A tohit a angelo
15
Ba lia e taregu u tana u hiharöto pan i Kolö:a
nonei a tohit a angelo ti ka mei a nitagala tegi hala menaien a tohit a niomi i puta,
a kapakapa tara man niomi.
Taraha,
nori e hakape riou a raharaha tere Sunahan.
2 Ba lia e taregu a ka te tara here ii u tasi,
ne here hase ii u galas ti sohale ii u tula.
Na lia u tara hasi u katuun ti tagala saluheia tara ka a omi a töatöa na turu kesa i tanen na turu hihase tara solonen.b
Nori i tuol ia i rehina u tasi te here ii u galas bate pile ner a man hapc te hala raien e Sunahan.
3 Nori i kömei u hets tere Mosis a katunun kui tere Sunahan na u hets tara Tunan Sipsip,d
bate mar hets uaier teka:
“O Tsunono,
o Sunahan,
alö te tagala saluhem!
A man toukui i tamölö e pan koruna na e niga soköna.
Alö a Tsunono Pan turu han hoboto.
A man markato i tamölö e matsköna na e mana hasina.
4 O Tsunono,
u katuun hoboto e matoute rioulö
bate soloseie riou lö.
Alö a töa te göagonom na te niga nitöam.
U han hoboto emi
hatsunono roua i tamölö,
taraha a markato a matskö i tamölö i haröto hakapein.”
5 I murina a ka teka alia u tari a Luman Lotu Pan i Kolö na makum a göagono i tanen e kalata.
6 Ba tohit a angelona tara tohit a niomi e lakasa rima tara Luman Lotu Pan.
U hasobö i taren e hiaka na e gogoso nitöa.
Na man sasaaherö a man goul e hahisi a man lumlumaren.
7 Ba töa tara tohats a ka a töatöae e hala ranei a tohit a angelo a tohit a kap ti kuiei a goul.
A man kap teka i saputi a raharaha tere Sunahan,
nonei te töatöa nitöana.
8 Bu ualesala na nitagala tere Sunahan e habutena u ruhu me saputena a Luman Lotu Pan.
E möa ta katuun ga antunan tasu romanaia tara Luman Lotu Pan e antunana te kapa noa a tohit a niomi tara tohit a angelo.