3 Turu nihamana i tarara bara te atei silera e Sunahan e habuteia a mamanaka turu ranga i tanen.

Na sahaka te tare rara,

e butuma tara ka tima tarei ra.

4 Turu nihamana tere Ebol,

be Sunahan e hanigeiena u haats i tanen batema hanigenei u haats tere Kein.

E Sunahan e haniga korui e Ebol me ngöe neien a katuun a matskö,

na turu nihamana i tanen be Sunahan e luena manka te hala naien.

E Ebol e mate,

kaba turu nihamana i tanen nonei e ranga noahasina.

5 Turu nihamana tere Inok be Sunahan e lu sei ba naneien a tou mate i tanen.

U katuun ima antunan sabe naien,

taraha e Sunahan e lu sei hakapeien.

Na u Buku u Göagono e poeiena e Inok e kato hasasaali e Sunahan i mam be Sunahan e lu seienen.

6 Te möa rara tu nihamana tere Sunahan,

nonei ema antunan sasaala mera neira.

Taraha,

esi te ngilin la uanama tere Sunahan ega hamani e Sunahan e kana,

bate hala nena a manka man niga turu katuun te sakie ren.

7 Te hamana menai e Noa e Sunahan te ranga menaien a pöata a omi tega lama tema tara noei e Noa,

e Noa e hengöe e Sunahan me kuiena a tolaala,

te niga sila gono meraien a galapien i tanen.

Ba nonei e haröto nena te hahuna merai e Sunahan u katuun i puta ti hahamana uaien,

be Sunahan e ngöe neien a katuun a matskö te hamana uaien.

8 Te hamana menai e Abraham e Sunahan me hengoena te ngö menaien tega la uaien tara han tena hala nanouen,

temar ranga uu e Sunahan.

Be Abraham e laba nena han i tanen,

kaba nonei ema atei sile ii ime tega la uaien.

9 Turu nihamana i tanen tere Sunahan ba nonei ena kana tara tana han te ranga meien e Sunahan.

Nonei e kaia tara luma labalaba me ka here nei a katununa tara tana han te keien a tsitabubun pöata tuun.

Na pien i tanen e Aisak na u hatutubunei i tanen e Jekop,

nori i lu gono has meien u töa u raranga hamana tere Sunahan.

10 Taraha,

e Abraham e hahalosi a han te gum hatagala koru te kui e Sunahan.

11 Turu nihamana noahas tere Sara tere Sunahan,

be Sunahan e hale neien a nitagala tega pika uaien,

noahasina te toböana koru uaien.

Kaba e Sara e hamana noahasi e Sunahan ega kato beien a ka te ranga mam noa naien.

12 Ba tara töa tson puku teka,

a tson a tsonpan koru bate katsin matena,

nonei a tson teka te kamei u hatutubunei u parpara koru te herei a man pitopitora i kolö na u kotolana tema antunan ase sabe nari.

13 U katuun hoboto teka i mate hakapa,

kaba nori i hamana noahasi e Sunahan.

Nori ima lue ii a manka te ranga meraien e Sunahan,

kaba nori i taran lehana tuun naien me hanige ren.

Ba nori e hatei ner nori u katunun hulala tuun i puta tara tsitabubun pöata.

14 U katuun temar ranga uaier teka e haröto ner nori e sakier ta han tegi tue hamatsköeien.

15 Nori sanena ti hakats poutsin a han ti laba namen,

ba nori te tatei sake poutser ta maroro tegi mar kopis pouts uaien.

16 Kaba e möa.

A han ti ngil bala korueien te niga bala,

nonei a han i Kolö.

Na e Sunahan ema matsingolo mei tegi ngö menaien a Sunahan i taren,

taraha nonei e kato beraien a han.

17-18 E Sunahan e ranga hamanaia tere Abraham i manasa me poeiena,

“Alö e ka sila memia romana u hatutubunei u parpara koru tara pien i tamölö e Aisak.”

E Abraham e hamani e Sunahan,

ba pöata te torohane ien e Sunahan be Abraham e katoenei a pien i tanen e Aisak a kaan haats tara makumun haats.

E Abraham e hengo noahasi e Sunahan me hakena a töa koru a pien tson i tanen tara makumun haats.

19 Taraha,

e Abraham e atei sil e Sunahan e antunan hatakei poutsin e Aisak tega mate uaien.

Bate here talei e Abraham e lu poutseia a pien tson i tanen tara tou mate.

20 E Aisak e hamana uu tere Sunahan,

me kalala rena galapien i tanen me ranga hamana nena a manka man niga tegi lui romana ere Jekop mere Iso.

21 Na turu nihamana noahas be Jekop e kalala rena man tötöa man pien tere Josep tara pöata te susukun mateien.

Nonei e ranga hamanein a manka man niga tegi lui a galapien tson tere Josep.

Nonei e tötöroköia i bakuna u tukana i tanen me hatsunono uana tere Sunahan.

22 Turu nihamana noahas tere Josep,

ba tara pöata te katsin mateien,

ba nonei e hatei rena u katunura i Israel egi laban romana a han i Itsip,

me ranga merena u katuun i tanen ime tegina mar kaho menaien romana tego mate uaien.

23 Turu nihamana noahas be tamana e Mosis na e tsinana e Mosis e hamouse ren tara topisa tsihou i murina ti poseien.

Nori i tarei nonei a pien a niga koru,

ba nori ema matouteri tegi hipus menaien u raranga pan tara king te pei menaien,

“A man galapien tson a man göama tara tei Israel egi kato hamatir.”

24 Turu nihamana noahas tere Mosis,

ba pöata te pan hakapaien,

ba nonei e rama nena tegi ngö menaien a pien tson tara pien tahol tere Pero a King.

25 E Mosis ema ngile ii a nisasaalana tara markato a omi ba nonei e ka gono meranen a tsitabubun pöata puku.

E möa.

Nonei e ngilin ka gono mer u katuun tere Sunahan,

bate lu gono meraneien u nikamits.

26 Nonei e mar hakats uu teka,

e niga bala nena tegi hamana uu tara katuun tena la nama romana nonei e Mesaia,

e noahasina ti ranga homi uu katuun i tanen.

Kaba markato teka e niga balein a manka man niga hobotona i Itsip.

Taraha,

nonei e hahalosi u hamatana u niga tega haleien e Sunahan.

27 Turu nihamana noahas tere Mosis ba nonei laba nena i Itsip.

Nonei ema matoute ii te raharaha uu a king.

A katuun ema antunan tare nei e Sunahan,

kaba e Mosis e herei e tareien bate tagala silena a ka te ngilin katoeien.

28 Na u nihamana noahas tere Mosis te kato meien u Paska tutuun turu Jiu ba nonei e katoena u raranga tegi ngats hamate merai u sipsip bate tsibil naria u rahatsingina sipsip tara man tamana,

ba Angelona tara Tou Mate tema tatei atung hamate ranei a man galapien tson a man hamua turu katunura i Israel.

29 Na turu nihamana noahas turu katunura i Israel,

me aroho sila ria i gusuna a Tasi a Rörö me tataala ria turu tsiktsiki te kato harakaraki e Sunahan,

me la sokör i hapala.

Ba u katunur i Itsip e katsin kukute rarimen ba nori e ruku hakapar.

30-31 E Rehap a töa tahol a lulu tson e kaia i Jeriko.

Kaba turu nihamana i tanen tere Sunahan ba nonei e nigana.

Na pöata ti lama a man tsonun taratara kopkop turu soldia ri Israel,

ba nonei e taguhu ranen.

Turu nihamana turu katunura i Israel tere Sunahan memi la hahis hoboter a taun i Jeriko turu tohit u lan,

ba ololo tara taun e talupuna me rusuna.

Na nori i kato hamatir u katuun tima ngilin kukute ii e Sunahan,

kaba nori ima kato hamate ii e Rehap.

32 Na lia e antunan mar hala noahas menagi u raranga i tar teka,

kaba e möa ta pöata i tar tego hatei merai lia ere Gidion mere Barak ne Samson ne Jepta,

na e Devit mere Samuel na u propet.

33 Nori i hamanaia tere Sunahan me tagala saluhe ria tara man makumun han tara man king a man parpara.

Nori i kato hatagala korui a man markato a man matskö me lueier a ka te ranga hamanein e Sunahan.

Na palai ti kaia tara man makum ti ka hasia u laion,

u laion ima kato homi raien.

34 Na palai ti lapo raia turu tula u ats koru ima omi has ii.

Na pala ti hamanaia tere Sunahan ima ngats hamate has rai.

Nori ima tagala ii,

kaba nori ina tagala koru tsiponi.

Nori i tagala koruia tara hiatatung,

na i tagala saluher a man amir tara man palair u han.

35 A touhaliou ti hamanaia tere Sunahan i lu poutsir u katuun i taren te hatakei pouts raia e Sunahan tara tou mate.

Na palair u katuun i kato hakamits koruri me hasoso noa lasir,

taraha i murina a tou mate i taren ba nori tena takei sile riou a nitöatöa a niga koru.

36 Ba palair u katuun i golgol silir me lahus raier,

ba palai e kits rari a tsien me haka raria tara karabus.

37 A palai i ti hamate tuun rai a hatu,

na palai i so kots tunir,

na palai i ngats hamate rai u lahoton hiatatung.

Na palai i hapous tuun rai a pikpiköna a sipsip na meme.

Nori i möa koru ta ka,

na u katuun i kato hohomi koru raien.

38 Nori i hula laia tara makum a palaka na tara pokus,

na nori i sösohoia tara man kiou.

U katuun u omi tara han i puta ima antuna ii turu katuun u niga ti kaia i gusuren.

39 U katuun u niga hoboto teka i hamanaia tere Sunahan na e Sunahan e haniga koru raien.

Kaba nori ima lu noei a ka te ranga hamana meraien e Sunahan tegi hala raien.

40 Taraha,

e Sunahan e atei sil mami a ka te niga bala tega butuia tara pöata i tarara,

na nonei e ngil tegi lu hoboto gono meraien ra a ka a niga teka.