiri.
I surukpa ma i tuko.
3 Uza ɗa baci dem u wece ɗa̱ ili iꞌya i zuwai ya tatsukpa ma,
i tonuko yi,
‘Asheku a ɗa a ka ciga ma,
kpam wa gonuko ta̱ ma gogo‑na.’ ”
4 Aku a lazai a ba a cinai maku ma makparyagi mi usiri a uwotsu u kuwa evu n ure.
An a ka surukpa ma,
5 ama ɗa aꞌa̱ri pini kushani a asu vi a wece le,
“Ndya i zuwai ya surukpa ma?”
6 A wushunku le tyoku ɗa Yesu tonuko le,
aku ama yi a a̱sa̱ka̱ le a lazai.
7 An a tuko yi maku ma makparyagi mi,
a polusoi aminya a upala̱ka a le a zuba u ne,
aku u yuwa̱i.
8 Ama ushani a polusoi aminya a upala̱ka a le a ure,
aza roku tani a polusoi avuku a ɗa a sata̱sai a agbaji.
9 Aza a kapala n aza a kucina̱ a rongoi isali n a dansi,
“Hosana,a
cikpalai Kashila̱!
Kashila̱ ka zuwuka uza ɗa u tuwa̱i n kala ka Magono ma Zuba una̱ u shinga! b
10 Kashila̱ ka zuwuka tsugono tsu tata u tsunu Dawuda tsa tsa tuwa̱ na vi una̱ u shinga!
Hosana,
cikpalai Kashila̱!”
11 Aku u uwai a Urishelima u uwai a Kuwa ku Kashila̱.
An u weɓelishei ko ndya wa,
u wenei kaara ka kotsoi,
aku u wuta̱i u banai a Batani kaɓolo n Kupanamere vi.
Yesu yankai maɗanga ma kapopi una̱
12 An kain ka wansai,
a a̱sa̱ka̱i Batani,
Yesu panai kambulu.
13 An u wenei maɗanga ma kapopi ma ma̱ri n avuku a mɓa̱ri,
u ba u weɓelei ko ma matsa.
An u rawai a asu vi,
u wene ili wa she avuku,
kpaci aꞌayin a ilimaci a kapopi a ɗa wa.
14 Aku u tonukoi kapopi ki,
“Uza wa doku wa lya kpam ilimaci i kapopi ara vunu wa.”
Kpam atoni a ne a pana̱ka yi ta̱ u danai nala.
Yesu lokoi aza a tsilaga a Kuwa ku Kashila̱
15 N urawa a Urishelima,
Yesu uwai a Kuwa ku Kashila̱,
aku u gita̱i uloko aza ɗa a ka tsila n a dengi pini.
U mutsukpusa̱i iteburu i aza a usavaɗa̱sa ikebe n ikirika i adengi ntambara.
16 Kpam u a̱sa̱ka̱ uza ɗa u cangai ili i roku u wura pini a ulanga u Kuwa ku Kashila̱ ki wa.
17 Aku u wenishike le u danai,
“A korongu wa,
a da ‘A ka isa̱ kuwa ku va̱ kuwa ku kavasu ka ama a iyamba gba̱ wa.’?
c Shegai eɗa̱ i gonukoi ka kaaɓuru ka aza a maga̱la̱ka̱.”
18 An aɗara̱kpi a pige n awenishiki a Mele a panai,
a gita̱i ubolo ure u ɗa a ka wuna yi,
kpaci a ka pana ta̱ uwonvo u ne an ama gba̱ a yain majiyan n uwenishike u ne.
19 An kuvuli ku yain,
aku a a̱sa̱ka̱i ilyuci yi.
Uwenishike a kaci ka uꞌekpe u kapopi
20 An a ka wura n usana,
aku a wenei maɗanga mi ma ekpei hal n alu.
21 Bituru ciɓai,
aku u tonukoi Yesu,
“Kawenishiki,
weɓele,
maɗanga ma vu yankai una̱ vi ma ekpe ɗe.”
22 U wushunku le,
“Pityanangi n Kashila̱.
23 Mayun n tonuko ɗa̱,
vuma ɗa baci dem u tonukoi masasa ma na,
‘Muɗa̱ ba vu rukpa̱ a kushiva̱,’
kpam bawu u yain mala̱la̱ a katakasuvu ka ne,
shegai u pityanangi ili iꞌya u danai,
a ka yanka yi ta̱ iꞌya.
24 Adama a nala n tonuko ɗa̱,
ili iꞌya baci dem i foloi n kavasu,
wushuki i tsa̱ra̱ iꞌya ɗe,
kpam ya woko ta̱ i ɗe.
25 Aꞌayin a ɗa baci dem i shamgbai uyan kavasu,
iꞌa̱ baci n uza ɗa ya pana upan,
cimbusuka̱ ni.
Tata u ɗe uza ɗa wa̱ri a zuba wa cimbusuka̱ ɗa̱ ta̱ dem unyushi u cingi u ɗe.
26 [Shegai i cimbusuka̱ baci ama wa,
nala dem Tata u ɗe uza ɗa wa̱ri a zuba wa cimbusuka̱ ɗa̱ unyushi u cingi u ɗe wa.]”
Keci a kaci ka ucira u Yesu
27 A doki a gonoi a Urishelima,
tyoku ɗa Yesu wa̱ri nwalu a asuvu a Kuwa ku Kashila̱,
aɗara̱kpi a pige n awenishiki a Mele na̱ nkoshi n pige a tuwa̱i ara ne.
28 A wece yi,
“N ucira u eni u ɗa va yansa ili i naha gba̱?
Kpam ya na̱ka̱ vu ucira u ɗa va yansa iꞌya?”
29 U wushunku le,
“Ma yan ɗa̱ ta̱ dem keci.
I wushunku mu baci,
mpa dem ma tonuko ɗa̱ ta̱ ucira u ɗa ma yansa̱ka ili i na yi.
30 Tonuko numu:
Ucira u ulyuɓugusu u Yahaya a zuba ɗa u wuta̱i ko a asu u ama?”
31 A dansai utyoku u le a danai,
“Tsu dana baci a zuba ɗa u wuta̱i,
wa dana ta̱ ndya i ɓishinka tsu uwushuku n eyi?
32 Kpam tsu dana baci a asu u ama ɗa u wuta̱i,
kakuma̱ ka na ka pana ta̱ upan u tsunu.”
A panai uwonvo u kakuma̱ ki,
kpaci ya dem u bidya ta̱ Yahaya matsumate ma.
33 Aku a wushunki yi a danai,
“Tsu reve wa.”
Aku u tonuko le,
“Mpa dem ma tonuko ɗa̱ ko ucira u eni u ɗa ma yansa̱ka ili i na yi wa.”