3 A matsi hahikapien,

alia e ngilin koloto menagi u pas i tamilimiou bate hatei ragi limiou ime temar lu pouts meraira e Sunahan.

Kaba lia e hakats koru negu tego koloto uu lia i tamilimiou bate hatei hatagala ragi limiou tego pile kap hatagala mena milimiou u nihamana i tamilimiou ti hapilepile kap mam burai u katuun tere Kristo.

E Sunahan e hala raira a markato turu nihamana na ema antunan palis menarien.

4 Taraha,

a palair u katuun u omi i mous ma i gusu milimiou.

U mar katuun teka i tus merai turu mar nihahuna te ka noua turu kout tere Sunahan,

ba nori tena tia riou,

ti mar ranga uu propet tere Sunahan.

Nori e roron paliseier u raranga u niga tere Sunahan bate katoerien u rarangana tara markato a omi.

U katuun teka e roron tori tsuga naier a töa puku a Tsunono i tarara,

e Iesu Kristo.

5 Alimiou u atei sil hakapeiam a manka te katoi a Tsunono i manasa,

kaba alia e ngilin hatei lel ragien limiou.

E Sunahan e taguhir u katunur i Israel me luba rena men turu tsiktsiki i Itsip.

Kaba i murinen nonei e kato hamatir u katuun ti hahamanaia i gusuren.

6 Na u angelo tima tuol ia iahana nipepeito te halarien e Sunahan,

ba nori te hipus ba ner a han i taren i Kolö,

e Sunahan e kits kap raien a man tsien,

be haka ranen tara makum a kuhil koru e antunana turu lanin hahuna pan.

7 Alimiou e atei sil hase miou a taun i Sodom na i Gomora na palair u taun has i rehiren.

U katuun ti kaia tara man han teka i kato hohomi koru mei a peisaren ti hiakaka gono pouts u a pal tson na touhaliou has.

Na ka teka e haröto nena ime temar hahuna mera neien romana,

u katuun u omi turu tula te kulupu nitöana.

8 Kaba u katuun u omi teka e markato noahas uaier iesana.

Nori e kato homi pouts haser a peisaren na e tori tsuga has raier u katuun pan.

Nori e ranga homi rer a pal kapanira i Kolö,

taraha nori e kukutier a markato temar sinasoho uaren.

9 Kaba e angelo Maikol,

a tsunono pan turu angelo,

ema mar ranga homi uai teka.

Pöata ti hiararanga sileien u tuenrei tere Mosis,

e Maikol ema ranga homi nai e Satan.

Nonei e ranga meien me poeiena,

“A Tsunono peisa te hapiou na noulö.”

10 Kaba u katuun teka e ranga hohomi ner a mamanaka tema atei silerien.

Nori e kukute laser temar ngil uana u tuenrei i taren,

te kato has uaier u poum na u muki.

Nori e markato las uaier teka,

na markato i taren e kato homi nitöa ranen.

11 Nori e lue riou romana a nihahuna pan.

Taraha,

nori e markato homi uaier te kato uu e Kein i manasa.

Nori e kato homir na e kui hatagala siler a moni,

te kato has uu e Balam.

Nori e hipus naier e Sunahan,

te markato has uu e Kora.

Ba nori te mate has riou romana.

12 U katuun teka e kato homi here rari limiou,

a ka a korkoriana te kato homiena u hasobö.

Pöata te gono hoboto sile mia limiou a kannou bate haröto has nemiou te hiangilngil uami limiou,

nori emi nou gono has mera riou limiou.

Ba nori te hirata pinopinor bate hakats peisa has ner a peisaren.

Nori e here rari u köasi u ruruhana te möa ta langits te söata ba nena a lomolomo.

U köasi teka ema taguhe nei a manka ni puta,

na u katuun has teka e mastein hihatutsur.

Kaba nori e here haseri a ruei tema mala huari tara pöatan hua na tara mamana pöata.

U ruei tema mala hua nei e kaho ba ner,

bate lango nitöana.

Na u katuun has teka ema habuteri ta markato tega taguhir u katuun.

13 A lomolomo e kato haposeiena u tasi bate habutena u puei u korkoriana.

Na e markato has uana iesana turu katuun teka tema antunan hamouseri a markato a korkoriana i taren.

A tapisu e roron tiana turu kuhil i lehana.

Te kato has uaier u tson hihatuts u gamogamo teka.

Nori e la hamatskö uaier romana tara nihahuna tere Sunahan tema tatei kapa nei.

14-15 E Inok a hatohitina^a a katuun tara hun katuun tere Adam.

E Inok e katoi u rangan propet me hatei mam nena u mar katuun u omi teka me poeiena,

“Hengo iam.

A Tsunono e la menama romana a parpara koru a angelo a göagono i tanen tegomi ona merien u katuun hoboto.

Nonei emi kout rena romana u katuun hoboto te sigaler e Sunahan bate haröto nena te omi uaren,

taraha nori e omier e Sunahan bate roron kato homir bate ranga hohomi naren.”

16 U katuun teka e roron ranga homi ner a nikaka i taren bate mamala sasaalari.

Nori e kukutier u ngilngil u omi i taren.

Nori e ranga sesei ner a peisaren na nori e angoso raier u katuun tegi lube meraien ta ka.

17 Kaba a mats hahikapien koru i tar,

alimiou go hakats pouts naiam u raranga turu aposol tere Iesu Kristo a Tsunono i tarara.

18 Nori i hatei mam raiou limiou me poeier,

“Tara kapakapana pöata,

u katuun e sigale riou romana a markato tere Sunahan bate katoe riou a manka man omi te ngilin kato naren.”

19 Nori u mar katuun teka te habuter a niomi i gusumilimiou,

bu katuun te hia raharahar.

Nori a pal katunura i puta,

na ema ka meri u Namnamei tere Sunahan.

20 Kaba limiou,

a matsi hahikapien i tar,

e möa koru tego markato uaiam limiou te kato uaier u katuun teka.

Alimiou go kato hatagala nitöa naiam u nihamana i tamilimiou bate hamana hanige miou u hihatuts tere Sunahan te kato hamatskö ranoura.

Alimiou go singo nitöa uaiam tere Sunahan,

bate singo memiou a nitagala turu Namnamei u Göagono.

21 Alimiou go mar kaka haniga uaiam te haniga uana e Sunahan,

ba nonei te haröto noahas ranoui limiou u ngilngil i tanen.

Ba limiou te hamana sil hase miou a pöata te taatagi koru ranouara e Iesu Kristo a Tsunono i tarara bate hala ranoira a nitöatöa te ka nitöana.

22 Alimiou go taatagi sil raiam u katuun te hula hakatsir.

23 Ba limiou te luba has ramiou a palai te ka ria tara maroro tara nihahuna tere Sunahan,

bate markato mera mien temar lu menari a tsi ruei te lu hatalis ba nari u tula.

Na limiou go taatagi sil raiam a palai bate omie miou a markato a omi i taren.

Alimiou go matout haseiam u hasobö u korkoriana i taren.

24 Alimiou go soloseiam e Sunahan,

taraha nonei a Tsunono Pan te antunan luba ranei limiou a man markato a man omi bate haka ranoua limiou i rehinen.

Ba limiou te möa lel mou ta ka ta omi i tamilimiou,

bate töan sasaala nitöa mou.

25 Soloseiam e Sunahan a töa puku.

Nonei te lu pouts meraira i tanen,

taraha e Iesu Kristo a Tsunono i tarara e mate sil raioura.

U katuun egi atei sil e Sunahan a Tsunono Pan,

na Nitsunono i tanen e pan saluhena tara mamanaka,

tara tantania,

na i romana,

na tara mamana pöata i murimuri.

U mana.