A angelo na pits pepa a tetenei
10
Ba lia e taregu a tana angelo a tagala e koulma i Kolö.
U köasi e kopo kap naien na bötou e hahisi a bakunen.
Na matanen e here ii a pitala,
na mounen e here ii u tula.
2 Nonei e ka mei a pits pepa a tetenei te tapalataia i limanen.
Nonei e hatöeia a pal matou i tasi na pal keruka turu tsiktsiki.
3 Ba nonei e ku hapan herenei a laion.
Na pöata te ku ien,
ba u tohit u gururu e soule ren.
4 Pöata ti soul hakapa ia u tohit u gururu,
ba lia e katsin koloto nagien turu pepa.
Kaba u töa u rarangana i Kolö e pei i tar,
“Hamousi u raranga turu tohit u gururu,
möa tu koloteien.”
5-6 Ba angelo te tuol ia turu tasi na turu tsiktsiki e hasoasei menanei a pal matou tanen i Kolö me hamana uana tara solona e Sunahan nonei te töatöa nitöana,
nonei te habuti u kolö na u tsiktsiki na u tasi na mamanaka iaharen.
Ba angelo e ranga hamana uana iasa me poeiena,
“E möa lel nou tegi hahaloso uu!
7 Kaba tara pöata te pihe noa a hatohitina a angelo a tuhil i tanen,
be Sunahan te habutu hamane nou a ka te mous,
a ka te hatei mam raien u katunun kui i tanen u propet tega katoeien.”
8 Ba u raranga te lama i Kolö ti hengo mami lia e ranga lenina me poeiena,
“Alö gona lu a pits pepa te tapalatana i limana a angelo te tuolna i tasi na turu tsiktsiki.”
9 Ba lia e la uagu tara angelo me rangate gien tega hala menaien lia a pits pepa a tetenei.
Ba nonei e poeiena i tar,
“Lui,
balö te noue men.
Nonei e suit here noi a möröana i rungu mölö,
kaba e kato hakahöe nou a torimölö.”
10 Ba lia e lue guma a pits pepa a tetenei i limanen me noue gen.
Nonei e suit here ii a möröana i rungur,
kaba pöata tu tongoleien lia ba nonei e kato hakahöena a torir.
11 Ba nonei e poeiena i tar,
“Alö gona ranga hatei lenin a manka te butu noua tara man hun katuun a man parpara tara man han,
na turu mamana u mar ranga u parpara na turu tsunono.”