Ojozi-imigwe, gudegbaa ẹjo iphe-ememe k'ikpazụ
15
Mu bya ahụma oke iphe-ọhubama,
dụ biribiri ọzo,
eme l'imigwe.
Ọ bụru ojozi-imigwe ẹsaa bẹ gude ẹjo iphe-ememe ẹsaa.
Ọ bụru iya bụ ẹjo iphe-ẹhuka ẹsaa k'ikpazụ,
bụ oke-ẹhu-eghu Chileke a-tụkoshi ụnwu-eliphe.
Teke iphe-ẹhuka ono bvụerupho ẹphe n'ẹsaa;
oke-ẹhu-eghu Chileke abvụ.
2 Mu hụmakwapho iphe,
dụ g'eze-ẹnyimu,
aphụ ngerengere g'e woru onyo yẹe ọku,
enwu enwunwu gwakọbe iya.
Mu hụmakwapho ndu lwụ-kperu ẹjo anụ-ẹgbudu phọ yẹe ntẹkpe,
a kpụru ọ dụ g'ọ dụ phọ.
Ndu ono bụkwapho ndu jịkaru l'ẹphe te ewoduru ùbvù akwabẹ ọ́gú ono,
nọ-chiru ẹnya ẹpha ẹjo anụ ono.
Ẹphe pfụru pfụ-kube eze-ẹnyimu ono,
dụ g'onyo ono.
Ẹphe pagbaarụ eze une,
Chileke nụru phẹ.
3 Ẹphe nọdu agụ ebvu Mósisu ono,
bụ nwozi Chileke;
mbụ ebvu,
bụkwapho ebvu Nwatụru ono sụ:
“Gụbe Chileke;
ọo ngu bụ
Ọkalibe-Kakọta-Ike.
Iphemiphe,
i mekọtaru parụ
ẹka bya adụkwapho
biribiri.
Ọo ngu bụ eze l'ọhamoha.
Ụzo ngu pfụgbaaru
nhamụnha bya
abụgbaaru ọkpobe ụzo.
4 Nnajịuphu;
?bụkpoo onye
bụ onye a-sụ
lẹ ya taa tsụdu ngu ebvu;
ọphu ya taa akwabẹdu
ẹpha ngu ùbvù?
Ọ kwa ngu kpụrumu bụ
onye dụ nsọ.
Ọhamoha a-bya abaarụ
ngu ẹja.
Noo kẹle onyemonye
hụma-dzuwaru
iphemiphe,
iime,
pfụru ọto.”
5 E mechaa;
mu bya elee ẹnya ọzo.
No iya;
mu hụma eze-ụlo Chileke l'imigwe g'a gụharu ime iya agụha.
Mbụ ime ẹka ono,
ụlo ono,
e gude ẹkwa mee bụ Chileke bẹ o shi l'ẹka ono nọ;
mbụ ụlo ẹkwo ono,
nọ-chiru ẹnya ọgbandzu,
shi Chileke l'ẹka ono.
6 Ojozi-imigwe ẹsaa ono,
bụ phẹ gude uzi ẹjo iphe-ememe ẹsaa ono shi l'ime eze-ụlo Chileke ono lụfuta.
Ẹphe yegbaa uwe,
bụ asagụ-mini;
egbu kẹ nwịinwii.
Ẹphe gude akpọ,
e gude mkpọla-ododo mee;
gude kebuta iya l'ọkpoma.
7 No iya;
onye lanụ l'ime iphe ẹno ono,
nọgbaa ndzụ ono gbẹshi bya eworu ochi ẹsaa,
a wụru lẹ mkpọla-ododo;
woru nụgbaa ojozi ẹsaa ono.
Iphe,
jiru ochi ẹsaa ono ejiji bụru oke-ẹhu-eghu Chileke;
mbụ Chileke ono,
nọ ndzụ ojejoje.
8 Ẹnwuru ọku kposhihụepho ji ụlo ono pyịmu;
kẹle eze-ọdu-biribiri Chileke mẹ ike iya bẹ dụ l'ẹka ono.
Ọphu ọ dụdu onye dụru ike bahụ l'ime ụlo ono jasụ teke ẹjo iphe-ememe ẹsaa ono,
ojozi-imigwe ẹsaa gude ono bvụadaru.