Yesu ta̱na̱sa̱i uza u ityoni i cingi
5
Yesu n atoni a ne a rawai a upashi u Kushiva̱ ku Galili u uyamba u Garasa.
2 An Yesu wuta̱i a kpatsu,
vuma u ityoni i cingi u wuta̱i a asu u asaun kotsu u cina yi.
Jesus Casts Out Demons (Mark 5:1-20)
3 Asu u asaun u ɗa u tsu ronguso.
Kpam ko uza wa fuɗa wa sira yi wa,
ko n ikani.
4 Kpaci a so yi ta̱ usira̱sa akere n aꞌene,
shegai u kiɗa̱sai ikani yi u koɗusoi irim iꞌya iꞌa̱ri aꞌene a ne,
kpam ko uza wa̱ n ucira u ɗa wa goso yi wa.
5 Kaara n kayin nte wa genge pini a asu u asaun vi n kaga̱la̱la̱,
aku u rongo isali n u kaara̱si ikyamba i ne n atali.
6 Eyi a mɓa̱ri,
an u wenei Yesu u sumai u ba u kuɗa̱ngi a kapala ka ne.
7-8 Aku Yesu tonuko yi,
“Wuta̱i pini a asu u vuma vi,
ityoni i cingi.”
Vuma vi u salai cika,
“Yesu,
Maku ma Kashila̱ ka pige,
ndya va ciga na̱ mpa?
Tsina n Kashila̱ an va kpa̱ɗa̱ mu uyan mavura.”
9 Pini nala,
Yesu wece yi,
“Ndya kala ka vunu?”
U danai,
“Kala ka va̱ ka Katam,
kpaci tsa̱ ta̱ ushani.”
10 U foloi Yesu cika kotsu u loko le pini a uyamba vi wa.
11 Ushiga u mburusunu u ɗa pini wa lina a kaga̱la̱la̱ ka masasa ma ma̱ri evu n a asu vi.
12 Ityoni i cingi yi i foloi Yesu,
“A̱sa̱ka̱ tsu tsu bana a asu u mburusunu,
kpam vu a̱sa̱ka̱ tsu tsu uwa le.”
13 U wushunku le,
aku a wuta̱i a ba a uwai a asuvu a mburusunu.
Ushiga vi,
evu na̱ mburusunu azu a re (2,000) ɗa.
A wuranai she a kushiva̱ a uwai pini a shumbugi.
14 Aza ɗa a ka lina̱ka mburusunu mi a sumai a ba danai a ilyuci n une.
Aku ama a wuta̱i a wene ili iꞌya i gita̱i.
15 An a tuwa̱i ara Yesu a wenei vuma ɗa wa̱ri n katam ka ityoni i cingi,
ndishi n aminya kpam n ugboji u ne,
aku uwonvo u ka̱na̱ le.
16 Aza ɗa a wenei ukuna vi,
a tonukoi ama ili iꞌya i gita̱i n vuma ɗa wa̱ri n ityoni i cingi na̱ mburusunu mi dem.
17 Aku a foloi Yesu u a̱sa̱ka̱ uyamba vi.
18 An Yesu wa uwa a kpatsu uza ɗa wa̱ri n ityoni i cingi caupa vi u foloi kotsu u toni yi.
19 Yesu a̱sa̱ka̱ yi u toni yi wa,
shegai u tonuko yi,
“Bana a kuwa asu u ama a vunu vu tonuko le tyoku ɗa Asheku a yanka vu,
n tyoku ɗa u pana vu asuvayali.”
20 Vuma vi u kyawunsai gba̱ uyamba u Dikafoli,
n u tonusuko le ili iꞌya Yesu yanka yi.
Aza ɗa a panai vi gba̱ a yan ta̱ majiyan.
Jayiru banai ara Yesu
21 An Yesu doki u pasamgbanai a kushiva̱ ki a kpatsu u gonoi upashi u niɗe,
kakuma̱ ka ama ka ɓolomgbonoi ka kyawan yi eyi pini a asu u kushiva̱ vi.
22 Uza u te a asuvu a azapige a kagata ka Kashila̱ uza u kala Jayiru u tuwa̱i pini.
N u wene Yesu,
u kuɗa̱ngi a kapala ka ne.
23 U folo yi cika u da,
“Maku ma va̱ makere ma pini a una̱ u ukpa̱,
ka̱na̱ asuvu vu tuwa̱ vu sawa yi kotsu u ta̱na̱ u yain uma.”
24 Yesu tono yi,
kakuma̱ ka ama ushani ka tono yi n ka gbaɓaryangusu yi.
Uka u ɗa u sawai Yesu kunya
25 Uka ɗa pini uza ɗa wa pana ikyamba cika a asu u ula̱la̱ u mpasa hal ayen kupa n a re.
26 U pana ta̱ ikyamba cika a kukere ku aza a aguma̱ kpam u wunai gba̱ ili iꞌya wa̱ri n iꞌya.
Ɗa wa yan yi shana,
maɓa̱la̱ mi she kapala ka ma̱ri ulya.
27 An u panai ukuna u Yesu,
u banai a kucina̱ ku ne a asuvu a kakuma̱ ki,
aku u sawa yi kunya.
28 Kpaci u yawunsa ta̱ a katakasuvu ka ne,
“N sawa baci kunya ku ne koshi ma ta̱na̱ ta̱.”
29 Kute‑kute ula̱la̱ u mpasa u ne u shamgbai kpam u panai a asuvu a ikyamba i ne u ta̱na̱i,
ɗa u wunvugai n upana u ikyamba.
30 Aku Yesu lazai u revei an ucira u wuta̱i a asuvu a ikyamba i ne.
U kpatalai a asuvu a kakuma̱ ki,
u danai,
“Ya sawai kunya ku va̱?”
31 Atoni a ne a wushuki,
a danai,
“Vu wenei dem kakuma̱ ka gbaɓaryangu vu,
aku vu dana ya sawa vu?”
32 Shegai Yesu lyai kapala n uweɓelishe ko wa wene uza ɗa u yain nala vi.
33 Uka vi an u revei ili iꞌya i gita̱i n eyi,
u wuta̱i u kuɗa̱ngi a kapala ka ne,
n uwonvo n u jeki ikyamba.
Aku u tonuko yi gba̱ ili iꞌya i gita̱i.
34 U tonuko yi,
“Maku ma va̱,
upityanangu u vunu u ta̱na̱sa̱ vu ɗe.
Wala ili vunu,
kpam upana u ikyamba u nala vi u pecemgbene n avu.”
Yesu ꞌya̱nga̱sa̱i maku ma Jayiru a ukpa̱
35 An Yesu wa̱ri a kadyanshi,
ama roku a wuta̱i a kuwa ku Jayiru,
uzapige u kagata ka Kashila̱.
A danai,
“Maku ma vunu ma kuwa̱ ɗe.
Ugan kpam vu damgbara̱sa kawenishiki ki wa?”
36 Yesu dambula gba̱m n ili iꞌya a ka tono wa,
u tonukoi uzapige vi,
“Pana uwonvo wa,
avu gai pityanangu.”
37 U a̱sa̱ka̱ ko uza u toni yi wa,
she Bituru,
n Yakubu n utoku u ne Yahaya.
38 An a rawai a kuwa ku uzapige ki,
Yesu panai ama aꞌa̱ri kacan,
aꞌa̱ri kushen n isali cika.
39 U uwai a asuvu,
u wece le,
“Ndya i tukoi kacan n isali naha?
Makere mi ma kuwa̱ wa,
alavu a ɗa yi.”
40 Shegai a doso yi idyoshi i magori.
Pini nala,
u wutukpa̱ le gba̱ le,
u bidyai tata na̱ mma makere vi n atoni a ne a ɗa aꞌa̱ri n eyi,
a uwai ubana a asu u ɗa makere mi ma̱ri.
41 U ka̱na̱i kukere ku makere ki u tonuko yi n kaletsu ka ne,
“Talita kumi.”
(“Maku ma makere,
n da vu ꞌya̱nga̱.”)
42 Kute‑kute makere mi ma ꞌya̱nga̱i ma gita̱i nwalu,
kpaci ayen a ne kupa n a re ɗa.
N uwene naha aku a yain majiyan cika.
43 U ɓarana le,
kotsu uza u reve ukuna vi wa,
aku u tonuko le a nei makere mi ilikulya u lyai.