Iphe, Jizọsu Goshiru Jiọnu Lẹ
Ọphulenya
1
Ọwa-a bụ ọphulenya Jizọsu Kéreshi,
Chileke nụru iya g'o goshi ndu ejeru iya ozi,
bụ iphe,
adụedu g'ọo-nọ-beru l'oomee.
Tọbudu iya bụ;
Jizọsu Kéreshi bya ezia ojozi-imigwe iya sụ g'o je atụko iphe ono g'ọ ha goshi Jiọnu,
bụ onye-ozi iya.
2 Ọo iphemiphe,
Jiọnu hụmaru bẹ ọ tụkoru g'ọ ha pfukọta-a.
Ọ bụru l'ẹkwo-a l'ẹka-a bẹ Jiọnu tụkoru opfu ono,
Chileke pfuru ono deshikọta.
Iphemiphe ono bụkotaru ọkpobe-opfu,
Jizọsu Kéreshi ono goshikọtaru iya.
3 Ọnu-ọma bẹ a gọru nụ iphe,
bụ onye agụ ẹkwo-a,
e deru opfu,
epfuchiru Chileke-a mẹ ndu nụmaru iya nụ;
ngabẹ iya nchị bya emeje iya ememe;
noo lẹ teke iphemiphe-a l'e-mekọta bẹ zaakwaru ntse.
Jiọnu l'ekele Chịochi ẹsaa
4 Ọo mbẹdua,
bụ Jiọnu bẹ ekele unubẹ Chịochi ẹsaa ono,
dụkota l'alị Eshiya ono ekele.
Mu sụ g'eze-iphe-ọma yẹe ẹhu ọdu guu,
shi Chileke l'ẹka tso unu.
Chileke ono bụ onye nọ ndzụ;
bya abụru onye shihawaa nọduta tẹmanu mgboko dụ;
bya abụru iya bụ onye ono,
abya nụ ono.
G'eze-iphe-ọma,
shi iya l'ẹka;
mẹkwapho ọphu shi l'ẹka Unme ẹsaa Chileke bụru k'unu jeyewarurọya.
Unme ẹsaa,
mu epfuru bụ Unme ẹsaa ono,
l'anọduje l'atatiphu Chileke l'ẹka ọ nọ l'aba-eze iya ono.
5 Eze-iphe-ọma yẹe ẹhu-guu ono shikwaphọ Jizọsu Kéreshi l'ẹka onye l'apfụshije ike l'iphemiphe,
o pfuru anyi;
bya abụru onye mbụ,
Chileke meru o teta nọdu ndzụ.
Ọ bụkwaru iya phọ bụ onye-ishi iphe,
bụkotakpoo ndu bụ eze lẹ mgboko-a.
Ọ bụ onye yekpọoru anyi obu;
k'ọphu ọ nwụhu-chiru anyi anwụhu,
anyi gege anwụhu.
Ọ bụru mee ya b'o gude tọo anyi l'ẹgbu ono,
iphe-ẹji shi kee anyi ono.
6 Ọ bya emee anyi;
anyi bụru eze;
bya abụru uke Chileke;
ndu ejeru Chileke,
bụkwapho Nna iya ozi.
G'ajaja mẹ ike bụkotaru kẹ Jizọsu jasụ lẹ tuutuutuu lẹ mịimiimii.
Nokwa g'ọ dụ.
7 Unu lekwa l'ọ nọakwa anọno l'urwukpu abya.
Onyemonye l'e-gude ẹnya iya hụma iya.
Iphe,
bụ ndu ono,
tụru iya arwa ono bẹ a-hụmakwa iya phọ.
Ọhamoha,
dụ lẹ mgboko-a bẹ l'a-rakọta ẹjo ẹkwa;
ẹka meji a-tọfu phẹ mẹ ọ -byaẹpho.
Noo iphe,
e-me nụ bụ onoya.
Nokwa g'ọ dụ.
8 “Ọ mbẹdua bụ Alụfa bya abụru Omega.
Mu bụ onye mbụ bya abụru onye ikpazụ.”
Nokwa iphe,
Nnajịuphu,
bụ Chipfu eepfu;
mbụ onye ono,
bụ iya bụ Ọkalibe-Kakọta-Ike;
bya abụru onye shihawaa nọduta tẹmanu mgboko dụ;
bya abụru iya bụ onye ono,
l'abya nụ ono.
Ahụma Kéreshi l'ọphulenya
9 Ọo mbẹdua bẹ bụ Jiọnu,
bụkwapho nwanna unu.
Mu bụ onye mu l'unu tụkoru bụru ndu ẹphe lẹ Jizọsu tụgbaru bụru nanụ l'eje ẹjo iphe-ẹhuka-a,
anyi eje-a.
Mu l'unu tụkokwarupho nweru ọta-nshi.
Ọ bụru ẹgube ono bẹ anyi e-mechakwaphọ tụko gbarụ mgba nweru mgboko ọ̀phúú ono,
l'e-shi Chileke l'ẹka ono.
L'o nweru teke a kpụtajeru mu je edobe l'alị,
ẹnyimu sọ-pheru.
Iphe,
eekuje ẹka ono bụ Patụmosu.
Iphe,
e gude kpụru mu laa ẹka ono bụ l'ọle mu asa opfu Chileke asasa;
mẹkwapho lẹ mu anọduje epfuru ndu ọzo l'edzudzu-ọha k'ọkpobe iphe ono,
Jizọsu Kéreshi goshiru mu ono.
10 Tọbudu iya bụ;
o be l'eswe ujiku lanụ,
bụ eswe Nnajịuphu;
Unme Chileke bya ejiẹ mu phọ ẹhu pyịmu.
Mu wata aphụ ọphulenya.
Mu nụma olu-opfu,
kwata adashikpọ ike ike ike ike g'onye egbu opu-ọgu l'ụzo azụ mu.
11 Olu ono sụ:
“Ọ kwa mbẹdua bụ Alụfa bya abụru Omega;
mu bụ onye mbụ bya abụru onye ikpazụ.
Tụkokpoepho iphe,
ịibya ahụma-a dekọta l'ẹkwo;
zikaaru Chịochi ẹsaa-a,
nọ lẹ Eshiya;
mbụ ndu Chịochi,
nọ lẹ Efesọsu;
waa ndu kẹ Sumena;
mẹ ndu kẹ Pegamọmu;
waa ndu kẹ Tayatayira;
waa ndu kẹ Sadisu;
waa ndu kẹ Filadelufiya;
mẹ ndu kẹ Layodeshiya.”
12 Mu bya aghaa ẹnya l'azụ gẹ mu hụmaeshikwa onye ono,
epfu eyeru mu nụ onoya.
Mu ghaa ẹnya ono mu hụma orọku ẹsaa e mekọtaru lẹ mkpọla-ododo.
13 Ọ dụru onye dụepho gẹ Abụbu-Ndiphe,
yekọtaerupho akpawuru uwe,
l'akpa iya l'ọgba-echi pfụru lẹ mgbaka orọku ẹsaa ono.
Uwe ono bẹ e gude akpọ-mkpọla-ododo kebuta iya l'unme.
14 Ẹgbushi,
dụ iya l'ishi nọdu achaẹpho kẹ phuuphuu g'ẹji atụru,
maru acha ụcha;
mbụ kwata acha pemu pemu g'aka-mini-sunoo.
Ẹnya iya dụepho g'ìphóró ọku,
enwu enwunwu.
15 Ọkpa iya labọ chakọta zịriri gẹ mkpụrukpu-ígwè,
ama mma,
a hụru l'ọku jeye ọ chaa achacha;
mbụ hụta iya jasụ o gbuchafụ.
Olu-opfu iya dụepho g'ẹka eze mini aphụ gbudugbudu.
16 Ọ chịru kpokpode ẹsaa l'ẹkutara iya.
Ogu-echi,
atsụ nkọ akpatiphu labọ nọdu alụfutaje iya l'ọnu.
Iphu onye ono nọdu egbuẹpho nwịinwii g'ẹnyanwu keru l'ishi.
17 Mu hụma iya bya adaa ya kpurumu lẹ mgboru ọkpa;
dabyiẹrupho g'onye nwụhuru anwụhu.
Ọ bya ebyibe mu ẹkutara iya bya asụ mu:
“Ndzụ b'agụshi ngu.
Ọo mbẹdua bụ Onye Ivuzọ bya abụru Onye Ikpazụ.
18 Ọo mbẹdua bụ onye ono,
shi nwụhu anwụhu;
ọle mu nọwaa ndzụ ojejoje nta-a.
Nokwa g'ọ dụ.
Ọ kwa mu gude ire-igodo ọku-alị-maa mẹ k'anwụhu.
19 Dee iphemiphe-a,
ị hụmawaru-a l'ẹkwo waa iphe,
dụ nta-a;
mẹkwapho iphe,
e-me l'iphu.
20 Waa iphe,
e domiru edomi dụ lẹ kpokpode ẹsaa-a phọ,
ị hụmaru l'ẹkutara mu phọ;
yẹle orọku mkpọla-ododo ẹsaa phọ.
Kpokpode ẹsaa ono bẹ bụ ụnwu-ojozi-imigwe,
l'anọduje eletagbaa Chịochi ẹsaa ono ẹnya;
orọku ẹsaa ono bụru Chịochi ẹsaa ọbu.”