6 “Abalị keẹpho ẹbo;

a rashịa sụ:

‘Eeghee!

Onye jeru alụ nwanyị ọ̀phúú ọbu alwaakwa-o!

Unu lụfuta bya eje iya ndzuta-o!’

7 Tọbudu iya bụ;

ụnwumgboko ono wulihukọta bya emezichaa orọku phẹ.

8 Ndu ọphu bụ ndu eswe phọ sụ ndu ọphuu,

kwarụ ẹnya phọ:

‘Unu menuru nwamanụ unu tadaru anyi jiko l'ọku anyịhuakwaa l'orọku anyi.’

9 Ndu k'ono,

kwarụ ẹnya ono sụ phẹ:

‘?Teke ọ tọ sụkwanu anyi l'unu-e?

Unu jepfukwa ndu ere manụ-ọku je akpata k'unu.’

10 Ẹphe tụgbua jeshia ya akpata.

Ọ bụru teke ono bẹ onye jeru alụ nwanyị ono byarwutaru;

ndu ọphu jịkobewaru ẹka ejeje phọ tsoru iya;

ẹphe bahụ l'ụlo ẹka eeme ekele-nwanyị ono l'ẹnyashi ono.

Ẹphe wụbaepho l'ụlo;

e woru ụzo guchia.

11 “E mechaa tẹme ụmadzu ise ọphuu bya;

bya asụ:

‘Nnajịuphu!

Nnajịuphu!

Gụhaaru anyi ụzo.’

12 Nwoke ono sụ phẹ:

‘Gẹ mu gbukwaaru iya unu tororo;

mu ta amakwa onye unu bụ.’ ”

13 Ọo ya bụ lẹ-a;

unu chekwa nche;

eshinu unu ta amadụ mbọku,

Abụbu-Ndiphe a-bya;

ọphu unu amadụ teke ọo-bụru.

14 “L'ẹka Chileke bụ eze dụekwapho g'iphe,

meru l'akọ nwoke lanụ,

gbẹshiru eje iphe-ọzo;

bya ekua ndu-ozi iya bya eworu ẹku iya ye phẹ l'ẹka.

15 Onye lanụ bẹ ọ nụru ụkporo ẹkpa-ego ise;

bya anụ onye ọphuu ụkporo ẹkpa-ego labọ;

bya anụ onye k'ẹto ụkporo ẹkpa-ego lanụ.

Onyemonye bẹ ọ nụerupho gẹ nwike nkiya beru.

Ọ nụchaa phẹ iya;

ọ bụru iya eje iphe-ọzo,

ooje.

16 Onye ọphu ọ nụru ụkporo ẹkpa-ego ise phọ tụgbuepho teke ono gude iya jeshia nghọ.

O je egude iya gbaa nghọ rita urwu ụkporo ẹkpa-ego ise ọzo tukobe iya.

17 Nokwaphọ g'onye ọphu a nụru ụkporo ẹkpa-ego labọ phọ meru.

O jeru eritakwaphọ urwu ụkporo ẹkpa-ego labọ ọzo tukobe iya.

18 O be l'onye ọphu natarụ ụkporo ẹkpa lanụ-a;

ọ tụgbua je ebvua alị woru okpoga nnajịuphu iya ono libe.

19 “Tọbudu iya bụ;

a nọkpoepho-oo jasụ:

o be ujiku lanụ;

nnajịuphu ndu ono lwa g'ẹphe l'ẹphe gbazia okpoga ono.

20 Onye ọphu a nụru ụkporo ẹkpa-ego ise phọ byatashia bya egudekwaphọ ụkporo ẹkpa-ego ise ọzo bya asụ:

‘Nnajịuphu;

iphe,

ị nụru mu bụ ụkporo ẹkpa-ego ise.

Wakwa ụkporo ẹkpa-ego ise ọzo,

mu ritaru l'urwu tukobe iya baa.’

21 Nnajịuphu iya sụ iya:

‘I meru ree!

Ị bụ ọkpobe onye-ozi,

e gude ire iya ẹka.

Eshinu e gude ire ngu ẹka lẹ nwiphe,

edzudu kaa bẹ mu e-me g'ị bụru onye-ishi l'iphe,

parụ ẹka.

Ngwa;

bya g'ẹhu tụko tsọo gụ lẹ nnajịuphu ngu ụtso.’

22 Onye ọphuu,

a nụru ụkporo ẹkpa-ego labọ phọ byakwa bya asụ:

‘Nnajịuphu;

iphe,

ị nụru mu bụ ụkporo ẹkpa-ego labọ.

Wakwa ụkporo ẹkpa-ego labọ ọzo,

mu ritaru l'urwu tukobe iya baa.’

23 Nnajịuphu iya ono sụ iya:

‘I meru ree.

Ị bụ ọkpobe onye-ozi,

e gude ire iya ẹka.

Eshinu e gude ire ngu ẹka lẹ nwiphe,

edzudu kaa bẹ mu e-me g'ị bụru onye-ishi l'iphe,

parụ ẹka.

Ngwa;

bya g'ẹhu tụko tsọo gụ lẹ nnajịuphu ngu ụtso.’

24 Onye ọphu a nụru ụkporo ẹkpa-ego lanụ phọ byakwa bya asụ:

‘Nnajịuphu;

mu maru ngu ree;

l'ị bụnukaru ẹjo nemadzụ.

Ịiwotaje iphe l'ẹka ị kụduru iphe;

tẹme ị nọdu ejeje ekpota iphe,

ị ghadụru.

25 Noo g'o gude ndzụ gụhu mu;

mu woru ụkporo ẹkpa-ego ngu je elibe l'alị.

Nggẹkwa iphe ngu.’

26 “Nnajịuphu iya ono sụ iya:

‘Lekwa gụbe iberezi iphe,

arwụhu-a,

ẹjo ọkpoma egbu egbugbu-a.

Ọo ngu phọ maru lẹ mu awọtaje iphe l'ẹka mu akụduru iphe;

tẹme mu nọdu ekpotajẹ iphe,

mu aghaduru.

27 I gege dobekpọoru mu nụ okpoga mu l'ụlo nche okpoga;

g'ọo-bụru mu -lwa mu eje ewota okpoga mu yẹe iphe,

o tukoberu onwiya.

28 Ngwa;

unu nata iya okpoga ono;

woru nụ onye phọ,

nweru ụkporo ẹkpa-ego iri phọ.

29 Kẹle onyemonye,

nweru nụ bẹ aa-nụbakwa g'o nweru k'etsutsu iya.

Obenu l'onye enwedu nụ bẹ aa-gbẹnu natafụlenu nwọphu o nweru.’

30 ‘Ngwa;

unu kpụta mkpọkoro onye-ozi-a kpụfu je eye l'ẹka gbakọtaru tsụkiribaa.

Ẹka ono bẹ nemadzụ a-nọdu kwaa ẹjo ẹkwa;

taa ikireze.’ ”

31 “Obenu lẹ teke Abụbu-Ndiphe a-nọdu egbu nwịinwii abya yẹe iphe,

bụkota ụnwu-ojozi-imigwe l'ophu bẹ ọo-nọdu l'aba-eze iya,

egbu nwịinwii.

32 Teke ono bẹ ndiphe mgburugburu e-dzukọta l'iphu iya.

L'ọobya eworu phẹ họo g'onye eche atụru,

l'ahọshije eghu l'ẹka atụru iya kụru;

dobe phẹ iche iche-a.

33 L'ọobya achịru ndu ọphu bụ atụru dobe onwiya l'ụzo ẹkutara;

chịru ọphu bụ eghu dobe l'ụzo ẹkicha.

34 Noo teke eze ono a-sụ ndu k'ono,

nọ iya l'ụzo ẹkutara ono:

‘Unu bya;

unubẹ ndu Nna mu gọru ọnu-ọma nụ.

Unu bya enweru mgboko ọ̀phúú ono,

Chileke kwakọbehawaruro unu e -shi teke o meru mgboko ono.

35 Kẹle ẹgu gụru mu;

unu nụ mu nri;

mu ria.

Ẹgu mini gụa mu;

unu chebe mu mini;

mu ngụa.

Mu bụru mbyambya;

unu dubata mu ibe unu.

36 Mu gbaru ọto;

unu nmabẹ mu iphe.

Iphe mee mu;

unu gbaaru mu mkpu.

Mu jee mkpọro;

unu bya mu agbaphe.’

37 “Noo teke ndu pfụberekoto a-sụ iya:

‘Nnajịuphu;

 ?bụ teke ole bẹ anyi hụmaru ngu ẹka ẹgu agụ ngu;

anyi nụ ngu nri ọbu?

Ọzoo lẹ mini agụ ngu;

anyi chebe ngu mini;

ị ngụa?

38 Tẹme ?bụkpoo teke ole bẹ anyi hụmaru ngu;

ị bụru mbyambya;

anyi dubata ngu ibe anyi?

Ọzoo l'ị gba ọto;

anyi nmabẹ ngu iphe?

39 ?Bụkpoo teke ole bẹ anyi hụmaru ngu l'ẹka iphe eme ngu;

ọzoo l'ị nọ l'ọka mkpọro;

anyi gbaaru ngu mkpu?’

40 Noo teke eze e-yeru phẹ ọnu sụ phẹ:

‘Gẹ mu gbukwaaru iya unu tororo;

eshinu unu mekpọwaru iya m'obeta ọ bụru onye lanụ,

ẹnya kachaa alwalwa l'ụnwunna mu-a bẹ bụakwaa mbẹdua bẹ unu meru iya.’

41 “Noo teke ọo-bya asụ ndu ọphu nọ iya l'ụzo ẹkicha:

‘Unu lụfu mu l'iphu;

unubẹ ndu Chileke tụru ọnu.

Unu wụba l'ọku ono,

e-nwu gidigidi jadụru ono,

bụ iya bụ ẹka Chileke meru doberu Obutuswe yẹe ụnwu-ojozi iya ono.

42 Kẹle ẹgu gụru mu;

ọphu unu anụduru mu nri.

Ẹgu mini gụa mu;

ọphu unu echebeduru mu mini.

43 Mu bụru mbyambya;

ọphu unu edubataduru mu ibe unu.

Mu gbaru ọto;

ọphu ọ dụdu iphe,

unu nmabẹru mu.

Iphe mee mu;

tẹme mu nọo l'ọka mkpọro;

ọphu unu agbajẹduru mu mkpu.’

44 Noo teke ẹphe e-yekwaphọ ọnu sụ:

‘Nnajịuphu;

 ?bụ teke ole be anyi hụmajekpooru ngu ẹka ẹgu agụ ngu;

ọzoo ẹka ẹgu mini agụ ngu;

ọzoo ẹka ị bụ mbyambya;

ọzoo ẹka ị gba ọto;

ọzoo l'ẹka iphe eme ngu;

ọzoo l'ẹka ị nọ l'ọka mkpọro;

ọphu anyi eyeduru ngu ẹka?’

45 Noo teke ọo-sụ phẹ:

‘Gẹ mu gbukwaaru iya unu tororo;

eshinu unu te emeduru iya g'ọ ka mma l'ọo onye lanụ,

ẹnya kachaa alwalwa l'ime ndu-a bẹ unu te emekwaru mu iya.’

46 Ọo ya bụ;

ẹphe eje anọdu l'ẹka ẹphe a-nọdu eje iphe-ẹhuka mkpụrumkpuru jasụ lẹ tuutuutuu lẹ mịimiimii.

Obenu lẹ ndu ọphu bụ ndu pfụberekoto e-je l'ẹka ẹphe e-nweru ndzụ ojejoje.”