Bayịburu-a bụ Ẹkwo-Opfu Chileke, a gbanweru dee l'opfu Izii. Iphe, e gude marụ iya bụ Bayịburu Izii.

O nweru Akahụ-Ọ̀gbandzu, nweru Ọ̀gbandzu Ọ̀phúú. A gbanweru iya nụ ndu Izii. Iphe, e gude dee ya nụ ndu Izii bụ; g'ẹphe agụje iya shi ẹgube ono maru Opfu Chileke ọkpobe amaru; mbụ g'ẹphe maru iphe, Chileke eepfu eyeru phẹ l'opfu-alị phẹ ẹgube ọ dụ e shi lẹ mbụlembu kpọ.

Ọo Ọ̀gbandzu Ọ̀phúú b'e vuchakpọo ụzo gbanwee wofuta l'opfu Izii l'apha 1980. Ozi k'agbanwee Ọ̀gbandzu Ọ̀phúu ono bẹ bụ apha iri lẹ nanụ b'e gude jekọta iya jasụ ọ bvụ; a wataru ozi ono l'apha 1964 jee ya jasụ l'apha 1980 teke ọ bvụru gedegede.

Ọo ya bụ; a -gbẹ l'apha 1980 ono bẹ ndu Chịochi, bụ ndu Izii nọ l'ẹkameka gude obu phẹ nabata iya g'a gụje iya lẹ Chịochi nọ l'ẹkameka; mẹ g'onyemonye gụje iya; mẹkwapho g'a gụje iya l'iphe, bụkpoo ẹka ndu kẹ Kéreshi dzukọberu.

A nọepho ọdu nwanshịi g'agbanwechaaru Ọ̀gbandzu Ọ̀phúú ono; ndu Ishi-Chịochi nọnu pfuahaa g'e-mee gbanwefua Akahụ Ọ̀gbandzu. Noo ya bụ; ndu Izii waa ndu Ikwo waa ndu Ẹzaa bya anọkobe chịa idzu k'agbanwee Akahụ Ọ̀gbandzu l'opfu-alị phẹ l'ẹhu l'ẹhu.

Noo teke a bya ahọta ndu Kọmitii, a-nọdu l'ishi ozi ono. Ndu a họtaru g'ẹphe tsoru lẹ Kọmitii ono bụ ndu shi lẹ Izii waa ndu Ẹzaa wafụa ndu shi lẹ Ikwo.

Ndu Izii bya awata agbanwe Akahụ Ọ̀gbandzu ono l'apha 1985. O be l'apha 1988, ndu Ẹzaa waa ndu Ikwo watafụa agbanwe nkephẹ.

Ndu Izii waa ndu Ẹzaa waa ndu Ikwo bya atụko nọkobe gbaru mgba eje ozi ono. Ẹphe gude obu lanụ g'unwune jee ya. Ndu nọnu gbanwee nkephẹ l'opfu-alị phẹ.

Bayịburu Izii b'a gbanweru dee ya g'ọ bụru iphe, Hiburu eepfu lẹ Akahụ Ọ̀gbandzu bẹ kẹ ndu Izii eepfu; ọ bụru iphe, Giriku eepfu lẹ Ọ̀gbandzu Ọ̀phúú bẹ kẹ Izii ee-pfukwaphọ. Noo kẹle Akahụ Ọ̀gandzu bụ opfu Hiburu waa Aramayiku b'e gude dee ya lẹ mbụlembukpo. Ọ bụru opfu Giriku b'e gude dee Ọ̀gbandzu Ọ̀phúú.

Nta-a b'a gbanwewaru Akahụ Ọ̀gbandzu yẹle Ọ̀gbandzu Ọ̀phúú dee ya l'opfu-alị, dụ igwerigwe.

Ndu ọphu e dewaru Bayịburu l'opfu-alị phẹ bẹ ta agọfuedu l'iphu Chileke. Iphe, gbaru phẹ l'ememe bụ g'ẹphe nabata opfu Chileke; k'ọphu ẹphe enweru ndzụ ojejoje.

E lerweru ẹnya elerwe lẹ Bayịburu, dụ iche iche, ndu ọphu e deru l'opfu Mbeke gude dee kẹ ndu Izii. Bayịburu Mbeke e lechaaru ẹnya bụlaje: King James Version; waa Revised Standard Version; waa New International Version; waa English Standard Version; waa Good News Bible; waa New Living Translation. E lekwarụpho ẹnya ree lẹ Bayịburu, e deru l'opfu Igbo; bya elekwaphọ ẹnya lẹ Bayịburu, e deru l'opfu Hiburu (Biblia Hebraica Stuttgartensia); waa Ọ̀gbandzu Ọ̀phúú, e deru l'opfu Giriku (Greek New Testament, UBS 4th Revised Edition).

Iphe, kparu iya nụ bụ l'ọo opfu Hiburu b'e vuchaa ụzo gude dee Ẹkwo Akahụ Ọgbandzu tẹme ọ bụkwarupho opfu Giriku b'e vuchaa ụzo gude dee Ẹkwo Ọ̀gbandzu Ọ̀phúú.

A gbanweru Bayịburu Izii ọ dụ nphe agụgu; tẹme odoo ẹnya ree; ọ bụru gẹ Izii epfuje opfu bụ g'e deru iya.

Ozi agbanwe Bayịburu Izii-a ta abụdu ozi onye lanụ jeru tẹme ọphu ọ bụkwapho Chịochi lanụ kpoloko bẹ yetaru ẹka e dee ya.

Ọo kwa ozi, a tụkoru kwẹe ẹka jee; Chịochi nọnu l'alị Izii yetakwaphọ ẹka e jee ozi ọbu.

Ọo iphe ono meru g'o gude a tụko g'aha nata Bayịburu-a l'ọo ya bụ Ẹkwo, Chileke gude eepfu opfu eyeru ndu Izii l'ophu l'opfu-alị phẹ.

Ndu gbanweru iya agbanwee dee ya l'opfu Izii bẹ dụkwa iche; ndu lerweru iphe, a gbanweru ẹnya ree waa iphe, e deru dụkwapho iche. Iphe, e deru lẹ Bayịburu-a b'e shi ishi lanụ lerwee ẹnya l'ẹkameka l'alị Izii; iphe, dụ g'ugbo ẹto, tẹmanu e wofutajẹru iya ọha.

A bya ahọta ndu ọphu byaru bya enyochabaa ya rengurengu g'a hụma l'ọ bụa gẹ Izii epfuje opfu bụ g'e deru iya.

Ọ tọ bụlekwaa ono kpụrumu; ndu ọphu maru opfu Hiburu waa Aramayiku waa Giriku rengurengu bẹ tsokwaphọ gụa iphe, e deru; kweta lẹ g'e deru iya bẹ dụ ree; tẹmanu ẹphe bya eye ẹka l'ẹkwo sụ l'ọ dụ ree g'ewofutaru iya ndu Izii g'ọ bụru Bayịburu phẹ. Ọo ụkporo apha l'apha ẹno b'e gude jekọta ozi, agbanwee Akahụ Ọ̀gbandzu.

A bya l'ẹpha ono, bụ Chipfu, bụ iya bụ ẹpha, e kuru Chileke; iphe, ọ bụ lẹ Hiburu bụ YHWH. Akpụru opfu ẹno ono, bụ YHWH bẹ bụ ẹpha Chileke kuru onwiya l'ẹkwo Awụfu 3:14-15 mẹwaro iphe, bụkpoo ẹka ọzo lẹ Akahụ Ọ̀gbandzu. Ẹpha Chileke ono bẹ dụ nsọ shii ẹgube ono Chileke l'onwiya dụ nsọ; k'ọphu bụ lẹ ndu Jiu te ekujedu ẹpha ono baa.

Ẹpha ono dụtabe nsọ k'ọphu bụ l'ọobujeru ndu Jiu gụ-vu ẹka e deru iya; ẹphe agbango ya kua ya Adonayi. Iphe, Adonayi fụtakwanuru bụru Chipfu.

Ọo ya meru ndu Izii wota ẹpha ono kua Chipfu. Ọ bụru gẹ Bayịburu, o-shi-l'ichee bụ Seputuajintu, e deru l'opfu Giriku kuru iya bụ ono.

Chipfu lẹ Akahụ Ọ̀gbandzu bẹ akpa ẹka ama lẹ Chileke; a bya lẹ Ọ̀gbandzu Ọ̀phúú ọ nọdu ama ẹka lẹ Kéreshi.

O nweru iphe, e deshiru ye lẹ Bayịburu-a k'ọphu ọo-ka edo ndu agụ iya nụ ẹnya: Kẹ mbụ bụ iphe, a haru deshia l'ọkpa-alị mpeji Bayịburu-a. Iphe ono e deshiru ono bụ iphe, e gude kọwa iphe, e deru l'opfu Hiburu; ọzoo ọphu e deru l'opfu Giriku gbachiru ẹnya. Ọo g'ụdu iphe ono edo ẹnya bẹ e gude deshia ya.

Ọzo bụ ọphu e deru l'ụzo mbvụcha Bayịburu-a gude kọwashia opfu shihugbaaru ike. A họtaru opfu shihuru ike l'ime Bayịburu-a kọshia iphe, ọ fụtagbaaru k'ọphu oo-do ẹnya.

Iphe ọzo bụ iphe, e seshigbaaru ye lẹ Bayịburu-a. Ịinodu asawashị iya bẹ ịi-haru savu iphe, e seru esese yegbaa ya. Ọo k'ọphu bụ onye agụ iya nụ hụma ụgbugba iphe, ọ gụtaru ono; l'oo doo ya ẹnya.

Ọzo bụ l'e seshiru mapụ, dụlaje iche iche lẹ mpeji iphu waa lẹ mpeji azụ Bayịburu-a.

“Ọnoma bẹ a gọru nụ iphe, bụ onye agụ ẹkwo-a, e deru opfu, epfuchiru Chileke-a mẹ ndu nụmaru iya nụ; ngabẹ iya nchị bya emeje iya ememe; noo lẹ teke iphemiphe-a l'e-mekọta bẹ zaakwaru ntse.” (Ọphulenya 1:3). G'ajaja bụru kẹ Chileke!Old Testament