Aragi kato hasasaali e Sunahan
13
Ngil raiam a man hahatoulana i tamilimiou te hamana uami limiou tere Kristo.
2 Na limiou go ngö has merami u katunura i lehana i luma i tamilimiou.
A palair u katuun i markato uu teka turu angelo,
kaba nori ima atei sil raien.
3 Ma solopala rami u katuun te ka ria tara karabus.a
Hakats here rami alimiou e ka gono mera men tara karabus.
Hakats sil has raiam u katuun te kato hakamits raier,
kato here has rami u katuun e kato hakamits has rariou limiou.
4 Alimiou hoboto ego hagöagoneiam a markatona tara hitöl bate hiahamhamana namiou a peisa milimiou.
A tson na tahol egima sake lel lanai ta taina ta tahol tsi ta taina ta tson gi soho gono meien.
Taraha e Sunahan e hahunei nou a tson na tahol temar kato uaier teka.
5 E möa tu ngil korueiam a moni,
ba limiou te sasaala memiou a manka te ka memi limiou.
Taraha,
e Sunahan e pei,
“Alia ema antunan laba ragi limiou
tsi ema antunan solopala ragi limiou.”
6 Ba ra te tatei ongolora bate poeiera,
“A Tsunono e taguhe noulia.
Alia ema antunan matoutegi ta ka
tegi kateia u katuun tuun i tar.”
7 Hakats sil raiam u tsunono i tamilimiou,
nori ti hatei mam railimiou u raranga tere Sunahan.
Hakats kap naiam a manka man niga te butuma tara markato a niga i taren,
ba limiou te hamana mia tere Sunahan timar hamana has uaien.
8 E Iesu Kristo,
nonei puku noahasina i manasa,
na i romana na tara mamana pöata.
Nonei ema tatei palis nei.
9 U hihatuts tema atei sileri te las ba ranoui limiou a maroro tere Sunahan egima kukute ii.
A torimilimiou ema antunan lu nanei ta nitagala tara mamana mar lo na tara kannou.
A man lo teka ema taguhu ranei u katuun te kukutie ren.
E möa.
A tori milimiou ega tagala mei a nihitaguhu tere Sunahan.
10 Ara u kristen e ka mera a makumun haats,
nonei a kuruse tere Kristo.
U Jiu te lotu ria tara markatona i manasa ema tatei lotu ria tara makumun haats i tarara teka.
11 Tara Lo turu Jiu,
pöata te luena a tsunono pan turu pris u rahatsing tara bulmakau a tson na meme bate la mena neien iahana Makum a Göagono Koru tego luba menaien a man markato a man omi,
a tuenrei ren e haats hakapa raria tara makumun haats ielesala tara han.
12 Na e Iesu e mate hasia ielesala tara taun tega hamatskö meraien ra tere Sunahan turu rahatsing peisa i tanen.
13 Aragi laban a han te ka rara bate la uara tere Iesu ielesala,
bara tena söata haseiera a nimatsingolo timar hamatsingolo has menai u katuun e Iesu.
14 Taraha,
ara ema ka meri ta han i puta teka tega ka nitöa romana.
E möa.
Ara e hahalosera a han tena la nama romana,
teka nitöa nou.
15 Ba tere Kristo aragi haats nitöa uu tere Sunahan te solosei mena reira e Sunahan te ranga uarara i tanen.b
16 Alimiou goma solopalemi tego kato haniga mera milimiou a palair u katuun bate hiatagtaguhu miou.
A markato teka e ngil korue nen na e kato hasasaalena e Sunahan.
17 Hengo haniga raiam u tsunono i tamilimiou,
bate kukute miou u raranga i taren.
Taraha,
nori e tara kapin toa rariou limiou.
Te hengo ramouen limiou,
ba nori te sasaala meriou a toukui i taren.
Kaba te möa nouen,
ba toriren te tiama nou,
ba ka teka tema taguhu ranoui limiou.
18 Singo be ramu moulam tere Sunahan.
Taraha,
alam e hasagohem a torimulam e gogosona i matana e Sunahan,
na lam e ngilin kato hanigantöa nem a mamanaka.
19 Alia e rangata hatagala silegu tego singo sil mena limiou alia be Sunahan te hala boroboro pouts mena meilia i tamilimiou.
U singo
20-21 E Sunahan,
te hala ranei ra a masalohana,
e tatei hala ranei limiou a mamanaka a niga,
antunana tego kato mena milimiou u ngil i tanen.
Nonei te hatakei poutsi a Tsunono i tarara e Iesu,
nonei a katuun te taratara kap rena u katuun i tanen bate here nei a katuun te taratara kap rena u sipsip i tanen.
Nonei e hatakei poutseien tara tou mate me haröto nena u rahatsing i tanen te kato hatagalena u rangan hiahanhaniga te kits gono meien e Sunahan na u katuun.
Nonei u raranga te ka nitöana.
Nonei e tatei taguhu ranou limiou ba limiou te katoemiou a manka te niga balana i matanen,
te hamana uamia limiou tere Iesu Kristo.
Aragi solosei e Kristo tara mamana pöata i murimuri.
U mana.
U kapakapana u ranga
22 A matsi hahatoulana,
hengo hanigeiam u raranga te koloto negulia teka batema sökanami,
taraha u pas teka u makmakum.
23 Alia e hatei ragi limiou e toularara e Timoti i halakasa hakapeia tara karabus.
Te la hasesei namen romana,
ba nonei te la gono menou lia tegona tara merai lia limiou.
24 Hala menami u hanhaniga i tamulam tara pal kapan hoboto i tamilimiou na turu katuun hoboto tere Sunahan.
A matsi hatoulana hasiri Itali e hala has rari limiou u hanhaniga i taren.
25 A nihitaguhu tere Sunahan e tatei kagono meranou limiou hobotontöa.
U mana.
Nonei talasi.