22
Ba angelo e hatare nei lia a ramun olona tara nitöatöa.
Nonei e kankanaha na e tara butu here ii u galas u niga na e oloma turu gumgum u göagono tere Sunahan na tara Tunan Sipsip.
2 Nonei e olo silaia i gusuna kalana tara taun a tsimus i Jerusalem.
Na a huol a harerehina a ramun e kaia a man rueina tara nitöatöa ti roron hua mei a maloto na huol a pöata turu töa u hiningal.
Na man kalaren i kato haniga pouts rai a man hun katuun.a
3 E möa nou tu hamal tara taun teka.
U gumgum u göagono tere Sunahan na tara Tunan Sipsip e ka noua tara taun teka,
na u katunun kui i tanen e hatsunone rouen.
4 Nori e tare riou a matanen,
na solonen e ka noua i poleren.
5 E möa lel nou ta bong,
na nori ema ngil lele roi tu lam na ta pitala.
A Tsunono e Sunahan nonei u ualesala i taren.
Ba nori te tsunono riou tara mamana pöata i murimuri.
E Iesu e la nama romana
6 Ba angelo e poeiena i tar,
“U ranga teka e manana na egi hamani.
Na Tsunono e Sunahan te hatakeiena u namnamei turu propet te haleiema a angelo i tanen gomi hatara meraien u katunun kui i tanen aha te sukusukun butuna.”
7 Be Iesu e poeiena,
“Hengo!
Ema lehana noi ba lia te la guma romana.
U buku teka e hatei nena a manka te butu nou,
na katuun te kukutena u raranga i tanen ega sasaala.”
8 Alia e Jon.
Alia nonei tu hengo a manka teka na tu tareien.
Pöata tu hengo hakapeien lia na tu tara hakapeien lia,
ba lia e tuhopö nena i mouna a angelo te haröte ii lia a manka teka tego hatsunono uu lia i tanen.
9 Ba nonei e poeiena i tar,
“Alö goma markato uai teka!
Alia has a katunun kui tere Iesu,
alia na lö na man hahatoulana i tamölö u propet,
na pala hoboto te hengoeier u raranga turu buku teka.
Ara hoboto u katunun kui tere Iesu.
Alö go hatsunoni e Sunahan!”
10 Ba nonei e pei hasena i tar,
“Alö goma hamouse ii u raranga turu buku teka te hatei nena a manka te butuna romana.
Taraha?
A pöata te butu hamana noien e sukusuku nama.
11 Haka ban a katuun a omi ega kato homi noa has,
na katuun te ka mena a markato a korkoriana ega kato hakorkoriana noa has.
Na katuun a niga has ega kato haniga noa has iou,
na katuun a matskö ega kato hamatskö noa has iou.”b
12 “Hengo!
Ema lehana noi balia te la guma.
Alia ena la meguma romana a man hamatana balia temi mar hala hapopo has goua turu katuun hoboto timar kato uamen i puta.c
13 Alia a Hatania na Kapakapa na tu Mam na tu Hamurimurima.
Alia te ka gou tara mamana pöata.”
14 U katuun te galuser u hasobö i taren egi sasaala.d
Nori te tatei tasu ria tara tamana tara taun na e tatei nou ria tara huana u rueina tara nitöatöa.
15 Ielesala tara taun te ka ria u mar katuun teka:
u katuun u omi,e
na u matmatuna,
na u tsiktsikolo na u lulu tson,
na u hihipuli,
na u katuun te hatsunoner u kesa,
na u katuun hoboto te gamogamor na te kukutier u raranga u gamo.
16 Be Iesu e poeiena,
“Alia u haleiema a angelo i tar i tamölö tegana hatei menaien a hun katuun i tar a mamanaka hoboto teka.
Alia e tubuna e Devit,
na lia e hatubuna has gia i tanen.f
Alia a Tounlan te alesala hapanina.”
17 U Namnamei tere Sunahan e poeiena,
“Lama!”g
Na hun katuun tere Iesu te hereri a tahol te katsin hitöluna e poeier,
“Lama!”
h
Na esi te hengoena a ka teka ega pei hasi,
“Lama!”
La muma,
u katuun hoboto te makar. Eresi te ngilin uar emi tatei ueier u ramununa tara nitöatöa te möa ta hihol.
A kapakapana u rangana turu buku
18 Alia e ranga hatagala gia turu katuun hoboto te hengoer u raranga turu buku teka te hatei nena a manka te butuna romana:
te haponena romana ta katuun tu tana tu raranga turu raranga teka,
be Sunahan te halai hase neien romana a man niomi te hatei nena u buku teka.
19 Na te luba nena romana ta katuun tu raranga turu buku teka,
be Sunahan te luba has nena romana a tsi makum i tanen turu rueina tara nitöatöa na tara Taun a Göagono,
te hatei nena u buku teka.
20 E Iesu,
te hatei nena te mana uana a manka teka,
nonei e poeiena,
“U mana koru,
ema manasa noi ba lia te la guma romana!”
U mana.
Lama,
o Iesu a Tsunono!
21 A Tsunono e Iesu e tatei taguhu rena u katuun hoboto i tanen.
U mana.