Imigwe ọ̀phúú mẹ alị ọ̀phúú
21
Tọbudu iya bụ;
mu bya ahụma igwe ọ̀phúú bya ahụma alị ọ̀phúú;
kẹle igwe ọphu shi dụ nụ ta adụedu;
ọphu alị ọphu shi dụ nụ adụhedu.
Ọphu eze-ẹnyimu adụedu.
2 Mu bya ahụma mkpụkpu,
dụ nsọ ono,
bụ iya bụ Jierúsalẹmu ọ̀phúú.
Mu hụma iya g'o shi l'imigwe ẹka Chileke nọ alwazeta l'alị.
E memakpọe ya phọ gẹ nwanyị,
abya ala ji;
mbụ nwanyị,
a kwawaru akwa g'ọo-dụ yẹe ji iya aswịru.
3 Mu nụma olu,
a nọ l'aba-eze ono chia g'e chiru mkpu sụ:
“Wakwa ibe Chileke ba-o!
Nta-a bẹ Chileke byaakwaru anọdu swiru nemadzụ eswiru.
Nta-a bụakwaa ẹka nemadzụ bu bẹ bụ ẹka Chileke e-buru;
nemadzụ abụru ndibe iya.
Chileke l'onwiya eswiru phẹ eswiru;
bụru Chileke phẹ.
4 Oo-hushichaa phẹ ẹnya-mini ẹkwa phẹ.
Anwụhu ta adụbaedu;
ọphu atsụ aphụ a-dụhedu;
ọphu aarahẹdu ẹkwa;
ọphu ọ dụedu iphe emebaa nemadzụ ẹhuka;
kẹle iphe ono,
shi dụkota nụ ono bvụwaru.”
5 Tọbudu iya bụ;
onye ono,
nọ l'aba-eze ono sụ:
“Lenu;
nta-a bẹ mu emeakwaa iphemiphe g'ọ bụkotaru iphe ọ̀phúú.”
Ọ sụkwa mu phọ-a:
“Tụko opfu-a dee l'ẹkwo;
noo l'ọ bụkota ọkpobe-opfu bya abụkwarupho opfu,
gbaru g'e gude iya ẹka.”
6 Ọ bya asụ mu:
“E meakwaru iya!
Ọ kwa mbẹdua bụ Alụfa bya abụru Omega;
Onye mbụ mẹ Onye ikpazụ.
Iphe,
bụkpoo onye mini agụ bẹ mu e-kekwa mini shi l'ọgba mini anụje ndzụ kẹ mmanụ.
7 Ọ kwa onye alwụje ọgu ono lwụta l'e-nworu iphemiphe.
Mu abụru Chileke onye ono;
onye ono abụru nwa mu.”
8 Obenu kẹ ndu ono,
atsụ ebvu ẹnya ono;
mẹ ndu ono,
ekwedu nụ ono;
mẹ ndu ono eme ẹjo ahụma ono;
mẹ ndu egbu nemadzụ;
mẹ ndu eme kẹ nwanyị;
mẹ ndu mgbashị;
mẹ ndu anọduje agwa iphe;
mẹ ndu adzụje ụka g'ẹphe ha;
ndu ono bẹ iphe nọ swiru phẹ nụ bụ eze iduma ono,
ọku mẹ nshị-egbe enwu taphutaphu ono,
bụ iya bụ ọnwu nnwụ labọ.
Jierúsalẹmu ọ̀phúú ono
9 Tọbudu iya bụ;
ojozi-imigwe lanụ l'ime ojozi ẹsaa ono,
shi parụ ochi ẹjo iphe-ememe ẹsaa ikpazụ phọ byapfuta mu bya asụ mu:
“Bya gẹ mu je egoshi ngu nwanyị ọ̀phúú ono,
l'abya ala ji ono,
bụ iya bụ nyee Nwatụru Chileke onoya.”
10 Unme Chileke bya ejiẹ mu phọ ẹhu.
Ojozi-imigwe phọ duta mu je enyihu ephekerephe úbvú,
ha l'eli ntụmatu.
O je egoshi mu mkpụkpu ono,
dụ nsọ,
bụ iya bụ Jierúsalẹmu g'o shi l'imigwe ẹka Chileke nọ alwazeta l'alị.
11 Ogbu-nwịinwii kẹ Chileke mee ya ọ nọdu eke kẹ zaa zaa.
Ìphóró iya nọdu eke zaa zaa gẹ kẹ mkpuma,
bụ iya bẹ aswa kakọta;
mbụ ìphóró dụepho gẹ kẹ mkpuma jiásùpà.
Mkpuma ọbu anọduje ama mma;
bya aphụ ngerengere.
12 Mkpụkpu ono bẹ e gude igbulọ kpụ-pheta mgburugburu.
Igbulọ ọbu haẹpho mebyikpọo kẹ phengara.
E bua ya ọnu-abata uzi iri l'ẹbo.
E ye ụnwu-ojozi-imigwe iri l'ẹbo g'ẹphe cheje ọnu-abata iri l'ẹbo ono nche.
L'ọnu-abata ono ẹphe n'iri l'ẹbo bẹ e degbachaaru ẹpha ipfu iri l'ẹbo ono,
dụ lẹ Ízurẹlu l'ẹhu l'ẹhu.
13 E bua ọnu-abata ẹto l'ụzo ọphu gharu iphu l'ụzo ẹnyanwu awawa;
a bya ebua ọnu-ụzo ẹto l'ụzo ẹnyanwu arịba;
bya ebua ọnu-ụzo ẹto l'ụzo isheli;
bya ebua ọnu-ụzo ẹto l'ụzo ndọhali.
14 Ọ bụru mkpuma iri l'ẹbo bẹ e gude tụa ọkpa igbulọ mkpụkpu ono mgburugburu.
Mkpuma ono ẹphe n'iri l'ẹbo bẹ e deshiru ẹpha ndu-ishi-ozi iri l'ẹbo;
mbụ ndu-ishi-ozi Nwatụru ono.
15 Ojozi-imigwe ono,
shi epfu anụ mu nụ ono bẹ gude ogugu mkpọla-ododo,
oo-gude tụ̀á mkpụkpu ono yẹle ọnu-abata iya yẹle igbulọ iya kpọo.
16 Mkpụkpu ono nweru mgburẹku ẹno,
haẹpho ẹnya nhamụnha.
Ọ bya egude ogugu tụ̀á ya.
Iphe,
ọ dụgbaa l'ogologo iya mẹ uswekete iya mẹ eli iya mẹkwapho ọsa iya bụru ụnu manyịru ugbo ẹto lẹ manyịru ụkporo iri l'ise.
17 Ọ bya atụ̀a igbulọ iya;
igbidigbi iya dụ ntụ ọkpa ụkporo labọ lẹ ntụ ọkpa ẹsato lẹ gẹ ndiphe atụje iphe.
Noo g'ojozi-imigwe ono tụru iya.
18 Iphe,
e gude kpụa igbulọ ono bụru mkpuma jiásùpà.
Mkpụkpu l'onwiya bụru mkpọla-ododo bẹ e gude mee ya.
Ọ nọdu aphụ ngerengere g'onyo.
19 Ọkpa igbulọ ono bẹ e gudegbaa mkpuma,
dụ iche iche,
ereshigbaa ire ike bya aphụgbaa ngerengere gude mee ya;
ọ nọdu ama mma.
Mkpuma ono kẹ mbụ bụ jiásùpà;
k'ẹbo bụru sáfàyà;
k'ẹto bụru ágètù;
k'ẹno bụru émèràlụ̀dú;
20 k'ise bụru ónìkùsù;
k'ishii bụru kanélìyànù;
k'ẹsaa bụru kìrísòlàyìtù;
k'ẹsato bụru bérìlù;
kẹ tete bụru tópàzù;
k'iri bụru kìrísòpùràsù;
k'iri lẹ nanụ bụru jiásìntù;
k'iri l'ẹbo bụru ámìtìsùtù.
21 Ọnu-ụzo iri l'ẹbo ono bụru igopoto iri l'ẹbo bẹ e gude mee ya.
Ọnu-ụzo ono ẹphe n'iri l'ẹbo l'ẹhu l'ẹhu bụkotaru igopoto lanụ bẹ e gude mee ya.
Ọma oji ime mkpụkpu bụru mkpọla,
guru egugu bẹ e gude mee ya.
Ọ nọdu aphụ kẹ ngerengere g'onyo.
22 Ọphu ọ dụdu eze-ụlo Chileke,
mu hụmaru l'ime mkpụkpu ono;
kẹle Nnajịuphu bụ Chileke,
bụ iya bụ Ọkalibe-Kakọta-Ike yẹe Nwatụru ono bụwaa eze-ụlo Chileke kẹ mkpụkpu ono.
23 Mkpụkpu ono ta adụedu iphe,
o gude ẹnyanwu eme;
ọphu ọ dụkwapho iphe,
o gude ọnwa eme.
Noo kẹle ogbu-nwịinwii Chileke bẹ echiwa l'ime iya.
Nwatụru Chileke ono bụru ìphóró,
e gude aphụ ụzo.
24 Ọ bụru ìphóró,
shi lẹ mkpụkpu ono bẹ ọhamoha e-gude nọdu ndzụ.
Iphe,
bụkpoo ndu eze,
nọkota lẹ mgboko evukọo ọdu-biribiri phẹ vubata l'ime mkpụkpu ono.
25 Ọnu-abata mkpụkpu ono e-ghekọtajeru ọnu tekenteke;
kẹle ẹnyashi ta abyakpọdaanu adụ l'ẹka ono.
26 Ọhamoha,
dụ l'eliphe bẹ a-tụko ọdu-biribiri,
ẹphe nweru enweru vutakọta bya akụbe lẹ mkpụkpu ono;
ẹphe akwabẹ mkpụkpu ono ùbvù.
27 Ọle ọ tọ dụkwanu iphe,
aasọ nsọ,
byaru abahụ lẹ mkpụkpu ono.
Onye eme ẹjo ememe m'onye adzụ ụka bẹ e te ekwekwa g'ọ bahụ iya.
Ndu a-bahụ iya nụ kpoloko bụepho ndu e deru ẹpha phẹ l'ẹkwo Nwatụru ono,
bụkwanu ẹka e deshiru ẹpha ndu a-nọ ndzụ ojejoje.